“ ပေႃးၵိၼ်ၼိုင်ႈၵွၵ်းတေပၼ် ၼိုင်ႈသႅၼ် ” ၶေႃႈၵႂၢမ်းဢၼ်ၼႆႉ ပဵၼ်သဵင်ဢၼ် လႆႈယိၼ်း ၼႂ်းႁွင်ႈ KTV ဢၼ်ပေႃႈမႄႈၵူၼ်းမိူင်းႁၼ်ထိုင်ဝႃႈ ႁွင်ႈငရၢႆးမိူင်းၵူၼ်း   ဢွင်ႈတီႈ ယႃႉဢၼႃႇၵၢတ်ႈ မိူဝ်းၼႃႈ ၵူၼ်းၼုမ်ႇ သႅၼ်းႁုၼ်ႈမႂ်ႇယူႇယၢမ်းလဵဝ် ။ ယိင်းဢွၼ်ႇ ဢႃယု 16 ပီၵေႃႉၼိုင်ႈ ဢမ်ႇပႆႇႁူႉလွင်ႈလီ/ၸႃႉ/ၽိတ်း/ထုၵ်ႇ   ၶႂ်ႈၵျေႃႇၶႂ်ႈမူၼ်ႈ မၢင်ႇၵိူဝ်းၶႂ်ႈလႆႈငိုၼ်းၵူၺ်းလႄႈ မၼ်းၼၢင်းၵိၼ်ၼမ်ႉဝၢၼ်ဢွၼ်ႇၼႂ်းၵွၵ်းၼၼ်ႉ။  

 မၼ်းၼၢင်း ဢမ်ႇဝူၼ်ႉမႅၼ်ႈ ဢမ်ႇႁူႉသေဢိတ်းဝႃႈ  ၼမ်ႉဝၢၼ်ၵွၵ်းလဵၵ်ႉလဵၵ်ႉဢွၼ်ႇ ဢိုၵ်ႉၼိုင်ႈၼၼ်ႉ  တေလႅၵ်ႈလၢႆႈၸၢတ်ႈပၢၼ်မၼ်းၼၢင်း။ မၼ်းၼၢင်းဢမ်ႇဝူၼ်ႉၼမ် ၵိၼ်တၢပ်ႇၵႂႃႇ 5 ၵွၵ်း။  

ဢၼ်မၼ်းၼၢင်းၵိၼ်ၼႆႉ ပဵၼ် Happy Water  ၽွင်ယႃႈမဝ်းၵမ် ဢၼ်လႆႈၼွၵ်းလေႃး ၼမ်ႉသူၼ်ႈၼမ်ႉဝၢၼ်သေၵိၼ်။  ပေႃးၵူၼ်းဢမ်ႇႁူႉတႄႉ တေထၢင်ႇဝႃႈ ပဵၼ်ၼမ်ႉမၢၵ်ႇမႆႉယႅၼ်ႈ ဢမ်ႇၼၼ်လဝ်ႈ  ၼႆၵူၺ်း ၊ ၽွင် Happy Water ဢဝ်ၽွင်ယႃႈမဝ်းၵမ်  Gamma-Hydroxybutyrate (GHB) ၊ Methamphetamine ၊ Ketamine ၊ Diazepam ၊ ယႃမႃႉ၊ ယႃႈဢီး၊ ယႃႈဢၢႆႉသ်၊ ၽွင်ၵၾိင်ႊ၊ သၢၼ်ၻၢႆႊယႃႊဝီႊၾႅမ်ႊ ၸိူဝ်းၼႆႉလေႃးၵၼ်ဝႆႉ လႄႈလႆႈဝႃႈပဵၼ်ယႃႈမဝ်းၵမ်သႅၼ်းဢၼ်ႁၢႆႉႁႅင်း။ ၵမ်ႈၼမ်ပဵၼ်သၢၼ်ယႃႈမဝ်းၵမ် ဢၼ်ဝႆႉႁဵတ်းႁႂ်ႈမိင်းမဝ်းလိုမ်းတူဝ်လိုမ်းႁၢင်ႈ လႄႈတႃႇႁၢင်ႈၼၢင်းယိင်းဢွၼ်ႇႁႂ်ႈလိုမ်းတူဝ် သေဢဝ်မႃးၵၼ်ႉၸၼ်လူလၢႆ။

