လိူၼ်ၼူဝ်ႊဝႅမ်ႊပိူဝ်ႊ ၼႂ်းဝူင်ႈတီႈၼိုင်ႈၼႆႉ ၸုမ်းသိုၵ်းၶၢင် (KIO/KIA) တီႉၺွပ်းလႆႈ ဝႂ်ငိုၼ်းၶႄႇပွမ် တီႈဝဵင်းမၢႆၵျႃႊယၢင် ၸႄႈမိူင်းၶၢင် တႃႇ 6 သႅၼ်ယႂၼ်ႊ (ၵိုင်ႇငိုၼ်းမၢၼ်ႈ 2700 သႅၼ်ပျႃး)။
တီႉလႆႈမိူဝ်ႈဝၼ်းတီႈ 6/11/2025 တီႈၵူၼ်းၸုမ်းၼိုင်ႈ လုၵ်ႉတၢင်းဝဵင်းလိူဝ်ႇ (မၢၼ်းတလေး) တေႃႉၵႂႃႇတၢင်းလႅၼ်လိၼ် မိူင်းၶႄႇၼႆ ၼုမ်ႇၸၢႆးၶၢင် ၵေႃႉႁူႉၸွမ်းပိူင်ပဵၼ်ၼႆႉလၢတ်ႈ ၼႄၼင်ႇၼႆ။
“ငိုၼ်းဢၼ်ၶဝ်ဢဝ်မႃးၼၼ်ႉ မီးငိုၼ်းမၢၼ်ႈ လႄႈ ငိုၼ်းၶႄႇ ပဵၼ်ဢၼ်ပွမ်တင်းသွင်မဵဝ်း။ ၵွၼ်ႇပႆႇတီႉၺွပ်းလႆႈၸုမ်းၶဝ်ၼႆႉ ၸဝ်ႈၼႃႈတီႈၶဝ်လႆႈၶၢဝ်ႇဝႆႉဢွၼ်တၢင်းဝႃႈ မီးၵူၼ်းတေႃႉငိုၼ်းတူႉ၊ ငိုၼ်းပွမ်မႃးၼႆလႄႈ ၸင်ႇပၵ်းတႃပႂ်ႉၵူတ်ႇထတ်း။ ငိၼ်းဝႃႈ ၵူၼ်းၸိူဝ်းၼႆႉ ၶဝ်တေမႃးသိုဝ်ႉၶူဝ်းၶွင် တၢင်းလႅၼ်လိၼ်ၼႆႉႁႄမိူဝ်း။ တီႉၺွပ်းလႆႈၶဝ်လႆႈတီႈလၢၼ်ႇ မၢႆၵျႃႊယၢင်။ ႁၼ်ငိုၼ်းၶႄႇ တင်းမူတ်းမီး 10 သႅၼ်ယႂၢၼ်ႇ။ တႃႇ 6 သႅၼ်ယႂၼ်ႊၼႆႉ ပဵၼ်ငိုၼ်းပွမ်။”
လႆႈႁူႉဝႃႈ ငိုၼ်းပွမ်ၼႆႉ ၽႄႈလၢမ်းၸွတ်ႈၼႂ်းၼႃႈတီႈၵုမ်းၵမ်ၸုမ်းသိုၵ်းၸၢဝ်းၶိူဝ်းၸိူဝ်းယူႇၸွမ်းလႅၼ်လိၼ် မိူင်းၶႄႇ-မိူင်းတႆး-မိူင်းၶၢင် ဝႆႉတင်းၼမ်သေ ၾၢႆႇၸဝ်ႈၼႃႈတီႈၶဝ်တိုၵ်ႉ ၸွမ်းၵူတ်ႇထတ်း တီႉၺွပ်းၵူၼ်းၸိူဝ်းႁဵတ်းၵၢၼ်ၵႃႉၶၢႆ လႄႈ ၽႄႈငိုၼ်းပွမ်ယူႇ ၼႆယဝ်ႉ။
ၵဵဝ်ႇလူၺ်ႈငိုၼ်းတူႉ၊ ငိုၼ်းပွမ်ၽႄႈလၢမ်းၸွတ်ႇၼႂ်းၼႃႈတီႈၸုမ်းသိုၵ်းၶၢင်ၼၼ်ႉသေ ၸဝ်ႈသိုၵ်းလူင် ၼေႃႇပူႇ ၽူႈၶၢၼ်ပၢၵ်ႇၶွင် ၸုမ်းသိုၵ်းၶၢင် KIA တႄႉ တုမ်ႉတွပ်ႇလၢတ်ႈတီႈသိုဝ်ႇၶၢဝ်ႇဝႆႉပဵၼ်တၢင်းၵၢၼ်ဝႃႈ “လွင်ႈၼႆႉ ပႆႇမီးလွင်ႈယိုၼ်ယၼ်သင်ဢွၵ်ႇမႃးပဵၼ်တၢင်းၵၢၼ်” ဝႃႈၼႆ။
ၵူၼ်းမိူင်းလႄႈ ၸဝ်ႈၵႃႉၶူဝ်းၵုၼ်ႇ ၵူၼ်းႁဵတ်းၵၢၼ်ပၢႆးမၢၵ်ႈမီးၼႂ်းၸႄႈဝဵင်းၸိူဝ်းတိတ်းၸပ်းၸွမ်းလႅၼ်လိၼ် မိူင်းၶႄႇ-မိူင်းတႆး-မိူင်းၶၢင်ၼၼ်ႉ ၵမ်ႈၼမ်ၸႂ်ႉတိုဝ်းငိုၼ်းၶႄႇသေႁဵတ်း ၵၢၼ်ၵႃႉၶၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