ဢမ်ႇဝႃႈၼႂ်းမိူင်းတႆးမိူင်းထႆး ဝၢႆးဢွၵ်ႇဝႃႇယဝ်ႉၼႆ ယဵပ်ႇၶဝ်ႈၶၢဝ်းၵတ်းယဝ်ႉလႄႈ ၾိင်ႈၾႃႉပၢင်ႇသႂ် ၵႂႃႇလႂ်ပႆလႂ်ၵေႃႈ ငၢႆႈသေၶၢဝ်းၾူၼ် ။ ၸင်ႇၼၼ် ပီႈၼွင်ႉတႆးလႄႈထႆး ပၢၼ်သိုပ်ႇပၢၼ် တိုၼ်း မီးၾိင်ႈသူင်သိူဝ်းၸွမ်းၶၢဝ်းၵတ်း မီးၾိင်ႈၵိၼ်ၾိင်ႈလူႇတင်းၼမ် ၸဵမ်ဢဝ် ပွႆးလူႇမွၵ်ႇၼမ်ႉၾႆးတဵၼ်း ၊ ပွႆးလိူၼ်သိပ်းသွင်မူၼ်း ႁိုဝ် ၾိင်ႈလွႆးၵထူင်း ။ ဝၢႆးၼၼ်ႉၵေႃႈ ပွႆးႁပ်ႉပီမႂ်ႇၸဵမ်ၸိူဝ်းၼႆႉ။ မိူဝ်ႈလဵဝ်ၵေႃႈ ၸဵမ်ပီႈၼွင်ႉထႆး ၊ တႆး လႄႈ တၢင်ႇၸၢဝ်းၶိူဝ်း ၼင်ႇႁိုဝ် ၾိင်ႈတေဢမ်ႇၶၢတ်ႇ  ႁၢင်ႈႁႅၼ်းဝႆႉၽႂ်မၼ်း  ။  ၽွင်းၼင်ႇၼႆ ၽႂ်ၵေႃႈဢမ်ႇထၢင်ႇဢမ်ႇမုင်ႈမွင်းသေ ၸဝ်ႈၼၢင်းႁေႃၶမ်းလူင် တူၼ်ထူၼ်ႈ 9 ၸၢမ်ႇပူႈၼွၼ်းၽေးလႄႈ လူင်ပွင်ၸိုင်ႈထႆး မၵ်းမၼ်ႈႁႂ်ႈၵူၼ်းမိူင်း ဝႆႉၼၵ်းၼႄၾၢင်ႁၢင်ႈတမ်ႇၼွႆႉမွင်ၸႂ်  90 ဝၼ်း ၊ တေလႆႈလူတ်း တၢင်းမူၼ်ႈတၢင်းၵျေႃႇ ၼႆလႄႈ တႆးႁွတ်ႈမိူင်းထႆးၵေႃႈၵႃႈတေလႆႈႁဵတ်းပွႆးပီမႂ်ႇတီႈၵႅပ်ႈမၼ်းၵူၺ်းယဝ်ႉ။  

ၸူဝ်ႈၶၢဝ်း သိုၵ်းမၢၼ်ႈယိုတ်းမိူင်းမႃး ၼႂ်းမိူင်းႁူမ်ႈတုမ်မၢၼ်ႈၼႆႉ ၸၢဝ်းၶိူဝ်းလႂ်ၵေႃႈ ဢမ်ႇထၢင်ႇႁၢင်ႈ ၸတ်းပွင်ၾိင်ႈ ထုင်းၽႂ်မၼ်းလီလီ ။ သိုၵ်းမၢၼ်ႈယိုတ်းၵုမ်းမိူင်းႁိုင်ၵႃႈႁိုဝ်ၵေႃႈ ပွင်ႇဝႃႈ ၾိင်ႈထုင်းႁိတ်ႈႁွႆးၸၢဝ်းၶိူဝ်း ထုၵ်ႇၵုမ်းၶင်မႃးၵႃႈၼၼ်ႉ ဢမ်ႇတွၼ်ႉလႆႈၸတ်းထၢင်ႇႁၢင်ႈလွတ်ႈလႅဝ်း ။