Happy Water   ၽွင်ႈယႃႈမဝ်းၵမ်လၢႆလၢႆသႅၼ်းမႃးၸၢပ်ႈၵၼ်ဝႆႉၼႆႉ  ပေႃးၵိၼ်ယဝ်ႉၵွပ်းၼိုင်ႈ ၶႂ်ႈၵိၼ်ထႅင်ႈ ၊ ပေႃးၵိၼ်ၼမ်    တေပဵၼ် ထူၺ်ႈၸႂ်ဢမ်ႇဢိမ်ႇ  ဢမ်ႇသၢင်ႇထုၵ်ႇ ၸၢင်ႈ လိုမ်းတူဝ် ထိုင်တီႈလူႉသုမ်းသၢႆၸႂ်ပႃး ၊ ၼႂ်းၶိုၼ်းၼၼ်ႉ မၼ်းၼၢင်း ၵိၼ်ၵႂႃႇ 5 ၵွၵ်း ဢဝ်ငိုၼ်း 5 သႅၼ် လႅၵ်ႈသၢႆၸႂ် မၼ်းၼၢင်းၵႂႃႇ   ။

 လုၵ်ႈဢွၼ်ႇယိင်းၵေႃႉၼႆႉ ၸိုဝ်ႈႁွင်ႉ ၼၢင်းႁဵဝ်းငိုၼ်း ဢႃယု 16  ၶူပ်ႇ ပဵၼ်ၵူၼ်းဝၢၼ်ႈလွႆၼွႆႉ ဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆး ပွတ်းၸၢၼ်း။  ၼႂ်းဝၼ်းတီႈ 21/6/2025 ၼၼ်ႉ မၼ်းၼၢင်းၵႂႃႇႁၢၼ်ႉ KTV X3  ဢၼ်ပိုတ်ႇဝႆႉ တၢင်းဝၢၼ်ႈမႆႉၼိဝ်ႉ ဢိူင်ႇၼမ်ႉတိုင်း ၸႄႈဝဵင်းမိူင်းပၼ်ႇသေ ၵႂႃႇၵိၼ်ၼမ်ႉယႃႈမဝ်းၵမ် Happy Water   ။

လႆႈႁူႉဝႃႈမၼ်းၼၢင်းၼႆႉ တိုၵ်ႉပဵၼ်လုၵ်ႈႁဵၼ်းၶိုၼ်ႈႁူင်းႁဵၼ်းၸၼ်ႉ G-12 တီႈဝဵင်းမိူင်းပၼ်ႇဝႆႉဝႃႈၼႆ ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ လုၵ်ႈဢွၼ်ႇၸိူဝ်းၼႆႉ တင်းတႆးၵေႃႉတႆးသႄႈၶဝ်ႁေ ၸူဝ်းၵၼ် ၵႂႃႇလႄႇ KTV ၼၼ်ႉၼႃႇ ၊ ပေႃးၵႂႃႇတီႈၼၼ်ႉ ၵိၼ်ၸေး လဵၼ်ႈၸေးလူး။  Happy Water ၸိူဝ်းၼႆႉ ပေႃးၵိၼ်ၼမ်ၵေႃႈ ထိုင်တၢႆၶႃႈဢိူဝ်ႈ။ မၼ်းၵိၼ်ၼမ် ပဵၼ်သျွၵ်ႉယဝ်ႉ ဢဝ်ၵႂႃႇႁူင်းယႃသိုၵ်း ၶႃႈဢိူဝ်ႈ။   တီႈႁူင်းယႃႇဢမ်ႇႁပ်ႉလႄႈ ၸင်ႇဢဝ်မိူဝ်းႁိူၼ်းၼၼ်ႉၼႃႇ”- ဝႃႈၼႆ ။

  ၵေႃႉပဵၼ်မႄႈလႄႈပီႈပီႈၼွင်ႉၼွင်ႉ ပူၼ်ႉၶၢပ်ႈတူဝ်ပၼ်ၼႂ်းဝၼ်းတီႈ 22/6/2025   ။

ဢႃယု 16 ဢၼ်ဝႃႈၼႆႉ ပဵၼ်ၽွင်းဢႃယုၶိုၼ်ႈ တိုၵ်ႉမီးတိုဝ်ႉတၢင်း ႁႃပၢႆးပၺ်ႇၺႃႇ  ပဵၼ်သႅၼ်းတိုၵ်ႉမီးတိုဝ်ႉတၢင်း ႁႃတၢင်းမူၼ်ႈတၢင်းသိူဝ်း တင်းၼမ် လႆႈထႅင်ႈ ၊  ၶႂ်ႈၵျေႃႇၶႂ်ႈမူၼ်ႈ လီယူသေတႃႉ တေလႆႈႁူႉဝႃႈ ၸွင်ႇတေပဵၼ်ၽေးတေႃႇတူဝ်လႄႈ ၊ တေလႆႈမေႃလိူၵ်ႈ တၢင်းမူၼ်ႈတူဝ်ၸဝ်ႈၵဝ် ယွၼ်ႉၶႂ်ႈၵျေႃႇ ၶႂ်ႈမူၼ်ႈ ၼိုင်ႈၶိုၼ်းလႄႈ ဢမ်ႇၶႂ်ႈႁႂ်ႈ ဢဝ်ၸၢတ်ႈပၢၼ်တူဝ်ၸဝ်ႈၵဝ်ၶဝ်ႈလႅၵ်ႈမိူၼ်ၼႆ ။ 

