ၸဵမ်မိူဝ်ႈသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉႁွင်ႈၵၢၼ်ဢၼ်မီးပုၼ်ႈၽွၼ်းတႃႇပူၵ်းပွင်ၼႂ်းဝၢၼ်ႈၼႂ်းမိူင်းၵေႃႈ ဢမ်ႇပဵၼ်ၵၢၼ်တႄႉတႄႉ  ။ ဢွင်ႈတီႈဢၼ် သိုၵ်းမၢၼ်ႈတိုၵ်ႉၵုမ်းဝႆႉလႆႈ ပဵၼ်ပိူင်ၼိုင်ႈ ၊ ဢွင်ႈတီႈဢၼ် သိုၵ်းၸၢဝ်းၶိူဝ်း ႁိုဝ်ဢမ်ႇၼၼ် ၸုမ်းလုၵ်ႉၽိုၼ်ႉၶၢဝ်းႁွင် PDF ၸိူဝ်းၼႆႉ ၵုမ်းဝႆႉသမ်ႉ ပဵၼ်ဝႆႉပိူင်ၼိုင်ႈ ။ ဢၼ်လႆႈယၢပ်ႇ ၊ ပိူင်ဢၼ်လႂ်ဢွၵ်ႇမႃးၵေႃႈ လႆႈၵူဝ်လႆႈႁႄသမ်ႉ ပဵၼ်ၵူၼ်းမိူင်း ။ ပွတ်းတၢင်း ၼမ်ႉၶမ်း ၸိုင်ႈတႆး ပွတ်းႁွင်ႇၼႆႉၵေႃႈ သိုၵ်းတဢၢင်း TNLA ဢၢင်ႈၸိုဝ်ႈဝႃႈ ၶႂ်ႈတႄႇၵၢၼ်ၽွင်းငမ်းတူဝ်ၵဝ်ႇၼႆသေ ၶိုင်ႁႃလၢႆးၵဵပ်းၶွၼ်ႇၵူၼ်းမိူင်းလၢႆးၼိုင်ႈယဝ်ႉလၢႆးၼိုင်ႈ ။ ဢၼ်မႃးပူၵ်းပွင်ပၼ် ၵူၼ်းမိူင်းၶိုၼ်းသမ်ႉ ဢမ်ႇႁၼ်မီးသင်ၼႆ ၵူၼ်းၼမ်ႉၶမ်းလၢတ်ႈ ။

ယၢမ်းၽွင်းမိူဝ်ႈလဵဝ် ပၢင်လိူၵ်ႈတင်ႈ ဢၼ်သိုၵ်းမၢၼ်ႈ ပိုၼ်ၽၢဝ်ႇတေၸတ်းယူႇမႅၵ်းမႅၵ်းၼၼ်ႉၵေႃႈ ၸမ်မႃး ။ ပၢႆပီ 2025 ၼႆႉ တေမီးလွင်ႈလႅၵ်ႈလၢႆႈသင်လၢႆလၢႆၼႆ ပဵၼ်တွၼ်ႈဢၼ် ၵူၼ်းၼႂ်းမိူင်းၼွၵ်ႈမိူင်း သူၼ်ၸႂ်ပၵ်းၸႂ်ဝႆႉ။

ၼႂ်းပီ 2025 ၼႆႉ ၸိုင်ႈမိူင်းဢဵၼ်ႁႅင်းယႂ်ႇလၢႆၾၢႆႇ မိပ်ႇဢီးမႃးလၢႆၾၢႆႇလႄႈ ၸုမ်းၸိူဝ်းလုၵ်ႉၽိုၼ်ႉသိုၵ်းမၢၼ်ႈၵေႃႈ ဢမ်ႇၸၢင်ႈပၼ်ႇၵၢၼ်လီလီ ။

