ၸုမ်းပလိၵ်ႈ လႄႈ သိုၵ်းမၢၼ်ႈ ၸိူဝ်းပႂ်ႉဢဝ်ႁူမ်ႇလူမ်ႈ ၸွမ်းၶူဝ် ၸွမ်းသဵၼ်ႈတၢင်း ၼႂ်းမိူင်းတႆးပွတ်းၸၢၼ်း ပွတ်းဢွၵ်ႇၼၼ်ႉ ႁေႉရူတ်ႉၵႃးတၢင်ႇၶူဝ်းၵုၼ်ႇ ရူတ်ႉၵႃးတၢင်ႇ ၵူၼ်း ဢွၵ်ႇၶၢဝ်းတၢင်းသေ ၵူတ်ႇထတ်း ထဵတ်ႈထၢမ် ယွၼ်းတူၺ်းပႃးလိၵ်ႈၵမ်ႉတၢင်းႁူင်းပလိၵ်ႈ တီႈၵူၼ်းၸိူဝ်းဢွၵ်ႇၶၢဝ်းတၢင်းၼၼ်ႉႁၢဝ်ႈႁႅင်းယူႇ ဝႃႈၼႆ။
မိူဝ်ႈႁူဝ်လိူၼ်မေႊၼႆႉ ၸုမ်းသိုၵ်းမၢၼ်ႈ ၸိူဝ်းပႂ်ႉ ႁူမ်ႇလူမ်ႈၶူဝ်လူင်ၶၢမ်ႈၼမ်ႉၶူင်း တီႈတႃႈၵေႃႈ ၵႄႈၵၢင် ဝဵင်းၵႃလိ လႄႈ ဝဵင်းမိူင်းပဵင်းၼၼ်ႉ ႁေႉႁၢမ်ႈၼၢင်းယိင်းၸိူဝ်းယိပ်းမၢႆၾၢင် တၢင်းမိူင်းမၢၼ်ႈထုင်ႉပဵင်း မိူၼ်ၼင်ႇမၢႆ (5/… 8/…. 7/…. 12/…….) သေ ဢမ်ႇပၼ်လတ်းၶၢမ်ႈၶူဝ်လူင်တႃႈၵေႃႈ ။
ၼၢင်းယိင်းၵေႃႉၺႃးၵူတ်ႇထတ်းတီႈ ၶူဝ်လူင်တႃႈၵေႃႈၼၼ်ႉ လၢတ်ႈၼႄတီႈၽူႈတွႆႇႁွၵ်ႈဝႃႈ “ႁဝ်းၶႃႈဢဝ်မႃးပႃး လိၵ်ႈႁပ်ႉႁွင်း တီႈၽူႈမီးပုၼ်ႈၽွၼ်း ၼႂ်းပွၵ်ႉ တီႈႁဝ်းယူႇၼၼ်ႉမႃးတဵမ်ထူၼ်ႈယူႇ။ ၵူၺ်းၵႃႈ သိုၵ်းၸိူဝ်းၼၼ်ႉဢမ်ႇပၼ်ႁဝ်းလတ်းၶၢမ်ႈၵဵတ်ႉၵႂႃႇငၢႆႈငၢႆႈ။ ၼိုင်ႈၵေႃႉ လႆႈပၼ်ငိုၼ်း 1 သႅၼ်ပျႃးယဝ်ႉၸင်ႇပွႆႇႁဝ်းၵႂႃႇ။ မၢင်ၸိူဝ်းၼႆႉ ပၼ်ငိုၼ်း ယဝ်ႉ ၵေႃႈ ဢမ်ႇလႆႈၶၢမ်ႈၶူဝ် ၵေႃႈမီး” ဝႃႈၼႆ။
လိူဝ်ၼၼ်ႉ ၸုမ်းသိုၵ်းမၢၼ်ႈ ၸိူဝ်းတင်ႈၵဵတ်ႉလၢၼ်ႇ ပႂ်ႉၼိူဝ်သဵၼ်ႈတၢင်းလူင် တႃႈၵုင်ႈ-ဝဵင်းတူၼ်ႈတီးၵေႃႈ ပႂ်ႉၵူတ်ႇထတ်း ၵူၼ်းဢွၵ်ႇၶၢဝ်းတၢင်းႁၢဝ်ႈႁႅင်းယူႇမိူၼ်ၵၼ်ၼႆ ၼၢင်းယိင်းၵေႃႉၺႃးၵူတ်ႇထတ်း ၽွင်းဢွၵ်ႇၶၢဝ်းတၢင်း ဝဵင်းတႃႈၵုင်ႈ – မိူင်းတႆးပွတ်းၸၢၼ်းၵေႃႉၼိုင်ႈ လၢတ်ႈၼင်ႇၼႆ။
