ၵူၼ်းၼုမ်ႇဝဵင်းတူၼ်ႈတီးဢၼ်ၵႂႃႇၾိုၵ်းၵၢၼ်သိုၵ်းၸဵမ်ၸုပ်ႈတီႈ 1 ပုၼ်ႉၼၼ်ႉဢွၵ်ႇႁိူၼ်းၵႂႃႇပေႃးလႆႈ 6 လိူၼ်ယဝ်ႉၸင်ႇလႆႈၶၢဝ်ႇဝႃႈ ၵႂႃႇတၢႆၼႃႈသိုၵ်း ၼႆသေၸင်ႇလႆႈႁႅၼ်းလူႇႁႅၼ်းတၢၼ်းပၼ်။
ၼႂ်းၵၢင်လိူၼ်ဢေႃႊၵတ်ႊသ်ၼႆႉ ၵၢင်ႉၵႄႇ ယူႇပွၵ်ႉလၼ်းမတေႃႇ (လမ်းမတော်) မႃးၸႅင်ႈတီႈပေႃႈမႄႈ ၵူၼ်းႁိူၼ်း မွင်ႇၶျၢၼ်းမျေႉဢွင်ႇ (ၼုမ်ႇၸၢႆးဢၼ်ထုၵ်ႇႁွင်ႉၵႂႃႇ ၾိုၵ်းၵၢၼ်သိုၵ်း ၸုပ်ႈထိၼိုင်ႈ) ၼၼ်ႉဝႃႈ ၵႂႃႇတၢႆၼႃႈသိုၵ်းယဝ်ႉၼႆလႄႈ ပေႃႈမႄႈၸင်ႇလႆႈႁႅၼ်းသွမ်းလူႇတၢၼ်းပၼ်ၼႂ်းဝၼ်းတီႈ 12/8/2025 ၼႆႉဝႃႈၼႆ ။
မွင်ႇၶျၢၼ်းမျေႉဢွင်ႇ/ဢွင်ႇဢွင်ႇ (ချမ်းမြေ့အောင်) ဢႃယု 31 ပီ ၼႆႉ ၵၢင်ႉၵႄႇၼႂ်းပွၵ်ႉ လူင်းၵဵပ်းသဵၼ်ႈၸိုဝ်ႈ သေသူင်ႇတူဝ်ၵႂႃႇၾိုၵ်းၵၢၼ်သိုၵ်း တၢင်းထုင်ႉဝဵင်းႁူဝ်ပူင်းပုၼ်ႉ ၸဵမ်မိူဝ်ႈ ဝၼ်းတီႈ 28/4/ 2025။ ၸဵမ်မိူဝ်ႈဢွၵ်ႇႁိူၼ်းၵႂႃႇၼၼ်ႉပေႃႈမႄႈၵူၼ်းတၢင်းႁိူၼ်းဢမ်ႇလႆႈငိၼ်းၶၢဝ်ႇႁူႉသင်။ ဢမ်ႇလႆႈတၢင်းၵပ်းသိုပ်ႇတိတ်းတေႃႇ တၢင်းႁိူၼ်း။
ၵူၼ်းၸမ်ၸႂ် မုင်ႉႁေႃႁိူၼ်း ဢွင်ႇဢွင်ႇ လၢတ်ႈဝႃႈ – “တင်းပေႃႈမႄႈၶဝ် လႆႈၵပ်းသိုပ်ႇၵမ်းလိုၼ်းသုတ်းပဵၼ် မိူဝ်ႈမၼ်းမီးၼႃႈသိုၵ်းတီႈလႃႈသဵဝ်ႈ ၊ မၼ်းလၢတ်ႈဝႃႈ ၶႃႈတႄႉလႆႈလႅၼ်ႈပၢႆႈယူႇယဝ်ႉ ၊ drone ၵေႃႈမႃးပၼ်ႇလဵပ်ႈ ၼႆသေဝၢင်းၾူင်းၵႂႃႇ ၸဵမ်မိူဝ်ႈၼၼ်ႉမႃးဢမ်ႇလႆႈတင်းၵပ်းသိုပ်ႇသင်ထႅင်ႈ”- ဝႃႈၼႆ ။