တေႃႈၼင်ႇ သိုၵ်းတဢၢင်း ဢၼ်ဢွင်ႇပေႉၵုမ်းလႆႈ လၢႆဝဵင်း ၼႂ်းပွတ်းႁွင်ႇၽွင်းပၢင်ယၼ်ႇသိုၵ်း 1027 ၼႆႉ ယင်းမီးလွင်ႈလႅၵ်ႈလၢႆႈမႃး ။ ပေႃးတူၺ်းလၢႆးႁဵတ်းလၢႆးသၢင်ႈၶဝ်တႄႉ လႅပ်ႈ တေၵုမ်းဝၢၼ်ႈၵုမ်းမိူင်းပွတ်းတွၼ်ႈ ဢၼ်ၶဝ်ၵုမ်းၵမ်ဝႆႉၼၼ်ႉၶၢဝ်းယၢဝ်းသေတႃႉ ၵမ်းလိုၼ်းၵေႃႈ လႆႈပွႆႇၽႃႈၶိုၼ်း ၼႆ ၵူၼ်းၼုမ်ႇပွတ်းႁွင်ႇၵေႃႉၼိုင်ႈလၢတ်ႈ။

ဝၼ်းတီႈ 27-28/10/2025 ၼႆႉ သိုၵ်းမၢၼ်ႈ တင်း သိုၵ်းတဢၢင်း ၵႂႃႇႁူပ်ႉထူပ်းၵၼ် တီႈဝဵင်းၶုၼ်ႊမိင်ႊ ၼႂ်းမိူင်းၶႄႇ ၵမ်းထူၼ်ႈ 9  ။ မိူဝ်ႈဢွၼ်တၢင်း ထူပ်းတင်းၶႄႇလၢႆၵမ်းၵေႃႈ ဢမ်ႇသူႈမီးလွင်ႈလႅၵ်ႈလၢႆႈသင်သေတႃႉ ပွၵ်ႈၼႆႉတႄႉ မီးလွင်ႈတူၵ်းလူင်းၵိုတ်းတိုၵ်း လူၺ်ႈဢမ်ႇမၵ်းမၼ်ႈၶၢဝ်းႁိုင် ။

ၾၢႆႇၸုမ်းသိုၵ်းတဢၢင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ “ တင်းသွင်ၾၢႆႇတူၵ်းလူင်းလႆႈၸႂ်ၵၼ်ဝႃႈ ၾၢႆႇသိုၵ်း တဢၢင်း တေထွႆဢွၵ်ႇ ၼႂ်းဝဵင်းမိူင်းၵုတ်ႈ၊ မိူင်းမိတ်ႈပၼ်ၶိုၼ်း သိုၵ်းမၢၼ်ႈ။ တႄႇဝၼ်းတီႈ 29/10/2025 ၾၢႆႇ သိုၵ်းမၢၼ်ႈၵေႃႈ တေဢမ်ႇလႆႈဢဝ်ႁိူဝ်းမိၼ်၊ ႁႅၼ်းသိုၵ်းၶိုၼ်ႈတိုၵ်းတေႃႇ သိုၵ်းတဢၢင်းၶိုၼ်းလႃးလႃး ။ သၢႆသိုၵ်း လႄႈ ၵူၼ်းသိုၵ်းတင်းသွင်ၾၢႆႇႁွတ်ႈထိုင်ဝႆႉတီႈလႂ်ၵေႃႈ တေလႆႈၵိုတ်းဝႆႉတီႈၼၼ်ႈ ” ၼႆယဝ်ႉ။

ၾၢႆႇၵၢၼ်သိုၵ်း သိုၵ်းတဢၢင်း မီးလွင်ႈလႅၵ်ႈလၢႆႈၵႂႃႇသေတႃႉ ၾၢႆႇၵၢၼ်ၽွင်းငမ်းတႂ်ႈသိုၵ်းတဢၢင်း ပွတ်းတၢင်း ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇတႄႉ တိုၵ်ႉပၼ်ႇၵၢၼ်လႆႈယူႇ။

ၸဵမ်မိူဝ်ႈ လိူၼ်သႅပ်ႊထႅမ်ႊပိူဝ်ႊ 2025 ၼၼ်ႉမႃး ထိုင်မိူဝ်ႈလဵဝ် ႁွင်ႈၵၢၼ်ၾၢႆႇရူတ်ႉၵႃး ၊ ႁွင်ႈၵၢၼ်ၾၢႆႇလိူမ်ႈလႆႇ ၊ ႁွင်ႈၵၢၼ်ၾၢႆႇၾႆးၾႃႉ ၊ ၾၢႆႇပၢႆးပၺ်ႇၺႃႇ ဢၼ်ယူႇတႂ်ႈသိုၵ်းတဢၢင်းၸိူဝ်းၼႆႉ တိုၵ်ႉႁဵတ်းၵၢၼ်မိူၼ်ၵဝ်ႇ။

