ၵျႃႊၽျႅၼ်ႉ ဢမ်ႇၼၼ် ၵၢၼ်ပႅတ်ႉၵိၼ်မၢပ်ႇၵိၼ် ၸွမ်း Online ၼႆႉ လုၵ်ႉတီႈသုၼ်ႇလဵဝ်၊ သုၼ်ႇၸုမ်း ပေႃႉယွၼ်ႈပႃး ၽွၼ်းပၢင်ႈမၢၵ်ႈမီး လႄႈ သလေႇၼႃႈတႃ ၸုမ်းလူင်ပွင်ၸိုင်ႈသိုၵ်း ဢိၵ်ႇပႃး လူင်ပွင်ၸိုင်ႈမိူင်းႁိမ်းႁွမ်းၵႂႃႇယဝ်ႉၼႆ တေႁၼ်ၺႃးၾၢင်ႉၺႃးၵၼ်ယူႇ။

တေၵႂၢတ်ႇလၢင်ႉၵျႃႊၽျႅၼ်ႉၼႆ ၵႃႈပေႉၶႂ်ႈဢွၵ်ႇလိၵ်ႈပိုၼ်ၽၢဝ်ႇႁဵတ်းၼေလႃႈ၊ မဵဝ်းၾူၼ်လုၵ်ႉတီႈၸွမ် ႁူဝ်ႈယွတ်ႇလူင်းလႄႈ ၽဵဝ်ႈတၢင်းႁွင်ႇလၼ်ၵႂႃႇပွင်ႇတၢင်းၸၢၼ်း၊ ၽဵဝ်ႈတၢင်းတူၵ်း တေသွတ်ႉသႅတ်ႉၵႂႃႇမူၵ်းယူႇ ပွတ်းဢွၵ်ႇပွႆးသႄႈ။

ၵၢၼ်ၵျႃႊၽျႅၼ်ႉၼႆႉ ဢမ်ႇၵႃးၵွႆးပႅတ်ႉလႅၼ်မိပ်ႇငႅၼ်း ငိုၼ်းတွင်းသၢႆၸႂ်၊ ပဵၼ်ပႃးလွၵ်းလဵၼ်ႈၸိူင်းၵၢၼ်မိူင်း ၵမ်ႉမႃႇၵၼ်ၵွၼ်ႇလႄႈ ဢမ်ႇသၢင်ႇထုၵ်ႇ ၸၢင်ႈၸၼ်လၢၵ်ႈပႃးၸုမ်းၸၢဝ်းလူႉၵွႆၵူၼ်ႇပင်းပႅတ်ႈၵွၼ်ႇ၊ တူၺ်းတီႈလွင်ႈၵွင်ႉၵၢႆႇ စောချစ်သူ၊ မင်းအောင်လှိုင် လႄႈ ၸဝ်ႈၶွင် KK Park ဢၼ်ၺႃးၺွပ်းဝႆႉၼႂ်းမိူင်းထႆးၼၼ်ႉၼႆ ပဵၼ်ထိုင်ဝႆႉၸၼ်ႉပၼ်ႁႃလူင်ၼႂ်းၵႄႈ တပ်ႉသိုၵ်းမၢၼ်ႈ ၊ လူင်ပွင်ၸိုင်ႈမိူင်းၶႄႇ လႄႈ မိူင်းထႆးဝႆႉယဝ်ႉယိုင်။

ပၼ်ႁႃလူင်ၼႆႉ ၸၼ်လၢၵ်ႈပႃး ၵႅမ်ၶုၼ်ၽွင်းလူင် ၾၢႆႇၽၼ်ႇတႃႇမိူင်းထႆး ဢၼ်ပႆႇတၼ်းလႆႈၼင်ႈလုမ်း ပေႃးလႆႈထွႆဢွၵ်ႇပႅတ်ႈယဝ်ႉလူး။

