မိူဝ်ႈဝႃး ဝၼ်းတီႈ 15/10/2025 ယၢမ်းၵၢင်ၶမ်ႈ ၶွမ်ႊမသျိၼ်ႊပၢင်လိူၵ်ႈတင်ႈ တႂ်ႈသိုၵ်းမၢၼ်ႈယိုတ်းမိူင်းၵုမ်းၵမ် ပိုၼ်ၽၢဝ်ႇဝၼ်းလူင်းသူၼ်းတုမ်တႃႇပၢင်လိူၵ်ႈတင်ႈပဵၼ်တၢင်းၵၢၼ်လႆႈ တႃႇၶၢဝ်းတၢင်း 60 ဝၼ်း။

ပႃႇတီႇၵၢၼ်မိူင်းၶဝ်တႄႇလူင်းသူၼ်းတုမ်ၵူၼ်းမိူင်း ႁႂ်ႈပၼ်သဵင်ၵၢင်ၸႂ်လႆႈၼႆႉ ပဵၼ်ဝၼ်းတီႈ 28/10/2025 ယၢမ်းၵၢင်ၼႂ်ၸဝ်ႉ 6 မူင်း တေႃႇထိုင် ဝၼ်း တီႈ 26/12/2025 ယၢမ်းၵၢင်ၶိုၼ်း 12 မူင်း ႁိုင်ၶၢဝ်းတၢင်း 2 လိူၼ်ဝႃႈၼႆ။

ၼႂ်းၶၢဝ်းတၢင်း 60 ဝၼ်းၼႆႉ ပႃႇတီႇၵၢၼ်မိူင်းၵူႈၸုမ်း၊ ၼေႃႇတႅၼ်းၽွင်း ၵူႈၵေႃႉ ၸိူဝ်းတေၶဝ်ႈၸွမ်းပၢင်လိူၵ်ႈတင်ႈ မီးသုၼ်ႇလႆႈ ႁူၺ်းသူၼ်း ႁွင်ႉၵူၼ်းမိူင်းၶွၼ်ႈတုမ်ၵၼ်သေ ပိုၼ်ၽၢဝ်ႇလၢတ်ႈၼေလွင်ႈ ပေႃႇလသီႇ မူႇပိူင်ၶွင်မုၵ်ႉၸုမ်းၽႂ်မၼ်းလႆႈ – ဝႃႈၼႆ။

ၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ ယၢမ်ႈတွပ်ႇလၢတ်ႈဝႆႉတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ “ပေႃး UEC ၶဝ် ပႆႇပၼ်ၶႂၢင်ႉ ႁႂ်ႈႁဵတ်းၵၢၼ်သူၼ်းတုမ်ပဵၼ်တၢင်းၵၢၼ်သေ ၼေႃႇတႅၼ်းၽွင်းသမ်ႉ ႁဵတ်းၵၢၼ်ႁူၺ်းသူၼ်းလူင်ႈၼႃႈၼႆႉၸိုင် ပႃႇတီႇၼၼ်ႉ ၸၢင်ႈၺႃးယႃႉ လူၺ်ႈႁဵတ်းၽိတ်းပၵ်းပိူင်ၾိင်ႈမိူင်း ပၢင်လိူၵ်ႈတင်ႈ” ၼႆယဝ်ႉ။

ၵူၺ်းၵႃႈ ၼိူဝ်သိုဝ်ႇတူင်ႇဝူင်းၵူၼ်းတႄႉ ၼေႃႇတႅၼ်းၽွင်း ပႃႇတီႇၵမ်ႈၽွင်ႈ သမ်ႉပေႃးပိုၼ်ၽၢဝ်ႇသူၼ်းတုမ် တႃႇပၢင်လိူၵ်ႈတင်ႈၼိူဝ်ၼႃႈၾဵတ်ႉသ် ပုၵ်ႉ သုၼ်ႇတူဝ်ၽႂ်မၼ်းၸဵမ်မိူဝ်ႈတႄႇတၢင်ႇသဵၼ်ႈၸိုဝ်ႈပုၼ်ႉယဝ်ႉ။

ပႃႇတီႇၸိူဝ်းတေၶဝ်ႈၸွမ်း ပၢင်လိူၵ်ႈတင်ႈဢၼ်ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ (ၵေႃႉၶႃႈႁႅမ်ၵူၼ်းမိူင်းလူႉတၢႆ ၊ ၵေႃႉပွႆႇမၢၵ်ႇသႂ်ႇ ႁိူၼ်းယေး ႁူင်းႁဵၼ်း၊ ဝတ်ႉဝႃးၽႃသိူဝ်ႇ ၵူၼ်းမိူင်းလူႉၵွႆယူႇၵူႈမိုဝ်ႉၵူႈဝၼ်းၼၼ်ႉ )တႄႉ တင်းသဵင်ႈမီးယူႇ 57 ပႃႇတီႇ ။

ၼင်ႇႁိုဝ် တေပဵၼ်ၸတ်းပၢင်လိူၵ်ႈတင်ႈ ပီ 2025 ၼႆႉ ႁႂ်ႈပေႃးပဵၼ်လႆႈတေႉၼၼ်ႉၵေႃႈ ၾၢႆႇၸုမ်းသိုၵ်းမၢၼ်ႈ ပေႃးတမ်းဝၢင်းမၵ်းမၼ်ႈ ပၵ်းပိူင်ၾိင်ႈမိူင်းပၼ်ဝႆႉဢွၼ်တၢင်းယဝ်ႉ။ ၵွပ်ႈၼႆ ပၢင်လိူၵ်ႈတင်ႈၼႆႉ တေဢမ်ႇမီးလွင်ႈႁူမ်ႇငမ်းၼိူဝ် မိူင်းႁူမ်ႈတုမ်ပတ်းပိုၼ်ႉ မွၵ်ႈၵႃႈႁိုဝ် – ၼႆ ၸၢႆးၺုၼ်ႉလုၼ်ႇ ႁူဝ်ပဝ်ႈပႃႇတီႇႁူဝ်သိူဝ် (SNLD) ယၢမ်ႈထတ်းသၢင်လၢတ်ႈၼႄဝႆႉၼင်ႇၼႆ။

ၵူၼ်းၼုမ်ႇၸိူဝ်းပၵ်းတႃၵၢၼ်လိူၵ်ႈတင်ႈတႄႉလၢတ်ႈဝႃႈ တႃႇႁႂ်ႈလႆႈတီႈယူႇပဵၼ်တၢင်းၵၢၼ်ၼၼ်ႉ သိုၵ်းမၢၼ်ႈၼႆႉ တိုၼ်းတေၶတ်းၸႂ်ႁဵတ်းႁႂ်ႈပဵၼ်ပၢင်လိူၵ်ႈတင်ႈဢွင်ႇမၢၼ် ဝႃႈၼႆ။