သိုၵ်းတဢၢင်း TNLA ၸိူဝ်းပၵ်းတပ်ႉပၢင်သဝ်း ပၼ်ႇၵၢၼ်ၽွင်းငမ်း ၼႂ်းထုင်ႉမၢၼ်ႈၸၢမ် ၸႄႈဝဵင်းၼမ်ႉတူႈဝႆႉ ဢွၵ်ႇၶေႃႈၸီႉသင်ႇ ႁႂ်ႈၵူၼ်းမိူင်း ဢိုတ်းၶိူင်ႈသတႃးလိင်ႉ (Starlink) လႆႈႁူႉၼင်ႇၼႆ။

သိုၵ်းတဢၢင်းလၢတ်ႈမိူဝ်ႈဝၼ်းတီႈ 17/10/2025 ဝႃႈ – တႄႇဝၼ်းတီႈ 18/10/2025 ၼႆႉၵႂႃႇ ၵူၼ်းမိူင်း တီႈ ထုင်ႉမၢၼ်ႈၸၢမ် တေလႆႈဢိုတ်းဝႆႉသတႃးလိင်ႉတင်းသဵင်ႈၼႆ ၼုမ်ႇၸၢႆးဢႃႇယု 35 ပီ ၵေႃႉယူႇဝႆႉၼႂ်းထုင်ႉမၢၼ်ႈၸၢမ် လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈလဵဝ် တီႈမၢၼ်ႈၸၢမ်ၼႆႉ လႅင်းၾူၼ်းၵေႃႈဢမ်ႇလႆႈ ၶၢတ်ႇဝႆႉ မီးသွင်သၢမ်ဝၼ်းယဝ်ႉ။ ႁဝ်းလႆႈၸႂ်ယႂ်ႇသတႃးလိင်ႉႁႄ တူၺ်းၶၢဝ်ႇ ငၢဝ်းၵွႆး။ ယၢမ်းလဵဝ်ၶဝ်သမ်ႉဝႃႈ သင်ႇႁႂ်ႈဢိုတ်းၼႆ။ တေႁိုင်ၵႃႈႁိုဝ်ၵေႃႈဢမ်ႇႁူႉ။ ၶဝ်ႁဵတ်းၸိူင်ႉၼႆၼႆႉ ဢမ်ႇမီးလွင်ႈတိတ်းတေႃႇၵပ်း သိုပ်ႇၵၼ်တင်းပီႈၼွင်ႉဢၼ်မီးယူႇၵႆၼၼ်ႉဢေႃႈ။ ၶဝ်ၵေႃႈတေမႆႈၸႂ်ၸွမ်း တၢင်းႁိူၼ်း ၼၼ်ႉၼႃႇ။ မၢၼ်ႈၸၢမ်ႁဝ်းၼႆႉ ပဵၼ်သိုၵ်းလွႆ ၵုမ်းဝႆႉမူတ်းဢေႃႈ။ ၸူးၸႂ်ႁဝ်းၶႃႈတႄႉဢမ်ႇၶႂ်ႈႁႂ်ႈၶဝ်ႁဵတ်းၸိူင်ႉၼႆ။ ၵူၺ်းၵႃႈ မိူဝ်ႈလဵဝ်ၼႆ ဢမ်ႇမီးၸုမ်းယိပ်းၵွင်ႈၵၢင်ႇၸုမ်းလႂ် ထွမ်ႇသဵင်ၵၢင်ၸႂ်ႁဝ်းႁႄ ႁၼ်ထိုင်ၵၢင်ၸႂ်ႁဝ်းၵူၼ်းမိူင်းၶႃႈလူး။”

လွင်ႈၼႆႉ တႃႇတေလႆႈႁူႉလွင်ႈတၢင်းမၼ်းလီလီၼႆသေ တိတ်းတေႃႇၸူး ၾၢႆႇပွင်ႇၶၢဝ်ႇတပ်ႉသိုၵ်းတဢၢင်းယူႇၵေႃႈ ၵပ်းသိုပ်ႇပႆႇလႆႈ။

ထုင်ႉမၢၼ်ႈၸၢမ်ၼႆႉ ၶဝ်ႈပႃးဝႆႉၼႂ်းၸႄႈဝဵင်းၼမ်ႉတူႈသေ သိုၵ်းတဢၢင်းၵုမ်းၵမ်ဝႆႉ ဝၢႆးလင် ပၢင်တိုၵ်းၽႅၼ်ယၼ်ႇ သိုၵ်း 1027 ပွၵ်ႈၵမ်းသွင်ယဝ်ႉ ပၼ်ႇၵၢၼ်ၽွင်းငမ်းဝႆႉတင်းသဵင်ႈ ၼႆယဝ်ႉ။

လႆႈႁူႉဝႃႈ ၽွင်းသိုၵ်းတဢၢင်းၵုမ်းၵမ် ပၼ်ႇၵၢၼ်ၽွင်းငမ်းထုင်ႉမၢၼ်ႈၸၢမ် ၸႄႈဝဵင်းၼမ်ႉတူႈဝႆႉၶၢဝ်းတၢင်းႁိုင် 1 ပီပၢႆၼႆႉ သဵၼ်ႈတႃႈ သၢႆတၢင်းဢၼ်ၵူၼ်းမိူင်းလႆႈပိုင်ႈဢိင်ၸႂ်ႉတိုဝ်းတႃႇၵႂႃႇမႃးႁဵတ်းႁႃၵိၼ်လဵင်ႉၼႃႈႁိူၼ်းၽႂ်မၼ်းယူႇၵူႈဝၼ်းၼႆႉ လူႉၵွႆယွၵ်းယွႆ။ ယွၼ်ႉသိုၵ်း တဢၢင်း ပၼ်ၵႃးတၢင်ႇၽွႆႈ ဢၼ်ၶွမ်ႊပၼီႊမႃးၶုတ်းဢဝ်တီႈဝဵင်းၼမ်ႉတူႈၼၼ်ႉ လတ်းၵႂႃႇမႃး ၵူၼ်းပိုၼ်ႉတီႈလၢတ်ႈၼင်ႇၼႆ။

ၽွင်းငဝ်းလၢႆးဝၢၼ်ႈမိူင်းဢမ်ႇၼိမ်သဝ်းၸိူင်ႉၼႆ သဵၼ်ႈတၢင်းၵေႃႈလူႉၵွႆဝႆႉလႄႈ သင်ၵိုင်ႉၵၢင်ႉလူဝ်ႇပၢႆႈၽေးမႃးၸိုင် ၵူၼ်းပိုၼ်ႉတီႈ ၸၢင်ႈယၢပ်ႇၽိုတ်ႇႁႅင်းၼႆ ၵူၼ်းမိူင်းၼႂ်းၸႄႈဝဵင်းၼမ်ႉတူႈ လၢတ်ႈၼႄၼင်ႇၼႆ။

လိူဝ်သေ သိုၵ်းတဢၢင်း (TNLA)ယဝ်ႉ ၾၢႆႇႁွင်ႇမၢၼ်ႈၸၢမ်ၼႆႉ မီးၸုမ်းသိုၵ်း ပႃႇတီႇမႂ်ႇသုင်ၸိုင်ႈတႆး ပၵ်းတပ်ႉပၢင်သဝ်း တူင်ႉၼိုင်ႈယူႇဝႆႉပႃးလႆႈႁူႉၼင်ႇၼႆ။