ၸၢဝ်းၶိူဝ်းၸိူဝ်းမီးယူႇမိူင်းထႆးတႄႉ ထၢင်ႇႁၢင်ႈလႆႈၸတ်းၼႄၾိင်ႈၸဝ်ႈၵဝ်ႇ ႁႂ်ႈၵူၼ်းၼႂ်းမိူင်းၼွၵ်ႈမိူင်းႁူႉႁၼ်ၸွမ်း ၊ လူင်ပွင်ၸိုင်ႈထႆးၼႆႉ ၾိင်ႈၸဝ်ႈၵဝ်ႇၵေႃႈဢမ်ႇႁႂ်ႈႁၢႆ ၊ ၾိင်ႈၸၢဝ်းၶိူဝ်းလဵၵ်ႉယႂ်ႇၵေႃႈ ဝႆႉၵႃႈၶၼ် ။  ဢဝ်ၾိင်ႈထုင်း ၶဝ်ႈၼႂ်းလွၵ်းၵၢတ်ႇႁႃငိုၼ်းၶဝ်ႈၸိုင်ႈမိူင်းလူးၵွၼ်ႇ။

ၸၢဝ်းၶိူဝ်းတႆးၸိူဝ်းယူႇမိူင်းထႆးၵေႃႈ ၼင်ႇႁိုဝ် လူင်ပွင်ၸိုင်ႈထႆး ပေႃးတေမၵ်းမၼ်ႈပၼ်ၾိင်ႈငႄႈႁိတ်ႈႁွႆးတႆး ႁႂ်ႈၶဝ်ႈၸၼ်ႉလူင်ပွင်ႈၸိုင်ၼၼ်ႉ ၸုမ်းၵဵဝ်ႇၶွင်ႈၶဝ် ဢွၼ်ၵၼ်ၶတ်းၸႂ်ၸတ်းပွင်မႃးယူႇၵူႈပီပီ ။

ငဝ်းလၢႆးမိူဝ်ႈလဵဝ်  ၼႆႉတေႃႇ  ပီ 2025 ၼႆႉသဵင်ႈတႄႉ တေပႆႇၸၢင်ႈၸတ်းပၢင်ၾိင်ႈထုင်းၵႂၢင်ႈၶႂၢင်။ ၵွပ်ႈဝႃႈ ၸဝ်ႈၼၢင်း သီႇရီႇၵိတ်ႇ  ၽရပရူမ်မရႃ ၶျိၼီၼၢတ်ႉ ၽရပရူမ်မရၢတ်ႉၶျၶျူၼ်ၼၼီ ၽၼ်းပီလူင် – ၵေႃႉပဵၼ်မႄႈၸဝ်ႈၵေးၸူး ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 10 မိူင်းထႆးယၢမ်းလဵဝ်၊ ၵေႃႉပဵၼ်ၼၢင်းၶၢင်းႁူဝ် ၸဝ်ႈမုၼ်ယႂ်ႇၶုၼ်ႁေႃၶမ်းတူၼ်ထူၼ်ႈ 9 ၼၼ်ႉၸၢမ်ႇပူႈၼွၼ်းၽေးၵႂႃႇ ။ လူင်ပွင်ၸိုင်ႈထႆးၸင်ႇ သင်ႇႁႂ်ႈ မၵ်းမၼ်ႈပၼ် ဝၼ်းတမ်ႇၼွႆႉမွင်ၸႂ် တႃႇ 90 ဝၼ်း ။

လူင်ပွင်ၸိုင်ႈထႆး ပိုၼ်ၽၢဝ်ႇပဵၼ်တၢင်းၵၢၼ်ဝႆႉဝႃႈ –

1) ဢွင်ႇတီႈႁၢပ်ႇၵၢၼ်ၶုၼ်ၸိူဝ်းၼၼ်ႉ တေလႆႈလူတ်းယွၼ်ႇ တုင်းၸိူဝ်ႉၸၢတ်ႈထႆးၶိုင်ႈသဝ် တႃႇၶၢဝ်းတၢင်း 30 ဝၼ်း