လွင်ႈ ၼၢင်းႁဵဝ်းငိုၼ်းၼႆႉ ၵူၼ်းပိုၼ်ႉတီႈလၢတ်ႈဝႃႈ   ပေႃးလဵင်ႉၶႄႇ မႃးႁူၺ်းသူၼ်းႁွင်ႉၵႂႃႇ KTV သေ ၸၢင်ႈၵိၼ် Happy Water  တႃႇမူၼ်ႈသိူဝ်းၸွမ်းၵၼ်သေ လႆႈပဵၼ်ၵႂႃႇ။ ဝၢႆးလင်ၼၢင်းႁဵဝ်းငိုၼ်းတၢႆယဝ်ႉ ပေႃႈလဵင်ႉၶႄႇ ၵႂႃႇႁိူၼ်းမႄႈၼၢင်းႁဵဝ်းငိုၼ်းသေ ပၼ်ငိုၼ်းသၢႆႈတႅၼ်းသေ ၵႄႈလိတ်ႈပၼ်ႁႃၵႂႃႇ ဝႃႈၼႆ။

ၽွင်းပူၼ်ႉၶၢပ်ႈတူဝ်တၢႆၼၢင်းႁဵဝ်းငိုၼ်းၼၼ်ႉ ​​ပေႃႈလဵင်ႉၶႄႇဢဝ်ငိုၼ်းၸွႆႈပၼ် 50 သႅၼ်သေ တူဝ်ပေႃႈလဵင်ႉၼၼ်ႉတႄႉ ပၢႆႈၵႂႃႇယူႇဝႆႉ တီႈဝဵင်းၼမ်ႉၸၢင် ။ ဝၢႆးၼၼ်ႉ ၵၢင်ႉၵႄၼႂ်းဝၢၼ်ႈ ၵႂႃႇတီႉၺွပ်းမႃးၶိုၼ်းမိူင်းပၼ်ႇ။ ၼႂ်းဝၼ်းတီႈ 28/6/2025 ဝၼ်းၵၢပ်ႈသွမ်းပၼ်မၼ်းၼၢင်းၼၼ်ႉၵေႃႈ ပေႃႈလဵင်ႉၼၼ်ႉပၼ်ငိုၼ်းထႅင်ႈ 200 သႅၼ်ပျႃး   ။

ထိုင်မႃးဝၼ်းတီႈ 1/7/2025 ပေႃႈလဵင်ႉၶႄႇၼၼ်ႉ ဢဝ်ငိုၼ်းမႃးပၼ်တီႈမႄႈၼၢင်းႁဵဝ်းငိုၼ်းထႅင်ႈ  2  ႁဵင် သႅၼ်ပျႃးသေ သွင်ၾၢႆႇလႆႈၸႂ်ၵၼ် ႁၢၼ်ႉၸႂ်ပဵင်းပေႃးပၼ်ၵၼ်သေ ၵႄႈလိတ်ႈပၼ်ႁႃ ယဝ်ႉတူဝ်ႈၵႂႃႇလီငၢမ်းၼႆ   ၵူၼ်းၸမ်ၸႂ်တင်းၽူႈတၢႆ လၢတ်ႈၼင်ႇၼႆ   ။ 

