သိုၵ်းတဢၢင်း TNLA ပိုၼ်ၽၢဝ်ႇႁၢမ်ႈၸႂ်ႉၶိူင်ႈတီႉဢိၼ်ႊထိူဝ်ႊၼႅတ်ႉယဝ်ႉဢမ်ႇႁိုင် ၵူၼ်းမိူင်းဝဵင်းၼမ်ႉတူႈႁၢႆဝႆႉ – ၵူၼ်းၼႂ်းပွၵ်ႉတႄႉဝႃႈ ၺႃးသိုၵ်းတဢၢင်းတီႉၺွပ်းဝႃႈၼႆသေတႃႉ တေႃႇထိုင်ဝၼ်းမိူဝ်ႈၼႆႉၵပ်းသိုပ်ႇပႆႇလႆႈလႄႈ ၵႂႃႇမီးတီႈလႂ်ပႆႇလႆႈႁူႉ။

တႄႇၵၢင်လိူၼ်ဢွၵ်ႉထူဝ်ႊပိူဝ်ႊမႃး သိုၵ်းတဢၢင်း  TNLA ၶဝ်ၵူတ်ႇထတ်း ၶိူင်ႈသတႃႊလိင်ႉ ၼႂ်းၸႄႈဝဵင်းၼမ်ႉတူႈ ၵူႈပွၵ်ႉယွမ်ႇ ၵူႈဝၢၼ်ႈဢိူင်ႇ။ ထိုင်မႃးႁၢင်လိူၼ်ၼႆႉ ၸၢႆးသႅၼ်းပၢၼ်ၶၢဝ်ႉ ဢႃယုမွၵ်ႈ 60 ပီ ဢၼ်မီးၶိူင်ႈဢိၼ်ႊထိူဝ်ႊၼႅတ်ႉ သတႃႊလိင်ႉဝႆႉတီႈႁိူၼ်းၵေႃႈႁၢႆၵႂႃႇတေႃႇထိုင်မိူဝ်ႈၼႆႉ လႆႈမႃးဝူင်ႈပၢႆယဝ်ႉ ၵူၼ်းႁိူၼ်းၵပ်းသိုပ်ႇၵေႃႈဢမ်ႇလႆႈ ပဵၼ်ဢၼ်မႆႈၸႂ်ဝႆႉဝႃႈၼႆ။  

 ၵူၼ်းမိူင်း ၼႂ်းၸႄႈဝဵင်းၼမ်ႉတူႈ လၢတ်ႈၼႄတီႈၽူႈတွႆႇႁွၵ်ႈဝႃႈ- “ သိုၵ်းTNLA ၼႆႉၶဝ်မႃးထတ်းၼႂ်းဝၢၼ်ႈ ၼႂ်းပွၵ်ႉ၊ ၶိူင်ႈသတႃႊလိင်ႉ ၵေႃႈၶဝ်ထွၼ်ဢဝ်ၵႂႃႇ။ မိုဝ်းထိုဝ်/ၾူၼ်း ၵူၼ်းၸိူဝ်းၵႂႃႇလဵၼ်ႈဢိၼ်ႊထိူဝ်ႊၼႅတ်ႉ သတႃႊလိင်ႉၼၼ်ႉၵေႃႈ ၶဝ်ယိုတ်းဢဝ်ၵႂႃႇ။  ၶဝ် လၢတ်ႈဝႃႈ ပေႃးဝၢၼ်ႈမိူင်းလီမႃး ၸင်ႇတေပၼ်ၶိုၼ်းဝႃႇ။ တေႁႂ်ႈႁဝ်းၵႂႃႇဢဝ်တီႈလႂ်ၵေႃႈ ဢမ်ႇလၢတ်ႈ တီႈမၼ်း။ မိူဝ်ႈလႂ်ဝၢၼ်ႈမိူင်းသမ်ႉတေလီၶိုၼ်းၵေႃႈဢမ်ႇႁူႉ။”  – ဝႃႈၼႆ။

