ၼႂ်းဝၼ်းတီႈ 30/10/2025 ၶၢဝ်းယၢမ်းၵၢင်ၼႂ် 11 မူင်း (ၶၢဝ်းယၢမ်း မိူင်းၶူဝ်ႊရီႊယိူဝ်ႊၸၢၼ်း)ၼႆႉ ၸွမ်ၸိုင်ႈ မိူင်းဢမေႊရိၵၼ်ႊ တေႃႊၼႄႊလ်ထရမ်ႉ တင်း ၸွမ်ၸိုင်ႈမိူင်းၶႄႇ သျီႊၵျိၼ်ႉၽိင် ႁူပ်ႉဢုပ်ႇၵၼ်တီႈ ဝဵင်းပူႊသၢၼ်ႊ (Busan)၊ မိူင်းၶူဝ်ႊရီႊယိူဝ်ႊၸၢၼ်း ဝႃႈၼႆ။

ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇဝႃႈ – “ႁဝ်းၶႃႈမီးလွင်ႈ တူၵ်းလူင်းလႆႈၸႂ်ၵၼ်ဝႆႉတၢင်းၼမ်ယဝ်ႉ၊ ဢၼ်ႁူပ်ႉထူပ်းၵၼ်ယၢမ်းလဵဝ်ၼႆႉ ယိူင်းဢၢၼ်း ၼင်ႇႁိုဝ်တေလႆႈၶေႃႈတူၵ်းလူင်းလႆႈၸႂ်ၵၼ် တိူဝ်းၼမ်မႃးထႅင်ႈ” ဝႃႈၼႆ။

ၸွမ်ၸိုင်ႈမိူင်းၶႄႇ သျီႊၵျိၼ်ႉၽိင်ၵေႃႈ လၢတ်ႈၵႂႃႇဝႃႈ – “မိူင်းၶႄႇ လႄႈတင်း မိူင်းဢမေႊရိၵၼ်ႊ ဢၼ်ပဵၼ်မိူင်းဢဵၼ်ႁႅင်းၵၢၼ်ပၢႆးမၢၵ်ႈမီးယႂ်ႇလိူဝ်ပိူၼ်ႈ 2 မိူင်း ၼႂ်းလုမ်ႈၾႃႉၼႆႉ ၵႆႉမီးလွင်ႈၶဵင်ႈၶႅင် တုမ်ႉတိူဝ်ႉၵၼ်ယူႇသေတႃႉ တႃႇမိူင်း ဢမေႊရိၵၼ်ႊ လႄႈ ၶႄႇ တေႁူမ်ႈၵၼ်ႁဵတ်းသၢင်ႈၵႂႃႇၼၼ်ႉ ၾၢႆႇမိူင်းၶႄႇ တူဝ်ႈတၼ်းဝႆႉယူႇ” ဝႃႈၼႆ။

သျီႊၵျိၼ်ႉၽိင် သိုပ်ႇလၢတ်ႈ ဝႃႈ – “ၼႂ်းၵႄႈမီးလွင်ႈၶဵင်ႇတႃႉဝႆႉယူႇလၢႆဢၼ်ၼၼ်ႉ လွင်ႈၵပ်းသိုပ်ႇၵႄႈၵၢင် ဢမေႊရိၵၼ်ႊ လႄႈတင်း ၶႄႇ တိုၵ်ႉမၼ်ႈၼိမ်ဝႆႉ။ ၵွပ်ႈၼၼ်ႉ လူဝ်ႇလႆႈသိုပ်ႇပႆၵႂႃႇတီႈ ၼိူဝ်သဵၼ်ႈတၢင်းဢၼ်မိူၼ်ၵၼ်လႄႈ မၢၼ်ႇမႅၼ်ႈၼၼ်ႉယူႇ” ဝႃႈၼႆ။