2) ၵူၼ်းၼႂ်းႁွင်ႈၵၢၼ်ႁၢပ်ႇၵၢၼ်ၶုၼ် ႁႂ်ႈၼုင်ႈၶူဝ်းသီလမ် ႁိုဝ်ဢမ်ႇၼၼ် သီၶၢဝ်သေ ၼႄလွင်ႈတမ်ၼွႆႉမွင်ၸႂ် တႃႇ 1 ပီ ။

3) တႃႇၵူၼ်းဝၢၼ်ႈၵူၼ်းမိူင်းသမ်ႉ ႁႂ်ႈၼုင်ႈပၼ်ၶူဝ်းလမ် ဢမ်ႇၼၼ် ၶူဝ်းသီသဝ်ႈ ဢၼ်ဢမ်ႇပေႃးၶွင်ႇပေႃးလႅင်ၼၼ်ႉ တႃႇ 90 ဝၼ်း ။

4) တေဢမ်ႇႁႂ်ႈၸတ်းပၢင်ၵိၼ်ၵျေႃႇ သဵင်ၼၼ်ႈပၼ်းဢူၼ် ၊ မိူၼ်ၼင်ႇ ႁၢၼ်ႉၵိၼ်ၵျေႃႇ (Pub , Bar ၽၢပ်ႊ ၊ ၿႃႊ ) ၊ ႁၢၼ်ႉႁွင်ႉၵႂၢမ်း KTV  ပႃးၸဵမ်ပွႆးလၢမ်းၵူႈသႅၼ်းသႅၼ်း ၸိူဝ်းၼႆႉ ႁႂ်ႈၵိုတ်း ႁိုဝ်ဢမ်ႇၼၼ် လူတ်းယွမ်းလွင်ႈတူင်ႉၼိုင် ႁႂ်ႈမႅၼ်ႈၸွမ်းငဝ်းလၢႆး တႃႇၶၢဝ်းတၢင်း 30 ဝၼ်း ။

တႃႇၸတ်းႁဵတ်းပၢင်ၼႄၾိင်ႈထုင်း ၵူႈၸိူဝ်းၸိူဝ်းၼႆႉ ဢမ်ႇၵွမ်ႉပီႈၼွင်ႉတႆးၵူၺ်း ၵူၼ်းထႆးၵေႃႈ ၶိုင်ပွင်ႁၢင်ႈႁႅၼ်းဝႆႉ တႃႇၼႄၾိင်ႈငႄႈၾိင်ႈထုင်းၼႂ်းမိူင်းထႆးမိူၼ်ၵၼ် ။ ပိူင်လူင်ၵေႃႈ လူင်ပွင်ၸိုင်ႈထႆး ၶႂ်ႈႁႂ်ႈၵူၼ်းၼွၵ်ႈမိူင်း မႃးဢႅဝ်ႇယဵမ်ႈၼမ် ။

ၶၢဝ်းၾိင်ႈၾႃႉ High Season ( November to March) ၼႆႉ ၸဵမ်ဢဝ် ၸဝ်ႈၶွင်ၵၢၼ်ႁူင်းႁႅမ်းလႄႈ ၵၢၼ် ဢႅဝ်ႇယဵမ်ႈ တွင်ႊတဵဝ်ႊ ၸိူဝ်းၼႆႉ တိုၼ်းမုင်ႈမွင်းဝႆႉသုင်သုတ်းဝႃႈ ႁႂ်ႈမီးၶႅၵ်ႇၼွၵ်ႇမိူင်းၼႂ်းမိူင်းဢႅဝ်ႇလႄႇၼမ် ၊ High Season  ၼႆႉ ပဵၼ်ၶၢဝ်းၵူၼ်းၵိုၼ်းငိုၼ်းၶွၼ်ႈၼႂ်းမိူင်းထႆး ပဵၼ်ၶၢဝ်းငိုၼ်းၶဝ်ႈၸိုင်ႈမိူင်းထႆးၼမ် ။ ၵွပ်ႈၼၼ် ပိူင်တေဢမ်ႇပေႃး ၶဵင်ႈၶႅင် မိူၼ်ၼင်ႇ မိူဝ်ႈပၢၼ်ၸဝ်ႈမုၼ်ယႂ်ႇၶုၼ်ႁေႃၶမ်း တူၼ်ထူၼ်ႈ 9 ၼၼ်ႉ လူႉသဵင်ႈ  – ၼႆ ၵူၼ်းၼုမ်ႇၽူႈလဵပ်ႈႁဵၼ်းပၢႆးမၢၵ်ႇမီးၵေႃႉၼိုင်ႈလၢတ်ႈ ။