ၵဵဝ်ႇလွင်ႈၼႆႉၼၢင်းယိင်းၼုမ်ႇ ၽူႈတူင်ႉၼိုင် သုၼ်ႇလႆႈသုၼ်ႇပဵၼ်ၵူၼ်းလၢတ်ႈၽူႈတွႆႇႁွၵ်ႈဝႃႈ -“ ငိုၼ်းမဵဝ်းလဵဝ်ၵူၺ်းဢမ်ႇယဝ်ႉ၊ မၼ်းၵိုင်ႇလီမီး လွင်ႈဢဝ်လိူင်ႈ ပၼ်တူတ်ႈတၢမ်ႇပႃးဢေႃႈ ၊ ယွၼ်ႉဝၢၼ်ႈမိူင်းႁဝ်း ဢမ်ႇမီးပၵ်းမီးပိူင် ဢမ်ႇမီးလွင်ႈၽဵင်ႇပဵင်းပဵၼ်ထမ်းမၢၼ်ႇမႅၼ်ႈလႄႈ  ၊ ၵၢၼ်ဢၼ် ၸႂ်ႉၵိၼ် Happy Water ႁဵတ်းႁႂ်ႈ ၼၢင်းယိင်းၼုမ်ႇပေႃးလႆႈလူႉတၢႆၵႂႃႇၼႆႉ မၼ်းမိူၼ်ၵၢၼ်ၶႃႈႁႅမ်ၵၼ် ယဝ်ႉ ၊ ပဵၼ်ၵၢၼ်ၽိတ်းပၵ်းပိူင်ႇ  ၽိတ်းသုၼ်ႇလႆႈသုၼ်ႇပဵၼ်တေႉတေႉ ၊ ႁူႉယူႇဝႃႈ ၽွၼ်းတုမ်ႉယွၼ်ႈမၼ်းမီး ၊ ပေႃးၵိၼ်တေတုမ်ႉတိူဝ်ႉၼႆ။ ၵူၺ်းၵႃႈ ႁူႉယူႇၵေႃႈသမ်ႉ ၸႂ်ႉၵိၼ် ၸႂ်ႉႁဵတ်းၼႆႉ ပဵၼ်ၵၢၼ်ႁဵတ်းၽိတ်း တႄႉတႄႉ”- ဝႃႈၼႆ ။

ၸူဝ်ႈသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ တီႈမိူင်းပၼ်ႇ  ၸိုင်ႈတႆးပွတ်းၸၢၼ်းႁၢၼ်ႉ ၵိၼ် ၵျေႃႇ KTV  လိူင်ႇၼမ်မႃး ။  ပိုတ်ႇ  တင်းဝၼ်းတင်းၶိုၼ်း ၊ မၢင်ႁၢၼ်ႉပိုတ်ႇ 24 ၸူဝ်ႈမူင်း။  ၵူၼ်းႁဵတ်းၵၢၼ်တီႈႁၢၼ်ႉ KTV ၵေႃႈပဵၼ်လုၵ်ႈဢွၼ်ႇ သႅၼ်းႁုၼ်ႈမႂ်ႇ ဢႃယု လဵၵ်ႉ ၼမ်လိူင်ႇမႃးႁႅင်း ႁဵတ်းႁႂ်ႈ ပေႃႈမႄႈ မႆႈၸႂ်တွၼ်ႈတႃႇမိူဝ်းၼႃႈ လုၵ်ႈလၢင်းၽႂ်မၼ်း ။

ၼၢင်းယိင်းတူင်ႉၼိုင် သုၼ်လႆႈသုၼ်ပဵၼ်လၢတ်ႈၽူႈတွႆႇႁွၵ်ႈဝႃႈ -“ဢိင်ၼိူဝ် ၵၢပ်ႈပၢၼ်ဝၢၼ်ႈမိူင်းတလဵဝ်လွင်ႈၶဵင်ႇတႃႉတွၼ်ႈတႃႇ  ၼၢင်းယိင်း တလဵဝ်ၼႆႉ ဢမ်ႇမီးလွင်ႈႁူမ်ႇလူမ်ႈ ၊ ၵၢၼ်ၸႂ်ႉတိုဝ်း ယႃႈမဝ်းၵမ်ၼႆႉ ဢမ်ႇမီးပၵ်း မီးပိူင်ႇ ၊ ယွၼ်ႉၼၼ် ၽွၼ်းတုမ်ႉယွၼ်ႈ လွင်ႈယႃႈမဝ်းၵမ် ၵေႃႈ လႆႈႁၼ်ၸႅင်ႈၸႅင်ႈလႅင်းလႅင်းမႃးမိူၼ်ၼႆ ”- ဝႃႈၼႆ ။

မိူၼ်ၼင်ႇၼႆ ၼႂ်းဝၼ်းတီႈ 16/7/2025 ယၢမ်းဝၢႆးဝၼ်း 2 မူင်း  ၼၢင်းသႅင်ၶမ်း ဢႃယု 25 ပီ ယူႇပွၵ်ႉ 5 ဝဵင်းၵႃလီႉ ၸိုင်ႈတႆးပွတ်းၸၢၼ်း ယွၼ်ႉၵႂႃႇ KTV ၵိၼ် Happy Water ၼမ်သေ လႆႈလူႉတၢႆၵႂႃႇဝႃႈၼႆ ။

လိူဝ်ၼၼ်ႉ ၼႂ်းဝၼ်းတီႈ 15/7/2025 ၼၢင်းသၢဝ် သပႄႇဢူး ဢႃယု 21 ပီ ၵူၼ်းမိူင်းယႆ ၸိုင်ႈတႆးပွတ်းႁွင်ႇ ယွၼ်ႉၵႂႃႇ KTV ၵိၼ် Happy Water ၼမ်သေ လႆႈလူႉတၢႆၵႂႃႇမိူၼ်ၵၼ် ၼႆယဝ်ႉ ။

