ၵူၼ်းမိူင်းၽၵ်းၵႃႇ ဝဵင်းၾၢႆၶုၼ်ၸိုင်ႈတႆးပွတ်းၸၢၼ်း ၸိူဝ်းဢမ်ႇၸႂ်ႈၶႃႈႁၢပ်ႇၵၢၼ်ၶုၼ် ၸိူဝ်း ၼၼ်ႉ လႆႈသိုဝ်ႉၸႂ်ႉၾႆးၾႃႉ ၼိုင်ႈလိူၼ် ၼပ်ႉႁူဝ်မိုၼ်ႇပျႃး ။
ဝဵင်းၾၢႆၶုၼ် ဢၼ်ထူပ်းၽေးပၢင်တိုၵ်းၼၼ်ႉ ဝၢႆးလင် ၸုမ်းလုၵ်ႉၽိုၼ်ႉထွႆဢွၵ်ႇဝဵင်းယဝ်ႉ သိုၵ်းမၢၼ်ႈႁူမ်ႈပျီႇတူႉၸိတ်ႉ ၶဝ်ႈပၵ်းတပ်ႉ ၼႂ်းဝၢၼ်ႈၼႂ်းဝဵင်းသေ ၸႂ်ႉၵူၼ်းပၢႆႈၽေးသိုၵ်း ၸိူဝ်းပၢႆႈသွၼ်ႈယူႇဝႆႉၸွမ်း ဝဵင်းပၢင်လွင်း ၊ ယွင်ႁူၺ်ႈ ၊ သီႇသႅင်ႇ ဢွၼ်ၵၼ် ပွၵ်ႈယူႇႁိူၼ်း ယေးၽႂ်မၼ်း ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈၶဝ်ပၼ်ၾႆးၶႃႈႁၢပ်ႇၵၢၼ်ၶုၼ်ၵူၺ်း ၊ ပေႃးဢမ်ႇၸႂ်ႈၶႃႈႁၢပ်ႇၵၢၼ်ၶုၼ်ၶဝ် ပေႃးၶႂ်ႈၸႂ်ႉၾႆးတေလႆႈသိုဝ်ႉဢဝ်ၼႆဢေႃႈ ၼိုင်ႈလိူၼ် တေလႆႈပၼ် ႁႃႈမိုၼ်ၶႃႈဝႃႇ ၊ တႃႇႁႃၵိၼ်ၵူၺ်းယၢပ်ႇယူႇယဝ်ႉ ဢမ်ႇပဵၼ်လႆႈၶႃႈ ၵူၼ်းမိူင်းလႆႈၸႂ်ႉ ၾႆးလႅတ်ႇ ၾႆးသူဝ်ႊလႃႊဢဝ် ”- ဝႃႈၼႆ ။
ယၢမ်းလဵဝ် ၵူၼ်းပၢႆႈၽေးသိုၵ်းၸိူဝ်းပွၵ်ႈမိူဝ်းၼႂ်းဝဵင်းၾၢႆႇၶုၼ် ၵမ်ႈၼမ် မႆႈၸႂ်လွင်ႈ ႁူမ်ႇလူမ်ႈလႄႈ ယၢမ်းၵၢင်ၶမ်ႈၵၢင်ၶိုၼ်း လႆႈၵႂႃႇၼွၼ်းၸွမ်း ဝတ်ႉဝႃးၽႃသိူဝ်ႇ – ၵူၼ်းပိုၼ်ႉတီႈလၢတ်ႈ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပွၵ်ႈမိူဝ်းၶိုၼ်းၵေႃႈ ဢမ်ႇပႆႇမီးလွင်ႈႁူမ်ႇလူမ်ႈ လႆႈမႆႈၸႂ် ၵႆႉလႆႈယိၼ်းသဵင်ၵွင်ႈသဵင်မၢၵ်ႇလႄႈ ၵူၼ်းၸိူဝ်းပွၵ်ႈမႃး မၢင်ၸိူဝ်းၵႂႃႇၼွၼ်းၸွမ်း ၵျွင်းမုၼ်ၸဝ်ႈ ၼႂ်းဝဵင်းၵေႃႈ မၢၵ်ႇမႅင်းၸိူဝ်းၼႆႉတိုၵ်ႉၵိုတ်းယူႇ”– ဝႃႈၼႆ ။
ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၾၢႆၶုၼ် မိူၼ်ၼင်ႇ ဝၢၼ်ႈလွႆပဝ်း ၊ ၼမ်ႉသွင်ၶႄး ၊ လႁႄႇ ၊ ၼႃးၵူင်း ၊ ၺွင်ႇမူၼ်း ၊ ဝၢၼ်ႈလွႆပူၵ်ႇ( တွင်ႇပူဝ်ႉၵျီး) ၊ ၸၢင်ႉၽိူၵ်ႇ ၊ ငႃးမူး လႄႈ ၵူၼ်းပၢႆႈၽေး သိုၵ်း ၼႂ်းၸႄႈဝဵင်း ယွင်ႁူၺ်ႈ မိူၼ်ၼင်ႇ ဝၢၼ်ႈလိၼ်ပူၵ်ႇတႅၵ်ႇ ၊ လွႆလူင် ၸိူဝ်းၼႆႉ ႁူဝ်ၵူၼ်းမီး ၸမ်မိုၼ်ႇ ဢွၼ်ၵၼ်ပွၵ်ႈယူႇၶိုၼ်းႁိူၼ်းယေး ဝႃႈၼႆ ။
ယၢမ်းလဵဝ်သိုၵ်းမၢၼ်ႈႁႄႉႁၢမ်ႈ ၵူၼ်းဝၢၼ်ႈ ၸိူဝ်းမီးၾၢႆဢွၵ်ႇၼမ်ႉၾၢႆၶုၼ် ဢမ်ႇပၼ်ၶဝ်ႈဢွၵ်ႇ ၼႂ်းဝဵင်းၾၢႆႇၶုၼ် ၵူၼ်းမိူင်းပိုၼ်ႉတီႈ ယၢပ်ႇၽိုတ်ႇတႃႇ ႁႃၵိၼ်လဵင်ႉတွင်ႉဝႆႉ ၼႆယဝ်ႉ ။
တႄႇဢဝ် ႁူဝ်ပီ 2025 ၼၼ်ႉမႃး တေႃႇထိုင်လိူၼ်ၵျူႊလၢႆႊၼႆႉ သိုၵ်းမၢၼ်ႈတင်း ၸုမ်း ပျီႇတူႉၸိတ်ႉ ပဢူဝ်း PNO ႁူမ်ႈၵၼ်သေ လေႃႇတိုၵ်းၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈမႃးႁၢဝ်ႈ ႁႅင်း ။ ဝၢႆးၼၼ်ႉ ၼႂ်းဝၼ်းတီႈ 07/07/2025 သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆးတင်းသဵင်ႈယဝ်ႉသေ ၸႂ်ႉၵူၼ်းပိုၼ်ႉတီႈ ပွၵ်ႈယူႇၶိုၼ်းႁိူၼ်းၽႂ်မၼ်းၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