ၵွၼ်ႇၼႃႈသိုၵ်းမၢၼ်ႈယိုတ်းမိူင်း တေတႄႇၸတ်းပၢင်ၵုမ်လူင်သၽႃးၸိူဝ်ႉၸၢတ်ႈ၊ သၽႃးၸႄႈမိူင်း လႄႈ တိူင်း၊ သၽႃးၵူၼ်းမိူင်းၼၼ်ႉ တူဝ်တႅၼ်းၶိုၵ်ႉတွၼ်း လူင်ပွင်ၸိုင်ႈမိူင်း ၶႄႇ မိတ်ႊသတိူဝ်ႊ တဵင်ႉသျီႊၵျွၼ်ႊ ၼမ်းၼႃႈ ႁွင်ႉဢဝ်ၽူႈမီးပုၼ်ႈၽွၼ်းၼႂ်းမိူင်းၶႄႇလၢႆလၢႆၵေႃႉသေ မႃးႁူပ်ႉထူပ်းဢုပ်ႇဢူဝ်း တူဝ်တႅၼ်းသိုၵ်းမၢၼ်ႈ ဢူးတၢၼ်းသူၺ်ႇ ၵေႃႉႁပ်ႉပုၼ်ႈၽွၼ်းဝႆႉပဵၼ် ၽွင်းလူင်ၼွၵ်ႈမိူင်း ဝႃႈၼႆ။

မိူဝ်ႈဝၼ်းတီႈ 13 လိူၼ်မၢတ်ႉၶျ် ပီ 2026 ယၢမ်းဝၢႆးဝၼ်း 2 မူင်း တဵင်ႉသျီႊၵျွၼ်ႊ တင်း ဢူးတၢၼ်းသူၺ်ႇ ႁူပ်ႉထူပ်းၵၼ်တီႈ ဝဵင်းလူင်ၼေႇပျီႇတေႃႇသေ ဢုပ်ႇဢူဝ်းၵၼ်ၵႂႃႇ လွင်ႈ ၵၢၼ်ၼိမ်တဵင်ႈ ၸွမ်းလႅၼ်လိၼ် မိူင်းၶႄႇ-မိူင်းတႆး ပဵၼ်ပိူင်ယႂ်ႇ ဝႃႈၼႆ။

ၼႂ်းၶေႃႈဢုပ်ႇဢူဝ်းၼၼ်ႉ ပႃးလွင်ႈတႃႇမိူင်းမၢၼ်ႈ-မိူင်းၶႄႇ ႁူမ်ႈမိုဝ်းၵၼ် ၽဵဝ်ႈမူၺ်ႉ ၵၢၼ်ၵျႃႊၽျႅၼ်ႉ (လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ) ၸွမ်းလႅၼ်လိၼ်၊ လွင်ႈတေႁူမ်ႈ ၵၼ် ႁဵတ်းသၢင်ႈၼႃႈၵၢၼ် ၸွမ်းၼႂ်းမိူင်းႁူမ်ႈတုမ် ဢၼ်တင်းသွင်မိူင်းတေလႆႈၼမ်ႉတွၼ်းၽွၼ်းလီ ၼၼ်ႉၵူၺ်းဢမ်ႇၵႃး ၼင်ႇႁိုဝ် ၸိုင်ႈမိူင်းၼွၵ်ႈ ပေႃးတေယွမ်းႁပ်ႉ ႁၼ်လီၵမ်ႉထႅမ်ၸွမ်း လွင်ႈႁဵတ်းသၢင်ႈၶဝ်သွင်မိူင်းၵႂႃႇၼၼ်ႉၵေႃႈ တေႁူမ်ႈမိုဝ်းၵၼ် ၶိုင်ပွင်ႁဵတ်းသၢင်ႈၵႂႃႇ ၼႆယဝ်ႉ။

လိူဝ်ၼၼ်ႉ ၾၢႆႇလူင်ပွင်ၸိုင်ႈမိူင်းၶႄႇ တေၵမ်ႉၸွႆႈႁဵတ်းသၢင်ႈပၼ် ၵၢၼ်ႁုၼ်ႈမုၼ်းၶိုၼ်ႈယႂ်ႇ ၼႂ်းမိူင်းမၢၼ်ႈၵူၺ်းဢမ်ႇၵႃး တေၸွႆႈၶိုင်ပွင်ပၼ် ႁႂ်ႈၶၵ်ႉၵၢၼ်ငမ်းယဵၼ်ၼႂ်းမိူင်း မိူင်း ႁူမ်ႈတုမ် မီးလွင်ႈၶိုပ်ႈၼႃႈမႃးလိူဝ်ၵဝ်ႇ ၸဵမ်ၸိူဝ်းၼႆႉ ဝႃႈၼႆ။

