ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 မႃး သိုၵ်းမၢၼ်ႈယိုတ်းမိူင်း တင်း သိုၵ်းၶၢင် (KIA) ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းမိူင်းၶၢင် လႄႈၽႄႈလၢမ်းၸွတ်ႇထိုင် ၸွမ်းလႅၼ်လိၼ်ၵႂႃႇသေ ၾၢႆႇလူင်ပွင်ၸိုင်ႈမိူင်းၶႄႇ လႆႈဢိုတ်းပႅတ်ႈ ၽၵ်းတူၶၢမ်ႈ လႅၼ်လိၼ်မိူင်းၶႄႇ ဢၼ်တိတ်းၸပ်းၵၼ်ဝႆႉတင်းမိူင်းၶၢင်ၼၼ်ႉ ႁိုင်ၶၢဝ်းတၢင်းမွၵ်ႈ 1 ပီ။

ၽၵ်းတူၶၢမ်ႈလႅၼ်လိၼ်မိူင်းၶၢင်-မိူင်းၶႄႇ ၸိူဝ်းၺႃးလူင်ပွင်ၸိုင်ႈမိူင်းၶႄႇဢိုတ်းႁပ်းၵႂႃႇၼၼ်ႉ ပဵၼ်တီႈ ၵၢၼ်ႇပၢႆႉတီႇ၊ လၢႆႇၸႃႇ၊ မၢႆၵျႃယၢင် လႄႈ လွႆၸေႊ တႃႇ 4 ဢွင်ႈတီႈ။ ၽၵ်းတူၶၢမ်ႈလႅၼ်လိၼ် တီႈၵၢၼ်ႇပၢႆႉတီႇ  လႄႈ လွႆၸေႊၼႆႉ ပဵၼ်ဢွင်ႈတီႈႁဵတ်းၵၢၼ်ၵႃႉၶၢႆယႂ်ႇလိူဝ်ပိူၼ်ႈသုတ်း ၸွမ်းလႅၼ်လိၼ်။

မိူဝ်ႈဝၼ်းတီႈ 25 လိူၼ်ဢွၵ်ႉထူဝ်ႊပိူဝ်ႊၼႆႉ ၾၢႆႇလူင်ပွင်ၸိုင်ႈမိူင်းၶႄႇ ၶိုၼ်းပိုတ်ႇပၼ်ၵႂႃႇပဵၼ်တၢင်းၵၢၼ်သေတႃႉ ၵၢၼ်တေႃႉဢဝ် ၶိူင်ႈၶူဝ်းၾႆးၾႃႉ လႄႈ ၼမ်ႉမၼ်းၸၢၵ်ႈၶဝ်ႈမႃးတၢင်းၾင်ႇမိူင်းမၢၼ်ႈ-မိူင်းၶၢင်ၼႆႉ ယင်းတိုၵ်ႉၺႃးဢိုတ်းဝႆႉယူႇၼႆ ၸဝ်ႈသိုၵ်းလူင် ၼေႃႇပူႇ ၽူႈၶၢၼ်ပၢၵ်ႇ ၸုမ်းသိုၵ်းၶၢင် KIA လၢတ်ႈၼႄၼင်ႇၼႆ။

ယၢမ်းလဵဝ် ဢၼ်တေႃႉသူင်ႇၶဝ်ႈဢွၵ်ႇလႆႈၸွမ်းၵဵတ်ႉလၢၼ်ႇ ၽၵ်းတူၶၢမ်ႈလႅၼ်လိၼ် မိူင်းၶႄႇ- မိူင်းၶၢင်ၼႆႉ ပဵၼ်ၶဝ်ႈၼမ်ႉတၢင်းၵိၼ် လႄႈ လိၼ်ပုၼ် (ဘိလပ်မြေ) တင်း ၶိူင်ႈၶူဝ်းၸႂ်ႉတိုဝ်းၼႂ်းၵၢၼ်ၵေႃႇသၢင်ႈၸဵမ်ၸိူဝ်းၼႆႉ ၼႆယဝ်ႉ။

