ပၢႆသဝ်ၶျိူင် ဢႃယု 75 ပီ ႁူဝ်ပဝ်ႈၵဝ်ႇ ၵဝ်ႈၵၢင်ႉဢၼ်ၺႃးၶႄႇတီႉၺွပ်းဢဝ်မိူဝ်းတႅပ်းတတ်းတြႃးသေ ပူင်ဝႆႉတူတ်ႈတၢမ်ႇတၢႆ မိူဝ်ႈဝၼ်းတီႈ 4/11/2025 ဝၼ်းဢၢင်းၵၢၼ်းဝူင်ႈပူၼ်ႉမႃးၼႆႉၼၼ်ႉ ၵိုင်ႉၵၢင်ႉလႆႈၶဝ်ႈႁူင်းယႃသေ လူႉတၢႆၵႂႃႇ မိူဝ်ႈၼႆႉ 11/11/2025 ယဝ်ႉဝႃႈၼႆ။

ဝၢႆးလင်ၺႃး လုမ်းတြႃးဝဵင်း သျႅၼ်ႊၵျႅၼ်ႊ ၸႄႈမိူင်းၵႂၼ်ႊတူင်ႊ မိူင်းၶႄႇ ပူင်တူတ်ႈတၢမ်ႇတၢႆယဝ်ႉထႅင်ႈဝၼ်းၼိုင်ႈ ၼႂ်းဝၼ်းပုတ်ႉ 5/11/2025 ၼၼ်ႉ ပၢႆသဝ်ၶျိူင် ၵိုင်ႉၵၢင်ႉဢမ်ႇယူႇလီ ထိုင်တီႈလႆႈၶဝ်ႈႁူင်းယႃသေလူႉတၢႆၵႂႃႇႁင်းၵူၺ်းၼႆ ၶၢဝ်ႇ BBC ႁၢႆးငၢၼ်းဝႆႉၼင်ႇၼႆ။

ပၢႆသဝ်ၶျိူင် Bai Suo cheng၊ လုၵ်ႈၸၢႆးမၼ်း ပၢႆယိင်သၢင်ႊ Bai Yingcang၊ ယၢင်လီႇၶျၢင်ႊ Yang Liqiang၊ ႁူ သႅဝ်ၵျႅင်ႊ Hu Xiaojiang လႄႈ ၶျိူၼ် ၵႂၢင်ႊယိ Chen Guangyi ၶဝ် 5 ၵေႃႉၼႆႉ လုမ်းတြႃးမိူင်းၶႄႇ တႄႇၵူတ်ႇထတ်းတူတ်ႈတၢမ်ႇၸဵမ်မိူဝ်ႈလိူၼ်ၵျူႊလၢႆႊပုၼ်ႉသေ မႃးပၼ်တူတ်ႈတၢမ်ႇတၢႆၼႂ်းႁူဝ်လိူၼ်ၼူဝ်ႊဝႅမ်ႊပိူဝ်ႊၼႆႉ ။
မၢပ်ႇမႂ်ၼႄးဝႆႉတင်းၽိတ်း ၵျႃႊၽျႅၼ်ႉဢိၵ်ႇလၢႆလၢႆဢၼ်။

တီႈပၢင်ဢၢၼ်ႇၽိုၼ်လိၵ်ႈၵဵဝ်ႇလူၺ်ႈတၢင်းၽိတ်းၸုမ်းပၢႆသဝ်ၶျိူင် တီႈလုမ်းတြႃးၼၼ်ႉ ပႃးဝႆႉဝႃႈ – ၸဝ်ႈၼႃႈတီႈမိူင်းၶႄႇ တင်ႈၸႂ်ၵႂႃႇထိုင်ဝဵင်းလၢဝ်ႇၵၢႆး ၽွင်းပၢင်တိုၵ်းၽႅၼ်ယၼ်ႇသိုၵ်း 1027 ၼၼ်ႉသေ ၵႂႃႇၵဵပ်းလၵ်းထၢၼ်တီႈၵူၼ်းမိူင်း1000 ပၢႆ၊ လႆႈၶေႃႈမုလ်း ၵဵဝ်ႇၵပ်းလွင်ႈပၢႆသဝ်ၶျိူင် ၵဵဝ်ႇၶွင်ႉၸွမ်းလွင်ႈ ၵျႃႊၽျႅၼ်ႉ – ၵၢၼ်ၵႃႉယႃႈမဝ်းၵမ်- တင်ႈႁူင်းမႄႈမွၵ်ႇယႃႈသေႁူၺ်းသူၼ်းသၢဝ်ဢွၼ်ႇဢိၵ်ႇၵူၼ်းၼုမ်ႇတင်းၼမ်သူင်ႇႁူင်းၶၢႆတူဝ် – ဢိၵ်ႇပႃးတင်း တၢင်းၽိတ်းလွင်ႈၵိၼ်သူးၵိၼ်လၢပ်ႈ၊ ၵၢၼ်ၶႃႈႁႅမ်ၵူၼ်းတၢႆၸိူဝ်းၼႆႉတင်းၼမ် – ပႃးဝႆႉၼင်ႇၼႆ။