ယူႇမိူင်းလႂ်ၵေႃႈ လႆႈဢဝ်ပိူင်မိူင်းၼၼ်ႉဝႃႈ လႄႈ သင်ဝႃႈ ထိုင်ၶိင်ႇၶၢဝ်းၸတ်းပွႆးၾိင်ႈငႄႈၾိင်ႈထုင်းၼႆၵေႃႈ ဢၼ်လီတီႈသုတ်းၵေႃႈ ႁႂ်ႈဢွၼ်ၵၼ် ၼပ်ႉယမ်ၼိူဝ်ပၵ်းပိူင်ၸိုင်ႈမိူင်း မိူင်းၼၼ်ႉ။ ထႅင်ႈၾၢႆႇၼိုင်ႈၵေႃႈ ဢမ်ႇၶႂ်ႈႁႂ်ႈ ၵူၼ်းမိူင်းထႆး ႁၼ်ၽိတ်းတေႃႇၵူၼ်းတႆးၼႂ်းမိူင်းထႆး ၊ ဢမ်ႇၶႂ်ႈတႆး ပဵၼ်ၵူၼ်းၸူၵ်ႉႁူၸူၵ်ႉတႃ ပိူၼ်ႈ။ သင်ဝႃႈ ယႃႇဢမ်ႇလွတ်ႈလႆႈလႄႈ တေၸတ်းပၢင်ၾိင်ႈငႄႈၾိင်ႈထုင်းယူႇၵေႃႈ လွင်ႈၵျေႃႇလွင်ႈမူၼ်ႈ ၊ သဵင်ၽဵင်းၵႂၢမ်းသဵင်လင်ၸိူဝ်းၼႆႉ ဢမ်ႇၶႂ်ႈႁႂ်ႈပႃး ၼႆ  ၸၢႆးသႅင်မိူင်း မင်းၵွၼ်း ႁူဝ်ပဝ်ႈ ၸုမ်းၸၢဝ်းၶိူဝ်းၸိုင်ႈထႆး ပွတ်းႁွင်ႇလႄႈ ၽူႈၵိူဝ်းၵုမ် သမႃးၶူမ်းပၢႆးပၺ်ၺႃလႄႈ ၾိင်ႈ ငႄႈတႆး လၢတ်ႈတီႈၽူႈတွႆႇႁွၵ်ႈၼင်ႇၼႆ။  

