ဢိၼ်ႊထိူဝ်ႊၼႅတ်ႉဢၼ်လုၵ်ႉတီႈၶိူင်ႈသတႃႊလိင်ႉမႃးၼႆႉ ဝၼ်းမိူဝ်ႈၼႆႉ လႆႈဝႃႈဝႆးလိူဝ်ၵျႃႉလိူဝ် သၢႆဢိၼ်ႊထိူဝ်ႊၼႅတ်ႉ ဢၼ်သိုၵ်းမၢၼ်ႈပွႆႇပၼ်ၼၼ်ႉတႄႉတႄႉဝႃႈၼႆသေတႃႉ တႄႇဢဝ်ၼႆႉၵႂႃႇ သင်ၸိူဝ်ႉဢမ်ႇတၢင်ႇမၢႆၾၢင်ၶိူင်ႈၸိုင် တေဢမ်ႇၸၢင်ႈၸႂ်ႉယဝ်ႉ ၶွမ်ႊပၼီႊ ပိုၼ်ၽၢဝ်ႇၼင်ႇၼႆ။
ယိူင်းဢၢၼ်းတႃႇၽဵဝ်ႈ ၸုမ်းၵၢၼ်ၵျႃႊၽျႅၼ်ႉသေ ၶွမ်ႊပၼီႊ X ၶွင် သတႃႊလိင်ႉႁဵတ်းဢွၵ်ႇ မူႇပိူင်ပေႃႇလသီႇမႂ်ႇ မႃးဝႃႈ – ၶိူင်ႈသတႃႊလိင်ႉၼိုင်ႈလုၵ်ႈၼႆႉ ပေႃးၶၢႆႉတီႈမၼ်းသေဢဝ်ၵႂႃႇၸႂ်ႉ တၢင်ႇမိူင်း (မိူင်းဢၼ်ဢမ်ႇလႆႈတၢင်ႇမၢႆၾၢင်ဝႆႉၼၼ်ႉ)ၸိုင် တေၸၢင်ႈၸႂ်ႉလႆႈၼႂ်းၶၢဝ်းတၢင်း 30 ဝၼ်းၵူၺ်းယဝ်ႉ ။ သင်ဝႃႈၶႂ်ႈသိုပ်ႇၸႂ်ႉထႅင်ႈၸိုင် တေလႆႈသိုပ်ႇတေႃႇဢႃယုမၢႆၾၢင်ထႅင်ႈ တီႈမိူင်းဢၼ်ၸဝ်ႈၵဝ်ႇဢဝ်ၵႂႃႇၸႂ်ႉတိုဝ်းၼၼ်ႉ။ ၵွပ်ႈၼႆ တွၼ်ႈတႃႇၵူၼ်းမိူင်းမၢၼ်ႈၵေႃႈ တေပၼ်ၸႂ်ႉတေႃႇထိုင် ဝၼ်းတီႈ 16/08/2026 ၼႆႉၵူၺ်းယဝ်ႉ – သင်ဝႃႈဢမ်ႇတၢင်ႇမၢႆၾၢင်ၸိုင် ဝၢႆးလင်ၼၼ်ႉတေဢမ်ႇၸၢင်ႈၸႂ်ႉယဝ်ႉ ဝႃႈၼႆဝႆႉ။
ၵူၺ်းၵႃႈတီႈမိူင်းမၢၼ်ႈသမ်ႉ လူင်ပွင်ၸိုင်ႈသိုၵ်း သမ်ႉဢမ်ႇပႆႇပၼ်ဢၼုယၢတ်ႈတၢင်ႇမၢႆၾၢင်တႃႇ ယွၼ်ႉဝႃႈပႆႇမီးၶေႃႈတူၵ်းလူင်းၵၼ်တင်းၶွမ်ႊပၼီႊ X သင်။ ၵူၺ်းၵႃႈ ဢိင်ၼိူဝ်မိူင်းမၢၼ်ႈ တိုၵ်ႉယူႇၼႂ်း ငဝ်းလၢႆးပႆႇၵတ်းယဵၼ်လႄႈ မီးလွင်ႈပွင်ႇၸႂ်ၵၼ်သေပၼ်ၸႂ်ႉဝႆႉၵူၺ်းဝႃႈၼႆသေတႃႉ ပေႃႈလဵင်ႉၶႄႇ ၵူၼ်းႁဵတ်းၵၢၼ်ၵျႃႊၽျႅၼ်ႉၶဝ်သမ်ႉ ဝၵ်ႉဢဝ်တိုဝ်ႉတၢင်းသေ ၸႂ်ႉၶိူင်ႈသတႃႊလိင်ႉ ႁဵတ်းၵၢၼ် လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊတူဝ်ႈလုမ်ႈၾႃႉ ။ ထိုင်တီႈၶွမ်ႊပၼီႊသတႃႊလိင်ႉ ဢွၵ်ႇပၵ်းပိူင်မႂ်ႇ တႃႇၽဵဝ်ႈမူၺ်ႉၸုမ်းလွၵ်ႇလႅၼ်ၵိၼ်ငိုၼ်း။ ၵူၺ်းၵႃႈဢၼ်တုမ်ႉတိူဝ်ႉ ၵမ်းသိုဝ်ႈသမ်ႉပဵၼ်ၵူၼ်းမိူင်း ၵူၼ်းၼုမ်ႇၸိူဝ်းတိုၵ်ႉႁဵတ်းၵၢၼ်တႃႇလႆႈလွင်ႈၽဵင်ႇပဵင်း လွတ်ႈလႅဝ်း ၽွင်းၶၢဝ်း ၸဝ်ႈဢႃႇၼႃႇ တဵၵ်းတဵင် ၶႃႈႁႅမ် ပူၼ်ႉပႅၼ်သုၼ်ႇလႆႈၵူၼ်းမိူင်း။
ဢၼ်ၸႂ်ႉၶိူင်ႈ သတႃႊလိင်ႉ ၼမ်သုတ်း တီႈမိူင်းမၢၼ်ႈၼႆႉ ပဵၼ်ၼႂ်းတိူင်းၸႄႈၵႅင်းလႄႈ မိူင်းတႆး။ ၵမ်ႈၼမ် ၸႂ်ႉတႃႇတူၺ်း တႃႇပိုၼ်ၽႄႈ ၶေႃႈမုလ်းၶၢဝ်ႇသၢၼ် ဢၼ်ပဵၼ်ယူႇၼႂ်းပိုၼ်ႉတီႈႁႂ်ႈၶိုတ်းတၼ်း – ၼႆ Myanmar Ineternet Project ဢွၵ်ႇၽိုၼ်ႁၢႆးငၢၼ်းဝႆႉၼင်ႇၼႆ။
ၵွပ်ႈၼႆ ဝၢႆးလင်ဝၼ်းတီႈ 16/08/2026 ၼႆႉ သင်ဝႃႈ သိုၵ်းမၢၼ်ႈမီးလွင်ႈတူၵ်းလူင်းၵၼ်တင်းၶွမ်ႊပၼီႊ X သေ ပၼ်တၢင်ႇမၢႆၾၢင်ယဝ်ႉၼႆ ၵူၼ်းမိူင်းမၢၼ်ႈ ၸင်ႇတေၸၢင်ႈတင်ႇမၢႆၾၢင်သေ ၸင်ႇတေၸၢင်ႈၸႂ်ႉၶိုၼ်း- ဝႃႈၼႆ။
ဢိၼ်ႊတိူဝ်ႊၼႅတ်ႉ သတႃႊလိင်ႉဢၼ်သိုဝ်ႉမႃးၸႂ်ႉယူႇၼႂ်းမိူင်းမၢၼ်ႈ ယၢမ်းလဵဝ်ၼႆႉ တေမီးႁႅင်းဝႆး 1 ၵိၵ်ႉ တေႃႇထိုင် 20000 ၵိၵ်ႉ။ ၵႃႈၶၼ်တႄႉ ၽတ်ႉၽဵင်ႇတေမီးယူႇ 1 ၵိၵ်ႉ 9000 ပျႃး။
တီႈမိူင်းမၢၼ်ႈၼႆႉ ဝၢႆးလင်သိုၵ်းမၢၼ်ႈယိုတ်းမိူင်းသေ ၸိူဝ်းပဵၼ်ၶွမ်ႊပၼီႊ ဢိၼ်ႊထိူဝ်ႊၼႅတ်ႉ ၼွၵ်ႈမိူင်း ဢၼ်မႃးလူင်းတိုၼ်းလၢင်း ပၼ်ၵူၼ်းမိူင်းၸႂ်ႉၸိူဝ်းၼၼ်ႉ – ထွႆထွၼ်ပွၵ်ႈၶိုၼ်းမိူင်းၽႂ်မၼ်းယဝ်ႉလႄႈ မီးၶွမ်ႊပၼီႊ MPT – Mytel ဢၼ်သိုၵ်းမၢၼ်ႈၵုမ်ၵမ်ၵမ်းသိုဝ်ႈၵူၺ်းယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