ၸွင်ႇတေယဝ်ႉၵႂႃႇမွၵ်ႈၼႆႈႁိုဝ်၊ လုၵ်ႉတီႈ BGF, DKBA တၵ်းလၢမ်းထိုင် KNU ဢမ်ႇႁၢင်ႉသႄႈ ။ မိူဝ်ႈလဵဝ် တပ်ႉသိုၵ်းမၢၼ်ႊယိုတ်ႈမိူင်း ၶဝ်ႈၽဵဝ်ႈမုင်ႉၵျႃႊၽျႅၼ်ႉလႄႈ ၵူၼ်းမွၵ်ႈသွင်ႁဵင် ပၢႆႈ ၶဝ်ႈလႅၼ်လိၼ်မိူင်းထႆးၵႂႃႇ၊ ၼႂ်းၼၼ်ႈပႃးၵူၼ်းၸိုင်ႈမိူင်း ထႆး၊ ဢိၼ်ႊတီႊယိူဝ်ႊ ၊ ၼီႇပေႃး၊ ဝႅတ်ႉၼၢမ်း ၊ ၵႅၼ်ႇၺႃႇ၊ သီႇရိလင်းၵႃ ၸဵမ်ၸိူဝ်းၼႆႈ ႁူမ်ႈသဵၼ်ႈမီး21 မိူင်းၼႆသေတႃႉ ၵမ်ႈၼမ်သုတ်းသမ်ႉ ပဵၼ်ၵူၼ်းမိူင်းၶႄႇ၊ ၸင်ႇၼၼ် ၵူၼ်းၶႄႇဢၼ်ပဵၼ်ၸဝ်ႈၶွင် KK Park ၼၼ်ႉ ႁႂ်ႈလႆႈမွပ်ႈပၼ်ၼႂ်းမိုဝ်းၶဝ်ဝႆးဝႆး ဢၼ်ဝႃႈၼၼ်ႉ မိူၼ်တင်းယိုၼ်တူဝ်ဝႃႈ ငဝ်ႈငိူၼ်ႈပၼ်ႁႃၼႆႉတႄႇမႃးတီႈၶဝ်ၼၼ်ႉၼႆယဝ်ႉ။

 ၵွၼ်ႇပႆႇတႄႇပၢင်ၵုမ်လူင် ASEAN ၸူဝ်ႈၸႃႈၸွမ်ၸိုင်ႈထရၢမ်ႉ ပႆႇပႃႈၽႅဝ်မႃးမလေႊသျႃႊ ႁႂ်ႈလႆႈမွပ်ႈပၼ်ၶဝ်ၵႂႃႇ ပွင်ႇဝႃႈၼၼ်ၵူၺ်း ။ ၵူၺ်းၵႃႈ ပႅၵ်ႉသမ်ႉမိူင်းထႆး ဢဝ်မၼ်းမွပ်ႈပၼ်ၶႄႇ ယဝ်ႉၵေႃႈယႃႇ ၵၢၼ်ၵျႃႊၽျႅၼ်ႉၼႆႉ ၸွင်ႇတေႁၢႆဝၢႆးၵႂႃႇယူႇႁႃႉ၊ ဢမ်ႇဝႃႈလႆႈၶႃႈသႄႈ။  ၵျႃႊၽျႅၼ်ႉ ၼႆႉ ဢမ်ႇၸႂ်ႈၶိူင်ႈၸႂ်ႉလၢႆးၵၢၼ်မိူင်းဢၼ်႞ၼႆ ၽႂ်တေၸၢင်ႈထဵင်ၶႃႈလႃႇၼေႃႈ။

