(တွင်ႈထၢမ် – ၶုၼ်ႇဢူၵ်ႉၵႃႇ ၼႃႇယၵ PNLO)

ၵၢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉၸိုင်ႈမိူင်း NCA ၶွပ်ႈတဵမ် 10 ပီၼႂ်းဝၼ်းတီႈ 15/10/2025 ။ ၵူၼ်းၵၢၼ်မိူင်းၵၢၼ်သိုၵ်းလႄႈ လုမ်ႈၾႃႉလၢႆၸိုင်ႈမိူင်းတႄႉလၢတ်ႈဝႃႈ NCA  လူႉၵွႆၸဵမ်မိူဝ်ႈ သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းပုၼ်ႉယဝ်ႉ ဝႃႈၼႆသေတႃႉ တၢမ်တူဝ်သိုၵ်းမၢၼ်ႈတႄႉတိုၵ်ႉဢဝ် NCA ႁဵတ်းၼႃႈတိူဝ်ႈၶၢႆၵိၼ်တေႃႇလုမ်ႈၾႃႉယူႇတေႃႇထိုင်ယၢမ်းလဵဝ်။ ပၢင်ပွႆး NCA ၶွပ်ႈတဵမ် 10 ပီၼႂ်းဝၼ်းမိူဝ်ႈၼႆႉၵေႃႈ တူဝ်တႅၼ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7  ၸုမ်းၵႂႃႇၶဝ်ႈႁူမ်ႈတီႈၼေႇပျီႇတေႃႇ။ လွင်ႈႁၢင်ႈႁႅၼ်းၵၢၼ်ၸတ်းပၢင်ၵႅဝ်ႈ၊ လွင်ႈၸုမ်းၸိူဝ်းတေၶဝ်ႈႁူမ်ႈ ႁၢင်ႈႁႅၼ်းၸိူင်ႉႁိုဝ်ၼႆၼၼ်ႉ ၼၢင်းၽူၺ်းၼုမ်ႇၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ် ၶုၼ်ႇဢူၵ်ႉၵႃႇ ၼႃႇယၵ PNLO ဝႆႉၼင်ႇၼႆ။

ထၢမ်။        ။ ပၢင်ပွႆးၶွပ်ႈၶူပ်ႇ NCA ဢၼ်တေၸတ်းႁဵတ်းတီႈ ဝဵင်းလူင်ၼေႇပျီႇတေႃႇၼၼ်ႉ ၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်း လူင်းလၢႆးမိုဝ်း ၵိုတ်းတိုၵ်းဝႆႉ 7 ၸုမ်း ၽႂ်ၵႂႃႇၶႃႈ။

တွပ်ႇ။       ။ တေၵႂႃႇတင်း 7 ၸုမ်းယူႇ။ ၵူၺ်းၽူႈဢွၼ်ႁူဝ်ၸုမ်းလႂ် တူဝ်တႅၼ်းၵေႃႉလႂ် ၸၼ်ႉလႂ် ၽႂ်တေၵႂႃႇၼႆၼၼ်ႉတႄႉ ပႆႇလႆႈႁူႉ ၸွမ်းႁူဝ်ယွႆႈတႅတ်ႈတေႃး။ မၢင်ၸုမ်းတႄႉၵေႃႈလၢတ်ႈယဝ်ႉ။ ၶွင်ႇသီႇဢဝ်ၶိုၼ်းၸိုင်ႈတႆးတႄႉ ၶဝ်ပႆႇလၢတ်ႈ။ ပႃႇတီႇမိူင်းမွၼ်းမႂ်ႇတႄႉ ဢွင်ႇၼၢႆႇမငႄး တေၵႂႃႇၶိုၼ်ႈ။ ၾၢႆႇၸုမ်းယၢင်းၽိူၵ်ႇသမ်ႉ ၵႅမ်ႁူဝ်ပဝ်ႈ တွၵ်ႇတႃႇၼေႃႇၵပေႃႇထူး လႄႈ လုၵ်ႈၸုမ်း တေၵႂႃႇၶဝ်ႈႁူမ်ႈၸွမ်း။ ၼိုင်ႈၸုမ်းၼႆႉ ၶဝ်ပၼ်သုၼ်ႇလႆႈၵႂႃႇၶိုၼ်ႈၸွမ်း 5 ၵေႃႉ။

DKBA တႄႉ တၢမ်တူဝ် ၽူႈၵွၼ်းသိုၵ်းသုင်သုတ်း ၸွမ်သိုၵ်းလူင် ၸေႃးသၵီး ဢမ်ႇၼၼ် ၵႅမ်ၸွမ်သိုၵ်းလူင် ၸေႃးသူၺ်ႇဝ ၼႂ်းသွင် ၵေႃႉၼႆႉ သေၵေႃႉၵေႃႉတေၵႂႃႇၶဝ်ႈႁူမ်ႈၸွမ်း။ ၾၢႆႇၸုမ်းပဢူဝ်း PNLO ႁဝ်းၶႃႈတႄႉၵေႃႈ ၵဝ်ၶႃႈ တင်း တေႃႇယိၼ်ႇယိၼ်ႇၸူဝ်း တေၶဝ်ႈႁူမ်ႈ။ ရၶႅင်ႇသမ်ႉ တေႃႇၸေႃးမျႃႉရႃႇၸႃႇလိၼ်း  ၵႂႃႇၶဝ်ႈႁူမ်ႈ။  

