သိုၵ်းမၢၼ်ႈတမ်းၶူင်းၵၢၼ် 100 ဝၼ်း ၵဵပ်းၶွၼ်ႇၶူဝ်းၵုၼ်ႇဢၼ်လုၵ်ႉတၢင်းလႅၼ်လိၼ်ၶဝ်ႈမႃးၶၢႆၼႂ်းမိူင်း ႁဵတ်းႁႂ်ႈၵူၼ်းမိူင်းတႆး ၵူၼ်းၵႃႉၶၢႆပႃးၸဵမ်ၵူၼ်းသိုဝ်ႉၸႂ်ႉ ယၢပ်ႇၽိုတ်ႇ ၵိၼ်းၸႂ် ။
တႄႇဢဝ်ဝၼ်းတီႈ 1/5/2026 ၼႆႉၵႂႃႇ သိုၵ်းမၢၼ်ႈပိုၼ်ၽၢဝ်ႇၶိုၼ်ႈၵႃႈၶွၼ်ႇၶူဝ်းၵုၼ်ႇၼမ်းၶဝ်ႈလႄႈ ၶူဝ်းၵုၼ်ႇဢၼ်လုၵ်ႉလႅၼ်လိၼ်ထႆး လႄႈလႅၼ်လိၼ်ၶႄႇၶဝ်ႈယွမ်းမႃး ဢေႇမႃးလိူဝ်ႁႅင်း။ ယွၼ်ႉဝႃႈၵူၼ်းၵႃႉ- ၸဝ်ႈၵႃး ဢမ်ႇႁတ်းတၢင်ႇၶူဝ်းၵုၼ်ႇၶဝ်ႈမႃးၶၢႆ လၢၼ်ႇ/ၵဵၵ်ႉ သိုၵ်းမၢၼ်ႈၵဵပ်းၵႃႈၶွၼ်ႇသုင်၊ ၸဝ်ႈၵႃး ၵူၼ်းၵႃႉလႆႈၵိုတ်းလိုဝ်ႈၵၢၼ်ဝႆႉၸူဝ်ႈၶၢဝ်း။
ၵူၼ်းၶၢႆၶူဝ်းၵုၼ်ႇၵိၼ်ယမ်ႉ ဝဵင်းမိူင်းသူႈၵေႃႉၼိုင်ႈလၢတ်ႈဝႃႈ ၶူဝ်းၵုၼ်ႇဢၼ်လုၵ်ႉမိူင်းထႆးမႃး သမ်ႉပေႃးၶႂ်ႈၶၢတ်ႇယူႇယဝ်ႉယၢမ်းလဵဝ်။ ၼႂ်းလိူၼ်တေမႃးၼႆႉ တေၸၢင်ႈႁႃသိုဝ်ႉယၢပ်ႇ ၵႃႈၶၼ်ၶူဝ်းၵုၼ်ႇၸၢင်ႈၶိုၼ်ႈ ဝႃႈၼႆ။
ၼၢင်းယိင်းၵူၼ်းပိုတ်ႇႁၢၼ်ႉၶၢႆၶူဝ်းၵုၼ်ႇ ဝဵင်းမိူင်းသူႈၵေႃႉၼိုင်ႈလၢတ်ႈဝႃႈ -“ၶူဝ်းၵုၼ်ႇ တၢင်းတႃႈၶီႈလဵၵ်း ၵေႃႈဢမ်ႇမႃးယဝ်ႉတလဵဝ်။ ယွၼ်ႉပိူဝ်ႈ သိုၵ်းမၢၼ်ႈတီႈၶူဝ်တႃႈၵေႃႈ ၵူတ်ႇထတ်းႁၢဝ်ႈႁႅင်းသေ ၵဵပ်းၶွၼ်ႇသုင်ႁႅင်း။ တေသင်ႉတၢင်းလႃႈသဵဝ်ႈၵေႃႈဢမ်ႇၸၢင်ႈ ယွၼ်ႉဝႃႈ ၶူဝ်းၵုၼ်ႇတၢင်းမိူင်းၶႄႇၵေႃႈ သိုၵ်းမၢၼ်ႈၵဵပ်းၶွၼ်ႇသုင်မိူၼ်ၵၼ်။ ပိူၼ်ႈဢမ်ႇပေႃးဢဝ်ၶူဝ်းၵုၼ်ႇၶဝ်ႈမိူင်းယဝ်ႉယၢမ်းလဵဝ်”- ဝႃႈၼႆ။
