ပီၼႆႉယွၼ်ႉၾိင်ႈၾႃႉရႃႇသီႇလႅၵ်ႈလၢႆႈၵတ်းႁႅင်းလႄႈ ၼႂ်းၶၢဝ်းတၢင်း လိူၼ်လဵဝ်ၵူၺ်း  ၵူၼ်းထဝ်ႈ ၼႂ်းပၢင်သဝ်းၵူၼ်းပၢႆႈၽေးသိုၵ်း  ဝဵင်းပၢင်လွင်း ၸိုင်ႈတႆးပွတ်းၸၢၼ်း  တၢႆ 6 ၵေႃႉ  ။

ၼႂ်းလိူၼ် ၼူဝ်ႊဝႅမ်ႊပိူဝ်ႊ ၾိင်ႈၾႃႉရႃႇသီႇလႅၵ်ႈလၢႆႈ  ၼႂ်းမိူင်းတႆးၵတ်းလိူဝ်ၸႂ်ႁႅင်းလႄႈ ၵူၼ်းထဝ်ႈလုၵ်ႈဢွၼ်ႇ ဢွၼ်ၵၼ်ပဵၼ်ဢမ်ႇယူႇလီ။ တီႈပၢင်သဝ်းၵူၼ်းပၢႆႈၽေးသိုၵ်း ဝဵင်းပၢင်လွင်းၼၼ်ႉၵေႃႈ ၵူၼ်းပၢႆႈၽေးသိုၵ်း ဢမ်ႇမီးၽႃႈႁူမ်ႇၶူဝ်းၼွၼ်းတဵမ်ထူၼ်ႈ ၼႂ်းၶၢဝ်းတၢင်းလိူၼ်လဵဝ်ၵူၺ်း ၵူၼ်းပၢႆႈၽေးသိုၵ်း တီႈဝၢၼ်ႈၼွင်တရႃႉလႄႈ ဝၢၼ်ႈၼွင်ၶႃ ၊ ဝၢၼ်ႈပၢင်ၶွၼ်ႇ တၢႆ 6 ၵေႃႉ ပဵၼ် ထဝ်ႈယိင်း 4 ၵေႃႉ လႄႈ ထဝ်ႈၸၢႆး 2 ၵေႃႉ လူႉတၢႆ ဝႃႈၼႆ ။  

ၽူႈၶၢၼ်ပၢၵ်ႇၸုမ်းၵူၼ်းၼုမ်ႇဝဵင်းၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ -“တီႈလိုဝ်ႈသဝ်းၶဝ်ပဵၼ်သုမ်ႉ ၽႃႈယၢင်ၵူၺ်း ႁႅင်းၵတ်းသမ်ႉၶိုၼ်ႈသုင်ႁႅင်းၼႃႇ ထိုင်တီႈဢမ်ႇၶၢမ်ႇလႆႈသေတၢႆၵႂႃႇဢေႃႈ။ ပေႃးၵၢင်ၶိုၼ်း လိုၵ်းၼႆ တီႈပၢင်လွင်းၼႆႉ ႁႅင်းၵတ်းလူင်းထိုင် 4°  ၊ ပေႃးၵၢင်ၼႂ်သမ်ႉလုမ်းထွင်းႁႅင်းၼႃႇ ၊ တီႈသုၼ်ပၢႆႈ ၽေးသိုၵ်းၵေႃႈ ၵူၼ်းဢမ်ႇယူႇလီၵေႃႈမီးၼမ်”- ဝႃႈၼႆ ။

မိူဝ်ႈလဵဝ် ထိုင်ၶၢဝ်းၵတ်းယဝ်ႉလႄႈ ၵူၼ်းပၢႆႈၽေးပၢင်တိုၵ်း ၸိူဝ်းယူႇသဝ်းဝႆႉတီႈပၢင်သဝ်းၵူၼ်းပၢႆႈၽေး ၼႂ်းၸႄႈဝဵင်းပၢင်လွင်း ႁဵင်ၵေႃႉပၢႆ လူဝ်ႇတၢင်းၵမ်ႉၸွႆႈ ၽႃႈၽႅၼ်ႇၶူဝ်းၼွၼ်း၊ သိူဝ်ႈၶူဝ်းဢုၼ်ႇ၊ ယႃႈယႃ လႄႈ ၶဝ်ႈၼမ်ႉတၢင်းၵိၼ်ၸဵမ်ၸိူဝ်းၼႆႉ ။