ၼႂ်းၶၢဝ်းတၢင်း 2 လိူၼ်မႃးၼႆႉၵူၺ်း ၼႂ်းမိူင်းတႆးၼႆႉ ဢွၼ်ႇယိင်းသၢဝ်ၵႂႃႇတၢႆ ယွၼ်ႉ Happy Water, K, Ice ၼႂ်းႁၢၼ်ႉ KTV  3 ၵေႃႉ ။ ၼႆႉတင်းပဵၼ်သဵၼ်ႈမၢႆ ဢၼ်လႆႈႁူႉႁၼ်ၸွမ်းၵူၺ်း ၊ ဢၼ်ဢမ်ႇႁူႉၸွမ်းၵေႃႈ ယင်းတေတိူဝ်းမီးၼမ် သေၼႆႉ ၊ ယွၼ်ႉႁၢၼ်ႉ မူၼ်ႈၵျေႃႇ KTV ၽႄႈၼမ်မႃးႁႅင်း လႄႈ ယႃႈမဝ်းၵမ်သႅၼ်းၵူၼ်းၼုမ်ႇၵိၼ်ယဝ်ႉ  ပဵၼ်ၽေးၵေႃႈ ၽႄႈလိူင်ႇၼမ်မႃးႁႅင်း ၼႂ်းမိူင်းတႆးပတ်းပိုၼ်ႉ ။  

ၵူၼ်းၼုမ်ႇသႅၼ်းႁုၼ်ႈမႂ်ႇၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“Happy Water ဢၼ်ဝႃႈၼႆႉ ပဵၼ်ယႃႈမဝ်းၵမ် ဢၼ်ၼိုင်ႈ  ဢၼ်တီႈဢမ်ႇမီးၶေႃႈႁႄႉႁၢမ်ႈသေ ၸႂ်ႉတိုဝ်းၵၼ် ၊ ၵူၺ်း ၽွၼ်းတုမ်ႉယွၼ်ႈ မၼ်းၼႆႉ ၼမ်ႁႅင်းၼႃႇ ၊ ၼၢင်းယိင်းၵေႃႈယဝ်ႉ လုၵ်ႈဢွၼ်ၼုမ်ႇၵေႃႈယဝ်ႉ ယွၼ်ႉယႃႈမဝ်းၵမ်လႄႈ လႆႈလူႉသုမ်းၵႂႃႇ ၸၢတ်ႈပၢၼ်ၵေႃႈမီးတင်းၼမ် ၊ ယဝ်ႉယွၼ်ႉဢမ်ႇမီးပၢႆႈဝူၼ်ႉလႄႈ ၵၢၼ်လၵ်ႉၸူၼ် ၶႃႈႁႅမ် ၵၼ်ၵေႃႈမီးတင်းၼမ်မႃး”- ဝႃႈၼႆ ။

လွင်ႈၼႆႉ ၵူၼ်းပိုၼ်ႉတီႈတုၵ်းယွၼ်း ၽူႈမီးပုၼ်ႈၽွၼ်းၼႂ်းပိုၼ်ႉတီႈ ဝႆႉၼမ်ႉၼၵ်းသေယဝ်ႉ  ၵႄႈၶႆ လွင်ႈၸႂ်ႉယႃႈမဝ်းၵမ်လႄႈ တေလႆႈမီးၵၢၼ်ဢဝ်ပုၼ်ႈၽွၼ်းႁႄႉႁၢမ်ႈ ။ တေလႆႈမီးပၵ်းပိူင်မၢႆမီႈ ၵုမ်းထိင်း ဢဝ်လိူင်ႈၵႂႃႇ  လွင်ႈဢၼ်ဝႆႉမဝ်ၼိူဝ်ယႃႈမဝ်းၵမ်သေ ၼေႃႇတႅၼ်းၶိူဝ်းၵိၼ်ၵိၼ်တၢႆတၢႆယူႇၸိူင်ႉၼႆ – ၵူၼ်းပိုၼ်ႉတီႈလၢတ်ႈ ။