“ႁူမ်ႈမိုဝ်းတၢင်းၾၢႆႇလူင်ပွင်ၸိုင်ႈထႆးၶဝ်ၼႆႉ ပဵၼ်ၼႃႈတီႈပုၼ်ႈၽွၼ်း ဢမ်ႇဝႃႈ ၵူၼ်းတႆးႁဝ်းၶႃႈ မၼ်းပဵၼ်ၼႃႈတီႈပုၼ်ႈၽွၼ်းၵူႈမူႇၵူႈၸုမ်း ၵူႈၸၢဝ်းၶိူဝ်း ဢၼ်ယူႇၼႂ်းမိူင်းထႆးယဝ်ႉ။ပေႃးဝႃႈ ၸွမ်းပိူင်တႄႉၵေႃႈ တၵ်းတေလႆႈ ၵိုတ်းယိုတ်းၵႂႃႇ လွင်ႈၵျေႃႇလွင်ႈမူၼ်ႈ ။ ပေႃးဝႃႈ ပဵၼ်ပွႆးၾိင်ႈငႄႈၾိင်ႈထုင်းတႄႉ ႁဵတ်းၵႂႃႇလႆႈယူႇ။ၵူၺ်းၵႃႈ လွင်ႈၵျေႃႇလွင်ႈမူၼ်ႈႁႃႉ လွင်ႈၽဵင်းၵႂၢမ်းၸိူဝ်းၼႆႉၵေႃႈ တၵ်းတေလႆႈၵိုတ်းၵႂႃႇ။ ပေႃးႁဵတ်းၸွမ်းၼင်ႇ ၾိင်ႈငႄႈၾိင်ႈထုင်းတႄႉ ပိူၼ်ႈဢမ်ႇႁၢမ်ႈႁႄႉ။မိူၼ်ၼင်ႇ ၵၢၼ်သႃသၼႃႁႃႉ လွင်ႈတိုဝ်းၵမ်ၸွမ်းၾိင်ႈငႄႈၾိင်ႈထုင်းၵေႃႈ ႁဵတ်းလႆႈယူႇ။ဢမ်ႇလႆႈႁၢမ်ႈတင်းမူတ်းတင်းသဵင်ႈ။ၵူၺ်းၵႃႈ ယွၼ်းတၢင်းႁူမ်ႈမိုဝ်းႁႂ်ႈၵိုတ်းလွင်ႈၵျေႃႇလွင်ႈမူၼ်း ၼႂ်းၶၢဝ်းတၢင်း 15 ဝၼ်းလႂ် 30 ဝၼ်းလႂ်ၼႆ ပိူၼ်ႈၵေႃႈတမ်းဝၢင်းဝႆႉႁူဝ်ယွႆႈမၼ်းယူႇၶႃႈ”

ပီတႆး 2119 ၼီႈ တေသုတ်းသဵင်ႈသေ တေထိုင် 2120 ၼီႈ ယဝ်ႉလႄႈ ပီႈၼွင်ႉတႆး ၵူႈတီႈတီႈ တိုၼ်းတေၸတ်းပၢင်ႁပ်ႉပီမႂ်ႇ    ။ ၵဵင်းမႂ်ႇ ၸိုင်ႈထႆးၼႆႉၵေႃႈ ပီႈၼွင်ႉတႆး တိုၼ်းဢွၼ်ၵၼ်ၸတ်းႁပ်ႉပီမႂ်ႇတႆးမႃးယူႇၵူႈပီ ။ ပီၼႆႉတႄႉ တေဢမ်ႇပဵၼ်ၸတ်းၵႂၢင်ႈၶႂၢင် ၊ တေၸတ်းတီႈၵႅပ်ႈမၼ်းၵူၺ်း ၊ တေႁပ်ႉပီမႂ်ႇ ၶမ်ႈၶိုၼ်း ဝၼ်းတီႈ 19/11/2025  ၊ ဝၼ်းတီႈ 20/11/2025   ပွတ်းၼႂ်ၼၼ်ႉ တေလူႇၶဝ်ႈမႂ်ႇၼမ်ႉမႂ်ႇၵူၺ်းယဝ်ႉၼႆ   ၸၢႆးသႅင်ယ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႂ်ႇ လၢတ်ႈၼႄဝႆႉၼင်ႇၼႆ –