ဢိင်ၼိူဝ် ငဝ်းလၢႆးၵၢၼ်သိုၵ်း လႅၵ်ႈလၢႆႈ ၊ လႆႈပွႆႇၽႃႈလၢႆဝဵင်းယဝ်ႉၼၼ်ႉသေ သိုၵ်းတဢၢင်းၶဝ် ယိင်ႈၶႅၼ်းပၵ်းၸႂ် ၼိူဝ်ၵၢၼ်ၵဵပ်းၶွၼ်ႇမႃးၼႆ- ၵူၼ်းၼမ်ႉၶမ်းလၢတ်ႈ။

ၵူၼ်းၸၢႆးၼမ်ႉၶမ်းၵေႃႉၼိုင်ႈလၢတ်ႈၼႄဝႆႉတၢင်းၵႂၢမ်းမၢၼ်ႈ ၼင်ႇၼႆ – “ ၶဝ်လႆႈလၢႆးလႂ်ၵေႃႈ ဢဝ်လၢႆးၼၼ်ႉၶႃႈယဝ်ႉ၊ မိူၼ်ၼင်ႇ ၶဝ်ပဵၼ် ၸူၼ် ဢၼ်ပဵၼ်တၢင်းၵၢၼ်ၼၼ်ႉယဝ်ႉ ၊ တၢင်းႁဵတ်းတၢင်းသၢင်ႈၶဝ် ဢမ်ႇပေႃးပိူင်ႈၸူၼ် ၊ မိူဝ်ႈတႄႇမၼ်းတႄႉ တဵၵ်းႁႂ်ႈၵူၼ်းမိူင်းႁဵတ်းဝႂ်လၢႆႇသိၼ်ႇရူတ်ႉၵႃး ၊ ၊ ၸင်ႇမႃးပဵၼ် ဝႂ်မုင်ႉႁေႃႁိူၼ်း ၊ ဝႂ်ၵပ်းတူဝ် မၢႆၾၢင် ၸိူဝ်းၼႆႉ ။ မၼ်း ဢမ်ႇၶဝ်ႈတၢင်းတိုဝ်းတီႈလႂ်လူး ။ပေႃးၶဝ်တႅမ်ႈဝႆႉဝႃႈ သွင်သႅၼ် ၊ ၶဝ်ၵဵပ်းတႄႉတႄႉသမ်ႉ သွင်သႅၼ်ႁႃႈမိုၼ်ႇ ။ ပေႃးတႅမ်ႈဝႆႉသၢမ်သႅၼ်သမ်ႉ ပဵၼ်ၵႂႃႇ သၢမ်သႅၼ်ႁႃႈ သီႇသႅၼ်ၸိူဝ်းၼႆႉ” – ဝႃႈၼႆ။

မိူၼ်ၼင်ႇ ၾၢႆႇလိူမ်ႈလႆႇၶဝ်ၵေႃႈ လူင်းၵဵပ်းၶွၼ်ႇ ဢၼ်ၶဝ်မၵ်းမၼ်ႈဝႃႈ ပဵၼ်ဢွင်ႈတီႈၾၢႆႇလိူမ်ႈလႆႇၶဝ်ၸိူဝ်းၼၼ်ႉ ။ ၵူၼ်းၸိူဝ်းဢၼ် ၵႃႉၶၢႆၸွမ်းတႃႈၸွမ်းတၢင်း ၸွမ်းလူၺ်ႈၵႃႈမႃႇၵႃႈႁႅင်းဢိတ်းဢွတ်းၵူၺ်းၵေႃႈ ၺႃးသိုၵ်းတဢၢင်းၵဵပ်းၶွၼ်ႇ ။

ၵူၼ်းၸိူဝ်းဢၼ် ဢဝ်ၶွင်ၵိၼ်ၶွင်ယႅမ်ႉ တၢင်ႇလေႃႉထူဝ်းၶၢႆၸိူဝ်းၼႆႉၵူၺ်းၵေႃႈ ၺႃးသိုၵ်းတဢၢင်းၵဵပ်းၶွၼ်ႇ 10,000  ပျႃး ၊ 15,000  ပျႃး ယၢမ်းလဵဝ်ပုင်ႈၶိုၼ်ႈထိုင် 80,000 ပျႃး – 100,000 ပျႃး ၸိူဝ်းၼႆႉ။

