မိူဝ်ႈဝႃး ဝၼ်းတီႈ 23/10/2025 ယၢမ်းၵၢင်ၶမ်ႈမွၵ်ႈ 9 မူင်း ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝဵင်းၼမ်ႉတူႈ ၸိုင်ႈတႆးပွတ်းႁွင်ႇ တူၵ်းႁိမ်းႁူင်းၸၢၵ်ႈ ႁုင်ၸိုၼ်း တီႈသိုၵ်းလွႆတဢၢင်း ယၢမ်ႈလိုဝ်ႈသဝ်း။
ၼႂ်းလိူၼ်ဢွၵ်ႉထူဝ်ႊပိူဝ်ႊၼႆႉၵူၺ်း ႁိူဝ်းမိၼ်သိုၵ်းမၢၼ်ႈ ယိုဝ်းသႂ်ႇၼႂ်းဝဵင်းၼမ်ႉတူႈမီး 5 ပွၵ်ႈယဝ်ႉ။ ပွၵ်ႈၼႆႉ မၢၵ်ႇၵႂႃႇတူၵ်းသႂ်ႇ ၼႂ်းပွၵ်ႉဢၼ်ၶႃႈႁၢပ်ႇၵၢၼ်ၶုၼ်ၶွင်သိုၵ်းမၢၼ်ႈယၢမ်ႈယူႇသဝ်း။ ဝၢႆးလင်ပၢင်တိုၵ်းၽႅၼ်ယၼ်ႇသိုၵ်းယဝ်ႉဢမ်ႇႁိုင် သိုၵ်းတဢၢင်း သိုပ်ႇၶဝ်ႈၵုမ်းၵမ် ဝဵင်းၼမ်ႉတူႈလႄႈ ဢွင်ႈတီႈၼၼ်ႉ ယၢမ်ႈပဵၼ်တီႈဢၼ်ၽူႈမီးၸၼ်ႉၼႂ်းသိုၵ်းတဢၢင်းၶဝ်ယူႇသဝ်းၼႆ ၵူၼ်းမိူင်း ၼႂ်းၸႄႈဝဵင်းၼမ်ႉတူႈ ၵေႃႉလႆႈပၢႆႈၽေးသိုၵ်းၵႂႃႇယူႇဝႆႉတၢင်း ဝဵင်းလႃႈသဵဝ်ႈ လၢတ်ႈၼင်ႇၼႆ။
“ၶမ်ႈဝႃးၼႆႉ ၶဝ်မႃးပွႆႇမၢၵ်ႇၵႂႃႇ 4 လုၵ်ႈ။ သဵင်မၼ်းမေႃးၵႂႃႇတၢင်း ၾၢႆႇၸၢၼ်းၼမ်ႉတူႈ ၸွမ်းႁိမ်းႁွမ်တူင်ႇတၢင်ႇ ႁူင်းႁဵၼ်းသွၼ် ၵၢၼ်သိုၵ်းမၢၼ်ႈမိူဝ်ႈဢွၼ်တၢင်းၼၼ်ႉဢေႃႈ။ တီႈၼၼ်ႈၼႆႉ မၢင်ပွၵ်ႈလွႆၶဝ် သွၼ်ၵၢၼ်သိုၵ်းၼႂ်းၼၼ်ႉၵေႃႈမီး။ ၸဵမ်မိူဝ်ႈဝၢႆးလွႆၶဝ် သိမ်းလႆႈဝဵင်းၼၼ်ႉ ၶဝ်ပႂ်ႉဝႆႉဢမ်ႇပၼ်ၵူၼ်းၾၢႆႇၼွၵ်ႈ ၶဝ်ႈၼႂ်းဝၢင်းၼၼ်ႉၶႃႈ။ ၵွပ်ႈၼၼ် တူၵ်းၺႃးႁိမ်းလႂ်တေႉတေႉၵေႃႈဢမ်ႇႁူႉ ၶႃႈ။”
ႁွင်ႈၵၢၼ်ၾၢႆႇပိုၼ်ၽၢဝ်ႇ သိုၵ်းတဢၢင်း (PSLF/TNLA) ပိုၼ်ၽၢဝ်ႇဢွၵ်ႇယိုၼ်ယၼ်ဝႆႉ လွင်ႈႁိူဝ်းမိၼ်တိုၵ်းၶွင်သိုၵ်းမၢၼ်ႈ မိူဝ်းပွႆႇ မၢၵ်ႇသႂ်ႇၼႂ်းဝဵင်းၼမ်ႉတူႈ 23/10/2025 ယၢမ်းၵၢင်ၶမ်ႈ 9 မူင်းပၢႆ ၼၼ်ႉယူႇသေတႃႉ တေႃႇထိုင် မိူဝ်ႈၼႆႉ 24/10/2025 ယၢမ်းဝၢႆးဝၼ်း ၶေႃႈမုၼ်းႁူဝ်ယွႆႈ လွင်ႈတိူဝ်ႉမၢတ်ႇၸဵပ်း လႄႈ လူႉၵွႆ ဢိၵ်ႇပႃး ၶႅပ်းႁၢင်ႈၸိူဝ်းၼႆႉ ပႆႇႁၼ်ပိုၼ်ၽၢဝ်ႇ ဢွၵ်ႇမႃး ပဵၼ်တၢင်းၵၢၼ်ထႅင်ႈ။
