ၵူၼ်းၸိူဝ်းဢဝ် Visa Free သေ ၶဝ်ႈဢႅဝ်ႇမိူင်းထႆးၼၼ်ႉ တေဢမ်ႇပၼ်ၶႂၢင်ႉ သိုပ်ႇတေႃႇဢႃယု ဝီႊသႃႊ ၼမ်လိူဝ် 2 ပွၵ်ႈ လႄႈ တေၶဵင်ႈၶႅင်ၵၢၼ်တေႃႇဢႃယု ဝီႊသႃႊၵႂႃႇ ၼႆ – လုမ်းၾၢႆႇၵူတ်ႇထတ်း ၵူၼ်းၶဝ်ႈဢွၵ်ႇမိူင်း မိူင်းထႆး ပိုၼ်ၽၢဝ်ႇၵႂႃႇ ၼႂ်းဝၼ်းတီႈ 12/11/2025 ၼင်ႇၼႆ။

ၸွမ်းၼင်ႇၶေႃႈပိုၼ်ၽၢဝ်ႇၼၼ်ႉသေ မၢင်ၸိူဝ်းဢဝ် Visa Free ၶဝ်ႈဢွၵ်ႇၼႂ်းမိူင်းထႆး ႁဵတ်းမိူၼ်ၼင်ႇ ၵူၼ်းဢႅဝ်ႇလႄႇတွင်ႈတဵဝ်းယဝ်ႉ မီးလွင်ႈၵဵဝ်ႇၶွင်ႈၸွမ်း ၵၢၼ်ၵႃႉၶၢႆၵူၼ်း၊ ႁဵတ်းၽိတ်းပူၼ်ႉပႅၼ်တၢင်း သၢႆႊပိူဝ်ႊ လႄႈ လွၵ်ႇလႅၼ်ၵိၼ်ငိုၼ်း ၸဵမ်ၸိူဝ်းၼႆႉ။

ယိူင်းဢၢၼ်းပိူဝ်ႈတႃႇတေၶဵင်ႈၶႅင်တေႃႇ ၵူၼ်းၼွၵ်ႈမိူင်း ၸိူဝ်းၵဵဝ်ႇၶွင်ႈၸွမ်း ၵၢၼ်ႁဵတ်းၽိတ်းပူၼ်ႉပႅၼ် မၢႆမီႈၸိူဝ်းၼၼ်ႉ ၸင်ႇလႆႈပိုၼ်ၽၢဝ်ႇဢွၵ်ႇမႃးၼႆ ၽူႈၶၢၼ်ပၢၵ်ႇ တီႈ လုမ်းၵူတ်ႇထတ်း ၵူၼ်းၶဝ်ႈဢွၵ်ႇမိူင်း မိူင်းထႆး လၢတ်ႈဝႆႉၼင်ႇၼႆ။

ယူႇတီႈၸုမ်းၵူတ်ႇထတ်းၵူၼ်းၶဝ်ႈဢွၵ်ႇမိူင်း တေဢဝ်လွင်ႈတၢင်း 4 လွင်ႈ ဝႆႉပဵၼ်ပိူင်လူင်သေ တိူဝ်းၶဵင်ႈၶႅင် ႁဵတ်းသၢင်ႈၵၢၼ်ၵူတ်ႇထတ်းၵႂႃႇ။ ၵူၼ်းၸိူဝ်းဢမ်ႇၼႄလႆႈလွင်ႈတၢင်းၸႅင်ႈလႅင်းလီသေ ဢဝ် Visa Free ၶဝ်ႈၼႂ်းမိူင်းထႆး ၼမ်လိူဝ် 2 ပွၵ်ႈၼၼ်ႉ တေၺႃးပၢၵ်ႈပႅတ်ႈ လွင်ႈပၼ်ၶႂၢင်ႉၶဝ်ႈၼႂ်းမိူင်းထႆး ၵမ်းလဵဝ် (Deny Entry)။ ၼႂ်းႁူဝ်ပီ 2025 ၼႆႉ ၵူၼ်းၼွၵ်ႈမိူင်း ၸိူဝ်းၺႃးပၢၵ်ႈပႅတ်ႈသေ ဢမ်ႇလႆႈၶႂၢင်ႉ ၶဝ်ႈၼႂ်းမိူင်းထႆး မီး 2900 ၵေႃႉ ၼႆယဝ်ႉ။

လိူဝ်ၼၼ်ႉ ၵူၼ်းၼွၵ်ႈမိူင်း ၸိူဝ်းၶဝ်ႈပႃးၼႂ်းသဵၼ်ႈမၢႆၸိုဝ်ႈသဵင်လူႉ ဢၼ်လုၵ်ႉတီႈလႅၼ်လိၼ် မႄႈသွတ်ႇ – မျႃႉဝတီႇ ပိုၼ်ႉတီႈမီးၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ (ၵျႃႊၽျႅၼ်ႉ) ပၵ်းသဝ်းၼၼ်ႉ တိုၼ်းတေဢမ်ႇပၼ်ၶႂၢင်ႉ ၶဝ်ႈၼႂ်းမိူင်းထႆး၊ တေၵူတ်ႇထတ်းၵူၼ်းၸိူဝ်းၵႆႉတေႃႇဢႃယုဝီႊသႃႊ ၸိူဝ်းမီးလွင်ႈထၢင်ႇထိူမ်ဝႃႈ ႁဵတ်းၽိတ်းပၵ်းပိူင် မၢႆမီႈ ဢမ်ႇၼၼ် သင်လူဝ်ႇမႃးၸိုင် တေပိၵ်ႉဢိုတ်းပႅတ်ႈ လွင်ႈပၼ်ၶႂၢင်ႉ တေႃႇဢုယုဝီႊသႃႊသေ တေသူင်ႇပွၵ်ႈ မိူင်းၶိုၼ်း ၼႆယဝ်ႉ။

ၵူၼ်းၸိူဝ်း ဢႃယုဝီႊသႃႊ မူတ်းသေ ယူႇသဝ်းဝႆႉ ၼႂ်းမိူင်းထႆးၼၼ်ႉၵေႃႈ တေၵူတ်ႇထတ်းၵႂႃႇႁၢဝ်ႈႁႅင်း ဝႃႈၼႆ။