တႄႇၵၢင်လိူၼ် ဢွၵ်ႇထူဝ်ႊပိူဝ်ႊ ၼႆႉမႃးသိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်းထူဝ်းသိုၵ်းၶဝ်ႈ ၼႂ်းၸႄႈ ဝဵင်းပၢင်လွင်း – ၾၢႆၶုၼ် ႁၢဝ်ႈႁႅင်း သေ ပဵၼ်ပၢင်တိုၵ်းၵၼ်တင်းၸုမ်းလုၵ်ႉၽိုၼ်ႉလႄႈႁဵတ်းႁႂ်ႈၵူၼ်းမိူင်း 4 ႁဵင်ပၢႆလႆႈငိူင်ႉပၢႆႈၽေးသိုၵ်းထႅင်ႈ ။
ၵူၼ်းၼႂ်းၸႄႈဝဵင်းၾၢႆၶုၼ်- ပၢင်လွင်း ဢွၼ်ၵၼ် ငိူင်ႉပၢႆႈၽေးသိုၵ်းၵႂႃႇယူႇ ၼႂ်းထိူၼ်ႇၼႂ်းၶိူဝ်း ၊ လူဝ်ႇ တၢင်း ၸွႆႈထႅမ် တီႈယူႇတၼ်းသဝ်း ၶဝ်ႈၼမ်ႉတၢင်းၵိၼ်လႄႈယႃႈယႃဝႆႉ ။
ၸုမ်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ လႆႈပၢႆႈယူႇၼႂ်းထိူၼ်ႇလႆႈယူႇၸွမ်းၽႃႈယၢင် မူဝ်းၵႃႇၵၼ်လႄႈ လူဝ်တင်းၸွႆႈထႅမ် တီႈယူႇသဝ်း ၊ ၶဝ်ႈၼမ်ႉတင်းၵိၼ် ၊ မၢင်ၸိူဝ်းၵေႃႈ လူဝ်ႇတင်း ၸွႆႈထႅမ် ယႃႈယႃ ၊ ပဵၼ်တၢင်းပဵၼ် ၶူမ်ႈၵၢႆးၸိူဝ်းၼႆႉ” – ဝႃႈၼႆ ။
ဝၢၼ်ႈဢၼ်လႆႈငိူင်ႉပၢႆႈၽေးသိုၵ်းယူႇယၢမ်းလဵဝ်ၼႆႉ ပဵၼ်ဝၢၼ်ႈဝေႃႉယၢၼ်ႇ(ဘောရန်) ၊ ဝၢၼ်ႈၸလူင်ႈၼိူဝ် (မြောက်စလုံး) ၊ ၸလူင်ႈတႂ်ႈ ( တောင်စလုံး ) ၊ လူင်ပႅၼ်ႈ ၊ ၼမ်ႉၼဵင်ႈ ၊ ၵေႃမႆႉသၢင်း မၢင်ၸိူဝ်းပၢႆႈၽေးသိုၵ်းၵႂႃႇတၢင်း ဝၢၼ်ႈတီႈမူၵ်းသိူဝ် (ဒီမောဆိုး) လႅၼ်လိၼ်တႆး- ယၢင်းလႅင် လႄႈ ၼႂ်းၸႄႈဝဵင်းပၢင်လွင်းၸဵမ်ၸိူဝ်းၼႆႉဝႃႈၼႆ ။
ဝၼ်းတီႈ 14/10/2025 ယၢမ်းၵၢင်ၶမ်ႈ သိုၵ်းမၢၼ်ႈထူဝ်းသိုၵ်း ဢဝ်ႁိူဝ်းမိၼ်သိုၵ်းမႃးပွႆႇမၢၵ်ႇသႂ်ႇၼႂ်းဝၢၼ်ႈ ဝေႃႉယၢၼ်ႇ(ဘောရန်) ဢိူင်ႇသီးပူး ၾၢႆႇတူၵ်းဝဵင်းၾၢႆၶုၼ်သေ ႁဵတ်းႁႂ်ႈၵူၼ်းမိူင်းငိူင်ႉပၢႆႈၽေးသိုၵ်း ႁူဝ်ၵူၼ်း 200 ပၢႆလႆႈငိူင်ႉပၢႆႈၽေးသိုၵ်းထႅင်ႈ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ တႄႇလႆႈပၢႆႈၼႂ်းဝၼ်းတီႈ 11/10/2025 ၽွင်းသိုၵ်းမၢၼ်ႈ ထူဝ်းသိုၵ်း ၶဝ်ႈၼႂ်းဝၢၼ်ႈသေ ဢဝ်ၾႆးၽဝ်ႁိူၼ်းၵူၼ်းဝၢၼ်ႈ မၢင်ၸိူဝ်းၵေႃႈ ပၢႆႈၶဝ်ႈထိူၼ်ႇၶဝ်ႈၶိူဝ်း မၢင်ၸိူဝ်းၵေႃႈပၢႆႈၵႂႃႇတီႈပၢင်သဝ်းၵူၼ်းပၢႆႈၽေးသိုၵ်း တင်းမိူင်းယၢင်းလႅင် ၊ တီႈဝၢၼ်ႈၵိုတ်း ၵူၼ်းၸၢႆးၵမ်ႈၽွင်ႈ ပႂ်ႉဢဝ် မၢၵ်ႇၶဝ်ႈတဝ်ႈၼမ်ႉဢၼ်ၽုၵ်ႇဝႆႉၼၼ်ႉ”- ဝႃႈၼႆ ။
ၼႂ်းႁူဝ်ပီၼႆႉ သိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၵွင်ႈၵၢင်ႇ ႁူမ်ႈတင်း ပျီႇတူႉၸိတ်ႉပဢူဝ်းသေ ထူဝ်းသိုၵ်းလေႃႇတိုၵ်းၸုမ်းလုၵ်ႉၽိုၼ်ႉႁၢဝ်ႈႁႅင်း ယဝ်ႉယိုတ်းၵုမ်းလႆႈၶိုၼ်း တၢင်းဝၢၼ်ႈ ၵေႃမႆႉသၢင်း၊ ဝၢၼ်ႈၼမ်ႉၼဵင်ႈ ၊ ဝၢၼ်ႈပၢင်ႇပုမ် ၊ လူင်ပႅၼ်ႈ ၼႂ်းၸႄႈဝဵင်းပၢင်လွင်း သေပၢင်တိုၵ်းသိုပ်ႇပဵၼ်ႁၢဝ်းႁႅင်း ၼႂ်းၸႄႈဝဵင်းပၢင်လွင်း – ၾၢႆၶုၼ် ဝႆႉၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