မိူဝ်ႈဝၼ်းတီႈ 27-28 လိူၼ်ဢွၵ်ႉထူဝ်ႊပိူဝ်ႊ ၸုမ်းသိုၵ်းမၢၼ်ႈ တင်း သိုၵ်းတဢၢင်း ၵႂႃႇႁူပ်ႉထူပ်းၵၼ် တီႈဝဵင်းၶုၼ်ႊမိင်ႊ ၼႂ်းမိူင်းၶႄႇ ငူပ်ႉငီႉၵၼ်ပဵၼ် ပွၵ်ႈၵမ်းထူၼ်ႈ 9 သေ လူင်းလၢႆးမိုဝ်းၵိုတ်းတိုၵ်းၵၼ် (လူၺ်ႈဢမ်ႇမၵ်းမၼ်ႈၶၢဝ်းတၢင်းႁိုင်) ၼႆယဝ်ႉ။

ၾၢႆႇၸုမ်းသိုၵ်းတဢၢင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ “ တင်းသွင်ၾၢႆႇတူၵ်းလူင်းလႆႈၸႂ်ၵၼ်ဝႃႈ ၾၢႆႇသိုၵ်းတဢၢင်း တေထွႆဢွၵ်ႇ ၼႂ်းဝဵင်းမိူင်းၵုတ်ႈ၊ မိူင်းမိတ်ႈပၼ်ၶိုၼ်း သိုၵ်းမၢၼ်ႈ။ ၾၢႆႇသိုၵ်းမၢၼ်ႈၵေႃႈ တေဢမ်ႇလႆႈဢဝ်ႁိူဝ်းမိၼ်၊ ႁႅၼ်းသိုၵ်းၶိုၼ်ႈတိုၵ်းတေႃႇ သိုၵ်းတဢၢင်းၶိုၼ်းလႃးလႃး တင်ႈတႄႇ ဝၼ်းတီႈ မိူဝ်ႈၼႆႉ 29/10/2025 ၶၢဝ်းယၢမ်း (00:00) သေ သၢႆသိုၵ်း လႄႈ ၵူၼ်းသိုၵ်းတင်းသွင်ၾၢႆႇႁွတ်ႈထိုင်ဝႆႉတီႈလႂ်ၵေႃႈ တေလႆႈၵိုတ်းဝႆႉတီႈၼၼ်ႉ” ၼႆယဝ်ႉ။

ၼႂ်းပၢင်ႁူပ်ႉထူပ်းဢုပ်ႇဢူဝ်း ၵမ်းထူၼ်ႈ 9 တီႈဝဵင်းၶုၼ်ႊမိင်ႊ ၼႂ်းမိူင်းၶႄႇပွၵ်ႈၼႆႉ ၾၢႆႇၸုမ်းသိုၵ်းမၢၼ်ႈ ပဵၼ်ၸွမ်သိုၵ်း ၵူဝ်ႇၵူဝ်ႇဢူး လႄႈ ၸုမ်းတူဝ်တႅၼ်း NSPNC ၼမ်းၼႃႈ၊ ၾၢႆႇၸုမ်းသိုၵ်းတဢၢင်း ပဵၼ်ၸွမ်သိုၵ်း တႃႉၵျူၵ်ႉၵျႃး ဢွၼ်ႁူဝ်ၼမ်းၼႃႈသေ ဢုပ်ႇဢူဝ်းၵႂႃႇ။ ၾၢႆႇလူင်ပွင်ၸိုင်ႈမိူင်းၶႄႇတႄႉ တူဝ်တႅၼ်းပဵၼ် တဵင်ႉသျီႊၸျုၼ်ႊ ၶဝ်ႈႁူမ်ႈႁဵတ်းပဵၼ် ၵူၼ်းယူႇၵၢင် လႄႈ သၢၵ်ႈသေႇလၵ်းထၢၼ်ၵႂႃႇ ၼႆယဝ်ႉ။