တႄႇၵၢင်လိူၼ် ဢွၵ်ႉထူဝ်ႊပိူဝ်ႊ ၼႆႉမႃးသိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ထူဝ်းသိုၵ်းၶဝ်ႈ ၼႂ်းၸႄႈဝဵင်းပၢင်လွင်း – ၾၢႆၶုၼ် ႁၢဝ်ႈႁႅင်း ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉၸဝ်ႈဢႃႇၼႃႇသိုၵ်း ႁၢဝ်ႈႁႅင်း ထိုင်ဝၼ်းမိူဝ်ႈၼႆႉ ။
ၼႂ်းဝၼ်းတီႈ13/10/2025 သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း ထူဝ်းသိုၵ်းၶဝ်ႈၼႂ်းဝၢၼ်ႈဝေႃႉယၢၼ်ႇ ( ဘောရန်) ဢၼ်မီးၾၢႆႇႁွင်ႇၾၢႆၶုၼ်သေ ပၢင်တိုၵ်းသိုပ်ႇပဵၼ်ႁၢဝ်ႈႁႅင်း ၾၢႆႇတင်းသိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ဢဝ်မၢၵ်ႇၵွင်ႈလူင် ၊ ၶိူင်ႈတရူၼ်ႊ ပိုတ်းယိုဝ်းၸွႆႈပႃးထႅင်ႈ ၶိုၼ်းၶိုၼ်းဝၼ်းဝၼ်း ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၾၢႆႇသိုၵ်းမၢၼ်ႈယူႇၼႂ်းဝၢၼ်ႈဝေႃႉယၢၼ်ႇသေ လၢမ်းယိုဝ်းၵွင်ႈလူင် ၵႂႃႇတီႈဢၼ်ၸုမ်းလုၵ်ႉၽိုၼ်ႉၶဝ်မီးၼၼ်ႉၵူႈဝၼ်း ၊ ပၢင်တိုၵ်းၵေႃႈ သိုပ်ႇပဵၼ်ဝႆႉႁၢဝ်ႈႁႅင်း”-ဝႃႈၼႆ ။
ပၢင်တိုၵ်းဢၼ်ပဵၼ်ယူႇ ယၢမ်းလဵဝ်ၼႆႉ ပဵၼ်တၢင်း ဝၢၼ်ႈဝေႃႉယၢၼ်ႇ(ဘောရန်) ၊ ဝၢၼ်ႈၸလူင်ႈၼိူဝ် (မြောက်စလုံး) ၊ ၸလူင်ႈတႂ်ႈ ( တောင်စလုံး ) ၼႂ်းၸႄႈဝဵင်းပၢင်လွင်း- ၾၢႆၶုၼ် ႁဵတ်းႁႂ်ႈၵူၼ်းပိုၼ်ႉတီႈ 4 ႁဵင်ပၢႆလႆႈငိူင်ႉပၢႆႈၽေးသိုၵ်း ၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပၢႆႈယူႇၵေႃႉတီႈၵေႃႉတၢင်း ၊ တေႁူမ်ႈၵၼ်ယူႇ တႄႉဢမ်ႇမီး ၊ မၢင်ၸိူဝ်းတႄႉ ပၢႆႈၵႂႃႇယူႇတီႈပၢင်သဝ်းၵူၼ်းပၢႆႈၽေးသိုၵ်း တၢင်းဝဵင်းတီႈမူၵ်းသိူဝ် ၊ ၵမ်ႈၼမ်တႄႉ ပၢႆႈၶဝ်ၼႂ်းထိူၼ်ႇၼႂ်းၶိူဝ်း ”- ဝႃႈၼႆ ။
တႄႇၼႂ်းဝၼ်းတီႈ 6/10/2025 ၼၼ်ႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း ထူဝ်းသိုၵ်းၶဝ်ႈၼႂ်းဝၢၼ်ႈၵေႃမႆႉသၢင်းသေ ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉမႃးၶိုၼ်း။ ဝၢႆးၼၼ်ႉ ၼႂ်းဝၼ်းတီႈ 9/10/2025 သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ၽဝ်ႁိူၼ်းၵူၼ်းမိူင်းၼႂ်းဝၢၼ်ႈ လူႉၵွႆ – လႆႈႁူႉၼင်ႇၼႆ။
မိူၼ်ၼင်ႇၼႆ ၼႂ်းဝၼ်းတီႈ 13/10/2025 ယၢမ်းဝၢႆးဝၼ်း 4 မူင်းၼၼ်ႉၵေႃႈ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ၶဝ်ႈၽဝ်ႁိူၼ်းၵူၼ်းဝၢၼ်ႈဝေႃႉယၢၼ်ႇ လူႉၵွႆ 30 လင်ပၢႆ ၼႆယဝ်ႉ ။
မိူၼ်ၼႆၼင်ႇၵဝ်ႇ ၼႂ်းထုင်ႉ ၾၢႆၶုၼ် မိူင်းပၢႆး လႅၼ်လိၼ် တႆး – ယၢင်းလႅင်ၼၼ်ႉၵေႃႈ သိုၵ်းမၢၼ်ႈ တင်း ၸုမ်းသိုၵ်းၽွမ်ႉႁူမ်ႈ ယၢင်းလႅင် တိုၵ်ႉမီးလွင်ႈပိုတ်းယိုဝ်းၵၼ် ပဵၼ်တီႈပဵၼ်တီႈယူႇသေ ပျီႇတူႉၸိတ်ႉပဢူဝ်း PNO ၽဝ်ႁိူၼ်းၵူၼ်းပိုၼ်ႉတီႈပႃးၼႆ သိုၵ်းယၢင်းလႅင် KNDF ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 13/10/2025 ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