“ဢိင်ၼိူဝ်မႄႈၽႅၼ်ႇလိၼ်ၶွင်ၸိုင်ႈထႆး လႆႈလူႉသုမ်းၵႂႃႇၼႆႉ ႁဝ်းၵေႃႈ တေဢမ်ႇမီး ၶွၼ်ႊသိူတ်ႊ ပၢင်ႁွင်ႉၵႂၢမ်း ၊ ဢၼ်ၵဵဝ်ႇၵပ်းလွင်ႈၶိူင်ႈႁွင်ႉၵႂၢမ်း ၶိူင်ႈသဵင်ၸိူဝ်းၼႆႉ ။ ၵူၺ်းၵႃႈ ႁဝ်းတေမီးၵၢၼ်ႁပ်ႉၸဵင် ၊ တေမီးတၢင်းၵႃႈဢၼ်ၵူၼ်းၼုမ်ႇ ႁၢင်ႈႁႅၼ်းဝႆႉလၢႆလၢႆၸုမ်း ။ တေႁူမ်ႈၵၼ်သေ ၸတ်းၶိုၼ်ႈမႃး။ တေမီးတၢင်းၵႃႈ ၾိင်ႈငႄႈၾိင်ႈထုင်းၶွင်ႁဝ်းလႄႈ တေႁပ်ႉၸဵင်ဝၼ်းတီႈ 19/10/2025) ဝၼ်းလဵဝ်  ၊ ဝၼ်းတီႈ 20 ၵေႃႈ တေလူႇၶဝ်ႈမႂ်ႇ ၊ တေလဵင်ႉလူၶႅၵ်ႇၸိူဝ်းမႃးၶဝ်ႈႁူမ်ႈ။ ယဝ်ႉၵေႃႈ တေၸတ်းပၢင်ဢုပ်ႇၶႆႈ ၵဵဝ်ႇၵပ်းလွင်ႈၸၢဝ်းၶိူဝ်းၼႂ်းမိူင်းထႆး ၸိူဝ်းၼႆႉပဵၼ်လၵ်း”

ပီႈၼွင်ႉတႆး ၸိူဝ်းႁွတ်ႈမိူင်းထႆးၼပ်ႉႁူဝ်ႁဵင်ႁူဝ်လၢၼ်ႉၼႆႉ ဢမ်ႇတွၼ်ႉၺႃးလူင်ပွင်ၸိုင်ႈထႆး ႁႄႉႁၢမ်ႈၶတ်းၶႂၢင်ၾိင်ႈထုင်းမႃး ။ ၸဵမ်ဢဝ် ပွႆးသၢင်ႇလွင်း ပွႆးဢွၵ်ႇဝႃႇ ၸိူဝ်းၼႆႉ ၸတ်းလႆႈထၢင်ႇႁၢင်ႈ ။

တေႃႇၼင်ႇ မိူဝ်ႈပၢၼ် ၶုၼ်ႁေႃၶမ်းထႆး လႄႈ ၸဝ်ႈၼၢင်းႁေႃၶမ်းတူၼ်တီႈ 9 ဢၼ်တိုၵ်ႉၸၢမ်ႇပူႈၼွၼ်းၽေးၵႂႃႇၼႆႉ မိူဝ်ႈၶဝ်တိုၵ်ႉမီးသၢႆၸႂ် လႄႈ တိုၵ်ႉၵႂႃႇလႆႈပႆလႆႈ ၶဝ်ၸဝ်ႈယင်းလူင်းပိုၼ်ႉတီႈတူၺ်းထိုင်လူလွမ်ပႃး ၸၢဝ်းၶိူဝ်း ၸိူဝ်းမႃးပိုင်ႈယူႇမိူင်းထႆး ၸွမ်းဢွင်ႈတီႈဢၼ်ၵႆဝၢၼ်ႈၵႆဝဵင်း  ။

မိူဝ်ႈပီ 1973 ၼၼ်ႉ ၶုၼ်ႁေႃၶမ်းလႄႈ ၼၢင်းႁေႃၶမ်းထႆး တူၼ်တီႈ 9 ၼႆႉ လူင်းပိုၼ်ႉတီႈသူႇၸႂ်းပီႈၼွင်ႉတႆး ဢၼ်မီးယူႇတီႈဝၢၼ်ႈမႂ်ႇမွၵ်ႇၸၢမ် တီႈၸႄႈဝဵင်းမႄႈဢၢႆႊ ၸႄႈတွၼ်ႈၵဵင်းမႂ်ႇ ။ ၽွင်းၼၼ်ႉ ပီႈၼွင်ႉၸၢဝ်းတႆး ၸိူဝ်းမႃးပႂ်ႉႁပ်ႉတွၼ်ႈ မီးတိုဝ်ႉတၢင်း လႆႈယူႇဢိူမ်ႈၸမ် ၸဝ်ႈမုၼ်ယႂ်ႇၶုၼ်ႁေႃၶမ်းလႄႈ ၼၢင်းႁေႃၶမ်းတႄႉတႄႉ ။

