သိုၵ်း MNDAA ပၼ်တူတ်ႈတၢမ်ႇၶွၵ်ႈလႄႈ တၢမ်ႇတၢႆ ၵူၼ်း 5 ၵေႃႉ တီႈမိူင်းၵူဝ်း ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ။
မိူဝ်ႈၼႆႉဝၼ်းတီႈ 11/11/2025 ယၢမ်းၵၢင်ၼႂ် သိုၵ်းၵဝ်ႈၵၢင်ႉ ဢဝ်ၵူၼ်းၸိူဝ်းဢၼ်ၶဝ်တီႉၺွပ်း ထတ်းထွင် ဝႆႉဝႃႈ မီးတၢင်း ၽိတ်းယႂ်ႇၼႆသေ ပၼ်တူတ်ႈတၢမ်ႇ ၶွၵ်ႈလႄႈ တၢမ်ႇတၢႆ တေႃႇၼႃႈၵူၼ်းမိူင်း။
ၵူၼ်းမီးတၢင်းၽိတ်းဢၼ်ၶဝ်ဢဝ်ဢွၵ်ႇမႃး 5 ၵေႃႉၼၼ်ႉ ပဵၼ်ၵူၼ်းမီးတၢင်းၽိတ်း မိူၼ်ၼင်ႇ ၵၼ်ႉၸၼ်လူလၢႆ လႄႈၶႃႈႁႅမ်ၵူၼ်းတၢႆ ၸိူဝ်းၼႆႉ ။ သိုၵ်းၵဝ်ႈၵၢင်ႉ ပိုၼ်ၽၢဝ်ႇၼႄပိုၼ်းတူဝ် ႁူဝ်ယွႆႈ တင်းသဵင်ႈ သေ တႅပ်းတတ်း ပၼ်တူတ်ႈတၢမ်ႇတၢႆ 3 ၵေႃႉ တူတ်ႈတၢမ်ႇၶွၵ်ႈ 2 ၵေႃႉ လႆႈႁူႉၼင်ႇၼႆ ။
ၵူၼ်းၸၢႆးၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၺႃးတၢမ်ႇတၢႆ 3 ၵေႃႉ ၊ ပဵၼ် ၸၢဝ်းမၢၼ်ႈၵေႃႉၼိုင်ႈ ၊ၸၢဝ်းတႆးၵေႃႉၼိုင်ႈလႄႈ ၸၢဝ်းၶႄႇၵေႃႉၼိုင်ႈ ၊ ထႅင်ႈသွင်ၵေႃႉတႄႉ တၢမ်ႇၶွၵ်ႈ14 ပီ ၼိုင်ႈၵေႃႉလႄႈ 10 ပီၼိုင်ႈၵေႃႉ ” – ဝႃႈၼႆ ။
ၼႂ်းၵူၼ်းၺႃးတၢမ်ႇတၢႆ 3 ၵေႃႉၼၼ်ႉ ပဵၼ်မၢၼ်ႈၵေႃႉၼိုင်ႈ – တႆးၵေႃႉၼိုင်ႈလႄႈ ၶႄႇၵေႃႉၼိုင်ႈ၊ ၸၢဝ်းမၢၼ်ႈၼၼ်ႉ မီးတၢင်းၽိတ်း ၶႃႈႁႅမ် မႄႈလဵင်ႉလႄႈ လၢဝ်းပၢၼ်းၵေႃႉၼိုင်ႈသေ ပၢႆႈၵႂႃႇယူႇတီႈ ပၢင်သၢႆး ၊ သိုၵ်းၵဝ်ႈၵၢင်ႉၶိုၼ်းၵႂႃႇတီႉၺွပ်းလႆႈမႃး ၊ ၸၢဝ်းတႆး ၼၼ်ႉသမ်ႉ ပဵၼ်ၵူၼ်းယူႇ တင်းဝၢၼ်ႈ ၼမ်ႉၸွၼ်ႇ။ တၢင်းၽိတ်းယိုဝ်းပိူၼ်ႈတၢႆ ။ ၸၢဝ်းၶႄႇဢၼ်ၺႃးတၢမ်ႇတၢႆၼၼ်ႉၵေႃႈ ပဵၼ်ၵူၼ်း ယူႇဝၢၼ်ႈ ၼမ်ႉၸွၼ်ႇၼင်ႇၵၼ်။ လူၺ်ႈတၢင်းၽိတ်း ၽိတ်းမေႃးၵၼ်သေ ၽၼ်းသႂ်ႇၵူၼ်းယူႇၸွမ်းၵၼ်ၵၼ် လႄႈ ၸင်ႇၺႃးတၢမ်ႇတၢႆ – ၼႆ ၵူၼ်းယိၼ်းႁၼ်ၸွမ်း လၢတ်ႈၼႄႇၼင်ႇၼႆ ။
