ယၢမ်းလဵဝ် ၵူၼ်းမိူင်းဢိၼ်ႊတူဝ်ႊၼီႊသျႃႊ ဢွၼ်ၵၼ်ဢွၵ်ႇၼႄၵၢင်ၸႂ်တေႃႇ လူင်ပွင်ၸိုင်ႈ ဝႆႉႁၢဝ်ႈႁႅင်း၊ ပဵၼ်လွင်ႈၶဵင်ႇတႃႉၵၢၼ်မိူင်း ဢၼ်ႁၢဝ်ႈႁႅင်းသုတ်း ၼႂ်းပၢၼ်ၸွမ်ၸိုင်ႈ ပရႃႇပူဝ်ႇဝူဝ်ႇ သူႇပီႇယႅၼ်ႇတူဝ်ႇ (Prabowo Subianto) လႆႈဢႃႇၼႃႇၽွင်းငမ်း မိူင်းဢိၼ်ႊတူဝ်ႊၼီႊသျႃႊမႃးလႄႈ ယွၼ်ႉၼၼ် ၽွင်းလူင်ၾၢႆႇၼွၵ်ႈမိူင်း မိူင်းၶႄႇ တုၵ်းယွၼ်းၵႂႃႇဝႃႈ – ႁႂ်ႈဢဝ်လွင်ႈႁူမ်ႇလူမ်ႈပၼ်ၵူၼ်းမိူင်းၶႄႇ ၸိူဝ်းမီးယူႇဝႆႉၼႂ်းမိူင်းၼၼ်ႉ ဝႃႈၼႆ။
ၽူႈၶၢၼ်ပၢၵ်ႇ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ လၢတ်ႈၵႂႃႇတီႈၼႂ်းပၢင်သပ်းၸႅင်ႈၶၢဝ်ႇ မိူဝ်ႈဝၼ်းတီႈ 01/09/2025 ၼႆႉဝႃႈ – ၸွမ်ၸိုင်ႈမိူင်းဢိၼ်ႊတူဝ်ႊၼီႊသျႃႊ ႁၢင်ႈႁႅၼ်းဝႆႉ တႃႇ ဢွၵ်ႇၶၢဝ်းတၢင်း ၵႂႃႇၶဝ်ႈႁူမ်ႈပၢင်ၵႅဝ်ႈဢွင်ႇပေႉသိုၵ်း ဢၼ်တေၸတ်းႁဵတ်းတီႈဝဵင်းပေႊၵျိၼ်ႊ မိူင်းၶႄႇ ၼႂ်းဝၼ်းတီႈ 3 ၼႆႉ။ ၵူၺ်းၵႃႈ ယွၼ်ႉငဝ်းလၢႆးၼႂ်းမိူင်းဢိၼ်ႊတူဝ်ႊၼီႊသျႃႊသေ လႆႈယုၵ်ႉလိူၵ်ႈပႅတ်ႈ ၵၢၼ်ဢွၵ်ႇၶၢဝ်းတၢင်း။ လွင်ႈၼႆႉယူႇတီႈ မိူင်းၶႄႇပွင်ႇၸႂ်ၸွမ်းယူႇ။ ယွၼ်ႉၼၼ်လႄႈ မုင်ႈမွင်းဝႃႈ လူင်ပွင်ၸိုင်ႈမိူင်းဢိၼ်ႊတူဝ်ႊၼီႊသျႃႊ တေဢဝ်လွင်ႈ ႁူမ်ႇလူမ်ႈပၼ် ၵူၼ်းမိူင်းၶႄႇ ၸိူဝ်းယူႇသဝ်းမီးဝႆႉ ၼႂ်းမိူင်းၶဝ်ၼၼ်ႉ – ဝႃႈၼႆ။
ၼႂ်းဝဵင်းလူင်ၵျႃႇၵႃႇတႃႇလႄႈ ဝဵင်းယႂ်ႇလူင်လၢႆလၢႆတီႈ ၼႂ်းမိူင်းဢိၼ်ႊတူဝ်ႊၼီႊသျႃႊၼၼ်ႉ ၵူၼ်းမိူင်းဢွၼ်ၵၼ်ဢွၵ်ႇၼႄၵၢင်ၸႂ်ဝႆႉႁၢဝ်ႈႁႅင်း။
မိူဝ်ႈဝၼ်းတီႈ 30/08/2025 ၼၼ်ႉ သိုဝ်ႇတူင်ႇဝူင်းၵူၼ်း (TikTok) မိူင်းၶႄႇၵေႃႈ ပိုၼ်ၽၢဝ်ႇဝႃႈ လႆႈပိၵ်ႉဢိုတ်းပႅတ်ႈ Live feature ၼႂ်း TikTok ၸူဝ်ႈၶၢဝ်း။ ၵွပ်ႈၼၼ်လႄႈ ၵူၼ်းမိူင်း ၸိူဝ်းယူႇသဝ်းဝႆႉ ၼႂ်းမိူင်းဢိၼ်ႊတူဝ်ႊၼီႊသျႃႊ တေဢမ်ႇၸၢင်ႈ live ၼႂ်း TikTok ၊ ပိူဝ်ႈတႃႇတေတုမ်ႉတွပ်ႇၵုမ်းထိင်း ၵဵဝ်ႇလူၺ်ႈပၢင်ၼႄၵၢင်ၸႂ်ၸိူဝ်းၼၼ်ႉ – သိုဝ်ႇၶၢဝ်ႇ Jakarta Post ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