ၼႂ်းၵႄႈၼၼ်ႉ မီးၼၢင်းယိင်းတႆးၵေႃႉၼိုင်ႈ မီးသုၼ်ႇလႆႈၸုၵ်းၸမ်ၼၢင်းႁေႃၶမ်းသေ ထၢႆႇၶႅပ်းႁၢင်ႈ ။ ႁၼ်ဝႃႈ ၸဝ်ႈၼၢင်းႁေႃၶမ်းလူင် တူၼ်တီႈ 9 ၼႆႉ မီးမႅတ်ႈတႃႇ ၵရုၼႃႇၼိူဝ် ၸၢဝ်းၶိူဝ်းမႃးတႄႉတႄႉ ၼႆ – ၸဝ်ႈၶိုၼ်းသႂ်ၸႂ်ယဵၼ် ၽူႈၵေႃႇတင်ႈၸုမ်းၶၢဝ်ႇၽူႈတွႆႇႁွၵ်ႈ လၢတ်ႈၼႄၼင်ႇၼႆ။

ၶၢဝ်းတၢင်း ၸဝ်ႈၼၢင်းႁေႃၶမ်း ဢမ်ႇယူႇလီၼႆႉၵေႃႈ ပီႈၼွင်ႉတႆးၼႂ်းမိူင်းထႆး ဢွၼ်ၵၼ် ႁူမ်ႈၵၼ် ၸတ်းႁဵတ်းပၢင်ယွၼ်းသူးပၼ် ႁႂ်ႈၸဝ်ႈၼၢင်းႁေႃၶမ်း ယူႇလီၵိၼ်ဝၢၼ်ၶိုၼ်း ။

ဝၼ်းတီႈ 12/8/2023 ၼၼ်ႉ သင်ၶၸဝ်ႈလႄႈ ၼုမ်ႇႁၢႆးၸၢႆးယိင်း ႁႅင်း ၵၢၼ်တႆး ယင်းႁူမ်ႈၵၼ် ၸတ်းပၢင်တႆႈတဵၼ်း တိူင်ႇၵၢဝ်ႇယွၼ်းသူးပၼ် ၸဝ်ႈၼၢင်းႁေႃၶမ်းထႆး တူၼ်ထီႉ 9 ၽွင်း ဢႃယုလႆႈ 91 ပီ တီႈဝတ်ႉပႃႇပဝ်ႈ ဢိူင်ႇသီၽုမ်း ဝဵင်းၵဵင်းမႂ်ႇ ၼၼ်ႉယူႇ။

ပီႈၼွင်ႉတႆး ၼႂ်းမိူင်းထႆး ထႅင်ႈလၢႆဢွင်ႈတီႈၵေႃႈ ဢမ်ႇလူင်ဢမ်ႇလိုမ်းသေ ၸတ်းပၢင်ယွၼ်းသူးပၼ် မိူၼ်ၵၼ်။ မိူဝ်ႈလဵဝ်ႉတႄႉ ၸဝ်ႈၼၢင်းႁေႃၶမ်းတူၼ်ထူၼ်ႈ 9 ႁိုဝ်ဢမ်ႇၼၼ် မႄႈၽႅၼ်လိၼ်ထႆး လႆႈၸၢမ်ႇပူႈၼွၼ်းၽေးၵႂႃႇယဝ်ႉလႄႈ ၵူႈၸၢဝ်းၶိူဝ်းၼႂ်းမိူင်းထႆး မွင်ၸႂ်ၸွမ်းတႄႉတႄႉဝႃႈဝႃႈ။

