ငိုၼ်းတႃႇၵမ်ႉထႅမ်ၵူၼ်းၸိူဝ်းၵႂႃႇၾိုၵ်းၵၢၼ်သိုၵ်းၼႆ သိုၵ်းမၢၼ်ႈၸႂ်ႉၵၢင်ႉၵႄႇၼႂ်းထုင်ႉပူင်း ၵဵပ်းတီႈၵူၼ်းမိူင်းၵူႈလိူၼ်ယူႇၵေႃႈ ၵမ်းၼႆႉသမ်ႉဝႃႈဢမ်ႇမီးၵူၼ်းၵႂႃႇၾိုၵ်းၵၢၼ်သိုၵ်းယဝ်ႉၼႆသေ တေႁႂ်ႈၵူၼ်းသႂ်ႇငိုၼ်းၸိူဝ်းၼၼ်ႉမႃးၸူၵ်းမႄးတႃႇၵႂႃႇၾိုၵ်းၵၢၼ်သိုၵ်းၼႆထႅင်ႈ။
ၵၢင်ႉၵႄႇလၢတ်ႈဝႃႈ တႄႇဢဝ်ၼႂ်းလိူၼ် တီႊသႅမ်ႊပိူဝ်ႊ ပီ 2025 ၼႆႉၵႂႃႇ ၵူၼ်းၸၢႆး ၼႂ်းထုင်ႉပူင်း ဢႃယု 18 ၶိုၼ်ႈၼိူဝ် တေလႆႈၸူၵ်းမႄး တႃႇၵႂႃႇႁၢပ်ႇ ၵၢၼ်သိုၵ်းမၢၼ်ႈ ။
ဢိူင်ႇဢၼ်တေလႆႈၸူၵ်းမႄးတႃႇၵႂႃႇႁၢပ်ႇၵၢၼ်သိုၵ်းမၢၼ်ႈၼၼ်ႉ ပဵၼ်ၼႂ်း ဢိူင်ႇဢတူင်းတေႃႇ ၊ ဢိူင်ႇၼႃးႁီး ၊ ဢိူင်ႇၵၢတ်ႇၵူႇ ထုင်ႉပူင်း ၸႄႈဝဵင်းတူၼ်ႈတီး ၸိူဝ်းၼႆႉ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပဵၼ်ပၼ်ႁႃယႂ်ႇ မီးလွင်ႈၶဵင်ႇတႃႉ တွၼ်ႈတႃႇၵူၼ်းၼုမ်ႇ ပိုၼ်ႉတီႈတႄႉတႄႉ။ ၵူၼ်းၼုမ်ႇၼႂ်းဝၢၼ်ႈၵေႃႈ ယၢမ်းလဵဝ် ပၢႆႈမူတ်းယဝ်ႉ ။ မိူဝ်ႈဢွၼ်တၢင်းတႄႉ ၸၢင်ႈ ၵူၼ်းၵႂႃႇဢဝ် ၊ ၵူၼ်းဢၼ်ၵႂႃႇၵေႃႈ ဢမ်ႇပွၵ်ႈမႃးၶိုၼ်းသေၵေႃႉ။ ယွၼ်ႉၼၼ် တလဵဝ်ၼႆႉ ၽႂ်ၵေႃႈ ဢမ်ႇၶႂ်ႈၵႂႃႇ။ ႁႃၸၢင်ႈၵေႃႈယၢပ်ႇ လိူၼ်တေမႃးၼႆႉ တေလႆႈၸူၵ်းမႄးၶိုၼ်း။ ၽႂ်ၸူၵ်းလႆႈၵေႃႈ မၼ်းၵႂႃႇ”- ဝႃႈၼႆ ။
တႃႇႁၢပ်ႇ ၵၢၼ်သိုၵ်းမၢၼ်ႈၼႂ်းထုင်ႉပူင်း ၼိုင်ႈဢိူင်ႇၼႆႉ လႆႈၵႂႃႇ 2 ၵေႃႉဢမ်ႇၼၼ် 3 ၵေႃႉ ။ ဢမ်ႇမီး ၵူၼ်းၶႂ်ႈၵႂႃႇလႄႈ ၵူၼ်းမိူင်းၼႂ်းပိုၼ်ႉတီႈ လႆႈၸၢင်ႈၵူၼ်းၵႂႃႇႁၢပ်ႇၵၢၼ်သိုၵ်း 80 သႅၼ်ထိုင် 100 သႅၼ်ပျႃး ၵူႈလိူၼ် ဝႃႈၼႆ ။
လိူဝ်ၼၼ်ႉၼႂ်းထုင်ႉပူင်း ၼႆႉတႄႇသိုၵ်းမၢၼ်ႈပိုၼ်ၽၢဝ်ႇႁၢပ်ႇၵၢၼ်သိုၵ်းၼႆႉ လႆႈသႂ်ႇငိုၼ်း တႃႇၵမ်ႉထႅမ် ၵူၼ်းၵႂႃႇႁၢပ်ႇၵၢၼ်သိုၵ်း 1 မိုၼ် ထိုင် 3 မိုၼ်ႇပျႃး ၵူႈလိူၼ် ။ လိူဝ်ၼၼ်ႉဢမ်ႇၵႃး တႃႇၵမ်ႉထႅမ် ပျီႇတူႉၸိတ်ႉ PNO ၵေႃႈ လႆႈပၼ်ငိုၼ်း 6 လိူၼ်ၼိုင်ႈပွၵ်ႈ။ ၼိုင်ႈပွၵ်ႈ 1 မိုၼ်ပျႃးထႅင်ႈ ၼႆယဝ်ႉ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တႃႇၵမ်ႉထႅမ်ၵူၼ်းၵႂႃႇႁၢပ်ႇၵၢၼ်သိုၵ်းၼႆႉ လႆႈသႂ်ႇၵူႈလိူၼ် မႃးမီးၸမ် 2 ပီယဝ်ႉ ၊ ပီၵၢႆလႆႈသႂ်ႇ 1 မိုၼ်ႇ ပီၼႆႉ မိုၼ်ႇသွင် ၊ မၢင်ဝၢၼ်ႈ ၸိူဝ်းလႆႈသႂ်ႇ 3 မိုၼ်ႇၼၼ်ႉ ယၢမ်းလဵဝ်လႆႈသႂ်ႇ 3 မိုၼ်ႇ 5 ႁဵင်ပျႃး ၼမ်မႃးတိၵ်းတိၵ်း။ ၵူၼ်းမိူင်းႁဵတ်းၵၢၼ်ႁႃၵိၼ်တႄႉယၢပ်ႇၼႃႇ ၵူၺ်းၵႃႈၼိုင်ႈလိူၼ်ၼႆႉလႆႈသႂ်ႇငိုၼ်း လၢႆတၢင်းၼႃႇ ၼိုင်ႈလိူၼ်ၼႆႉ ဢၼ်လႆႈသႆႇငိုၼ်း မီးၸမ် 4 မိုၼ်ႁႃႈ ၸိူဝ်းၼႆႉ တႃႇႁႃၵိၼ်လဵင်ႉတွင်ႉၼႆႉယၢပ်ႇမႃးၵူႈမိုဝ်ႉၵူႈဝၼ်း ”- ဝႃႈၼႆ ။
မိူၼ်ၼင်ႇၼႆ တႄႇၼႂ်းလိူၼ် ၼူဝ်ႊဝႅမ်ႊပိူဝ်ႊ ၼႆႉမႃး တီႈဝဵင်းဢေးတႃႇယႃႇ ၸႄႈဝဵင်းတူၼ်ႈတီးၵေႃႈ သိုၵ်းမၢၼ်ႈလူင်းၵဵပ်းတႃႇၵမ်ႉထႅမ် ၵူၼ်းၵႂႃႇႁၢပ်ႇၵၢၼ်သိုၵ်း တိူဝ်းၼမ်မႃး ႁဵတ်းႁႂ်ႈၵူၼ်းမိူင်း ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ ၵူၼ်းပိုၼ်ႉတီႈလၢတ်ႈၼင်ႇၼႆ ။
ဢွၼ်တၢင်း ၵႃႈၵမ်ႉထႅမ် တႃႇၵူၼ်းၵႂႃႇႁၢပ်ၵၢၼ်သိုၵ်းၼႆႉ ၵူၼ်းမိူင်းဝဵင်းဢေးတႃႇယႃႇ ၼိုင်ႈလိူၼ်လႆႈပၼ် 5 မိုၼ်ႇထိုင် 1 သႅၼ်ပျႃး ယၢမ်းလဵဝ် လႆႈပၼ်ထိုင် 2 သႅၼ်ပျႃး ။
လိူဝ်ၼၼ်ႉ ပေႃးပဵၼ် ၵူၼ်းဢႃယုတဵမ် ၶဝ်ႈၼႂ်းသႅၼ်းတႃႇႁၢပ်ႇ ၵၢၼ်သိုၵ်းၼၼ်ႉ သင်ဝႃႈဢမ်ႇယူႇ တီႈႁိူၼ်း(ပေႃးပဵၼ်ၵူၼ်းၵႂႃႇႁဵၼ်းလိၵ်ႈတီႈၸၼ်ႉၸွမ်၊ ၵႂႃႇႁဵတ်းၵၢၼ်မီးဝႆႉတၢင်ႇဝဵင်း) ၸိူဝ်းၼႆႉၵေႃႈ တီႈႁိူၼ်းလႆႈသႂ်ႇငိုၼ်းတႅၼ်းတၢင်ဝႆႉပၼ်ၵူႈလိူၼ်။
ၵူၼ်းဢၼ်ပႃးသဵၼ်ႈသၢႆမၢႆ တႃႇၶဝ်ႈႁၢပ်ႇၵၢၼ်သိုၵ်းၼၼ်ႉသင်ၸိူဝ်ႉဝႃႈ ဢမ်ႇၶႂ်ႈၶဝ်ႈႁၢပ်ႇ ၵၢၼ်သိုၵ်း ၼႆၸိုင် လႆႈၵႂႃႇငူပ်ႉငီႉၵၼ်တၢင်းၵၢင်ႉၵႄႇ ၼႂ်းပွၵ်ႉသေ လႆႈပၼ်ငိုၼ်းတီႈၵၢင်ႉၵႄႇ ၼပ်ႉႁူဝ်သိပ်း သႅၼ်ပျႃးထႅင်ႈ ၼႆယဝ်ႉ ။
သိုၵ်းမၢၼ်ႈပိုၼ်ၽၢဝ်ႇ ၵူၼ်းမိူင်းသႅၼ်းပၢၼ်ၼုမ်ႇ ဢႃယု 18 -35 တေလႆႈႁၢပ်ႇ ၵၢၼ်သိုၵ်းၼႆႉ တႄႇမႃးမိူဝ်ႈပီ 2024 သေလိူၼ် February သေ တႄႇၵဵပ်းၵူၼ်းၵႂႃႇၾိုၵ်းသိုၵ်းၼႂ်းလိူၼ် March ထိုင်ယၢမ်းလဵဝ် မီးၵႂႃႇ ၸုပ်ႈတီႈ 15 ယဝ်ႉ လႆႈႁူႉၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