ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ႁူပ်ႉထူပ်းၶႃႈႁၢပ်ႇၵၢၼ်ၵူၼ်းမိူင်းဝဵင်းမေႃႇလမျႅင်ႇ သေလၢတ်ႈဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸဵမ်ဢဝ်ၸုမ်းၵိုတ်းတိုၵ်းလႄႈ ၸုမ်းတိုၵ်ႉယိုဝ်းယူႇၸိူဝ်းၼႆႉ ဢမ်ႇမီးၵတိသဵတ်ႉၸႃႇတေႃႇၸိုင်ႈမိူင်း တူၺ်းပုၼ်ႈပၢင်ႈပၢႆးမၢၵ်ႈမီးၸဝ်ႈၵဝ်ႇသေ ႁူမ်ႈမိုဝ်းၵၼ်တင်းၸုမ်းၵႃႉၶၢႆၼွၵ်ႈမၢႆမီႈၵူၺ်းလႄႈ ၸိုင်ႈမိူင်းဢမ်ႇလႆႈၶွၼ်ႇ ဝႃႈၼႆ။

ဝၼ်းတီႈ 16/11/2025 ယၢမ်းၵၢင်ၶမ်ႈ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ႁူပ်ႉထူပ်းၵူၼ်းမိူင်းတီႈဝဵင်းမေႃႇလမျႅင်ႇသေလၢတ်ႈထႅင်ႈဝႃႈ – “ ယွၼ်ႉပိူဝ်ႈၵၢၼ်ၵႃႉၶၢႆၼွၵ်ႈမၢႆမီႈလိူင်ႇၼမ်မႃးလႄႈ ယၢမ်းလဵဝ်လႆႈပိၵ်ႉလၢၼ်ႇလႅၼ်လိၼ်ဝႆႉၵမ်ႈၽွင်ႈ။ ၵၢၼ်ၵႃႉၶၢႆၵၢတ်ႇမိုတ်ႉၼႆႉ ႁဵတ်းႁႂ်ႈပဵၼ်ႁႅင်းလူင်တႃႇႁႂ်ႈၸုမ်းယိပ်းၵွင်ႈၵၢင်ႇၸွမ်းလႅၼ်လိၼ် မီးႁႅင်းသေသိုပ်ႇသၢႆၸႂ်လိပ်းၶီးလႆႈၶၢဝ်းႁိုင်။ တုမ်ႉတိူဝ်ႉလွင်ႈၵတ်းယဵၼ်ၼိမ်တဵင်ႈ”- ဝႃႈၼႆ။

သိုၵ်းမၢၼ်ႈလၢတ်ႈဝႃႈ – ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႂ်းမိူင်းယၢင်းၽိူၵ်ႇၼႆႉ သၢင်ႈလွင်ႈသုၵ်ႉယုင်ႈဢူၼ်ၵဝ်း ၊ ႁဵတ်းႁႂ်ႈႁိူၼ်းယေးၵူၼ်းမိူင်းလူႉၵွႆ ၊ ႁဵတ်းႁႂ်ႈဢမ်ႇမီးလွင်ႈၵတ်းယဵၼ်ၼိမ်တဵင်ႈ- ဝႃႈၼႆပႃး။

ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇၼႆႉ – မိူဝ်ႈဝႃးဝၼ်းတီႈ 16/11/2025 ယၢမ်းၵၢင်ၼႂ် ႁွတ်ႈထိုင်ဝဵင်းၽႃဢၢင်ႇ မိူင်းယၢင်းၽိူၵ်ႇ။ ၽိူဝ်ႇထိုင်ၶၢဝ်ႇမၼ်းၸၢႆးလိုဝ်းၵႂႃႇသေလႄႈ မႆႈၸႂ်လွင်ႈႁူမ်ႇလူမ်ႈၼႆသေ ဢမ်ႇႁတ်းသိုပ်ႇယူႇတေႃႇ – ၼႅတ်ႈၵိုင်ႉၵၢင်ႉဢွၵ်ႇၵႂႃႇဝဵင်းမေႃႇလမျႅင်ႇ မိူင်းမွၼ်း ၵမ်းလဵဝ်- ၸုမ်းသိုဝ်ႇၶၢဝ်ႇယႂ်ႇမၢၼ်ႈလၢႆလၢႆဢၼ်တႄႉတႅမ်ႈတၢင်ႇဝႆႉၼင်ႇၼႆ။