ပေႃးဢမ်ႇၵႄႈလိတ်ႈပၼ်ႁႃၼႆႉ တူင်ႇဝူင်းတေႁၢင်ႈႁၢႆႉၵႂႃႇႁႅင်း ၊ ၵူၼ်းလၵ်ႉၵူၼ်းၸူၼ် ၵေႃႈတေလိူင်ႇၼမ်  ၊ ၵူၼ်းၼုမ်ႇဢၼ်တူင်ႇဝူင်းၵူၼ်း မုင်ႇမွင်းဝႆႉဝႃႈ ပဵၼ်ၼေႃႇတႅၼ်းၶိူဝ်းမိူဝ်းၼႃႈ ၼႆၼၼ်ႉၵေႃႈ တေလူႉသုမ်းတၢႆႁၢႆလႄႈ ၸၢင်ႈႁဵတ်းႁႂ်ႈ   တူၵ်းသုမ်း ၵူႈၾၢႆႇၾၢႆႇ ဢဵၼ်ႁႅင်းၵူၼ်းၵေႃႈတေဢႄႇလူင်း ပေႃးဢမ်ႇဢဝ်လိူင်ႇလႆႈ ဢမ်ႇႁႄႉၵင်ႈပၼ်လႆႈၽေးၸိူဝ်းၼႆႉၸိုင် ၸိူဝ်ႉၸၢတ်ႈ ဝၢၼ်ႈမိူင်း တေမီးလွင်ႈသုမ်းယဝ်ႉသုမ်းထႅင်ႈၵူၺ်း ဝႃႈၼႆ  ။  

KTV ၵၢပ်ႈပၢၼ်ယၢမ်းလဵဝ် ဢမ်ႇၸႂ်ႈဝႃႈ ပဵၼ်တီႈႁွင်ႉၵႂၢမ်း ယူတ်းယႃႇၸႂ်ၵူၺ်းယဝ်ႉ ၊ လႆႈယႃႈမဝ်းၵမ် ၵူႈသႅၼ်းသႅၼ်း ၊ မိူၼ်ၼင်ႇ K ၊  Happy Water ၊ E  ၊ Ice ၸိူဝ်းၼႆႉ ။

 ယႃႈ  K ဢၼ်ဝႃႈၼၼ်ႉ   ပဵၼ်ၽွင် ။ ပဵၼ်မဵဝ်းဢၼ်ဢဝ်သုတ်ႇၶဝ်ႈၼႂ်း ႁူးၶူႈၼင်ႇ။ ပဵၼ်ယႃႈမဝ်းၵမ်သႅၼ်းၼိုင်ႈၼင်ႇၵဝ်ႇ။    K ၼႆႉၼိုင်ႈထူင်မီးၵႃႈၶၼ် 8 မိုၼ်ႇ ထိုင်  2 သႅၼ်ပျႃး။ 

  ပေႃးသုတ်ႇ ယႃႈ  K ၼမ် ၽွင်ယႃႈၶဝ်ႈၵႂႃႇၶၢင်ႉၶမ် ၼႂ်းႁူးၶူႈၼင်၊ ၶူႈၼင်တေတႅၵ်ႇလိူတ်ႈ၊ ႁူဝ်ၶႆႈ၊ လီႇႁူၵႅၼ်းၸိူဝ်းၼႆႉ။

“ၵူၼ်းၵိၼ်ယႃႈ K  –  Happy Water ၸိူဝ်းၼႆႉဝႆႉၼႆ  ႁူႉလီၼႃႇ ၊ ပေႃးၶဝ်ၵိၼ်ဝႆႉ ၵၢင်ၶမ်ႈၼႆ ပေႃးၵၢင်ၼႂ် မႃး ၶဝ်တေတူင်ႉတူင်ႉတိုၼ်ႇတိုၼ်ႇ ဢမ်ႇၶႂ်ႈလပ်းၶႂ်ႈၼွၼ်း ၊ ပေႃးထႅင်ႈဝၼ်းမႃးၼႆ မိူၼ်ၵူၼ်းဢမ်ႇယူႇလီ ၊  ဢမ်ႇမီးႁႅင်း ၊ ဢမ်ႇၶႂ်ႈႁဵတ်းသင် ၶႂ်ႈၼွၼ်းယူႇၼႂ်းၽႃႈ  ဢမ်ႇၶႂ်ႈပဵၼ်တူဝ်ယဝ်ႉ”- ဝႃႈၼႆ ။

ၼႂ်းၼၼ်ႉ ယႃႈ Happy Water ၼႆႉမီးၽေးတေႃႇလုၵ်ႈဢွၼ်ႇ/ၵူၼ်းၼုမ်ႇႁၢႆႉႁႅင်းလိူဝ်ပိူၼ်ႈသုတ်း။ ႁၢင်ႈၾၢင်ပဵၼ်ၽွင် ၊ ပဵၼ်မဵဝ်းဢၼ်ၵိၼ်တၢင်း Cocktail ၊ ၼမ်ႉ ၊ လဝ်ႈ ၸိူဝ်းၼႆႉ ။ ၼိုင်ႈထူင်မႃးၼွၵ်း လႆႈၵွၵ်းဢွၼ်ႇ 6 ၵွၵ်း ။ ၼိုင်ႈထူင်ႇၼႆႉ သိုဝ်ႉၶၢႆၵၼ် 2 သႅၼ် ထိုင် 4 သႅၼ်ပျႃး။

