ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ်တႂ်ႈသိုၵ်းမၢၼ်ႈ UEC ပိုၼ်ၽၢဝ်ႇ ပၢၵ်ႈမွတ်ႇသဵၼ်ႈၸိုဝ်ႈ တေႃႇတႅတ်ႉတႅတ်ႉၶၢႆႇ ႁူဝ်ပဝ်ႈပႃႇတီႇၼမ်းၼႃႈၵူၼ်းမိူင်း (ပျီႇတူႉသျေႉသွင်ႇပႃႇတီႇ) PPP ၼႂ်းသဵၼ်ႈၸိုဝ်ႈၼေႃႇၽူႈတႅၼ်းဢၼ်မီးသုၼ်ႇတေၶဝ်ႈၶေႉပၢင်လိူၵ်ႈတင်ႈ။
ဝၼ်းတီႈ 25/10/2025 UEC ပိုၼ်ၽၢဝ်ႇဝႃႈ “ တေႃႇတႅတ်ႉတႅတ်ႉၶၢႆႇၼႆႉ ဢမ်ႇလွတ်ႈၵၢင်းတၢင်းပၵ်းပိူင်မၢႆမီႈ ပၢင်လိူၵ်ႈတင်ႈ မတ်ႉတႃ 8 (D) ၼၼ်ႉလႄႈ ၸင်ႇလႆႈပၢၵ်ႈပႅတ်ႈသဵၼ်ႈၸိုဝ်ႈၼေႃႇၽွင်းတႅၼ်း။ ၵူၺ်းၵႃႈ ၵဵဝ်ႇတၢင်းသုၼ်ႇတူဝ်မၼ်းၼၢင်းၵေႃႉလဵဝ်ၵူၺ်း – ပႃႇတီႇၵၢၼ်မိူင်းမၼ်းၼၢင်းတႄႉ ဢမ်ႇၵဵဝ်ႇ။ ၵွပ်ႈၼႆပႃႇတီႇတႄႉသိုပ်ႇႁဵတ်းၵၢၼ်ၵႂႃႇလႆႈယူႇ ”- ဝႃႈၼႆ။
တေႃႇတႅတ်ႉတႅတ်ႉၶၢႆႇ- ၼႆႉ ပဵၼ်ၵူၼ်းမိူင်းၵုတ်ႈ၊ ပဵၼ်ၽူႈမၢၵ်ႈၵူၼ်းမီးလူင်ၼႂ်းမိူင်းမၢၼ်ႈၵေႃႉၼိုင်ႈ။ မၼ်းၼၢင်းမီးႁၢၼ်ႉၶၢႆၶမ်းၸိုဝ်ႈသဵင်ယႂ်ႇလၢႆလၢႆႁၢၼ်ႉ။ မၼ်းၼၢင်းၼႆႉပဵၼ်ပီႈၼၢင်း ၼၢင်းၸိူင်းမၢၼ်ႈ ၸိုဝ်ႈသဵင်လင် – ထုၼ်းဢဵင်ႇတရႃႇပူဝ်ႇ။ မၼ်းၼၢင်းပဵၼ်ၽူႈၸမ်ၸႂ် ႁဵတ်းၵေႃႉၵၼ်တင်းသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းလႄႈႁဵတ်းႁႂ်ႈၵူၼ်းၼုမ်ႇလႄႈၵူၼ်းမိူင်းၵမ်ႈၼမ် ဢမ်ႇႁၼ်လီၵမ်ႉထႅမ်မၼ်းၼၢင်း။
ပၢင်လိူၵ်ႈတင်ႈဢၼ်တေမႃးၼႆႉ မၼ်းၼၢင်းတေၶဝ်ႈၶေႉၶဵင်ႇတီႈၼင်ႈၽူႈတႅၼ်းသၽႃးၸိူဝ်ႉၸၢတ်ႈ ၼႂ်းတိူင်းတႃႈၵုင်ႈ – ၼႂ်းပိူင် FPTP ၽႂ်ပေႉမၼ်းဢဝ်။ ၽွင်း UEC ပိုၼ်ၽၢဝ်ႇသဵၼ်ႈၸိုဝ်ႈၼေႃႇၽူႈတႅၼ်းပွၵ်ႈၵမ်းၼိုင်ႈၼၼ်ႉ ပႃးသဵၼ်ႈၸိုဝ်ႈမၼ်းၼၢင်းယူႇသေတႃႉ ၼႂ်းဝၼ်းတီႈ 25/10/2025 ၼႆႉၸင်ႇၶိုၼ်းပိုၼ်ၽၢဝ်ႇဝႃႈ သုၼ်ႇတူဝ်မၼ်းၼၢင်း ၽိတ်းပၵ်းပိူင် ပၢင်လိူၵ်ႈတင်ႈလႄႈ ပၢၵ်ႈပႅတ်ႈသဵၼ်ႈၸိုဝ်ႈမၼ်းၼၢင်း ၼႂ်းၼေႃႇၽူႈတႅၼ်းဢၼ်မီးသုၼ်ႇၶဝ်ႈၶေႉပၢင်လိူၵ်ႈတင်ႈဝႃႈၼႆ။
ပၢင်လိူၵ်ႈတင်ႈဢၼ်တေၸတ်းၼႂ်းႁၢင်လိူၼ်တီႊသႅမ်ႊပိူဝ်ႊၼႆႉ ပႃႇတီႇၵၢၼ်မိူင်းဢၼ်တေၶဝ်ႈၶေႉၶဵင်ႇပတ်းပိုၼ်ႉၸိုင်ႈမိူင်း မီး 6 ပႃႇတီႇ။ ၼႂ်းၼၼ်ႉပႃး ပႃႇတီႇ PPP ဢၼ်မၼ်းၼၢင်းဢွၼ်ႁူဝ်ဝႆႉၼႆႉ ပႃႇတီႇၼိုင်ႈ။ ယူႇတီႈပႃႇတီႇမၼ်းၼၢင်းသေ သူင်ႇသဵၼ်ႈၸိုဝ်ႈၼေႃႇၽူႈတႅၼ်းတႃႇၶဝ်ႈၶေႉၶဵင်ႇပၢင်လိူၵ်ႈတင်ႈဝႆႉ 672 ၵေႃႉ။
UEC ပိုၼ်ၽၢဝ်ႇ သဵၼ်ႈၸိုဝ်ႈ ၼေႃႇၽူႈတႅၼ်းဢၼ်တေၶဝ်ႈၶႅင်ႇပၢင်လိူၵ်ႈတင်ႈၵမ်းၼႆႉ ပတ်းပိုၼ်ႉၸိုင်ႈမိူင်းမီး 5023 ၵေႃႉ။ ၼႂ်းၼၼ်ႉၼေႃႇၽူႈတႅၼ်းဢၼ်ဢမ်ႇၶူပ်းငၢမ်ႇၵၼ်တင်း ပၵ်းပိူင်မၢႆမီႈပၢင်လိူၵ်ႈတင်ႈ၊ ပၵ်းပိူင်ပၢႆးၸၢင်ႈ၊ပၵ်းပိူင် ပိူင်ငဝ်ႈပိုင်းၸိုင်ႈမိူင်း သေ ဢၼ်ထုၵ်ႇUEC ပၢၵ်ႈပႅတ်ႈသဵၼ်ႈၸိုဝ်ႈၼၼ်ႉမီးယူႇ 86 ၵေႃႉ။ ၼႂ်းၼၼ်ႉပႃးသဵၼ်ႈၸိုဝ်ႈ တေႃႇတႅတ်ႉတႅတ်ႉၶၢႆႇ ၵေႃႉၼိုင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