ၶူဝ်းၵုၼ်ႇၸဵမ်တၢင်းမိူင်းထႆးလႄႈမိူင်းၶႄႇ ဢမ်ႇပေႃးၶဝ်ႈမႃးၼမ်ယဝ်ႉလႄႈ ၼႂ်းမိူင်းတႆးပွတ်းၸၢၼ်း ပွတ်းၵၢင် ပဵၼ်ဢၼ်ယၢပ်ႇၸႂ်။ ၶူဝ်းၵုၼ်ႇၸႂ်ႉသွႆတေၵိုတ်းၶၢတ်ႇ။ တေႁႃသိုဝ်ႉယၢပ်ႇ။ ပေႃးပဵၼ်ၼႆၵႂႃႇၶၢဝ်းႁိုင်တႄႉ တေတုမ်ႉတိူဝ်ႉမိူၼ်ၵၼ်မူတ်း – ၸဝ်ႈၵုၼ်ႇၵေႃႉၼိုင်ႈလၢတ်ႈၼင်ႇၼႆ။
“ၽွင်းၶၼ်ၼမ်ႉမၼ်းၶိုၼ်ႈၼၼ်ႉၵေႃႈ ၶၼ်ၶူဝ်းၵုၼ်ႇၵေႃႈၶိုၼ်ႈ။တလဵဝ်သမ်ႉၶဝ်ၶိုင်ထႅင်ႈ ၶူင်းၵၢၼ် 100 ဝၼ်းၼႆႁေ ၶိုၼ်ႈၵႃႈၶွၼ်ႇထႅင်ႈလႄႈ ၶၼ်ၶူဝ်းၵုၼ်ႇၵေႃႈတေသုင်မႃးထႅင်ႈ။ ၶၼ်သုင်လၢႆလၢႆယင်းၶႅၼ်း ၸၢင်ႈႁႃသိုဝ်ႉယူႇပေႃးပိူၼ်ႈတင်းတိုၵ်ႉဢဝ်မႃးလႆႈယူႇတႄႉ- ၼေႃႈ ။” – ၸဝ်ႈႁၢၼ်ႉၶၢႆၶူဝ်းၶွင်ၵိၼ်ယမ်ႉဝဵင်းမိူင်းသူႈလၢတ်ႈၼင်ႇၼႆ။
ၶူဝ်းၵုၼ်ႇမိူင်းၶႄႇၵေႃႈ ပေႃးပဵၼ်သႅၼ်းဢၼ်သိုၵ်းမၢၼ်ႈၶိုၼ်ႈၵႃႈၶွၼ်ႇဝႆႉၼၼ်ႉ ၵူၼ်းၵႃႉဢမ်ႇႁတ်းဢဝ်ၶဝ်ႈမႃးၶၢႆ။ ၵွပ်ႈၼႆတၢင်းမူႇၸေႊၵေႃႈဢမ်ႇၸၢင်ႈၸႂ်ယႂ်ႇ ဢမ်ႇၸၢင်ႈသင်ႇမႃးၶၢႆ။ႁဵတ်းႁႂ်ႈၵူၼ်းမိူင်းတႆးပွတ်းၵၢင် ပွတ်းၸၢၼ်းယၢပ်ႇၽိုတ်ႇ- ၸဝ်ႈၵုၼ်ႇ ၵူၼ်းမိူင်းသူႈလၢတ်ႈထႅင်ႈၼင်ႇၼႆ။
“ယွၼ်ႉပိူဝ်ႈသိုၵ်းမၢၼ်ႈၵဝ်းၸိူင်ႉၼႆလႄႈ ပၢႆးမၢၵ်ႈမီးၼႆႉတူၵ်းၼႃႇယဝ်ႉ။ တေႃႈၼင်ႇယၢမ်းလဵဝ် ၵူၼ်းဢၼ်ၶႅၼ်းၸႂ်ယင်းယၢပ်ႇၽိုတ်ႇထၢၼ်ႇၼႆႉၼႆတႄႉ တွၼ်ႈတႃႇၵူၼ်းႁႃၸဝ်ႉ ၵိၼ်ၶမ်ႈ တႄႉ ယိင်ႈၶႅၼ်းတေယၢပ်ႇၽိုတ်ႇမႃးတိၵ်းတိၵ်း။ ၵႃႈၶၼ်ၼိူဝ်ႉၼိူဝ်ႉပႃပႃၵေႃႈ ၵႃႈယႂ်ႇ။ တွၼ်ႈတႃႇၼႃႈႁိူၼ်းၼိုင်ႈလင်ၼႆႉ ၼိုင်ႈဝၼ်းလႆႈသိုဝ်ႉၸၢႆႇလဵင်ႉၵၼ် သဵင်ႈယူႇတီႈဢေႇသုတ်းမွၵ်ႈ 2 မိုၼ်ႇပျႃး။ ပေႃးၵူၼ်းၼႂ်းႁိူၼ်းၼမ် ၶႅၼ်းတေသဵင်ႈၼမ်”- ၵူၼ်းၵူတ်ႉၶၢႆလၢတ်ႈထႅင်ႈၼင်ႇၼႆ။
ပၢႆလိူဝ်ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇ။ သိုၵ်းမၢၼ်ႈသမ်ႉၸႂ်ႉလၢႆးတၢင်းဢွမ်ႈသေ ႁၢမ်ႈဢဝ်ၶူဝ်းၵုၼ်ႇတၢင်းၼွၵ်ႈၶဝ်ႈမႃးၶၢႆလဵင်ႉ ၵူၼ်းၼႂ်းမိူင်း တေႁဵတ်းႁႂ်ႈၵူၼ်းမိူင်း ၵိၼ်းၸႂ်လိူဝ်ၵဝ်ႇထႅင်ႈၵူၺ်းယဝ်ႉ- ၵူၼ်းမိူင်းဝဵင်းမိူင်းသူႈလၢတ်ႈၼင်ႇၼႆ။
ဢၼ်သိုၵ်းမၢၼ်ႈပိုၼ်ၽၢဝ်ႇဝႆႉမိူဝ်ႈႁၢင်လိူၼ်ဢေႊပရိူဝ်ႊလ်ၼၼ်ႉတႄႉဝႃႈ ဢၼ်တေတႄႇၶိုၼ်ႈၶွၼ်ႇ ၶူဝ်းၵုၼ်ႇၼမ်းၶဝ်ႈ တႄႇဢဝ်ဝၼ်းတီႈ 1/5/2026 ၼႆႉၵႂႃႇၼႆႉတႄႉပဵၼ် ပႃလႄႈ ၶူဝ်းဢွၵ်ႇၼႂ်းၼမ်ႉ၊ ၶဝ်ႈမုၼ်းၶဝ်ႈပွင်း၊ ၶူဝ်းၵုၼ်ႇလွင်ႈရူတ်ႉၶိူင်ႈ ရူတ်ႉၵႃး၊ ၼမ်ႉၼူမ်းဝူဝ်းလႄႈတၢင်းၵိၼ် ဢၼ်ၵဵဝ်ႇၵပ်း ၼမ်ႉၼူမ်းဝူဝ်း ၸိူဝ်းၼႆႉ။
သိုၵ်းမၢၼ်ႈၶိုၼ်ႈၵႃႈၶွၼ်ႇၶူဝ်းၵုၼ်ႇဢၼ်ဢဝ်ၶဝ်ႈၼႂ်းမိူင်းၼႆႉ ဢမ်ႇၵႃးၵမ်းၼႆႉၵူၺ်း။ ပီၵၢႆ 2025 ၵေႃႈ သိုၵ်းမၢၼ်ႈပိုၼ်ၽၢဝ်ႇပွၵ်ႈၼိုင်ႈယဝ်ႉ ၽွင်းၼၼ်ႉတႄႉၶိုၼ်ႈၵႃႈၶွၼ်ႇၶူဝ်းၶွင်ၵဵဝ်ႇၵပ်းၶိူင်ႈၸႂ်ႉၾႆးၾႃႉလႄႈ ၶူဝ်းၸႂ်ႉၶူဝ်းသွႆ တႃႇ 35 သႅၼ်း။ ၼၼ်ႉပၢႆသင်ႇပိၵ်ႉ- ႁၢမ်ႈဢဝ်ၶဝ်ႈမႃးၶၢႆ ၼႆပႃးထႅင်ႈလူးၵွၼ်ႇ။
တႅမ်ႈ- ၸၢႆးသႅင်ဢၢႆႈ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