မိူဝ်ႈၼႆႉ ဝၼ်းတီႈ 14/11/2025 တႄႇယၢမ်းၵၢင်ၼႂ်ၸဝ်ႉ 6 မူင်း သိုၵ်းၵဝ်ႈၵၢင်ႉ (MNDAA) တင်း သိုၵ်းမၢၼ်ႈၵိုင်ႉၵၢင်ႉဢိုတ်းၶူဝ်လူင် ဝဵင်းသီႇပေႃႉပႅတ်ႈလႄႈ ၵူၼ်းမိူင်း ဢမ်ႇၸၢင်ႈ ၶၢမ်ႈၵႂႃႇမႃး။ ၸဝ်ႈရူတ်ႉၵႃး လႆႈၵိုတ်းပႂ်ႉဝႆႉ ၸွမ်းၼိူဝ်သဵၼ်ႈတၢင်းလူင်တင်းၼမ် ၼႆယဝ်ႉ။
ယွၼ်ႉသိုၵ်းၵဝ်ႈၵၢင်ႉ ၵိုင်ႉၵင်ႉ ဢဝ်ထူင်လိၼ် ထူင်သၢႆးဢိုတ်းၶူဝ်ပႅတ်ႈလႄႈ ၸဝ်ႈၵႃး ၸိူဝ်းလုၵ်ႉတၢင်းဝဵင်း လိူဝ်ႇ (မၢၼ်းတလေး) တေဢွၵ်ႇၶၢဝ်းတၢင်းၵႂႃႇ ဝဵင်းလႃႈသဵဝ်ႈၼၼ်ႉ လႆႈငိူင်ႉၵႂႃႇၸွမ်း သဵၼ်ႈတၢင်း တၢင်ႇသဵၼ်ႈၼႆ ၸဝ်ႈၵႃး လႅၼ်ႈ ဝဵင်းလိူဝ်ႇ- လႃႈသဵဝ်ႈ လၢတ်ႈၼႄၼင်ႇၼႆ။
“ယွၼ်ႉသင်လႄႈဢိုတ်း၊ တေဢိုတ်းလၢႆဝၼ်းၼႆၵေႃႈ ၶဝ်ဢမ်ႇလၢတ်ႈ။ ဢမ်ႇပိုၼ်ၽၢဝ်ႇဝႆႉဢွၼ်တၢင်း။ ရူတ်ႉၶိူင်ႈၵေႃႈဢမ်ႇၸၢင်ႈလတ်း။ ၶဝ်ဢဝ်ထူင်လိၼ်၊ ထူင်သၢႆးမႃးၶပ်ႉႁႄႉဝႆႉ။ ၵႃးၸိူဝ်းတေၵႂႃႇတၢင်း လႃႈသဵဝ်ႈၼၼ်ႉတႄႉ လႆႈပၼ်ႇၵႂႃႇတၢင်း ၼမ်ႉလၼ်ႈၵူၺ်းယဝ်ႉ။”
ၵွၼ်ႇၼႃႈ သိုၵ်းတင်းသွင်ၸုမ်းတေဢိုတ်းၶူဝ်လူင်ဝဵင်းသီႇပေႃႉ သဵၼ်ႈတၢင်းလူင်ႁၢႆႊဝေႊ လႃႈသဵဝ်ႈ- ဝဵင်းလိူဝ်ႇ (မၢၼ်းတလေး) ၼႆႉ မီးၶၢဝ်ႇလိုဝ်းဢွၵ်ႇဝႃႈ သိုၵ်းမၢၼ်ႈ တင်း သိုၵ်း ၵဝ်ႈၵၢင်ႉႁူပ်ႉဢုပ်ႇၵၼ် တီႈႁူင်းႁႅမ်းၸၢင်ႉသွင်တူဝ် ၼႂ်းၵၢင်ဝဵင်းလႃႈသဵဝ်ႈ။
ဝၢႆးၼၼ်ႉထႅင်ႈမွၵ်ႈသွင်ဝၼ်း သိုၵ်းၵဝ်ႈၵၢင်ႉ လႄႈ သိုၵ်းမၢၼ်ႈ ၸိူဝ်းပၵ်းတပ်ႉပၢင်သဝ်းဝႆႉ တီႈဢိူင်ႇႁူဝ်ယ ၸႄႈဝဵင်းမိူင်းယႆ ႁိမ်းသဵၼ်ႈတၢင်းၽႄၵႂႃႇ ဝဵင်းတၢင်းယၢၼ်းၼၼ်ႉ ၶဵင်ႈ ၶႅင်ၵၢၼ်သိုၵ်းတေႃႇၵၼ်သေ သဵၼ်ႈတၢင်းၺႃးဢိုတ်းၵႂႃႇၵမ်းၼိုင်ႈ ၼႆယူႇ။
ၸၢႆးဢွင်ႇ ၵူၼ်းၼုမ်ႇ ၵေႃႉယူႇဝႆႉတီႈၸႄႈဝဵင်းမိူင်းယႆတႄႉ လၢတ်ႈၼႄတီႈၽူႈတွႆႇႁွၵ်ႈဝႃႈ “မိူဝ်ႈၼႆႉ (14/11/2025) တၢင်းႁူဝ်ယ မိူင်းယႆတႄႉ ဢမ်ႇလၢၵ်ႇလၢႆးသင်ၶႃႈ။ မိူၼ်ၵဝ်ႇ ၵူၺ်း ၵႂႃႇမႃးလႆႈယူႇ။ ၼိူဝ်ဢွၼ်ႊလၢႆႊတႄႉ ငိၼ်းၶၢဝ်ႇ လၢႆမဵဝ်းယူႇ။ ၵူၺ်းတီႈပိုၼ်ႉတီႈတေႉတႄႉ ဢမ်ႇမိူၼ်ၼၼ်ၼင်ႇၵဝ်ႇ။ ပေႃးပဵၼ်ၵႃးတၢင်ႇၵုၼ်ႇတႄႉ လႆႈပၼ်ငိုၼ်းသေ လႆႈလၢတ်ႈၵႂၢမ်းတေႃႇ သိုၵ်းၸိူဝ်းၼႆႉယဝ်ႉ ၸင်ႇၸၢင်ႈၶၢမ်ႈၵိၵ်ႉလၢၼ်ႇၶဝ်တႄႉ ၼႄႉၼွၼ်းယူႇ” ဝႃႈၼႆ။
ဢိင်ၼိူဝ်သိုၵ်းမၢၼ်ႈ တင်း သိုၵ်းၵဝ်ႈၵၢင်ႉ ဢိုတ်းသဵၼ်ႈတၢင်းလူင်ႁၢႆးဝေး တီႈၶူဝ်လူင်ဝဵင်းသီႇပေႃႉ ၼိူဝ်သဵၼ်ႈ တၢင်း ဝဵင်းလိူဝ်ႇ (မၢၼ်းတလေး)- လႃႈသဵဝ်ႈ-မူႇၸေႊ လူၺ်ႈဢမ်ႇမီးဝၼ်းမၵ်းမၼ်ႈၼႆႉသေ ၵူၼ်းမိူင်းၼႂ်းပိုၼ်ႉတီႈ လႄႈၸဝ်ႈရူတ်ႉၵႃး ဢမ်ႇၸၢင်ႈလတ်းၶၢမ်ႈၵႂႃႇမႃးလႆႈငၢႆႈလူမ်လႄႈ ဢွၼ်ၵၼ်မႆႈၸႂ်ၵူဝ်ၵႃႈၶၼ်ၵုၼ်ႇ ပုင်ႈၶိုၼ်ႈသုင်ႁႅင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