ဢၼ်ၺႃးတူတ်ႈၶွၵ်ႈၼၼ်ႉတႄႉ ၵေႃႉၼိုင်ႈပဵၼ်ၸၢဝ်းမၢၼ်ႈ ။ ပဵၼ်ၵူၼ်းႁူဝ်ပၢင် ၶၢႆႉမႃးယူႇလႃႈသဵဝ်ႈ၊ မႃးပိုတ်ႇႁၢၼ်ႉၶၢႆယႃႈယႃသေ ၽိတ်းမေႃးၵၼ်တင်း ၵူၼ်းႁဵတ်းၵၢၼ်ၸွမ်းၵၼ်လႄႈ ၸင်ႇၺႃးတၢမ်ၶွၵ်ႈ 14 ပီ ၊ ထႅင်ႈၵေႃႉၼိုင်ႈၵေႃႈပဵၼ်ၵူၼ်းမိူင်းမၢၼ်ႈတူင်ႈပဵင်းသေမႃးယူႇတီႈၵူတ်ႉၶၢႆ မႃးႁဵတ်းၵၢၼ်ပေႃႉမၢၵ်ႇဢုတ်ႇ ၊ သမ်ႉမႃးၵၼ်ႉၸၼ်လူလၢႆမေးၼၢင်းပိူၼ်ႈလႄႈ ၸင်ႇၺႃးတၢမ်ႇၶွၵ်ႈ 14 ပီ – ၵူၼ်းပိုၼ်ႉတီႈလၢတ်ႈၼင်ႇၼႆ။
မိူၼ်ၼင်ႇၼႆ ဝၼ်းတီႈ 26/09/2025 ယၢမ်းၵၢင်ၼႂ် 7 မူင်း သိုၵ်းၵဝ်ႈၵၢင်ႉ ဢဝ်ၵူၼ်းၸိူဝ်း မီးတၢင်း ၽိတ်းယႂ်ႇ7 ၵေႃႉ ဢွၵ်ႇမႃးပၼ်ႇလဵပ်ႈၼေၵူၼ်းမိူင်းဝဵင်းသႅၼ်ဝီယဝ်ႉ ပၼ်တူတ်ႈတၢမ်ႇၶႃႈႁႅမ်တၢႆ တေႃႇၼႃႈၵူၼ်းမိူင်းၵႂႃႇ ၼင်ႇၼႆၼင်ႇၵဝ်ႇ။
ၼႃႈလိၼ်ၶိုၵ်ႉတွၼ်းမၢႆ 2 ဢၼ်သိုၵ်းဝႃႉ UWSA ၵုမ်းၵမ်လႄႈ ၼႃႈလိၼ်ၶိုၵ်ႉတွၼ်း မၢႆ 4 တပ်ႉသိုၵ်းမိူင်းလႃး MNDAA ၵုမ်းၵမ်ဝႆႉၼႆႉ ပေႃးမီးၵူၼ်းမီးတၢင်းၽိတ်းၼၵ်းၼႃႁၢဝ်ႈႁႅင်းၼႆ ၵႆႉပူင်တူတ်ႈတၢမ်ႇ၊ ပၼ်တၢင်းၽိတ်း တေႃႇၼႃႈတေႃႇတႃ ၵူၼ်းမိူင်း ၸိူင်ႉၼႆမႃးတႃႇသေႇ။ ယွၼ်ႉတၢင်းၽိတ်းယႂ်ႇႁႅင်းသေ ယိုဝ်းတၢႆတေႃႇၼႃႈ တေႃႇတႃၵူၼ်းမိူင်းတင်းၼမ်ၵေႃႈ ယၢမ်ႈမီးမႃး။
လွင်ႈၼႆႉ ယူႇတီႈ ၸုမ်းတူင်ႉၼိုင်သုၼ်ႇလႆႈၵူၼ်း မိူင်းဝၼ်းတူၵ်း ဢမ်ႇႁၼ်လီၸွမ်း။ ဝၼ်းတီႈ 26/04/2024 ၼႆႉၵေႃႈ ၸၢတ်ႈၸိုင်ႈယူႊရူပ်ႉ EU ဢွၵ်ႇလိၵ်ႈပိုၼ်ၽၢဝ်ႇဝႆႉၽိုၼ်ၼိုင်ႈ။ သႄႉသွမ်းဝႆႉ လွင်ႈပၼ်တူတ်ႈတၢမ်ႇႁၢႆႉႁႅင်းတေႃႇၼႃႈ ၵူၼ်းတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