တီႈဝဵင်းတူၼ်ႈတီးၼႆႉ ၵူၼ်းၼုမ်ႇၸိူဝ်းထုၵ်ႇသူင်ႇၵႂႃႇ ၼႃႈသိုၵ်း တၢႆၼႃႈသိုၵ်းၼႆႉ ဢမ်ႇၸႂ်ႈပွၵ်ႈၼႆႉ ပွၵ်ႈလဵဝ် ၊ ၵႂႃႇတၢႆၼႃႈသိုၵ်းသေ ပေႃႈမႄႈ ဢမ်ႇလႆႈႁူႉၶၢဝ်ႇငၢဝ်းသင်ၼႆႉ မီးတင်းၼမ် ။ ယွၼ်ႉၼၼ်လႄႈ ၽႂ်ၵေႃႈ ဢမ်ႇၶႂ်ႈၵႂႃႇၾိုၵ်း ဢမ်ႇၶႂ်ႈၵႂႃႇႁၢပ်ႇၵၢၼ်သိုၵ်း။
ၵဵဝ်လွင်ႈၼႆႉ ၽူႈၶဝ်ႈၸုမ်း TGI Support Revolution လၢတ်ႈၽူႈတွႆႇႁွၵ်ႈဝႃႈ -“ၵူၼ်းတူၼ်ႈတီႈ ၵႂႃႇတၢႆၼႃႈသိုၵ်း မီး 50 ပၢႆယဝ်ႉ ၊ ထႅင်ႈဢိၼ်ႉမႃးၵူၼ်းၼုမ်ႇတေဢမ်ႇမီးယဝ်ႉ ၊ ၵူၼ်းၼုမ်ႇဢၼ်မီးၼႂ်းမိူင်းၵေႃႈ တူဝ်ဢမ်ႇတၢႆၵေႃႈ မိူၼ်ၸၢတ်ႈပၢၼ်တၢႆၵႂႃႇယဝ်ႉ ဢမ်ႇမီးတင်းမုင်ႈမွင်းသင်”-ဝႃႈၼႆ ။
ၸဵမ်မိူဝ်ႈသိုၵ်းမၢၼ်ႈ ၵဵပ်းသိုၵ်းမႃး ၸုပ်ႈၼိုင်ႈပုၼ်ႉ ၶဝ်လၢတ်ႈဝႃႈ တႃႇလူလွမ် ပႂ်ႉဢဝ်ႁူမ်ႇလူမ်ႈ ၼႂ်းဢွင်ႈတီႈၽႂ်မၼ်းၵူၺ်း ဝႃႈၼႆသေတႃႉ ဝၢႆးၾိုၵ်းၵၢၼ်သိုၵ်းယဝ်ႉ ထုၵ်ႇသူင်ႇၸူးၼႃႈသိုၵ်းသေ တၢႆၵႂႃႇ မီးမႃးၼမ် ။ ဢွၼ်တၢင်း သူင်ၵႂႃႇၾိုၵ်းၵၢၼ်သိုၵ်း တီႈဝဵင်းၵဵင်းတုင်ႇသေတႃႉ ယၢမ်းလဵဝ် သူင်ႇၵႂႃႇၾိုၵ်းသိုၵ်းတီႈဝဵင်းလွၵ်ႉၸွၵ်ႇယဝ်ႉ သူင်ႇၼႃႈသိုၵ်း ၵမ်းလဵဝ် – ၵူၼ်းၸၢႆးပိုၼ်ႉတီႈလၢတ်ႈ ။
ၽွင်းသိုၵ်းမၢၼ်ႈၵဵပ်းၵူၼ်းမိူင်းၵႂႃႇႁၢပ်ႇထၢမ်းၵၢၼ်သိုၵ်းၼၼ်ႉ ၵူၼ်းၼုမ်ႇဢၼ်ၵႆႉၵႂႃႇတၢႆၼႃႈသိုၵ်းတီႈဝဵင်းတူၼ်ႈတီးၼႆႉပဵၼ်ၵူၼ်းၼႂ်းပွၵ်ႉ ၵျွင်းၵျီးသူႉ(ကျောင်းကြီးစု) ၊ ရတၼႃႇသီႇရီႉ (ရတနာသီရိ) ၊ ၵၢၼ်ႇတႃႇ (ကံသာ) ၊ ၸိင်ႇပၢၼ်း (စိန်ပန်း) ၊ ၺွင်ႇၽိဝ်ႇသၶၢၼ်း (ညောင်ဖြူစခမ်း) ၊ ၶျၢၼ်းမျႃႉတႃႇသီႇ ( ချမ်းမြသာစည် ) ၸိူဝ်းၼႆႉ ၼႆ ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