ယႃႈမဝ်းၵမ်ၸိူဝ်းၼႆႉပေႃးသုတ်ႇ/ ၵိၼ်မႅၼ်ႈယဝ်ႉၸိုင် ႁဵတ်းႁႂ်ႈၵူၼ်းဢမ်ႇႁိူဝ်ႉဢူၼ်ႈ    ဢမ်ႇၶႂ်ႈလပ်းၶႂ်ႈၼွၼ်း   ။ ၵူၺ်းၵႃႈ ပေႃးၵိၼ်ယဝ်ႉ တၵ်းလႆႈတူင်ႉတူင်ႉတိုၼ်ႇတိုၼ်ႇ ၵျွၵ်းၵျွၵ်းဝႅၼ်ဝႅၼ်ယူႇတႃႇသေႇ လိူတ်ႈၸင်ႇတေၸႅဝ်ႈ ။ ပေႃးၵိၼ်ယဝ်ႉသေ ယူႇၼိမ်ၼိမ်ၸိုင် လိူတ်ႈတေတုင်၊ ၵူၼ်းၼႆႉတေ ၵတ်းလၢင်ႈ ၊ ၼိူဝ်ႉၼင်ၸဵပ်း ၊ ဢဵၼ်ၶဵင်ႈမႃး ။ သင်ၵိၼ်ၼမ်ပူၼ်ႉတႄႉ ၸိူင်ႉႁိုဝ်ၵေႃႈ တိုၼ်းဢမ်ႇလွတ်ႈတၢႆ – ၵူၼ်းႁူႉလွင်ႈ Happy Water ၵေႃႉၼိုင်ႈလၢတ်ႈၼင်ႇၼႆ  ။

ၸွမ်းၼင်ႇ ၾၢႆႇပၢႆးသၢႆႈ ထတ်းထၢတ်ႈယဝ်ႉသေ တႅမ်ႈႁၢႆးငၢၼ်းဝႆႉတႄႉ – Happy Water ၼႆႉပေႃးၵိၼ်ၶဝ်ႈၵႂႃႇၼႂ်းတူဝ်ယဝ်ႉ ထၢတ်ႈယႃႈမဝ်းၵမ်ၼၼ်ႉၵႂႃႇတဵင်သႂ်ႇ သဵၼ်ႈဢဵၼ်ဢႃႇရူင်ႇ တၢင်းႁူႉဢၼ်လမ်ႇလွင်ႈၼၼ်ႉပႅတ်ႈသေ ႁဵတ်းႁႂ်ႈၵူၼ်းမိင်းမဝ်း၊ လိုမ်းတူဝ်လိုမ်းၶိင်း  ဢမ်ႇပေႉတူဝ် ဢမ်ႇၸွႆႈတူဝ်ၵဝ်ႇလႆႈသင်သေဢိတ်း။ ၵွပ်ႈၼႆ ပေႃးပဵၼ်ၼၢင်းယိင်းဢွၼ်ႇၵိၼ်ၼႆၸိုင် ၸၢင်ႈမီးၽေးထုၵ်ႇၵၼ်ႉၸၼ်လူလၢႆ၊ ထုၵ်ႇပေႃႉထုပ်ႉႁဵတ်းႁၢႆႉ ၊ ထုၵ်ႇလၵ်ႉၶူဝ်းၶွင် ဢၼ်မီးၵႃႈၶၼ်ၵိုၵ်းတူဝ်။

