ၸွမ်ႁၢၼ် တႃႉၽူင်းၵျေႃႇ ၽူႈၼမ်းၼႂ်းၵူႈလွင်ႈလွင်ႈ ႁူဝ်ၼႃႈတပ်ႉသိုၵ်းတဢၢင်း TNLA လၢတ်ႈဝႃႈ – ယွၼ်ႉၺႃးမိပ်ႇငႅၼ်းပၼ်ႁႅင်းဢီး ၾၢႆႇၼိုင်ႈၵေႃႈ ပဵၼ်တႃႇႁွမ်ႁႅင်းၶိုၼ်းလႄႈ ၸင်ႇလႆႈၵိုတ်းပၢင်တိုၵ်းၵၼ်တင်း တပ်ႉသိုၵ်းမၢၼ်ႈယိုတ်းမိူင်း ဝႃႈၼႆ။

ၵဵဝ်ႇၵပ်း လွင်ႈလႆႈၵိုတ်းတိုၵ်းၵၼ်တင်း တပ်ႉသိုၵ်းမၢၼ်ႈသေ ၸွမ်ႁၢၼ် တႃႉၽူင်းၵျေႃႇ တႅမ်ႈတၢင်ႇဝႆႉ ၼိူဝ်သိုဝ်ႇတူင်ႇဝူင်းဝႃႈ – ယွၼ်ႉလွင်ႈတႅပ်းတတ်းၵိုတ်းတိုၵ်း ဝႆးၵႂႃႇလႄႈ တေပဵၼ်လွင်ႈဝူၼ်ႉၵႂင်ၶမ်ၸႂ်ၵၼ်ၼႆၼၼ်ႉ ပွင်ႇၸႂ်ယူႇ။ တၢမ်ႇႁိူဝ်းမိၼ်လႄႈ ၶိူင်ႈၻရူၼ်ႊပွႆႇမၢၵ်ႇၼၼ်ႉ လႆႈၶၢမ်ႇမႃးမိူၼ်ၵၼ်။ ယၢမ်းလဵဝ် ထိုင်ၶၢဝ်းလူဝ်ႇလိုဝ်ႈလႄႈလိုဝ်ႈ၊ ၺႃးတၢမ်ႇ မိပ်ႇငႅၼ်း ပၼ်ႁႅင်းဢီးၼႃႇလႄႈ လိုဝ်ႈ၊ ပဵၼ်တႃႇႁွမ်ႁႅင်းၶိုၼ်းလႄႈ ၸင်ႇလိုဝ်ႈ ဝႃႈၼႆ။

မိူဝ်ႈဝူင်ႈပူၼ်ႉမႃးၼႆႉၵူၺ်း သိုၵ်းတဢၢင်း TNLA တင်း သိုၵ်းမၢၼ်ႈ ႁူပ်ႉထူပ်းဢုပ်ႇဢူဝ်းၵၼ်သေ တူၵ်းလူင်းၵိုတ်းတိုၵ်းၵၼ်။ ၾၢႆႇသိုၵ်းတဢၢင်း ၽွမ်ႉၸႂ်ပႃး တႃႇထွႆဢွၵ်ႇပၼ်ၶိုၼ်း ဝဵင်းမိူင်းၵုတ်ႈ တင်း မိူင်းမိတ်ႈ။ ၾၢႆႇသိုၵ်းမၢၼ်ႈၵေႃႈ တူၵ်းလူင်းဝႃႈ တေဢမ်ႇပွႆႇမၢၵ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ်။

ၵူၺ်းၵႃႈ ၸုမ်းလုၵ်ႉၽိုၼ်ႉ PDF ဢၼ်လႆႈႁူမ်ႈၸွမ်း ၸုမ်းသိုၵ်းတဢၢင်းသေ ယိုတ်းၵုမ်းလႆႈဝႆႉ ဝဵင်းမိူင်းၵုတ်ႈ တင်း မိူင်းမိတ်ႈၼၼ်ႉတႄႉ ပိုၼ်ၽၢဝ်ႇဢွၵ်ႇမႃးဝႃႈ တေသိုပ်ႇၵႅတ်ႇၶႄပိုၼ်ႉတီႈသေ လုၵ်ႉၽိုၼ်ႉသိုၵ်းမၢၼ်ႈၵႂႃႇ ဝႃႈၼႆ။

ဝၢႆးလင် ၵိုတ်းတိုၵ်းၵၼ်တင်း သိုၵ်းတဢၢင်းၼႆႉ ႁိူဝ်းမိၼ်သိုၵ်းမၢၼ်ႈ တိူဝ်းပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းရၶႅင်ႇ AA ၵုမ်းၵမ် ၵူၼ်းမိူင်းလႆႈမၢတ်ႇၸဵပ်းလူႉတၢႆၼမ်။