ပၢင်ၵုမ်လူင် ASEAN ပွၵ်ႈၵမ်း 47 ဢၼ်တေႁဵတ်းၼႂ်းဝၼ်းတီႈ 26 မိူဝ်ႈၽုၵ်ႈၼႆႉ တၢမ်တူဝ်ၸွမ်ၸိုင်ႈထရၢမ်ႉ တေၶဝ်ႈပႃးၼႆလႄႈ ဢွၼ်လၢမ်းႁၼ်မၢင်ႇၵိူဝ်းဝႃႈ ဢမေႊရိၵၼ်ႊ တေယိပ်းငမ်ၵုမ်းၵမ်ပႃး လွင်ႈမိူင်းၶႄႇသုမ်ႇငုမ်းၼိူဝ် မိူင်းမၢၼ်ႈ လႄႈ ၸိူဝ်းမိူင်းႁိမ်းႁွမ်း ၵမ်ႈၽွင်ႈယူႇၼႆယဝ်ႉ။

 မိူဝ်ႈလဵဝ် ပိူဝ်ႈတႃႇတိုၵ်းယႃႉၵၢၼ်ၵႃႉယႃႈမဝ်းၵမ်ၼၼ်ႉ ဢမေႊရိၵၼ်ႊ ပွႆႇၽုင်ႁိူဝ်းတၢင်ႇၶိူင်ႈမိၼ်လူင်မၼ်း ၶဝ်ႈၵႂႃႇၼႂ်းပၢင်ႇလၢႆႇၶႃႇရေႇပီႇယၼ်ႇသေ ပၼ်ႁႅင်းဢီးတေႃႇ ဝႅၼ်ၼီၸဝွႆးလႃး လႄႈ ၶူဝ် လမ်ပီယႃယူႇယဝ်ႉ။

 ႁဝ်းၶႃႈ ယၢမ်ႈပၢႆးၼေမႃးယူႇ၊ ၼႂ်းၸိုင်ႈမိူင်း 5 မိူင်း ဢၼ်ဢမေႊရိၵၼ်ႊ မၢႆထိုင်ဝႃႈ လုတ်ႈႁၢမ်းဝႆႉၵၢၼ်ၽဵဝ်ႈပႅတ်ႈ ယႃႈမဝ်းၵမ်ၼၼ်ႉ ၶဝ်ႈပႃးမိူင်းမၢၼ်ႊၼႆ။

 ပေႃးၼၼ် ၵၢၼ် ၵျႃႊၽျႅၼ်ႉ ဢၼ်ၵဵဝ်ႈၵွတ်ႇဝႆႉတင်း ယႃႈမဝ်းၵမ်ၼၼ်ႉ ဢမေႊရိၵၼ်ႊ တေဢမ်ႇဢဝ်လိူင်ႈၵိုၵ်းၵပ်း ၵၼ်ၼႆ ဢမ်ႇၸၢင်ႈဝႃႈလႆႈလေႃႇ။ တိူၵ်ႈတီႈဝႃႈ ထရၢမ်ႉၼႆႉ ဝႆႉပႃႇၸႃးၼိူဝ် ၵၢၼ်ၽွၼ်းပၢင်ႈၵူၺ်း ၼႆၵေႃႈလၢႆးလႃႈ၊ ၼင်ႇႁိုဝ်မိူင်းထႆး ဢၼ်ပဵၼ်ဢူၺ်းလီၵဝ်ႇၵဝ်ႇမၼ်း တေလွတ်ႈလႆႈတႂ်ႈႁူမ်ႈငဝ်း မိူင်းၶႄႇၼၼ်ႉ ႁူႉတေၶိုင်ပႃးယဝ်ႉ၊ ပေႃးၼၼ်မႃး လိူင်ႈၵျႃႇၽႅၼ်ႇ လႄႈ ယႃႈမဝ်းၵမ်ဢၼ်တင်း ၼမ်ႁၼ်ထိုင်ဝႃႈ လုၵ်ႉတီႈလႅၼ်လိၼ်မိူင်းမၢၼ်ႈသေ ၽႄႈလၢမ်းၶဝ်ႈၸူးမိူင်းထႆး၊ မိူင်းၶမဵၼ် ၸဵမ် ၸိူဝ်းၼႆႈၼၼ်ႉ ၸွင်ႇတေဢမ်ႇၺႃးသၢႆလင်ၽႅတ်းပႃးႁိုဝ်၊ လႅပ်ႈဢမ်ႇလွတ်ႈၺႃးသႄႈ။

