တႄႇႁူဝ်လိူၼ်ဢွၵ်ႇထူဝ်ႊပိူဝ်ႊ ဝၢႆးလင်သိုၵ်းမၢၼ်ႈယိုတ်းမိူင်း ၶဝ်ႈၵုမ်းၵမ်လႆႈၶိုၼ်း ၸႄႈဝဵင်းၵျွၵ်ႉမႄး တင်းသဵင်ႈယဝ်ႉ ဝဵင်းသီႇပေႃႉ လႄႈ ဝဵင်းမိူင်းၵုတ်ႈ ၺႃးပဵၼ်ပဝ်ႉမၢႆ ၼႂ်းၽႅၼ်ၵၢၼ် သိုၵ်းမၢၼ်ႈ မိၼ်းဢွင်ႇလၢႆႇ။

မိူဝ်ႈၼႆႉဝၼ်းတီႈ 16/10/2025 ယၢမ်းၵၢင်ၼႂ် 7 မူင်းၶိုင်ႈ ႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇပွတ်းဢွၵ်ႇ ဝဵင်းမိူင်းၵုတ်ႈ ပွၵ်ႉၼိူဝ်ၵုင်းၺွင်ႇ (အထက်ညောင်ကုန်း) မၢၵ်ႇတူၵ်းတႅၵ်ႇသႂ်ႇ တီႈႁူင်းလဵင်ႉၵႆႇ ၼႂ်းၸႄႈဝဵင်းမိူင်းၵုတ်ႈ ။

ၵူၼ်းမိူင်းၼႂ်းပိုၼ်ႉတီႈ ဝဵင်းမိူင်းၵုတ်ႈ လၢတ်ႈၽူႈတွႆႇႁွၵ်ႈဝႃႈ “မၢၵ်ႇလူင် သႅၼ်း 250 ပွင်ႊ တူၵ်း 2 လုၵ်ႈ။ ပဵၼ်ဢွင်ႈတီႈ လဵင်ႉၵႆႇလႄႈ ပွၵ်ႈၼႆႉ ဢမ်ႇမီးၵူၼ်းမၢတ်ႇၸဵပ်းလူႉတၢႆၸွမ်း။ ပဵၼ်ၶၢဝ်းၵၢင်ၼႂ်ၸဝ်ႉ ၶဝ်ၵိုင်ႉၵၢင်ႉမႃးပွႆႇ ၽွင်းၼၼ်ႉ ႁဝ်းတိုၵ်ႉတေႁုင်ၶဝ်ႈယူႇ။ တေသိုပ်ႇတင်ႈမေႃႈၶဝ်ႈႁႃႉ၊ တေလႆႈလႅၼ်ႈပႅပ်ႉႁႃႉၼႆ သမ်ႉပေႃးၵႂင်ၵႂႃႇၵမ်ႉၼိုင်ႈ” ဝႃႈၼႆ။

ၶွၵ်ႈၵႆႇၸိူဝ်းၼႆႉမိူဝ်ႈၵွၼ်ႇပဵၼ်ၶွၵ်ႈၵႆႇၵူၼ်းမိူင်း။ ၸူဝ်ႈသိုၵ်း TNLA ၶဝ်ႈၵုမ်းဝဵင်းမိူင်းၵုတ်ႈယဝ်ႉတႄႉ ၶွၵ်ႈၵႆႇၵေႃႈပဵၼ်ၶဝ်ၵုမ်းသေ ၼႂ်း 2-3 လိူၼ်မႃးၼႆႉၵႆႇၵေႃႈဢမ်ႇပေႃးမီးၼမ်ယဝ်ႉၼင်ႇၵဝ်ႇ – လႆႈႁူႉၼင်ႇၼႆ။

မိူၼ်ၼႆ မိူဝ်ႈဝႃး ဝၼ်းတီႈ 15 ယၢမ်းၵၢင်ၼႂ် 8 မူင်းၶိုင်ႈ တေႃႇထိုင် ယၢမ်းဝၢႆးဝၼ်း မွၵ်ႈ 3 မူင်း သိုၵ်းမၢၼ်ႈၸႂ်ႉႁႅင်းသိုၵ်း 300 ၵေႃႉ ၸတ်းငႃးသိုၵ်း 3 သဵၼ်ႈသေ လုၵ်ႉတၢင်းဝဵင်းၵျွၵ်ႉမႄး ၶိုၼ်ႈလေႃႇတိုၵ်း တပ်ႉသိုၵ်းတဢၢင်း တၢင်းဝၢၼ်ႈၼႃးၶၢႆး၊ ဝၢၼ်ႈၵွင်းၶႃး ၼႂ်းဢိူင်ႇၵၢင်ႉမေႃႇ လႄႈ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်းၼႆ ႁွင်ႈၵၢၼ်ၶၢဝ်ႇငၢဝ်း ၶွင်ပႃႇတီႇမႂ်ႇသုင်ၸိုင်ႈတႆး (SSPP) ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉၼင်ႇၼႆ။