သိုဝ်ႇၶၢဝ်ႇ မိူင်းၶူဝ်ႊရီႊယိူဝ်ႊၸၢၼ်း ႁၢႆးငၢၼ်းၵႂႃႇဝႃႈ – တီႈၼႂ်းပၢင်ၵုမ် သွင်မိူင်း ႁူပ်ႉထူပ်းၵၼ်ၼၼ်ႉ ၵဵဝ်ႇလူၺ်ႈလွင်ႈၶွၼ်ႇ၊ လွၵ်းလၢႆးပၢႆးပၺ်ႇၺႃႇ ပၢႆးၸၢင်ႈ၊ လွင်ႈၶဵင်ႈၶႅင်ၵႄႈၵၢင်သွင်ၸိုင်ႈမိူင်း တေလူတ်းယွမ်းထိုင်လႆႈ မွၵ်ႈၵႃႈႁိုဝ်ၼႆၼၼ်ႉ တူဝ်ႈလုမ်ႈၾႃႉ ဢွၼ်ၵၼ်သူၼ်ၸႂ်ဝႆႉ။ 

ႁွင်ႈၵၢၼ်ၶၢဝ်ႇ လူင်ပွင်ၸိုင်ႈမိူင်းၶႄႇ CCTV တႄႉ ႁၢႆးငၢၼ်းဝႆႉဝႃႈ – သွင်ၾၢႆႇႁူပ်ႉထူပ်းဢုပ်ႇၵုမ်ၵၼ် ႁိုင်ၶၢဝ်းတၢင်း 1 ၸူဝ်ႈမူင်း 40 မိၼိတ်ႉသေ ယဝ်ႉတူဝ်ႈၵႂႃႇ၊ လႆႈၶေႃႈတူၵ်းလူင်းသင်ၼႆၼၼ်ႉတႄႉ ပႆႇလႆႈႁူႉၸွမ်း၊ ၶၢဝ်းယၢမ်းပၢင်ၵုမ်ၼႆႉ ႁိုင်လိူဝ်သေ ဢၼ်ၶၢတ်ႈလၢမ်းဝႆႉ ဝႃႈၼႆ။

ၵဵဝ်ႇလူၺ်ႈလွင်ႈႁူပ်ႉထူပ်းဢုပ်ႇၵုမ်ၵၼ်ၼႆႉသေ သွင်ၾၢႆႇၵေႃႈ ဢမ်ႇပႆႇပိုၼ်ၽၢဝ်ႇပဵၼ်တၢင်းၵၢၼ်။ 

ဝၢႆးလင်ႁူပ်ႉဢုပ်ႇၵၼ်ယဝ်ႉ ၵၢၼ်ဢွၵ်ႇၶၢဝ်းတၢင်း ၸွမ်ၸိုင်ႈ မိူင်းဢမေႊရိၵၼ်ႊ တေႃႊၼႄႊလ်ထရမ်ႉ တီႈၼႂ်းၵုၼ်ၶဵဝ်ဢေးသျႃးၵေႃႈ ပဵၼ်ဢၼ်ယဝ်ႉတူဝ်ႈၵႂႃႇသေ ပွၵ်ႈမိူဝ်းၶိုၼ်း။ ထရမ်ႉၼႆႉ ဢွၵ်ႇၶၢဝ်းတၢင်းမႃး ၼႂ်းၵုၼ်ၶဵဝ် ဢေးသျႃး တႃႇၶၢဝ်းတၢင်း 5 ဝၼ်း၊ ႁွတ်ႈထိုင်တီႈ မိူင်းမလေးသျႃး၊ မိူင်းၵျပၼ်ႊလႄႈ ၶူဝ်ႊရီႊယိူဝ်ႊၸၢၼ်း။

ၾၢႆႇၼိုင်ႈၵေႃႈ ၸွမ်ၸိုင်ႈ မိူင်းၶႄႇ သျီႊၵျိၼ်ႉၽိင် သိုပ်ႇဢွၵ်ႇၶၢဝ်းတၢင်းၵႂႃႇတီႈဝဵင်း ၵျွင်ႊၵျူႊ၊ မိူင်းၶူဝ်ႊရီႊယိူဝ်ႊၸၢၼ်း တႃႇၶဝ်ႈႁူမ်ႈၸွမ်းပၢင်ၵုမ် ၵၢၼ်ႁူမ်ႈသၢင်းပၢႆးမၢၵ်ႈမီး ဢေးသျႃး – ပၸိၾိၵ်ႉ၊  ၵၢၼ်ဢွၵ်ႇၶၢဝ်းတၢင်းပွၵ်ႈၼႆႉ ပဵၼ်ပွၵ်ႈၵမ်းႁႅၵ်ႈ ၼႂ်းၶၢဝ်းတၢင်း 11 ပီ ဝၢႆးလင်ပီ 2014 ၼႆယဝ်ႉ။