ၽူႈလူင်ႉလႅၼ်ႇၵၢၼ်မိူင်းတႆး မိူင်းႁူမ်ႈတုမ်ၵေႃႉၼိုင်ႈတႄႉ ယၢမ်ႈထတ်းသၢင် လၢတ်ႈဝႆႉတီႈ ၽူႈတွႆႇႁွၵ်ႈဝႃႈ “ပေႃးဢဝ်ၵႂၢမ်းတဵင်ႉသျီႊၵျုၼ်ႊ ၽူႈၵမ်ၵၢၼ်လိူင်ႈ ဢေႊသျႃႊ ၶွင်မိူင်း ၶႄႇၼၼ်ႉဝႃႈတႄႉ ပၢင်လိူၵ်ႈတင်ႈၼႆႉ လူၺ်ႈၸွမ်ၸိုင်ႈ သျီႊၵျိၼ်ႉၽိင်ႊ ၽွမ်ႉလႆႈၸႂ်လႄႈ ၸင်ႇပဵၼ်ႁဵတ်းၼႆလႄႈ ဝၢႆးပၢင်လိူၵ်ႈတင်ႈယဝ်ႉတႄႉ ၵႃႈတေလႆႈသၢင်ႈ ၵၢၼ်ၵိုတ်းတိုၵ်းယူႇတေႉယဝ်ႉ” ဝႃႈၼႆ။

မိူဝ်ႈပူၼ်ႉမႃး လိူၼ်မၢတ်ႉၶျ် ဝၼ်းတီႈ 6 ၼႆႉ ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊထရမ်ႉ လႆႈလူင်းလၢႆးမိုဝ်းဝႆႉ တႃႇၵႂၢတ်ႇလၢင်ႉ ၸုမ်းၵေႃႇၵၢၼ်ႁၢႆႉၸွမ်းလႅၼ်လိၼ် ၸိူဝ်းယူႇ ၾၢႆႇလင်သေၵမ်ႉထႅမ်ပၼ် ၸုမ်းၵျႃႊၽျႅၼ်ႉ ႁဵတ်းၵၢၼ်လွၵ်ႇလႅၼ်ၵိၼ် ငိုၼ်းတင်း ဢွၼ်ႊလၢႆႊ (TCOs) ၸိူဝ်းၼၼ်ႉဝႆႉ ၼႆယဝ်ႉ။

တႃႇၵႂၢတ်ႇလၢင်ႉၽဵဝ်ႈမူၺ်ႉပႅတ်ႈ ၸုမ်းၵေႃႇၵၢၼ်ႁၢႆႉ ၸုမ်းယိပ်းၵွင်ႈၵၢင်ႇ ၸိူဝ်းယူႇၾၢႆႇလင်သေ ၵမ်ႉထႅမ်ဢဝ်ႁူမ်ႇလူမ်ႈပၼ် ၸုမ်းၵျႃႊၽျႅၼ်ႉၼၼ်ႉ တေႃႊၼႄႊထရမ်ႉ ပူင်ၶေႃႈသင်ႇဝႆႉတီႈ ၽွင်းလူင်ၼႂ်းမိူင်းၶဝ်ဝႃႈ ႁႂ်ႈဢဝ်ၽႅၼ်ၵၢၼ်တႃႇၽဵဝ်ႈမူၺ်ႉၸုမ်းၵမ်ႉထႅမ်ၵျႃႊၽျႅၼ်ႉၼၼ်ႉပၼ် ၼႂ်းၶၢဝ်းတၢင်း 4 လိူၼ် ၼႆယဝ်ႉ။

မိူၼ်ၼၼ်ၼင်ႇၵဝ်ႇ သိုၵ်းမိူင်းထႆး တင်း ၸုမ်းသိုၵ်းၸွပ်ႇၶၢဝ်ႇမိူင်းဢမေႊရိၵၼ်ႊ (FBI) ႁူမ်ႈပႃးတင်း မိူင်းမၢၼ်ႈ (မိူင်းႁူမ်ႈတုမ်) ၵေႃႈ ႁူမ်ႈၵၼ်ႁဵတ်းသၢင်ႈ ၵၢၼ်ၵႂၢတ်ႇလၢင်ႉၽဵဝ်ႈမူၺ်ႉ ၸုမ်းၵျႃႊၽျႅၼ်ႉ လႄႈ ၸုမ်းၵေႃႇၵၢၼ်ႁၢႆႉ တင်း ၸုမ်းယိပ်းၵွင်ႈၵၢင်ႇ ၼႂ်းတႃဝၼ်းဢွၵ်ႇမိူင်းဢေးသျႃႊဝႆႉယူႇ ၼႆယဝ်ႉ။

ၾၢႆႇၼိုင်ႈၵေႃႈ သိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇၼႆႉ မီးၽႅၼ်ၵၢၼ်ဝႆႉ တေမူၼ်ႉမႄးလၵ်းမိူင်း 2008 ဢၼ်ၸုမ်းသိုၵ်းမၢၼ်ႈ ၶဵၼ်ႇတႅမ်ႈမၵ်းမၼ်ႈၸႂ်ႉတိုဝ်းဝႆႉယူႇၼၼ်ႉ ထႅင်ႈ ၵမ်းၼိုင်ႈ ၼႂ်းပၢင်ၵုမ်လုမ်းသၽႃး ပဵၼ်တၢင်းၵၢၼ်ၵႂႃႇ ၼႆယဝ်ႉ။