လိူဝ်ၼၼ်ႉ မိူဝ်ႈဝၼ်းတီႈ 14 ယၢမ်းတၢမ်းၶမ်ႈ 4 မူင်းၶိုင်ႈတေႃႇ 5 မူင်း သိုၵ်းမၢၼ်ႈၸႂ်ႉႁိူဝ်းမိၼ် ပွႆႇမၢၵ်ႇသႂ်ႇ ထပ်းၵၼ် ၸွမ်းဝၢၼ်ႈ ၸိူဝ်းမီးယူႇသၢပ်ႇဝဵင်းသီႇပေႃႉ မွၵ်ႈ 30 လုၵ်ႈ။ မၢၵ်ႇတူၵ်းတႅၵ်ႇတိူဝ်ႉၺႃး ႁိူၼ်းယေး လႄႈ ႁူင်းႁဵၼ်း ၊ ဝတ်ႉဝႃး တီႈဝၢၼ်ႈၼမ်ႉႁူးၼွႆႉ ။

ၼႂ်းပၢင်ပွႆးဝၼ်းၶွပ်ႈၶူပ်ႇ 10 ပီတဵမ် NCA ဢၼ်ၸတ်းႁဵတ်းတီႈ ဝဵင်းလူင်ၼေႇပျီႇတေႃႇ မိူဝ်ႈဝႃးဝၼ်းတီႈ 15/10/2025 ၼၼ်ႉ မိၼ်းဢွင်ႇလၢႆႇ ပိုၼ်ၽၢဝ်ႇပဵၼ်တၢင်း ၵၢၼ်ဝႃႈ ၸုမ်းလႂ် ၽႂ်ႁဵတ်းႁႂ်ႈဝၢၼ်ႈမိူင်းတူၵ်းၵိၼ်းၵေႃႈ ၾၢႆႇတပ်ႉသိုၵ်းမၢၼ်ႈ ၽွမ်ႉတႃႇၸတ်းၵၢၼ်တုမ်ႉတွပ်ႇၶိုၼ်းၵမ်းသိုဝ်ႈ ဝႃႈၼႆဝႆႉ။

တႄႇၼႂ်းႁူဝ်ပီ 2025 ၼႆႉမႃး သိုၵ်းမၢၼ်ႈ ၸတ်းၽႅၼ်ၵၢၼ်သိုၵ်း ၸႂ်ႉၶိူင်ႈတရူၼ်ႊ လႄႈ ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းမိူင်းတႆးပွတ်းႁွင်ႇ ၼႃႈတီႈသိုၵ်းတဢၢင်းၵုမ်းၵမ်ႁၢဝ်ႈႁႅင်းသေ ယိုတ်းၵုမ်းဢဝ်လႆႈၶိုၼ်း ဝဵင်းၼွင်ၶဵဝ်၊ ဝဵင်းၵျွၵ်ႉမႄး။

ဝဵင်းမိူင်းၵုတ်ႈၼႆႉပႃးဝဵင်းၼိုင်ႈ ၼႂ်းဢၼ်သိုၵ်းမၢၼ်ႈပိုၼ်ၽၢဝ်ႇ 63 ဝဵင်းၼႂ်းငဝ်းလၢႆးၶိုၵ်ႉၶၵ်ႉ သေတေႁႅၼ်းသိုၵ်းလေႃႇတိုၵ်း ၼႆဝႆႉၼၼ်ႉ။ ၵွပ်ႈၼႆလႄႈယၢမ်းလဵဝ် ၼင်ႇႁိုဝ် တေယိုတ်းလႆႈၶိုၼ်း ဝဵင်းသီႇပေႃႉ လႄႈ ဝဵင်းမိူင်းၵုတ်ႈၼၼ်ႉ သိုၵ်းမၢၼ်ႈ တိုၵ်ႉသိုပ်ႇၽႅၼ်ၸတ်းႁဵတ်းပၢင်တိုၵ်းယူႇ။ ၵူၼ်းမိူင်းၸိူဝ်းယူႇသဝ်းၼႂ်းထုင်ႉ ဝဵင်းၵျွၵ်ႉမႄး၊ ဝဵင်းသီႇပေႃႉ၊ ဝဵင်းၼမ်ႉတူႈ၊ ဝဵင်းၼမ်ႉသၼ်ႇ ၼပ်ႉႁူဝ်ႁဵင်ၵေႃႉ လႆႈပၢႆႈၽေးပၢင်တိုၵ်းဝႆႉ ယင်းပႆႇၸၢင်ႈပွၵ်ႈယူႇသဝ်းႁိူၼ်းယေးၽႂ်မၼ်းၶိုၼ်းလီငၢမ်း။

ၸိူင်ႉႁိုဝ်ၵေႃႈလီ ၼႂ်းလိၵ်ႈၵိၼ်ၵႅၼ်ႇ ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊတႄႉပႃးဝႆႉဝႃႈ – သိုၵ်းၼႆႉ တေဢမ်ႇလႆႈပိုတ်းယိုဝ်း ပွႆႇမၢၵ်ႇသႂ်ႇတီႈႁိမ်းဝၢၼ်ႈ- တေဢမ်ႇလႆႈပွႆႇမၢၵ်ႇသႂ်ႇၶူဝ်းၶွင်ႁိူၼ်းယေးၵူၼ်းမိူင်း ဝႃႈၼႆဝႆႉ။