ပၢင်လိူၵ်ႈတင်ႈ ဢၼ် ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ တေၼမ်းၸတ်းႁဵတ်း ၼႂ်းႁၢင်ပီ 2025 လႄႈ ႁူဝ်ပီ 2026 ၼႆႉ ပဵၼ်ပၢင်လိူၵ်ႈတင်ႈပွမ်သေ ဢမ်ႇၶဝ်ႈတၢင်းၵၢၼ်ၼႆ ၸုမ်းၸၢတ်ႈၸိုင်ႈလုမ်ႈၾႃႉ တူဝ်တႅၼ်းမိူင်းမၢၼ်ႈ လၢတ်ႈၸီႉၸမ်ႈၼႄဝႆႉၼင်ႇၼႆ။
Tom Andrew ထွမ်ႊ ဢႅၼ်ႊတရူႊ တူဝ်တႅၼ်းၶိုၵ်ႉတွၼ်းၸၢတ်ႈၸိုင်ႈလုမ်ႈၾႃႉ UN ၵဵဝ်ႇလူၺ်ႈသုၼ်ႇလႆႈသုၼ်ႇပဵၼ်ၵူၼ်းမိူင်းမၢၼ်ႈ မွၵ်ႇလၢတ်ႈၵႂႃႇတီႈပၢင်သပ်းၸႅင်ႈၶၢဝ်ႇ ပၢင်ၵုမ်လူင်ၸၢတ်ႈၸိုင်ႈလုမ်ႈၾႃႉ မိူဝ်ႈဝၼ်းတီႈ 29/10/2025 ဝႃႈ- “ပၢင်လိူၵ်ႈတင်ႈမိူင်းမၢၼ်ႈၵမ်းၼႆႉပဵၼ်ဢၼ်ပွမ် လႄႈ ပဵၼ်ၵၢၼ်လႅၼ်တေႃႇၵၼ်ၵူၺ်း။ တဵၵ်းတီႉၺွပ်းဢဝ်ၽူႈဢွၼ်ႁူဝ်ၵၢၼ်မိူင်း ၾၢႆႇၶတ်းၶၢၼ်ႉၼၼ်ႉ ယဵတ်ႈၶွၵ်ႈဝႆႉသေ – တူဝ်ၸဝ်ႈဢႃႇၼႃႇသမ်ႉ တေၶိုၼ်းမႃးႁဵတ်းပၢင်လိူၵ်ႈတင်ႈဢၼ်လွတ်ႈလႅဝ်းလႄႈၽဵင်ႇပဵင်းၼႆၼၼ်ႉတႄႉ ဢမ်ႇပဵၼ်လႆႈသႄႈ။ ယဝ်ႉၵေႃႈ သမ်ႉပၢႆတဵၵ်းပိုၼ်ၽၢဝ်ႇယႃႉပႅတ်ႈ ပႃႇတီႇၵၢၼ်မိူင်း 40 ၸုမ်း ၸိူဝ်းဢွင်ႇပေႉပၢင်လိူၵ်ႈတင်ႈ လူၺ်ႈလွင်ႈၽဵင်ႇပဵင်းပဵၼ်ထမ်းၼၼ်ႉသေ ဢိုတ်းႁၢမ်ႈဢမ်ႇပၼ် ၸုမ်းသိုဝ်ႇ ႁၢႆးငၢၼ်း ၶၢဝ်ႇမၢၼ်ႇမႅၼ်ႈၸိုဝ်ႈၸႂ်ႈၼၼ်ႉထႅင်ႈ။ ၼၼ်ႉၵူၺ်းဢမ်ႇၵႃး ပၢႆဢမ်ႇပၼ်ၵူၼ်းမိူင်း တူၵ်ႇလၢတ်ႈသေႉသွမ်း ထတ်းသၢင်ၼိူဝ် ၸဝ်ႈဢႃႇၼႃႇသိုၵ်း။ ဢမ်ႇပၼ် ဢုပ်ႇလၢတ်ႈထတ်းသၢင်လွင်ႈပၢင်လိူၵ်ႈတင်ႈသေဢိတ်း ” – ဝႃႈၼႆ။
လိူဝ်ၼၼ်ႉ ၽွင်းၶၢဝ်းၵူၼ်းမိူင်းႁူမ်ႈတုမ်ႁူပ်ႉၽေးပၢင်တိုၵ်း လႄႈ ၽေးသၽႃႇဝသေ လူဝ်ႇတၢင်း ၸွႆႈထႅမ်ၵူၼ်းတေႃႇၵူၼ်းယူႇၼႆႉ ၾၢႆႇသိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်းသေ သိုပ်ႇပွႆႇမၢၵ်ႇသႂ်ႇပိုၼ်ႉတီႈမီးၵူၼ်းမိူင်းယူႇသဝ်းဝႆႉႁၢဝ်ႈႁႅင်း ။
ၾၢႆႇၶွမ်ႊမသျိၼ်ႊသိုၵ်းမၢၼ်ႈၵေႃႈပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ သင်မီးၵူၼ်းသေႉသွမ်း ဢမ်ႇၼၼ် ဢုပ်ႇလၢတ်ႈထတ်းသၢင်လွင်ႈပၢင်လိူၵ်ႈတင်ႈၸိုင် တေတီႉၺွပ်းဢဝ်လိူင်ႈၵူၼ်းၵေႃႉၼၼ်ႉၵႂႃႇ လူၺ်ႈပၵ်းပိူင်ၾိင်ႈမိူင်းပၢင်လိူၵ်ႈတင်ႈၼႆလႄႈ ၼႂ်းၶၢဝ်းတၢင်း 15 ဝၼ်း သိုၵ်းမၢၼ်ႈတီႉၺွပ်းဢဝ်လိူင်ႈ မီးၸမ် 10 ၵေႃႉယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