လုမ်းတြႃးမိူင်းၶႄႇဢၢၼ်ႇပႃးဝႃႈ ပၢႆသဝ်ၶျိူင်ၼႆႉ သူင်ႇပျီႇတူႉၸိတ်ႉဢၼ်မၼ်းလဵင်ႉဝႆႉၸိူဝ်းၼၼ်ႉၵႂႃႇဢဝ်ႁူမ်ႇလူမ်ႈပၼ် ႁူင်းၵၢၼ်ၵျႃႊၽျႅၼ်ႉလႄႈ ၸင်ႇဝႃႈၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊၼႆႉပၼ်ႇၵၢၼ်လႆႈလီငၢမ်း။ မၼ်းၸၢႆးၼႆႉပဵၼ်ႁူဝ်ၼႃႈၸုမ်းၵျႃႊၽျႅၼ်ႉသေ လွၵ်ႇလႅၼ်ၵိၼ်ငိုၼ်းၵူၼ်းတင်းလုမ်ႈၾႃႉဝႆႉ 3 မိုၼ်ႇၵမ်း၊ လႆႈငိုၼ်းပဵၼ် မိုၼ်ႇလၢၼ်ႉယႂၼ်ႊ။ လိူၼ်ၼၼ်ႉ ပၢႆသဝ်ၶျိူင်ၼႆႉ ႁဵတ်းဢွၵ်ႇယႃႈမဝ်းၵမ်ၶၢႆ ဢမ်ႇယွမ်း 11 တၼ်ႊ – ဝႃႈၼႆ။

ၶိူဝ်းႁိူၼ်းယႂ်ႇၶႄႇၵဝ်ႈၵၢင်ႉၼႂ်းမိူင်းမၢၼ်ႈ ဢၼ်ပဵၼ်ၶိူဝ်းႁိူၼ်း ပၢႆ၊ ဝေႇ၊ မိင် လႄႈ လဵဝ် တင်း 4 ဢၼ်ၼႆႉ ၺႃးမိူင်းၶႄႇလိုပ်ႈလမ်းတီႉၺွပ်းလူၺ်ႈတၢင်းၽိတ်းယႃႈမဝ်းၵမ် တၢင်းၽိတ်းၵျႃးၽျႅၼ်ႉ ၸိူဝ်းၼႆႉသေ ဢဝ်ၵႂႃႇၵုမ်းၶင်ဝႆႉတီႈမိူင်းၶႄႇတင်းၼမ်။ ယၢမ်းလဵဝ်ၵေႃႈ တိုၵ်ႉလႆႈၶိုၼ်ႈလုမ်းတြႃးဝႆႉယူႇၵေႃႈမီး။ ၵူၺ်းၵႃႈဢၼ်ပၼ်တူတ်ႈတၢမ်ႇတၢႆၵႂႃႇၵေႃႈမီးတင်းၼမ်။

မိူဝ်ႈၽွင်းလိူၼ်သႅပ်ႊထႅမ်ႊပိူဝ်ႊပူၼ်ႉမႃးၼႆႉၵေႃႈ လုမ်းတြႃးမိူင်းၶႄႇပၼ်တူတ်ႈတၢမ်ႇတၢႆတေႃႇ ၶိူဝ်းႁိူၼ်း မိင် ဢၼ်ပဵၼ်ၽူႈမၢၵ်ႈၵူၼ်းမီးလူင်ၶိူဝ်းၵဝ်ႈၵၢင်ႉ 11 ၵေႃႉ။