လႆႈႁူႉဝႃႈ ပိူဝ်ႈတႃႇပိုတ်ႇၽၵ်းတူၶၢမ်ႈလႅၼ်လိၼ်မိူင်းၶၢင် – မိူင်းၶႄႇ ပဵၼ်တၢင်းၵၢၼ်လႆႈၸိူင်ႉၼႆၼႆႉ ၸုမ်းပႃႇတီႇၵၢၼ်မိူင်းၶွင် ၸုမ်းသိုၵ်းၶၢင် (KIO) ငူပ်ႉငီႉၵၼ်တင်း လူင်ပွင်ၸိုင်ႈမိူင်းၶႄႇမႃး လၢႆပွၵ်ႈလၢႆၵမ်း။ ၼင်ႇႁိုဝ် ၵဵတ်ႉလၢၼ်ႇၸိူဝ်းတိုၵ်ႉၺႃးဢိုတ်းဝႆႉ တေပိုတ်ႇၵႂႃႇလႆႈၼၼ်ႉၵေႃႈ သိုပ်ႇဢုပ်ႇဢူဝ်းဝႆႉယူႇ ဝႃႈၼႆ။

လၢႆႇၸႃႇၼႆႉ ပဵၼ်ဢွင်ႈတီႈဢၼ်ၸုမ်းသိုၵ်းၶၢင် ပၵ်းငဝ်ႈငုၼ်းဝႆႉသေ ၸုမ်းသိုၵ်းၶၢင် ယိုတ်းသိမ်းဢဝ် မၢႆၵျႃယၢင် ဢွၼ်တၢင်းသုတ်း။ ၵဵတ်ႉလၢၼ်ႇၵၢၼ်ႇပၢႆႉတီႇတႄႉ ယိုတ်းသိမ်းဢဝ်လႆႈ မိူဝ်ႈဝၼ်းတီႈ 20 လိူၼ်ၼူဝ်ႊဝႅမ်ႊပိူဝ်ႊ ပီ 2024 ပူၼ်ႉမႃးၼၼ်ႉသေ လွႆၸေႊတႄႉ ယိုတ်းၵုမ်းဢဝ်လႆႈ မိူဝ်ႈဝၼ်းတီႈ 11 လိူၼ်မၢတ်ႉၶျ် ပီ 2025 ၼႆႉ။

ယၢမ်းလဵဝ် ၵဵတ်ႉလၢၼ်ႇၸွမ်းလႅၼ်လိၼ် ဢၼ်ၸုမ်းသိုၵ်းၶၢင် KIA ၵုမ်းၵမ်ဝႆႉ ၼႂ်းမိူင်းၶၢင်ၼႆႉ ပဵၼ်ၵဵတ်ႉလၢၼ်ႇ ၾီႇမေႃႇ၊ ပၢင်ဝႃႈ၊ ၵၼ်ႇၾၼ်ႇ ၸိူဝ်းမီးၼႂ်းၸႄႈဝဵင်းၶျီႇၽူၺ်ႇ လႄႈ ၸႄႈဝဵင်းမိူင်းမႂ်ႇၼၼ်ႉ ၼႆယဝ်ႉ။

ၵဵတ်ႉလၢၼ်ႇၸွမ်းလႅၼ်လိၼ် ပၢင်ဝႃႈ  လႄႈ ၾီႇမေႃႇၼႆႉ တင်း မၢႆၵျႃယၢင်ၼႆႉ ပဵၼ်ဢွင်ႈတီႈဢၼ် တေႃႉသူင်ႇႁႄႈလိၼ် ၵႃႉၶၢႆတေႃႇၵၼ်။ ၵၢၼ်ႇပၢႆႉတီႇ လႄႈ လွႆၸေႊၼႆႉသမ်ႉ ပဵၼ်ၵဵတ်ႉလၢၼ်ႇ ဢၼ်လူင်ပွင်ၸိုင်ႈမိူင်းၶႄႇ တင်း မိူင်းမၢၼ်ႈ ႁူမ်ႈၵၼ် ႁဵတ်းၵၢၼ်တေႃႉသူင်ႇၶူဝ်းၵုၼ်ႇပဵၼ်တၢင်းၵၢၼ်။

မိူဝ်ႈပူၼ်ႉမႃး ပီ 2024 လိူၼ်တီႊၸဵမ်ႊပိူဝ်ႊၼၼ်ႉ ၸုမ်းသိုၵ်းၶၢင် KIA တင်း ၸုမ်းသိုၵ်းဢူၺ်းလီၶဝ် ႁူမ်ႈၵၼ်သေ ယိုဝ်းသိုၵ်းမၢၼ်ႈ ၸိူဝ်းတူင်ႉၼိုင်ယူႇသဝ်းဝႆႉၼႂ်းမိူင်းၶၢင်။ ၾၢႆႇသိုၵ်းၶၢင် ယိုတ်းၵုမ်းဢဝ်လႆႈၸႄႈဝဵင်း ၼႂ်းမိူင်းၶၢင် တႃႇ 13 ၸႄႈဝဵင်း ၼႆယဝ်ႉ။