ဝၢႆးလင် ပၢင်တိုၵ်းၽႅၼ်ယၼ်ႇသိုၵ်း 1027 မႃး ၸႄႈဝဵင်းၼမ်ႉတူႈၼႆႉ သိုၵ်းတဢၢင်း (TNLA) ၵုမ်းၵမ်ယူႇသဝ်း ပၼ်ႇၵၢၼ်ၽွင်း ငမ်းဝႆႉၵူၺ်းဢမ်ႇၵႃး ပႃႇတီႇမႂ်ႇသုင်ၸိုင်ႈတႆး SSPP/SSA ၵေႃႈ တူင်ႉၼိုင်ယူႇသဝ်းဝႆႉ ၼႆယဝ်ႉ။
ၼႂ်းလိူၼ်ဢွၵ်ႉထူဝ်ႊပိူဝ်ႊ ဝၢႆးလင်သိုၵ်းမၢၼ်ႈယိုတ်းမိူင်း ၶဝ်ႈၵုမ်းလႆႈၶိုၼ်း ဝဵင်းသီႇပေႃႉယဝ်ႉ သၢႆသိုၵ်းမၢၼ်ႈ သိုပ်ႇမုင်ႈၼႃႈၶိုၼ်ႈ သိုၵ်းမုင်ႈၼႃႈၸူး ဝဵင်းၼမ်ႉတူႈ ၸွမ်းသဵၼ်ႈတၢင်း သီႇပေႃႉ-တႃႈတေႈ-မၢၼ်ႈၸၢမ်-ၼမ်ႉတူႈယူႇလႄႈ ၵူၼ်းမိူင်း ၸိူဝ်းယူႇၸွမ်း ဝၢၼ်ႈသဵၼ်ႈတၢင်းၼၼ်ႉ လႆႈငိူင်ႉဢွၵ်ႇဝႆႉၸူဝ်ႈၶၢသ်း မီးၸမ်မွၵ်ႈ 500 ၵေႃႉ ဝႃႈၼႆ။
ယၢမ်းလဵဝ် ၼႂ်းဝဵင်း လႄႈ ၸွမ်းသၢပ်ႇဝဵင်းၼမ်ႉတူႈၼႆႉ ဢမ်ႇၸႂ်ႉလႆႈ လႅင်းၾူင်း လႅင်းဢိၼ်ႊတႃႊၼႅတ်ႊ- လႆႈ။ ယွၼ်ႉၵူဝ်ၵူၼ်း ၶွၼ်ႈတုမ်ၵၼ်- ၵူဝ်ဢမ်ႇမီးလွင်ႈႁူမ်ႇလူမ်ႈၼႆသေ Starlink ၵေႃႈ ၺႃးသိုၵ်းတဢၢင်း သင်ႇႁၢမ်ႈဢိုတ်းဝႆႉပႃးထႅင်ႈ။ ႁဵတ်းႁႂ်ႈၵူၼ်းမိူင်း ယၢပ်ႇၽိုတ်ႇတႃႇ ၵပ်းသိုပ်ႇၵပ်းသၢၼ်ၵၼ်ဝႆႉ ၼႆယဝ်ႉ။
သိုၵ်းမၢၼ်ႈပိုၼ်ၽၢဝ်ႇဝႆႉငဝ်းလၢႆးၶိုၵ်ႉၶၵ်ႉ 63 ၸႄႈဝဵင်းသေ ထႅမ်ႁႅင်းသိုၵ်းၶိုၼ်ႈတိုၵ်းၸုမ်းသိုၵ်းၸၢဝ်းၶိူဝ်းမႃး ႁိုင်ၶၢဝ်းတၢင်း 2-3 လိူၼ်ယဝ်ႉ။ ယၢမ်းလဵဝ်ႈၸမ်ၶၢဝ်းဝၼ်းၸတ်းပၢင်လိူၵ်ႈတင်ႈ ထႅင်ႈၶၢဝ်းတၢင်းမွၵ်ႈ 2 လိူၼ်။ သိုၵ်းမၢၼ်ႈထႅမ်ႁႅင်းသိုၵ်းတၢင်းလိၼ် တၢင်းၵၢင်ႁၢဝ်သေယိုဝ်းသႂ်ႇ ဝဵင်းၸိူဝ်းဢၼ်တူၵ်းဝႆႉၼႂ်းမိုဝ်းၸုမ်းလုၵ်ႉၽိုၼ်ႉၶဝ်ဝႆႉဢမ်ႇထၢတ်ႇဢမ်ႇဝၢႆး ပႃးၸဵမ်ၼႂ်းမိူင်းတႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