ထၢမ်။        ။ ပၢင်ပွႆးၶွပ်ႈၶူပ်ႇ 10 ပီတဵမ် NCA ၼႆႉ  ၸတ်းပဵၼ်ၾၢင်ႁၢင်ႈၸိူင်ႉႁိုဝ်ၽွင်ႈၶႃႈ။

တွပ်ႇ။       ။ ၸွမ်းၼင်ႇ ၼႂ်းလိၵ်ႈမွၵ်ႇၶဝ်လၢတ်ႈဝႆႉၼၼ်ႉတႄႉ တေၸတ်းၵႂႃႇ ႁႂ်ႈၵိုင်ႇငမ်ႇၵၼ်တင်း ၵုင်ႇသိၵ်ႈၶႃႇ ၵၢၼ်မိူင်းၼႆယူႇ။ လမ်ႇလွင်ႈသုတ်းတႄႉ ၵဵဝ်ႇလူၺ်ႈၶၵ်ႉၵၢၼ်ငမ်းယဵၼ်ၼၼ်ႉၼႃႇ။ တေၶိုၼ်းထတ်းသၢင်ၵၼ်ဝႃႈ ၼႂ်းၶၢဝ်းတၢင်း 10 ပီၼႆႉ ၶၵ်ႉၵၢၼ် ငမ်းယဵၼ်ထိုင်ၸၼ်ႉလႂ်ယဝ်ႉ ၸွင်ႇထိုင်တီႈထိုင်တၢင်းၼႄႇၸဵမ်ၸိူဝ်းၼႆႉ။ လွင်ႈၼႆႉတႄႉ လႆႈဝႃႈပဵၼ်ၶၵ်ႉၵၢၼ်ဢၼ်လမ်ႇလွင်ႈ ပိူင်ၼိုင်ႈ။

ထၢမ်။        ။ လူင်းလၢႆးမိုဝ်းၵိုတ်းတိုၵ်းၵၼ်တင်းသိုၵ်းမၢၼ်ႈၼႆႉ တဵမ်ၵႂႃႇ 10 ပီယဝ်ႉလႄႈ ၶၵ်ႉၵၢၼ်ငၢၼ်း NCA ၼႆႉ ၸွင်ႇဝူၼ်ႉဝႃႈ မီးလွင်ႈဢွင်ႇမၢၼ်၊ ၶၵ်ႉၵၢၼ်ႁဵတ်းၸွမ်းၵၼ်မႃးၼႆႉ ထိုင်ၶၵ်ႉတွၼ်ႈလႂ်ယဝ်ႉၶႃႈ။

တွပ်ႇ။       ။ ပေႃးဢၢၼ်ႇတူၺ်း လိၵ်ႈၵိၼ်ႇၵႅၼ်ႇဢၼ်တူၵ်းလူင်းၵၼ်ဝႆႉၸၼ်ႉမိူင်းႁူမ်ႈတုမ်ၼၼ်ႉၸိုင် ပေႃးလူင်းလၢႆးမိုဝ်းၵိုတ်းတိုၵ်း ယဝ်ႉ မၼ်းတေဢမ်ႇလႆႈၵိုတ်းယူႇၸိူင်ႉၼႆ။ ၼႂ်းၶၵ်ႉၵၢၼ်ဝၢင်းၽႅၼ်ၵူႈၸၼ်ႉၸၼ်ႉၼႆႉ မီးပႃးဝႆႉဝႃႈ တေလႆႈၸတ်းႁဵတ်း ပၢင်ဢုပ်ႇ ဢူဝ်းၶၵ်ႉၵၢၼ်မိူင်းၵႂႃႇ ၸၼ်ႉလႂ်ၸၼ်ႉၼၼ်ႉၼႆယူႇ။ တေလႆႈၸတ်းၵႂႃႇ သၢမ်ၸၼ်ႉ သၢမ်သႅၼ်း။

ထၢမ်။        ။ လူင်းလၢႆးမိုဝ်း NCA ၸွမ်းၵၼ်တင်း သိုၵ်းမၢၼ်ႈမႃးတဵမ် 10 ပီယဝ်ႉလႄႈ လိၵ်ႈၵိၼ်ႇၵႅၼ်ႇၵိုတ်းပၢင်တိုၵ်းၵၼ်ၼႆႉ ၸွင်ႇမၼ်းမီးၽွၼ်းလီလႄႈ ထိုင်တီႈထိုင်တၢင်းယူႇၶႃႈႁႃႉ။ ႁၼ်ထိုင်ၸိူင်ႉႁိုဝ်ၽွင်ႈၶႃႈ။

