ဝၼ်းတီႈ 4/11/2025 သိုဝ်ႇၶၢဝ်ႇမိူင်းၶႄႇပိုၼ်ၽၢဝ်ႇဝႃႈ လုမ်းတြႃးဝဵင်း သျႅၼ်ႊၵျႅၼ်ႊ ၸႄႈမိူင်းၵႂၼ်ႊတူင်ႊ မိူင်းၶႄႇ တႅပ်းတတ်းပၼ်တူတ်ႈတၢမ်ႇတၢႆလႄႈတၢမ်ႇၶွၵ်ႈ ၸုမ်း ပၢႆသဝ်ၶျိူင် ႁူဝ်ပဝ်ႇၵဝ်ႇ ၼႃႈလိၼ်ၽွင်းငမ်းတူဝ်ၵဝ်ႇ ၵဝ်ႈၵၢင်ႉ လႄႈလုၵ်ႈၼွင်ႉမၼ်း ဝႃႈၼႆ။
ပၢႆသဝ်ၶျိူင် Bai Suo cheng၊ ပၢႆယိင်သၢင်ႊ Bai Yingcang၊ ယၢင်လီႇၶျၢင်ႊ Yang Liqiang၊ ႁူ သႅဝ်ၵျႅင်ႊ Hu Xiaojiang လႄႈ ၶျိူၼ် ၵႂၢင်ႊယိ Chen Guangyi ၶဝ် 5 ၵေႃႉတႄႉ ၺႃးတူတ်ႈတၢမ်ႇတၢႆၵမ်းလဵဝ်။
ဢၼ်ပဵၼ် လီ ၾူႊသူဝ်ႇ Li Fushou လႄႈ လီသိုဝ်ႇတိူဝ် Li Zhide ၶဝ် 2 ၵေႃႉတႄႉ ၺႃးတူတ်ႈတၢမ်ႇၶွၵ်ႈ 2 ပီယဝ်ႉၸင်ႇၺႃးတၢမ်ႇတၢႆ။
ၼႂ်းၸုမ်းၵဝ်ႈၵၢင်ႉ ဢၼ်ၺႃးၶႄႇတီႉမိူဝ်းတႅပ်းတတ်းတြႃး တီႈမိူင်းၶႄႇၼၼ်ႉ ဢမ်ႇၵႃး 7 ၵေႃႉၼႆႉၵူၺ်း။
မိူၼ်ၼင်ႇ ၵူဝ် ၵျႅၼ်ႊၸိူင်ႊ Guo Jianzheng လႄႈ ၽၼ်ႊသျႅၼ်ႉ Pan Xian ၶဝ် 5 ၵေႃႉသမ်ႉၺႃးတူတ်ႈၶွၵ်ႈသုတ်းၸူဝ်ႈ။
ဢၼ်ပဵၼ် လီ လူင်ႁူဝ် Li Longhua လႄႈ လေႃႇ ဝိူၼ်တိင်ႊ Luo Wending ၶဝ် 9 ၵေႃႈသမ်ႉ ၺႃးတူတ်ႈၶွၵ်ႈ 20 ပီထိုင် 30 ပီသေဢမ်ႇၵႃး ၺႃးတူတ်ႈယိုတ်းၶူဝ်းၶွင်ဢၼ်မီးၵႃႈၶၼ်တင်းမူတ်း၊ ဝၢႆးပူၼ်ႉတူတ်ႈၶွၵ်ႈယဝ်ႉ တေၺႃးတူတ်ႈတၢမ်ႇလိုပ်ႈဢွၵ်ႇမိူင်း ဢမ်ႇပၼ်ၶဝ်ႈမိူင်းၶႄႇသေဢိတ်းယဝ်ႉ ၸဵမ်ၸိူဝ်းၼႆႉ – သိုဝ်ႇၶၢဝ်ႇၶႄႇ ပိုၼ်ၽၢဝ်ႇၼင်ႇၼႆ။
ၵူၼ်းၵဝ်ႈၵၢင်ႉ ၸိူဝ်းၺႃးမိူင်းၶႄႇတီႉၺွပ်းၵႂႃႇပၼ်တူတ်ႈတၢမ်ႇၼၼ်ႉ မိူင်းၶႄႇပိုၼ်ၽၢဝ်ႇဝႃႈ ပိူင်လူင် ပဵၼ်ယွၼ်ႉတၢင်းၽိတ်း လွၵ်ႇလႅၼ်ၵိၼ်ငိုၼ်းတင်းသိုဝ်ႇၼႅင်ႈသၢၼ် (ၵျႃႊၽျႅၼ်ႉ) ၊ ပိုတ်ႇပၢင်တေႃႇလွင်း ၵႃႊသီႊၼူဝ်ႊ၊ ၶႃႈႁႅမ်ပိူၼ်ႈတၢႆလူၺ်ႈတင်ႈၸႂ်၊ ႁဵတ်းႁၢႆႉႁႂ်ႈပိူၼ်ႈမၢတ်ႇၸဵပ်း၊ တီႉၺွပ်းပဵၼ်တူဝ်ယိူဝ်ႇ၊ ထႆၵိၼ်ငိုၼ်း၊ တီႉၺွပ်းၼၢင်းယိင်းၵႂႃႇႁဵတ်းမႄႈမွၵ်ႇယႃႈသေ ပႂ်ႉတတ်းၵိၼ်ငိုၼ်းတွင်းၵႃႈႁူဝ်၊ ႁူၺ်းႁွင်ႉၵူၼ်းၶၢမ်ႈလႅၼ်လိၼ်ၶဝ်ႈဢွၵ်ႇၸိုင်ႈမိူင်းလူၺ်ႈဢမ်ႇပဵၼ်တၢင်းၵၢၼ်၊ ၵေႃႇၵၢၼ်ႁၢႆႉ၊ တေႃႇလွင်း၊ လႅၼ်ငိုၼ်း 29000 လၢၼ်ႉယႂၼ်ႊ၊ ၶႃႈႁႅမ်ၵူၼ်းမိူင်းၶႄႇတၢႆ 6 ၵေႃႉလႄႈႁဵတ်းႁႂ်ႈၵူၼ်းမၢတ်ႇၸဵပ်းတင်းၼမ်၊ ႁဵတ်းဢွၵ်ႇယႃႈမဝ်းၵမ် 11 တၼ်ႊ- ၸဵမ်ၸိူဝ်းၼႆႉဝႃႈၼႆ။
ၼႂ်းဢၼ်ၵူၼ်းၵဝ်ႈၵၢင်ႉထုၵ်ႇၵႂႃႇထတ်းတြႃးတီႈမိူင်းၶႄႇၼႆႉ – တူဝ်ပၢႆသဝ်ၶျိူင် ဢိၵ်ႇ 10 ၵေႃႉၼၼ်ႉတႄႉ တၢမ်တူဝ်သိုၵ်းမၢၼ်ႈၵေႃႉတီႉၺွပ်းသေ မွပ်ႈပၼ်မိူင်းၶႄႇ ၸဵမ်မိူဝ်ႈဝၼ်းတီႈ 30/01/2024 ပုၼ်ႉ။
ပၢႆသဝ်ၶျိူင်ၼႆႉ ၽွင်းပီ 2009 ၼၼ်ႉပဵၼ်ၵေႃႉဢၼ်လုၵ်ႉၽိုၼ်ႉ ၽိူင်ၵျႃးသိူင်းသေ ၶိုၼ်ႈပဵၼ်ႁူဝ်ပဝ်ႈၼႃႈလိၼ်ၽွင်းၵမ်းတူဝ်ၵဝ်ႇ မိူင်းၵဝ်ႈၵၢင်ႉ (ၵေႃႉႁႅၵ်ႈ) တေႃႇထိုင် ပီ 2011 ။ မၼ်းၸၢႆးၼႆႉ ပဵၼ်ၵူၼ်းၸမ်ၸႂ် မိုတ်ႈၵိုဝ်းၵၼ်တင်းသိုၵ်းမၢၼ်ႈ။ သိုၵ်းမၢၼ်ႈ ယူႇလင်ပၼ်ႁႅင်းၵမ်ႉၸွႆႈမႃးတႃႇသေႇ။ ၽွင်းပၢင်လိူၵ်ႈတင်ႈၸိူဝ်းၼၼ်ႉၵေႃႈ မၼ်းၸၢႆးယူႇၼႂ်းပႃႇတီႇသၢင်ႇသီႈ USDP သေ ၶဝ်ႈပၢင်လိူၵ်ႈတင်ႈ ဢွင်ႇပေႉ ၶဝ်ႈယူႇၼႂ်းသၽႃးမႃးတႃႇသေႇ။ ထိုင်မႃးပီ 2023 ၽွင်း ၽိူင်ၵျႃးသိူင်း ၶိုၼ်းႁႅၼ်းသိုၵ်းလေႃႇတိုၵ်းၶိုၼ်းၼၼ်ႉ ပၢႆသဝ်ၶျိူင်ပၢႆႈၵႂႃႇယူႇၼေႇပျီႇတေႃႇၸွမ်းသိုၵ်းမၢၼ်ႈ။ ထိုင်မႃးပီ 2024 ၽိူဝ်ႇမိူင်းၶႄႇသင်ႇမႃးတီႈသိုၵ်းမၢၼ်ႈ – သိုၵ်းမၢၼ်ႈၵေႃႈဢဝ်တူဝ်ပၢႆသဝ်ၶျိူၼ် တၢင်ႇၶိူင်ႈမိၼ်သူင်ႇမွပ်ႈပၼ်မိူင်ႇၶႄႇငၢႆႈငၢႆႈလီလီ။ တေႃႇထိုင်မိူင်းၶႄႇပေႃးပၼ်တူတ်ႈတၢမ်ႇတၢႆ မိူဝ်ႈဝၼ်းတီႈ 4/11/2025 ၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