Happy Water ၼႆႉပဵၼ်ယႃႈမဝ်းၵမ်လေႃးလႄးလႄႈ ပေႃးၵိၼ်တိၵ်းတိၵ်း ၸၢင်ႈၸပ်းၸွႆးယိၼ်ႉမၼ်းသေ ယိင်ႈႁိုင်ယိင်ႈလႆႈၵိၼ်ထီႇ/ၼမ်မႃးလိူဝ်ၵဝ်ႇတိၵ်းတိၵ်း ၸင်ႇပေႇယိၼ်ႉမၼ်း။ ပေႃးၵိၼ်ၼမ် ၵိၼ်တႃႇသေႇၸိုင် မီးၽေးတေႃႇဢၢင်ႇၵႃႇတူဝ်ၶိင်းႁဝ်း။ မိူၼ်ၼင်ႇ ႁဵတ်းႁႂ်ႈသဵၼ်ႈဢႃႇရူင်ႇဢဵၼ်ႁူႉႁဝ်းၵွႆ၊ လွတ်ႈလူမ်းထူၺ်ႈၸႂ်ႁဝ်းလူႉ၊ ႁဵတ်းႁႂ်ႈႁႅၼ်းတဵၼ်ႈႁူဝ်ၸႂ်ဢမ်ႇမၢၼ်ႇမႅၼ်ႈ၊ ဢၼ်ႁၢႆႉႁႅင်းသုတ်းတႄႉ ၸၢင်ႈပဵၼ်သျွၵ်ႉ သေထိုင်တၢႆ။ ၼႂ်းဝၼ်းမိူဝ်ႈၼႆႉ ၵူၼ်းၼုမ်ႇၼင်ႇၵၼ် ဢမ်ႇၼၼ် ပေႃႈလဵင်ႉၵူၼ်းၵႃႉၶၢႆယႃႈမဝ်းၵမ် Happy Water  ၶဝ် တေဢုပ်ႇလၢတ်ႈသိုဝ်ႉၶၢႆၵၼ်ၼႂ်းပွၵ်ႉၼႂ်းယွမ်ႇ တၢင်းဢွၼ်ႊလၢႆႊမႃးလွတ်ႈလွတ်ႈလႅဝ်းလႅဝ်း လူၺ်ႈဢမ်ႇၵူဝ်ၵိၼ်ၽႂ် ဢမ်ႇၵဵင်ၸႂ်ၽႂ်။ ၶဝ်တေလၢတ်ႈဝႃႈ – Happy Water  မီးၽွၼ်းလီတေႃႇပၢႆးယူႇလီ ၼႆသေ ႁူၺ်းၶၢႆႁႂ်ႈမႃးသိုဝ်ႉၵိၼ်တူၺ်း ။

ၵူၺ်းၵႃႈ  ၽူႈလူင်ႉလႅၼ်ႇၾၢႆႇပၢႆးထၢတ်ႈၶႅမ်ႊမီႊၶိူဝ်ႊၶဝ် ထတ်းတူၺ်းတႄႉ Happy Water  ၼႆႉဢမ်ႇမီးၽွၼ်းလီတွၼ်ႈတႃႇပၢႆးယူႇလီသင်သေဢိ တ်း။ ၵူၺ်းပဵၼ်ယႃႈမဝ်းၵမ်ဢၼ်မီးၽေးတေႃႇတူဝ်ၸဝ်ႈၵဝ်ႇၵူၺ်းဢမ်ႇၵႃး ပေႃးၵိၼ်ယဝ်ႉ ယင်းၸၢင်ႈသၢင်ႈပၼ်ႁႃပၼ်တူင်ႇဝူင်းၵူၼ်း ဢမ်ႇယဝ်ႉဢမ်ႇတူဝ်ႈ။

ၵွပ်ႈၼႆၸုမ်းၾၢႆႇႁႄႉၵင်ႈယႃႈမဝ်းၵမ်ၶဝ်ႈသူႇတူင်ႇဝူင်းၵူၼ်းၶဝ်တႄႉလၢတ်ႈဝႃႈ – လုၵ်ႈလၢၼ်ၵူၼ်းၼုမ်ႇၽႂ်သေဢမ်ႇဝႃႈ တႃႇတေႁၢင်ႇယၢၼ်ၽေးယႃႈမဝ်းၵမ် Happy Water ၼၼ်ႉ – သင်ဝႃႈထုၵ်ႇႁူၺ်းႁွင်ႉႁႂ်ႈၸိမ်း ႁႂ်ႈၵိၼ်တူၺ်းၵေႃႈလီ၊ ၼႂ်းၸႂ်ၸဝ်ႈၵဝ်ႇဢွၵ်ႇမႃးၶႂ်ႈၸိမ်းတူၺ်းၵေႃႈလီ တိုၼ်းယႃႇယွမ်းႁဵတ်းၸွမ်းလႃးလႃး။ သင်ဝႃႈၵႂႃႇၼႂ်းႁၢၼ်ႉၵိၼ်ၵျေႃႇမူၼ်ႈသိူဝ်း ၸိူဝ်းၼႆႉၵေႃႈ ယႃႇယွမ်းၵိၼ်ၼမ်ႉသူမ်ႈၼမ်ႉဝၢၼ်ႈ ဢၼ်ၵူၼ်းပႅၵ်ႇၼႃႈပႅၵ်ႇတႃ ၵူၼ်းဢမ်ႇႁူႉၸၵ်းဢဝ်မႃးလဵင်ႉၼၼ်ႉလႃးလႃး- ဝႃႈၼႆ။