“ပေႃးဢွၵ်ႇၶၢဝ်းတၢင်းၼႆႉ လူဝ်ႇမီးပႃးလိၵ်ႈႁပ်ႉႁွင်း လိၵ်ႈၵမ်ႉတီႈ ၽူႈယႂ်ႇၵူၼ်းလူင်ၼႂ်းပွၵ်ႉၼႂ်းယွမ်ႇၼႆလႄႈ ၼင်ႇႁိုဝ်တေဢမ်ႇမီးပၼ်ႁႃၸွမ်းတၢင်းၼၼ်ႉ ႁဝ်းၵၼ်ႉဢဝ်ပႃးၵႂႃႇၸွမ်း။ မၢႆၾၢင်တီႈႁဝ်းယိပ်းဝႆႉၼႆႉၵေႃႈ ဢမ်ႇၸႂ်ႈမၢႆၾၢင် ဢၼ်ၶဝ်မၢႆႁူဝ်ဝႆႉ။ ၽိူဝ်ႇထိုင်ၼိူဝ်သဵၼ်ႈတၢင်းလူင် ၸုမ်းသိုၵ်းၶဝ်ၶိုၼ်ႈမႃးၼိူဝ်ၵႃးသေ ထတ်းႁဝ်း ယွၼ်းတူၺ်း လိၵ်ႈၵမ်ႉယၼ်လႄႈ ႁဝ်းၵေႃႈဢဝ်ဢွၵ်ႇၼႄ သမ်ႉဝႃႈဢမ်ႇၸႂ်ႈမဵဝ်းမၼ်း လူဝ်ႇလႆႈပဵၼ် လိၵ်ႈႁပ်ႉႁွင်း တီႈႁူင်းပလိၵ်ႈဝႃႇ။ၸဝ်ႈၼႃႈတီႈၼႂ်းႁူင်းပလိၵ်ႈတေလႆႈႁဵတ်းလိၵ်ႈယိုၼ်ယၼ်ပၼ်ဝႃႈ ၸဝ်ႈၵဝ်ႇဢမ်ႇမီးတၢင်းၽိတ်းသင်ၵွၼ်ႇ တေပွႆႇပၼ်ၵႂႃႇ ပေႃးဢမ်ႇမီးဝႂ်ႁပ်ႉႁွင်းတီႈႁူင်းပလိၵ်ႈၼႆႉ တေလႆႈပၼ်ငိုၼ်းၼႆႁႄ ယွၼ်းဢဝ်ငိုၼ်းႁဝ်းၵႂႃႇ” ဝႃႈၼႆ။
ၵၢၼ်ၵူတ်ႇထတ်း ၵူၼ်းၸိူဝ်းဢွၵ်ႇၶၢဝ်းတၢင်း ယွၼ်းတူၺ်းဝႂ်ႁပ်ႉႁွင်းၼႆႉ လႆႈႁူႉဝႃႈပဵၼ်ၶေႃႈၸီႉသင်ႇ ၽူႈၵုမ်းတိူင်းသိုၵ်းၶဝ်သေ ပႃးၼႂ်းၽႅၼ်ၵၢၼ်ငၢၼ်း လူင်ပွင်ၸိုင်ႈသိုၵ်း ၶၢဝ်းတၢင်း 100 ဝၼ်းၼၼ်ႉထႅင်ႈၼႆယဝ်ႉ။
လႆႈႁူႉဝႃႈ ၵူၼ်းမိူင်းၸိူဝ်းဢွၵ်ႇၶၢဝ်းတၢင်း ယင်းၺႃးၸုမ်းသိုၵ်းမၢၼ်ႈၶဝ် လၢတ်ႈႁိုတ်းသႂ်ႇႁၢတ်းသႂ်ႇၵူၺ်းဢမ်ႇၵႃး ယိုတ်းသိမ်းဢဝ်ၵႂႃႇပႃး ၾူၼ်း လႄႈ မၢႆၾၢင်ၸိူဝ်းၼႆႉထႅင်ႈ ၼႆ ယဝ်ႉ။
မိူဝ်ႈႁူဝ်လိူၼ်ၾႅပ်ႉပိဝ်ႊရီႇၼၼ်ႉ ၾၢႆႇသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ ၵူၼ်းၸိူဝ်းယူႇသဝ်းဝႆႉၼႂ်း ၸႄႈဝဵင်း ၸုမ်းသိုၵ်းလုၵ်ႉၽိုၼ်ႉၶဝ်ၵုမ်းၵမ်ဝႆႉၼၼ်ႉ ပေႃးဢွၵ်ႇၶၢဝ်းတၢင်းၵႂႃႇဝၢၼ်ႈတႂ်ႈမိူဝ်းၼိူဝ်ၸိုင် တေလႆႈၼႄပႃးမၢႆၾၢင် တေလႆႈမီးဝႂ်ႁပ်ႉႁွင်း တီႈၽူႈမီးပုၼ်ႈၽွၼ်းၼႂ်းပွၵ်ႉလႄႈ ႁူင်းပလိၵ်ႈ ဝဵင်းဢၼ်ၸဝ်ႈၵဝ်ႇယူႇသဝ်းၼၼ်ႉ ၼႆသေ ၵပ်ႉၵိၼ်းၵၢၼ်ဢွၵ်ႇၶၢဝ်းတၢင်းဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