မိူဝ်ႈၼႆႉ ဝၼ်းတီႈ 27/3/2026 ယၢမ်းၵၢင်ၼႂ် 10 မူင်းၶိုင်ႈ တဝ်ႈၵႅတ်ႉသ်တႅၵ်ႇ ႁဵတ်းႁႂ်ႈ ၾႆးမႆႈႁိူၼ်းလင်ၼိုင်ႈ ဢၼ်မီးၼိူဝ်သဵၼ်ႈတၢင်း ၼိၼ်းသီႇ ပွၵ်ႉပျီႇတေႃႇတႃႇ (ပြည်တော်သာ) ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ။
ၵူၼ်းႁူႉႁၼ်ၸွမ်းလၢတ်ႈၽူႈတွႆႇႁွၵ်ႈဝႃႈ -“ဢၼ်ၾႆးမႆႈၼႆႉပဵၼ်ႁိူၼ်းပိုတ်ႇႁၢၼ်ႉ မႄးရူတ်ႉ-ရူတ်ႉၶိူင်ႈဢေႃႈ ၊ ၸဝ်ႈႁိူၼ်းၼႆႉ ၾႆးႁုပ်ႇၺႃးတီႈၶႅၼ်လႄႈမၢတ်ႇၸဵပ်းၵႂႃႇ ၊ ၵူၼ်းႁိမ်းႁွမ်းလႄႈ ၸုမ်းၶႄႇၾႆးမႃးၸွႆႈဢေႃႈ ဢၼ်မၢတ်ႇၸဵပ်းႁၢဝ်ႈႁႅင်းတႄႉဢမ်ႇမီး”- ဝႃႈၼႆ ။
မီးလွင်ႈလူႉသုမ်းၵႂႃႇၵႃႈႁိုဝ်ဢၼ်ဝႃႈၼၼ်ႉတႄႉ ယူႇတီႈၸုမ်းႁဝ်းၶႃႈ တိုၵ်ႉသိုပ်ႇတွင်ႈထၢမ် ႁူဝ်ယွႆႈမၼ်းဝႆႉယူႇ ။
မိူၼ်ၼႆၼင်ႇၵဝ်ႇ ၶမ်ႈဝႃး 26/03/2026 ယၢမ်းၵၢင်ၶိုၼ်းမွၵ်ႈ 11 မူင်းၼင်ႇၵဝ်ႇၾႆးမႆႈ ၵၢတ်ႇမိူင်းၶိူဝ်း ဝဵင်းသီႇပေႃႉ။ ၵူၼ်းပိုၼ်ႉတီႈလၢတ်ႈဝႃႈ ၼၼ်ႉတႄႉ ပဵၼ်ယွၼ်ႉသၢႆၾႆးၾႃႉသျွတ်ႉသေ ၾႆးတႄႇမႆႈ၊ ၾႆးမႆႈႁွင်ႈတၢင်းၶၢႆ လူႉသုမ်းၵႂႃႇမွၵ်ႈ 10 ႁၢၼ်ႉ ဝႃႈၼႆ။
ဝၼ်းၼၼ်ႉယၢမ်းၵၢင်ၶမ်ႈ 8 မူင်းပၢႆၵေႃႈ ပဵၼ်လွင်ႈၾႆးမႆႈထႅင်ႈ တီႈဝႆႉၶူဝ်းၶွင် Chemical ႁိမ်းႁူင်းယႃလူင်ယၢၼ်ႇၵိၼ်း ဝဵင်းလူင်တႃႈၵုင်ႈ၊ ၽွင်းမိူဝ်ႈ ၸုမ်းၶႄၾႆး ၵႂႃႇၶႄၾႆးၸွႆႈ ၼၼ်ႉ လုၵ်ႈၸုမ်း 3 ၵေႃႉ ၵႅၼ်ႉၵႂၼ်းထူၺ်ႈၸႂ်ၵပ်ႉလႄႈ လႆႈသူင်ႇယူတ်းယႃတူဝ်ဝႆႉ တီႈႁူင်းယႃ ဝႃႈၼႆ။