ၵူၼ်းမိူင်းၼႂ်းပိုၼ်ႉတီႈဝဵင်းပၢင်လွင်း လၢတ်ႈၼႄတီႈၽူႈတွႆႇႁွၵ်ႈဝႃႈ -“ လုၵ်ႈဢွၼ်ႇလႄႈၼၢင်းယိင်း ၵေႃႈ ဢွၼ်ၵၼ်ၼၢဝ်၊ ပဵၼ်ဝတ်း၊ ပဵၼ်ၶႆႈ၊ ဢမ်ႇယူႇလီၵေႃႈမီးတင်းၼမ်။ ၵမ်ႈၼမ်ၼႆႉ ဢမ်ႇမီးၶူဝ်းဢုၼ်ႇ၊ ၽႃႈႁူမ်ႇ၊ ၽႃႈသိူဝ်ႇၸိူဝ်းၼႆႉ။ ယႃႈယႃ တင်း တႃႇၵိၼ်ယႅမ်ႉၵေႃႈ ယၢပ်ႇၽိုတ်ႇဝႆႉတေႉတေႉ”- ဝႃႈၼႆ ။  

တီႈပၢင်သဝ်းၵူၼ်းပၢႆႈၽေးသိုၵ်းၼၼ်ႉ ၵမ်ႈၼမ်ပဵၼ်ၵူၼ်းမိူင်း ၼႂ်းၸႄႈမိူင်းယၢင်းလႅင် လႄႈ ၸႄႈဝဵင်းၾၢႆၶုၼ် ယူႇသဝ်းဝႆႉ။ ဢိင်ၼိူဝ်ငဝ်းလၢႆးပိုၼ်ႉတီႈပႆႇၼိမ်သဝ်းလႄႈ ၵူၼ်းပၢႆႈၽေးသိုၵ်း ၼပ်ႉႁူဝ်ႁဵင်ၵေႃႉ ပႆႇၸၢင်ႈပွၵ်ႈၶိုၼ်းႁိူၼ်း ႁိုင်မွၵ်ႈၼိုင်ႈပီပၢႆယဝ်ႉၼႆ- ၵူၼ်းမိူင်းၼႂ်းပိုၼ်ႉတီႈလၢတ်ႈ ။  

ၸႄႈဝဵင်းပၢင်လွင်း ၸႄႈတွၼ်ႈၵၢတ်ႇလေႃႉ မိူင်းတႆးပွတ်းၸၢၼ်းၼႆႉ တၢင်းသုင်ၼိူဝ်ၼႃႈၼမ်ႉပၢင်ႇလၢႆႇမီး 4800 ထတ်းလႄႈ ပေႃးထိုင်ၶၢဝ်းၵတ်းမႃးၸိုင် မူၺ်ၼၢႆးတူၵ်းႁႅင်းသေ ၵတ်းႁႅင်းၵူႈပီပီ ။

လိူဝ်ၼၼ်ႉ ၵူၼ်းပၢႆႈၽေးသိုၵ်း ႁူဝ်ၼပ်ႉၵူၼ်း 500 ၵေႃႉပၢႆ ၸိူဝ်းယူႇသဝ်းဝႆႉၼႂ်းၸႄႈဝဵင်းပၢင်လွင်း-ဝဵင်း ၾၢႆၶုၼ်ၵေႃႈ လူဝ်ႇတၢင်းၸွႆႈထႅမ် ၶူဝ်းလဵင်း၊ ၽႃႈႁူမ်ႇၶူဝ်းၼွၼ်းလႄႈ ယႃႈယႃ မိူၼ်ၵၼ် – လႆႈႁူႉၼင်ႇ ၼႆ။