ၸဝ်ႈၼၢင်း လႆႈၸၢမ်ႇပူႈၼွၼ်းၽေးၵႂႃႇ လူၺ်ႈတၢင်းပဵၼ်ၵူၼ်းထဝ်ႈ တီႈႁူင်းယႃလူင် ၵျူႊလႃႊလူင်ႊၵွၼ်ႊ သၽႃၵႃၶျၢတ်ႉထႆး ၽွင်းဢႃယုထူၼ်ႈထိုင် 93 ပီ မိူဝ်ႈဝၼ်းတီႈ 24/10.2025 ယၢမ်းၵၢင်ၶမ်ႈ 9 မူင်း 21 မိၼိတ်ႉၼၼ်ႉ ။

ၸဝ်ႈၼၢင်း သီႇရီႇၵိတ်ႇ  ၽရပရူမ်မရႃ ၶျိၼီၼၢတ်ႉ ၽရပရူမ်မရၢတ်ၶျၶျူၼ်ၼၼီ ၽၼ်းပီလူင်  ၼႆႉ ၵိူတ်ႇမိူဝ်ႈဝၼ်းတီႈ 12/08/1932 ႁူမ်ႈၽၢၵ်ႈတင်း ၸဝ်ႈမုၼ်ယႂ်ႇၶုၼ်ႁေႃၶမ်းထႆးတူၼ်ထူၼ်ႈ 9 ။ မီးလုၵ်ႈလၢင်းႁူမ်ႈၵၼ် 4 ၵေႃႉ။ လုၵ်ႈယိင်း 3 ၵေႃႉလႄႈ လုၵ်ႈၸၢႆးၵေႃႉၼိုင်ႈ။ ၸဝ်ႈယိင်း သီႇရိထွၼ်း လုၵ်ႈယိင်းၸဝ်ႈၼၼ်ႉ ပီႈၼွင်ႉတႆးႁူႉၸၵ်းၼပ်ႉယမ် ယွၼ်ႉပိူဝ်ႈၸဝ်ႈၼၢင်းၶူၼ်ႉၶႂႃႉလဵပ်ႈႁဵၼ်းပိုၼ်းတႆး ၸိူဝ်ႉသၢႆတႆး ။

 ယၢမ်းလဵဝ်လုၵ်ႈၸၢႆးၸဝ်ႈ ဢၼ်ၵူၼ်းလုမ်ႈၾႃႉႁူႉၸၵ်းဝႃႈ ၸဝ်ႈၾႃႉၸၢႆးၼၼ်ႉ ၶိုၼ်ႈၼင်ႈႁေႃ ပဵၼ်ၸဝ်ႈ မုၼ်ယႂ်ႇၶုၼ် ႁေႃၶမ်းထႆး တူၼ်ထူၼ်ႈ 10 ဝႆႉ ။ ပေႃးထိုင်မႃးဝၼ်းၵိူတ်ႇမၼ်းၸဝ်ႈၼႆ ၽူႈႁၢပ်ၵၢၼ်ၶုၼ်လူင်ပွင်ၸိုင်ႈမိူင်းထႆးလႄႈ ၵူၼ်းဝၢၼ်ႈၵူၼ်းမိူင်း ၼႂ်းမိူင်းထႆး ၸတ်းႁဵတ်းပၢင်ယုၵ်ႉယွင်ႈဝၼ်းၵိူတ်ႇမၼ်းၸဝ်ႈ ။ ပီႈၼွင်ႉတႆး ၸိူဝ်းႁွတ်ႈၽႅဝ်ၼႂ်းမိူင်းထႆး တင်းၼမ်ၵေႃႈ ၶဝ်ႈႁူမ်ႈၵူႈပီ။

ယွၼ်းသူး ႁႂ်ႈၸဝ်ႈၼၢင်းႁေႃၶမ်း တူၼ်ထူၼ်ႈ 9 ၸဝ်ႈၼၢင်း သီႇရီႇၵိတ်ႇ  ၽရပရူမ်မရႃ ၶျိၼီၼၢတ်ႉ ၽရပရူမ်မရၢတ်ၶျၶျူၼ်ၼၼီ ၽၼ်းပီလူင်  ႁွတ်ႈသူႇ သုၵတိ တီႈၵတ်းယဵၼ်​​သေၵမ်းၶႃႈ