လိူဝ်ၼၼ်ႉ ၼင်ႇႁိုဝ်ၵၢၼ်တေႃႇလွင်းလႄႈလွင်ႈလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊတေဢမ်ႇၶိုၼ်းငွၵ်ႈႁူဝ်ပဵၼ်တူဝ်လႆႈၶိုၼ်ႈမႃးၶိုၼ်းၼၼ်ႉၵေႃႈ လႆႈယႃႉပႅတ်ႈႁူင်းၵေႃႇၵၢႆႇၶဝ်ပႅတ်ႈတင်းၼမ် တီႈလႅၼ်လိၼ်ထႆး။ ၽွင်းလုမ်ႈၾႃႉပၼ်ႁႅင်းဢီးတႃႇၽဵဝ်ႈမူၺ်ႉၸုမ်းၵျႃႊၽျႅၼ်ႉ ၽွင်းဢမေႊရိၵၼ်ႊ ၽွတ်ႈၸုမ်းၽဵဝ်ႈမူၺ်ႉၵျႃႊၽျႅၼ်ႉသေတေလူင်းမိုဝ်းႁဵတ်းၵၢၼ်ယူႇၸိူင်ႉၼႆၼႆႉ ယူႇတီႈသိုၵ်းမၢၼ်ႈၵေႃႈ တေဝႆႉပဵၼ်ၵၢၼ်ၸိူဝ်ႉၸၢတ်ႈဢၼ်ၼိုင်ႈသေ တေၽဵဝ်ႈမူၺ်ႉ KK Park ၵႂႃႇ- မၼ်းၸၢႆးလၢတ်ႈၵႂႃႇပႃးၼင်ႇၼႆ။

သိုၵ်းမၢၼ်ႈၼႆႉႁူမ်ႈၵၼ်တင်းတပ်ႉပႂ်ႉလႅၼ်လိၼ်ဢၼ်ၶဝ်ၵုမ်းၵမ်လႆႈၼၼ်ႉသေ ၶဝ်ႈပိုတ်းယိုဝ်းႁူင်းၵျႃႊၽျႅၼ်ႉတီႈ KK Park မိူဝ်ႈႁၢင်လိူၼ်ဢွၵ်ႉထူဝ်ႊပိူဝ်ႊ။ ၵူၼ်းႁဵတ်းၵၢၼ်တီႈၼၼ်ႉဢွၼ်ၵၼ်ပၢႆႈၵေႃႉႁူးၵေႃႉတၢင်း။ ဝၢႆးၼၼ်ႉ 2-3 ဝၼ်းသိုၵ်းမၢၼ်ႈပွႆႇမၢၵ်ႇယႃႉႁူင်းၵေႃႇၵၢႆႇလူႉၵွႆၵူၼ်ႇပင်း။ တေႃႇထိုင်ၵၢင်လိူၼ်ၼူဝ်ႊဝႅမ်ႊပိူဝ်ႊၼႆႉ သိုၵ်းမၢၼ်ႈပိုၼ်ၽၢဝ်ႇဝႃႈ ယႃႉၵွႆယဝ်ႉ 100 လင်ပၢႆဝႃႈၼႆ။

ၵူၺ်းၵႃႈၽူႈပၵ်းတႃၵၢၼ်မိူင်းၶဝ်တႄႉလၢတ်ႈဝႃႈ – KK Park ၼႆႉ ပဵၼ်ယွမ်ႇဢွၼ်ႇဢိတ်းၶွင်ၸုမ်းၵျႃႊၽျႅၼ်ႉၵူၺ်း။ သိုၵ်းမၢၼ်ႈႁဵတ်းၵႅင်ႈႁဵတ်းၼႄလုမ်ႈၾႃႉၵူၺ်း။ တၢင်ႇတီႈတၢင်ႇဝဵင်း တီႈဢၼ်မီးႁူင်းၵျႃႊၽျႅၼ်ႉယႂ်ႇ တိုၵ်ႉမီးထႅင်ႈတင်းၼမ်။ သိုၵ်းမၢၼ်ႈဢမ်ႇႁတ်းတိူဝ်ႉႁတ်းၽဵဝ်ႈ- ဝႃႈၼႆ။

ၸုမ်းၵျႃႊၽျႅၼ်ႉၼႆႉ ပၵ်းတႃၸူးၸိုင်ႈမိူင်းဢၼ်ပၵ်းပိူင်မၢႆမီႈဢမ်ႇႁူမ်ႇငမ်းပၼ်ၵူၼ်းမိူင်းၼၼ်ႉလႄႈ ၼႂ်းၵုၼ်ၶဵဝ်ဢေႊသျႃႊၼႆႉ မိူင်းမၢၼ်ႈ မိူင်းၵမ်ႊပေႃႊတီႊယိူဝ်ႊ မိူင်းၾိလိပ်ႉပိၼ်ႊသ် ပဵၼ်ပိုၼ်ႉတီႈဢၼ်မီးၸုမ်းၵျႃႊၽျႅၼ်ႉ ၼမ်သုတ်းၼႆ – ၸုမ်းပၵ်းတႃတူၺ်းလွင်ႈၵျႃႊၽျႅၼ်ႉတႅမ်ႈဢွၵ်ႇဝႆႉၼင်ႇၼႆ။