ၸၢႆးသႅၼ်းပၢၼ်ၶၢဝ်ႉဢၼ်ႁၢႆဝႆႉၼႆႉၵေႃႈ ၵူၼ်းၼႂ်းပွၵ်ႉလၢတ်ႈဝႃႈ ၺႃးသိုၵ်းတဢၢင်း တီႉၺွပ်းဢဝ်ၵႂႃႇပႃးၸဵမ်မိူဝ်ႈဝၼ်းတီႈ 28/10/2025 တေႃႇဝၼ်းမိူဝ်ႈၼႆႉ  3/11/2025 ၵေႃႈ ပႆႇႁၼ်ပွၵ်ႈႁိူၼ်းၶိုၼ်းလႄႈ ႁဵတ်းႁႂ်ႈၵူၼ်းၼႂ်းမုင်ႉႁေႃႁိူၼ်းမႆႈၸႂ် ။

ၵူၼ်းမိူင်းၼႂ်းၸႄႈဝဵင်းၼမ်ႉတူႈ ၵေႃႉႁူႉႁၼ်ၸွမ်းလွင်ႈၼႆႉ လၢတ်ႈၼႄတီႈၽူႈတွႆႇႁွၵ်ႈဝႃႈ -“ၵေႃႉဢၼ်ၶဝ်ၺွပ်းၵႂႃႇၼႆႉ ပဵၼ်တႆးဢေႃႈ။  တေႁွင်ႉၵႂႃႇဝႆႉတီႈလႂ်။ တေဢဝ်ၵႂႃႇလၢႆဝၼ်း၊ တေၵုမ်းတူဝ်ဝႆႉႁိုင်ၵႃႈႁိုဝ်ၼႆၵေႃႈ ဢမ်ႇလၢတ်ႈ။ မိူဝ်ႈလဵဝ်ႁဝ်းၵပ်းသိုပ်ႇၵၼ်တင်းမၼ်းၵေႃႈဢမ်ႇလႆႈယဝ်ႉဢေႃႈ။ တီႈႁိူၼ်းၶဝ်ၼႆႉ တင်ႈဝႆႉသတႃးလိင်ႉ။ ႁဝ်းမိူဝ်းႁႃမၼ်းတီႈႁိူၼ်းၵေႃႈ ပိၵ်ႉၽၵ်းတူႁိူၼ်းဝႆႉ။ ၵူၼ်းၸိူဝ်းယူႇႁိမ်းႁိူၼ်းမၼ်းၼၼ်ႉ ၵေႃႈဢမ်ႇမီးၽႂ်။ ဝၢႆးလင် မၼ်းတႅမ်ႈလိၵ်ႈတၢင်ႇၼိူဝ်ၾဵတ်ႉပုၵ်ႉဢၵွင်ႉသုၼ်ႇတူဝ်မၼ်းဝႃႈ “ ၼႂ်းဝဵင်းၼမ်ႉတူႈၼႆႉဢမ်ႇမီးၽႂ်ယဝ်ႉ” ၼႆၼၼ်ႉ ယဝ်ႉမၼ်းၵေႃႈႁၢႆၵႂႃႇ။ ” ဝႃႈၼႆ။

ၵေႃႉၺႃးတီႉၵႂႃႇၼၼ်ႉ လႆႈႁူႉဝႃႈပဵၼ် ၵူၼ်းၸၢႆးဢႃႇယု 60 ပၢႆ ။ မၼ်းၸၢႆးယူႇပွၵ်ႉ 5 ဝဵင်းၼမ်ႉတူႈ ။  မၼ်းၸၢႆးပဵၼ်ၶႃႈႁၢပ်ႇၵၢၼ် ၶုၼ်ၵဝ်ႇ ၼႂ်းႁွင်ႈၵၢၼ်ၾၢႆႇပၢႆးပၺ်ႇၺႃႇ။ ၵူၺ်းၵႃႈ တႄႇသိုၵ်းမၢၼ်ႈယိုတ်းမိူင်းမႃး မၼ်းၸၢႆးဢမ်ႇႁၼ်လီၸွမ်း ပိူင်ၸဝ်ႈဢႃႇၼႃႇသိုၵ်းလႄႈမၼ်းၸၢႆးဢွၵ်ႇၵၢၼ် ႁဵတ်း CDM ဝႆႉ  ။ ၵူၼ်းၼႂ်းပွၵ်ႉတႄႉလၢတ်ႈဝႃႈ ဢၼ်ၺႃးတီႉၼႆႉဢမ်ႇၵႃးမၼ်းၸၢႆးၵေႃႉလဵဝ် ။ တေပႃးၵႂႃႇလၢႆၵေႃႉတႄႉဢမ်ႇႁူႉတႅတ်ႈတေႃး ယွၼ်ႉသင်ၼႆ ၵူၼ်းၼႂ်းဝဵင်းၼမ်ႉတူႈ ဢွၼ်ၵၼ်ပၢႆႈၽေးသိုၵ်းဝႆႉလႄႈပႆႇၸၢင်ႈယိုၼ်ယၼ် – ဝႃႈၼႆ။

