ၶၢဝ်ႇပွမ်ၽႄႈလၢမ်းဝႃႈ သိုၵ်းမၢၼ်ႈပွႆႇတေႃႇဢွင်ႇသၢၼ်းၸူႉၵျီႇ

ၽွင်းၶၢဝ်းၵူၼ်းမိူင်း လုၵ်ႉႁိုၼ်ႇသၢၼ်ၶတ်း သိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်း ၊ တုၵ်းယွၼ်းပွႆႇတူဝ် ဢွင်ႇသၢၼ်းၸူႉၵျီႇၶိုၼ်း ၼႆယူႇတီႈဝဵင်းလူင်တႃႈၵုင်ႈ တူၼ်ႈတီး ဝဵင်းလိူဝ်ႇ ၸိူဝ်းၼႆႉ ၶမ်ႈၼႆႉမီးၶၢဝ်ႇပွမ်ဢွၵ်ႇမႃးဝႃႈသိုၵ်းမၢၼ်ႈ ပွႆႇတူဝ်တေႃႇဢွင်ႇသၢၼ်းၸူႉၵျီႇဝႃႈၼႆ။

ဝၼ်းတီႈ 6/2/2021 မိူဝ်ႈၼႆႉၵၢင်ၼႂ် ၵူၼ်းမိူင်းၼႄၵၢင်ၸႂ်တီႈဝဵင်းယႂ်ႇဝဵင်းလူင်လၢႆလၢႆဝဵင်းဢမ်ႇႁိုင်မွၵ်ႈ ၸူဝ်ႈမူင်း သိုၵ်းမၢၼ်ႈတတ်းၶၢတ်ႇၼႅင်ႈသၢၼ်ဢိၼ်ႊထိူဝ်ႊၼႅတ်ႉ
ပႃးၸဵမ် သၢႆၾူၼ်း။ ဢမ်ႇၸၢင်ႈတိတ်းတေႃႇသိုဝ်ႇ သၢၼ်ၵၼ်။ ၶၢဝ်ႇငၢဝ်းၵူၼ်းၼႄၵၢင်ၸႂ်ၵေႃႈဢမ်ႇၸၢင်ႈပိုၼ်ၽႄႈၼေၵူၼ်းလုမ်ႈၾႃႉလႆႈႁၼ်သင်။

ဢၢႆႈၼွင်ႉ ၵူၼ်းတူၼ်ႈတီးသိုပ်ႇၾူၼ်းတွင်ႈထၢမ်မႃးတီႈၽူႈတွႆႇႁွၵ်ႈဝႃႈ – ဢမ်ႇမီးဢိၼ်ႊထိူဝ်ႊၼႅတ်ႉလႄႈႁဝ်းၶႃႈဢမ်ႇလႆႈႁူႉၶၢဝ်ႇ ႁၼ်ၶၢဝ်ႇသင်။ ပိူၼ်ႈဝႃႈ ဢွင်ႇသၢၼ်းၸူႉၵျီႇ
လွတ်ႈမႃးယဝ်ႉၼႆၸွင်ႇၸႂ်ႈၶႃႈႁႃႉ- ဝႃႈၼႆ။

ၶမ်ႈၼႆႉၵိုင်ႉၵၢင်ႉမီးၶၢဝ်ႇဢွၵ်ႇမႃးဝႃႈ တေႃႇဢွင်ႇသၢၼ်းၸူႉၵျီႇ လွတ်ႈမႃးယဝ်ႉၼႆလႄႈ ၵူၼ်းမိူင်းတႃႈၵုင်ႈ ဢွၵ်ႈႁိူၼ်းမႃးၶွၼ်ႈၵၼ်ၼိူဝ်ႈသဵၼ်ႈတၢင်းသေ
ၸူမ်းသိူဝ်းတူပ်းမိုဝ်းၵၼ်။

ၵဵဝ်ႇၵပ်းလွင်ႈၼႆႉၵူၼ်းၼႂ်းပႃႇတီႇၼူၵ်ႉယုင်းလၢတ်ႈဝႃႈ ပဵၼ်ၶၢဝ်ႇပွမ်ၵူၺ်း။ တိုၼ်းတင်ႈၸႂ်ႁဵတ်းႁႂ်ႈၵူၼ်းတိုၼ်ႇသၢၼ်ႈၵူၺ်း ဝႃႈၼႆ။

ၵူၼ်း ပွၵ်ႉပယိၼ်ႉၼွင်ႇ တႃႈၵုင်ႈၵေႃႈလၢတ်ႈဝႃႈ – မီးၵူၼ်းပၼ်ႇရူတ်ႉထိပ်ႇသေႁွင်ႉပၢဝ်ႇဝႃႈ ၶၢဝ်ႇ RFA ပိုၼ်ၽၢဝ်ႇ သိုၵ်းပွႆႇ ဢွင်ႇသၢၼ်းၸူႉၵျီႇ လွတ်ႈမႃးယဝ်ႉ-
ၼႆလႄႈ ဢဝ်ၶၢဝ်ႇၼႆႉၽႄႈလၢမ်း ဝႃႈၼႆ။

ဝၼ်းတီႈ 1/2/2021 သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းသေ ၵုမ်းၶင်တူဝ် ဢွင်ႇသၢၼ်းၸူႉၵျီႇ၊ ၸွမ်ၸိုင်ႈဢူးဝိၼ်းမျိၼ်ႉလႄႈ ၽူႈၼမ်းၼႂ်းၸုမ်း NLD ဝႆႉ။ မၢင်ၵေႃႉတႄႉ ပွႆႇမႃးၶိုၼ်းယဝ်ႉသေတႃႉ ဢွင်ႇသၢၼ်းၸူႉၵျီႇတင်း ဢူးဝိၼ်းမျိၼ်ႉတႄႉ တိုၵ်ႉၵုမ်းၶင်ၵိုၵ်းႁိူၼ်းဝႆႉ မီတီႈၼေႇပျီႇတေႃႇ။

မိူဝ်ႈၽုၵ်ႈ 7/2/2021 ၼႆႉ ၵူၼ်းမိူင်းတႃႈၵုင်ႈ တေဢွၵ်ႇၼေၵၢင်ၸႂ်ယႂ်ႇၼမ်လိူဝ်မိူဝ်ႈၼႆႉ မီးၶၢဝ်ႇဝႆႉၼင်ႇၼႆ။