ယၢမ်းလဵဝ်ၼႆႉ သိုၵ်းတဢၢင်း လူင်းၵဵပ်းပႃး သဵၼ်ႈမၢႆ ႁၢၼ်ႉလဵၵ်ႉႁၢၼ်ႉယႂ်ႇ ဢၼ်မီးၼႂ်းၼမ်ႉၶမ်းပႃး ၊ တိူၵ်ႈတီႈဝႃႈ ဝၼ်းၼိုင်ႈ ၶဝ်တေလႆႈဢွၵ်ႇၼမ်ႉၶမ်းၵႂႃႇၼႆၵေႃႈ ၶဝ်တေၸၢင်ႈၵဵပ်းၶွၼ်ႇၵူၼ်းမိူင်းထႅင်ႈယူႇ ၊ ယွၼ်ႉၶဝ်မီးၶေႃႈမုလ်း Data ၼႂ်းၼမ်ႉၶမ်းတင်းၼမ်ယဝ်ႉ ဝႃႈၼႆ။

ၵူၼ်းၼမ်ႉၶမ်း လၢတ်ႈၼႄဝႆႉတၢင်းၵႂၢမ်းမၢၼ်ႈၼင်ႇၼႆ –“ငိုၼ်းတႄႉ ၵဵပ်းယူႇႁဵတ်းၼၼ် ဢၼ်ႁဵတ်းပၼ်ၶိုၼ်းတႄႉ မီးၵၢၼ်ၵဵပ်းယုၵ်းယၢၵ်းပိူင်လဵဝ်ၵူၺ်း ။ တၢင်ႇလွင်ႈဢမ်ႇႁဵတ်းသင်ပၼ် ။ မိူၼ်ၼင်ႇ ၶွၼ်ႇဢၼ်လႆႈၸႂ်ႉသဵၼ်ႈတၢင်း(ဘီးလိမ့်ခွန်) ၼႆသေ ၵဵပ်းငိုၼ်း ၵေႃႈမီး ၵူၺ်းၵႃႈ သဵၼ်ႈတၢင်းတႄႉ ဢမ်ႇမႄးသင်ပၼ် ။ မိူၼ်ၼင်ႇ KTV ၸိူဝ်းၼႆႉၵေႃႈ ၶၢဝ်ႇတႄႉဢွၵ်ႇဝႃႈ ၶဝ်ၸႂ်ႉပိၵ်ႉၼႆဝႃႈ ၵူၺ်းၼႃႇ မိူၼ်ႁၢင်ႈပိုတ်ႇမႃးၼမ်လိူဝ်ၵဝ်ႇၵွၼ်ႇ” -ဝႃႈၼႆ။

တေႃႈၼင်ႇ ႁူင်းႁဵၼ်းသုၼ်ႇလဵဝ် (Private School) ဢၼ်ပိုတ်ႇဝႆႉ ၼႂ်းၼမ်ႉၶမ်းၸိူဝ်းၼႆႉ ယင်းၺႃး ၸုမ်းသိုၵ်း တဢၢင်း ၵဵပ်းၶွၼ်ႇႁၢဝ်ႈႁႅင်းလႄႈ ၸဵမ်လုၵ်ႈႁဵၼ်း လႄႈ ၸဝ်ႈၶွင်ႁူင်းႁဵၼ်း လႆႈသဵင်ႈငိုၼ်းတင်းသွင်တႃ ၼႆ ၵူၼ်းပိုၼ်ႉတီႈလၢတ်ႈ။