ၸင်ႇၼၼ် မိၼ်းဢွင်ႇလၢႆႇၵေႃႈ ၼႅတ်ႈၶဝ်ႈၽဵဝ်ႈႁူင်းၵၢၼ် KK Park ဢမ်ႇၵႃး ၸႂ်ႉႁႅင်းလိူဝ်သေ ယိုတ်းပႃးသဵၼ်ႈတၢင်းလူင်ၵၢၼ်ၵႃႉၶၢႆ ၼႂ်းၵႄႈထႆးလႄႈမၢၼ်ႈ ဢၼ်လႆႈလတ်းၽၢၼ်ႇၼႃႈတီႈ KNU ၼၼ်ႉယဝ်ႉ။

ဢမ်ႇၸႂ်ႈဝႃႈ ပိူဝ်ႈတႃႇလႆႈၼႃႈလီတီႈထႆးပိူင်လဵဝ်ၵေႃႈ ၵေႇသုတ်းတေလွတ်ႈ လႆႈသၢႆတႃ ထရၢမ်ႉပၵ်းတူၺ်းပဵၼ်ယႂ်ႇၼၼ်ႉယိုင်။

 ၾၢႆႇၼိုင်ႈၵေႃႈ ပေႃးတဵၵ်းတဵင်လႆႈ KNU ၼႆ ႁူႉတေလႆႈၼႃႈလီ တီႈမိူင်းပႃးလူး။ မိူဝ်ႈမိူဝ်ႈလဵဝ်ၵၼ်သေ ၸွမ်သိုၵ်းယႃႇပျေႉ လၢတ်ႈဢွၵ်ႇမႃးဝႃႈ ပေႃးၶႂ်ႈလႆႈၸႄႈမိူင်းဝႃႉ ႁႂ်ႈပူတ်းၶိူင်ႈလၢၵ်ႈၼၢၵ်ႈသေ လူင်းလိူၵ်ႈတင်ႈယဝ်ႉ ၶဝ်ႈမႃးဢုပ်ႇၼႂ်း တႅၼ်းၽွင်းၼႆၼၼ်ႉၵေႃႈ မိူၼ်တင်းၼေငဝ်းၼၢမ်းဝႃႈ ပေႃးထိုင်ၼႃႈၼႅၼ်ႈမႃး ၸုမ်းဝႃႉၵေႃႈ ၸၢင်ႈၺႃးမိပ်ႇငႅၼ်းလူၺ်ႈ ပၼ်ႁႃသေလွင်ႈလွင်ႈ ၸိူင်ႉၼင်ႇယႃႈမဝ်းၵမ်ၼၼ်ႉလႂ်ယူႇ ၼႆၵူၺ်း။

ၵၢၼ်မိူင်းၼႆႉ သလေႃႇဢမ်ႇတေႃႇႁိုၵ်ႉၺႃးၼႆ ဢမ်ႇသူႈမီး၊ ၵႂႃႇၸွမ်းၽႅၼ်သွၼ်ႉၽႅၼ်လွၼ်ႉလွၼ်ႉလႄႈ ပွႆႇႁႂ်ႈၸုမ်းၸၢဝ်းလုၵ်ႉၽိုၼ်ႉႁဝ်းၶဝ် လူင်တူဝ်လိုမ်းၶိင်းၵေႃႈ တၵ်းၺႃးၸုမ်းဢူင်ႈမိုဝ်းယႂ်ႇ ၵဵပ်းသႂ်ႇပဵၼ်ယိူဝ်ႇၵၢၼ်မိူင်းၶဝ်ဢမ်ႇႁၢင်ႉယဝ်ႉၼႆ ယွၼ်းပၢႆးၼေတၢင်းႁၼ်မွၵ်ႈၼႆႈၵွၼ်ႇဢေႃႈ။