မိူၼ်ၼႆ မိူဝ်ႈဝႃးၵၢင်ၼႂ် မွၵ်ႈ 9 မူင်းၶိုင်ႈသမ်ႉ ၾႆးမႆႈႁိူၼ်းၶၢႆၼမ်ႉမၼ်းၸၢၵ်ႈ တီႈၸႄႈဝဵင်း မႁႃႇဢွင်ႇမျေႇ ဝဵင်းလိူဝ်ႇ၊ ဢွၼ်ႇၸၢႆး ဢႃယု 17 ပီ တၢႆၵိုၵ်းၾႆး၊ ၵေႃႉပဵၼ်မႄႈဢွၼ်ႇၸၢႆးသမ်ႉ ၺႃးၾႆးႁုပ်ႇမၢတ်ႇၸဵပ်း။
ယၢမ်းလဵဝ် ၾိင်ႈၾႃႉၵိုင်ႉၵၢင်ႉႁွၼ်ႉမႆႈႁႅင်းမႃးတိၵ်းတိၵ်းလႄႈ ထုၵ်ႇလီဢွၼ်ၵၼ်ၾၢင်ႉၽေးၽိုၼ်းၽေးၾႆး။
တႃႇႁႂ်ႈၾႆးယႃႇမႆႈငၢႆႈၼၼ်ႉ ႁႂ်ႈၽဵဝ်ႈယုမ်းယွမ်ႇလႄႈယုၵ်းယၢၵ်း ၼႂ်းႁိူၼ်းလႄႈၸွမ်းႁိမ်းႁွမ်းႁိူၼ်းၸဝ်ႈၵဝ်ႇ မူတ်းမူတ်းသႂ်သႂ် ၊ ႁႂ်ႈဝႆႉပုင်းၶႄၾႆး လႄႈ ၶိူင်ႈယိပ်းတႃႇၶႄၾႆး တီႈဢၼ်ဢဝ်လႆႈငၢႆႈငၢႆႈမၼ်း။ ယႃႇၵဵပ်းဝႆႉ ၼမ်ႉမၼ်းၸၢၵ်ႈ ဢၼ်တေၸၢင်ႈပဵၼ်ၸိူဝ်ႉၾႆးလႆႈငၢႆႈ။ ပေႃးမီးၼမ်ႉမၼ်း လႄႈမေႃႈၵႅတ်ႉသ်ၸိုင်ယႃႇလႃႈလီတႆႈၾႆးတဵၼ်းဝႆႉႁိမ်းၸမ်။ ယႃႇၵႂႃႇလုတ်ႇလႅၼ်းယႃႈႁိမ်းၸမ်။
ၼင်ႇႁိုဝ်တေလွတ်ႈၽေးၼၼ်ႉ သင်တေဢွၵ်ႇႁိူၼ်းၵႂႃႇတၢင်းၼွၵ်ႈၼႆၸိုင် ထုၵ်ႇလီမွတ်ႇ မုၵ်ႉၾႆး၊ ၾႆးတဵၼ်း ပိၵ်ႉဝႆႉ ၾႆးၾႃႉတင်း ၾႆးသႅင်လႅတ်ႇ ၵူႈဢၼ်ဢၼ်၊ ထွၼ်သၢႆထႅမ်ႁႅင်းၾူၼ်ႊ ထႅမ်ႁႅင်းပႅတ်ႊထရီႊၵူႈဢၼ်ဢၼ်၊ မေႃႈၾႆးၷႅတ်ႉသ် ၸိူဝ်းၼႆႉၸႂ်ႉယဝ်ႉႁႂ်ႈၶိုၼ်းပိၵ်ႉဝႆႉ လီလီငၢမ်းငၢမ်းယဝ်ႉၸင်ႇဢွၵ်ႇႁိူၼ်း ၼႆၸဝ်ႈႁၢၼ်ႉ ၶၢႆၵုၼ်ႇ တိုၵ်းသူၼ်း လၢတ်ႈပႃးၼင်ႇၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