သိုၵ်းတဢၢင်းၼႆႉ ၾၢႆႇၵၢၼ်သိုၵ်းၵၢၼ်တိုၵ်း ၶိုပ်ႈၼႃႈ ၼႂ်းပီ 2023 – 2024 တင်း 2 ပီ ။ ၸုမ်းဢူၺ်းလီ ပွတ်းႁွင်ႇ 3 ၸုမ်း MNDAA-AA လႄႈ TNLA ၼႆသေ ၸိုဝ်ႈလိုဝ်းၼႂ်းတူင်ႇဝူင်းၵူၼ်းႁဵတ်းၵၢၼ်လုၵ်ႉၽိုၼ်ႉတႄႉတႄႉ။ ယိုတ်းၵုမ်း လႆႈ ၸၼ်ႉတိူင်းသိုၵ်း 2 တီႈသေ တင်းမူတ်း ယိုတ်းလႆႈ 53 ၸႄႈဝဵင်းလူးၵွၼ်ႇ ။   

ၽိူဝ်ႇထိုင်မႃး လိူၼ်ဢေႊပရိူဝ်ႊလ် 2025 ၼႆႉ တႄႇမီးလွင်ႈလႅၵ်ႈလၢႆႈမႃး ။ သိုၵ်းၵဝ်ႈၵၢင်ႉ MNDAA ဢၼ်ယိုတ်း ၵုမ်းလႆႈ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ တီႈလႃႈသဵဝ်ႈၼၼ်ႉၵေႃႈ လႆႈမွပ်ႈၶိုၼ်းသိုၵ်းမၢၼ်ႈ။

ႁႅင်းမိပ်ႇဢီးမိူင်းၶႄႇ ႁူမ်ႇငမ်းပႃး တပ်ႉသိုၵ်းဝႃႉ UWSA မႃးလႄႈ ၵၢၼ်သိုဝ်ႉၵၢၼ်ၶၢႆ မၢၵ်ႇမိုဝ်ႉၸိုၼ်းယၢမ်း တႃႇၸုမ်း ဢူၺ်းလီပွတ်းႁွင်ႇ 3 ၸုမ်းၼၼ်ႉၵေႃႈ မီးလွင်ႈၶွင်ႈၶမ်ႈမႃး၊ ၵမ်းလိုၼ်းၵေႃႈ သိုၵ်းဝႃႉ ႁွင်ႉပၢင်ၵုမ်ၶိုၵ်ႉၶၵ်ႉသေ ပိုၼ် ၽၢဝ်ႇဝႃႈ တေဢမ်ႇမီးလွင်ႈၵမ်ႉထႅမ်ၵွင်ႈၵၢင်ႇတေႃႇၸုမ်းလႂ် ၼႆၸိူဝ်းၼႆႉ။

လၢတ်ႈလႆႈဝႃႈ ဢဵၼ်ႁႅင်းသိုၵ်းတဢၢင်းပုင်ႈၶိုၼ်ႈ 2023- 2024  ပီသေ 2025 ၼႆႉ ယူပ်ႈလူင်းၶိုၼ်း။ ၶၢဝ်းတၢင်းပၢင်ယၼ်ႇယၼ်သိုၵ်း 1027 ၶွပ်ႈတဵမ် 2 ပီၼႆႉ ယဵၼ်းပဵၼ်ၵႂႃႇပၢင်ၵိုတ်းတိုၵ်းသိုၵ်းတဢၢင်းပႅတ်ႈၼႆ – ၵူၼ်းၼုမ်ႇလဵပ်ႈႁဵၼ်းၵၢၼ်မိူင်းၵေႃႉၼိုင်ႈလၢတ်ႈ။

ၸဵမ်မိူဝ်ႈ ပႆႇပိုၼ်ၽၢဝ်ႇၵိုတ်းတိုၵ်းၵေႃႈ ဢွင်ႈတီႈဢၼ် သိုၵ်းတဢၢင်းယိုတ်းလႆႈ မိူၼ်ၼင်ႇ ၼွင်ၶဵဝ်  ၵျွၵ်ႉမႄး သီပေႃႉ ၸိူဝ်းၼႆႉ ၺႃးသိုၵ်းမၢၼ်ႈ လေႃႇတိုၵ်းယိုတ်းဢဝ်ၶိုၼ်းၶိူဝ်းယႂ်း။ တေႃႈၼင်ႇ မိူင်းၵုတ်ႈ မိူင်းမိတ်ႈလႄႈ ဢွင်ႈတီႈဢၼ် တိတ်းၸပ်းလႅၼ်လိၼ်ဝဵင်းလိူဝ်ႇ ၸိူဝ်းၼႆႉၵေႃႈ တေလႆႈထွႆဢွၵ်ႇပဵၼ်တၢင်းၵၢၼ် လူၺ်ႈဢမ်ႇလူဝ်ႇပိုတ်းယိုဝ်းၵၼ်။