ယူႇတီႈၽူႈတွႆႇႁွၵ်ႈၵပ်းသိုပ်ႇၸူး ႁွင်ႈၵၢၼ်ၾၢႆႇပွင်ႇၶၢဝ်ႇ သိုၵ်းတဢၢင်းယူႇၵေႃႈ ၵပ်းသိုပ်ႇဢမ်ႇလႆႈ လႄႈ ဢမ်ႇၸၢင်ႈယိုၼ်ယၼ်ဝႃႈ တီႉဢဝ်မၼ်းၸၢႆးၵႂႃႇဝႆႉတီႈလႂ်။ တီႉဢဝ်ၵူၼ်းဝၢၼ်ႈၵႂႃႇလၢႆၵေႃႉၸဵမ်ၸိူဝ်းၼႆႉ။

မိူဝ်ႈၵၢင်လိူၼ်ဢွၵ်ႉထူဝ်ႊပိူဝ်ႊပူၼ်ႉမႃးၼႆႉ သိုၵ်းတဢၢင်း (TNLA) ဢဝ်ၶေႃႈဢၢင်ႈဝႃႈ တႃႇလွင်ႈႁူမ်ႇလူမ်ႈၼႆသေ ၸီႉသင်ႇႁႂ်ႈၵူၼ်းမိူင်းၸိူဝ်းတင်ႈၶိူင်ႈသတႃႊလိင်ႉ ၼႂ်းထုင်ႉမၢၼ်ႈၸၢမ် လႄႈ ၸႄႈဝဵင်းၼမ်ႉတူႈ ပိၵ်ႉဢိုတ်း ထွၼ်ၶိူင်ႈသတႃးလိင်ႉဢွၵ်ႇဝႆႉတင်းသဵင်ႈ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး ၸႄႈဝဵင်းၼမ်ႉတူႈၼႆႉ သိုၵ်းတဢၢင်း (TNLA) ၵုမ်းၵမ်ပၼ်ႇၵၢၼ်ဝႆႉ သေ တဵၵ်းတဵင်လွၵ်ႇငိုတ်ႈ ႁႂ်ႈၵူၼ်းမိူင်းႁဵတ်းမၢႆၾၢင်၊ ဝႂ်မုင်ႉႁေႃႁိူၼ်း၊ ဝႂ်လၢႆႇသိၼ်ႊရူတ်ႉၵႃး လႄႈ ၵဵပ်းၶွၼ်ႇၵူႈလွင်ႈလွင်ႈ ၸွမ်းၼင်ႇတမ်းဝၢင်းပိူင်ဝႆႉၼၼ်ႉ ၼႆယဝ်ႉ။

ၼႂ်းၸႄႈဝဵင်းၼမ်ႉတူႈၼႆႉ ဢမ်ႇၸႂ်ႉတိုဝ်းလႆႈ ၾူၼ်း၊ ဢိၼ်ႊထိူဝ်ႊၼႅတ်ႉ၊ ၾႆးၾႃႉ ၸိူဝ်းၼႆႉႁိုင်ၼၢၼ်း ပီပၢႆယဝ်ႉသေ ၼင်ႇႁိုဝ်တေႁူႉၶၢဝ်ႇငၢဝ်းၶိုတ်းတၼ်းလႆႈၼၼ်ႉ ၵူၼ်းမိူင်းၸင်ႇလႆႈႁႃလၢႆးတၢင်းၸႂ်ႉတိုဝ်း ၶိူင်ႈသတႃႊလိင်ႉ ဝႆႉၸူဝ်ႈၶၢဝ်း ၼႆယဝ်ႉ။