တႃႇတေထွႆဢွၵ်ႇပၼ်ၸိူင်ႉၼႆ ယူႇတီႈၸုမ်းသိုၵ်းတဢၢင်း TNLA လႆႈတႅပ်းတတ်းသဵၼ်ႈၸႂ် ယၢပ်ႇယဵၼ်းတႄႉတႄႉ ၼႆ လူၺ်းယေႇဢူး ၽူႈၶၢၼ်ပၢၵ်ႇ သိုၵ်းတဢၢင်း လၢတ်ႈတီႈသိုဝ်ႇၶၢဝ်ႇဝႆႉၼင်ႇၼႆ။

ဢိင်ၼိူဝ် သိုၵ်းတဢၢင်းတူၵ်းလူင်းတေထွႆဢွၵ်ႇပိုၼ်ႉတီႈမိူင်းမိတ်ႈ မိူင်းၵုတ်ႈ ၸိူဝ်းၼႆႉသေ ၸုမ်းလုၵ်ႉၽိုၼ်ႉၶၢဝ်းႁွင် PDF ၸိူဝ်းဢၼ်ယၢမ်ႈႁူမ်ႈႁႅင်းတိုၵ်းၸွမ်း သိုၵ်းတဢၢင်းၸိူဝ်းၼႆႉတႄႉ ၶိုၼ်းပိုၼ်ၽၢဝ်ႇဝႃႈ တေသိုပ်ႇႁႄႉၵင်ႈၵႂႃႇ ၼင်ႇႁိုဝ်တေဢမ်ႇသုမ်းၶိုၼ်းဢွင်ႈတီႈၸိူဝ်းၼၼ်ႉဝႃႈၼႆ။

မိူဝ်ႈတႄႇမၼ်းတႄႉ သိုၵ်းၸၢဝ်းၶိူဝ်းၵုမ်းမိူင်းၼႆႉ ယင်းတေၶႅၼ်းလိူဝ်သေ သိုၵ်းမၢၼ်ႈၵုမ်းၼႆသေ ၵူၼ်းမိူင်းတႆး ပွတ်းႁွင်ႇ ၸိူဝ်းယူႇတႂ်ႈသိုၵ်းဢူၺ်းလီၵုမ်းၵမ် ဢွၼ်ၵၼ်ဝူၼ်ႉဝႆႉထႃႈလွင်ႈလီ ။ ၵူၺ်းၵႃႈ ဢိင်ၼိူဝ် ၽႂ်ၵုမ်းလႆႈၵေႃႈ မၼ်းၶိၼ်ႁဵတ်းၶုၼ်ယူႇတိၵ်းတိၵ်းလႄႈ ၵူၼ်းမိူင်းသမ်ႉယိင်ႈၶႅၼ်းယူႇယၢပ်ႇ ။

ၵုမ်းပႆႇတၼ်းလႆႈလၢႆပီ ၵူၼ်းမိူင်းၸိူဝ်းယူႇတႂ်ႈသိုၵ်းၵဝ်ႈၵၢင်ႉၵုမ်းၵေႃႈဝႃႈ တေလႆႈႁဵတ်းမၢႆၾၢင်မိူင်းၵဝ်ႈၵၢင်ႉ ၊ ၸိူဝ်း ယူႇတႂ်ႈသိုၵ်းတဢၢင်းၵုမ်းသမ်ႉဝႃႈ တေလႆႈႁဵတ်းမၢႆၾၢင်မိူင်းတဢၢင်း ။ ၵူၼ်းမိူင်းတႄႉ တေၵႂႃႇ ဝၢၼ်ႈတႂ်ႈ မိူင်းၼိူဝ် ပေႃးဢမ်ႇၸၢင်ႈ ဢမ်ႇႁၼ်ၽွၼ်းလီမၼ်းသေဢိတ်း – ၼႆ ၵူၼ်းမိူင်းတႆးပွတ်းႁွင်ႇၵေႃႉၼိုင်ႈလၢတ်ႈၼင်ႇၼႆ။