တွပ်ႇ။       ။ ႁဝ်းၶႃႈတႄႉႁၼ်ဝႃႈ မၼ်းမီးၽွၼ်းလီယူႇ။ ၼႂ်းၶၢဝ်းတၢင်း 10 ပီပၢႆပၢႆၼႆႉ လႆႈဝႃႈ လွင်ႈၵတ်းယဵၼ် ၼိမ်တဵင်ႈမႃးတၢၼ်ႇတၢၼ်ႇမၼ်းယူႇ။

တူဝ်ယၢင်ႇ- မိူၼ်ၼင်ႇ တၢင်းမိူင်းယၢင်းၽိူၵ်ႇၼႆႉ ဝၢႆးလင်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်းယဝ်ႉ ၶဝ်တႄႇႁဵတ်းသၢင်ႈ ၶူင်းၵၢၼ် သဵၼ်ႈတၢင်း Asia ႁႄ ၵူၼ်းမိူင်းႁဵတ်းၵၢၼ်ၵႃႉၶၢႆလႆႈ ၵတ်းၵတ်းယဵၼ်ယဵၼ်လႄႈ မီးလွင်ႈၶိုၼ်ႈယႂ်ႇမႃးတေႉတေႉ။

ဝၢႆးလင် ပီ 2021 ငဝ်းလၢႆးဝၢၼ်ႈမိူင်း ဢမ်ႇၼိမ်သဝ်းလႄႈ တင်းမူတ်းၼႆႉလႆႈယုင်ႈယၢင်ႈၵႂႃႇသဵင်ႈသေ လႆႈၵိုတ်းယင်ႉၼႃႈၵၢၼ်ပႅတ်ႈ တင်းသဵင်ႈ။ ဢၼ်ၵူၼ်းမိူင်းလႆႈယူႇၵတ်းယဵၼ်ယူႇ မိူဝ်ႈပူၼ်ႉမႃးၼၼ်ႉၵေႃႈ ပဵၼ်ၽွၼ်းယွၼ်ႈၶွင် NCA ယဝ်ႉ။

ထၢမ်။        ။ ပၢင်ပွႆးၶွပ်ႈတဵမ် NCA 10 ပီၼႆႉ ၾၢႆႇသိုၵ်းမၢၼ်ႈ တေပဵၼ်ၽႂ်ဢွၼ်ၼမ်းသေ ၶဝ်ႈႁူမ်ႈ။

တွပ်ႇ။       ။ ပၢင်ပွႆးၼႆႉ တေမီးယူႇသွင်တွၼ်ႈ။ တွၼ်ႈၼိုင်ႈ ပဵၼ် Workshop  လႄႈ ထႅင်ႈတွၼ်ႈၼိုင်ႈပဵၼ်ၶၵ်ႉတွၼ်ႈပိုတ်ႇပၢင်ပွႆး။ ဝၼ်းတီႈ 15 လိူၼ်ဢွၵ်ႇထူဝ်ႊပိူဝ်ႊ ယၢမ်းၵၢင်ၼႂ် 9 မူင်းတေႃႇ 12 မူင်းၼႆႉ ပဵၼ်ၶၵ်ႉတွၼ်ႈပိုတ်ႇပၢင်ပွႆး။ တီႈၶၵ်ႉတွၼ်ႈၼႆႉ တေမီးၽူႈၼမ်းၸိုင်ႈမိူင်း မႃးမွၵ်ႇလၢတ်ႈၶေႃႈၵႂၢမ်းပိုတ်ႇပၢင်ပၼ်။ တီႈပၢင်ပွႆးပိုတ်ႇပၢင်ၼႆႉ တေမီးၵူၼ်း 7 ၵေႃႉ မွၵ်ႇလၢတ်ႈၶေႃႈၵႂၢမ်း။ တွၼ်ႈဝၢႆးဝၼ်းသမ်ႉ တႄႇယၢမ်း 2 မူင်းၶိုင်ႈ တေတႄႇ Workshop ၶၵ်ႉၵၢၼ်ငမ်းယဵၼ်ၵႂႃႇ တေႃႇထိုင် ဝၼ်းတီႈ 17 ။ ၶႅၵ်ႇၵူၼ်းမိူင်းၼွၵ်ႈ ၽူႈမီးပိုၼ်ႉႁူႉပၢႆးႁၼ်ၶဝ်ၵေႃႈတေပႃးၵမ်ႈၽွင်ႈ။

ၵူၺ်းၵႃႈ တူဝ်တႅၼ်းၸိုင်ႈမိူင်းၼွၵ်ႈၶဝ်ၼႆႉ တေမႃးၶဝ်ႈႁူမ်ႈၸွမ်းလၢႆၵေႃႉတႄႉ ပႆႇလႆႈႁူႉ။ ၸွင်ႇၶဝ်သမ်ႉ တေမႃးပဵၼ်သၢၵ်ႈသေႇ လၵ်းထၢၼ် ၼႂ်းၵၢၼ်လူင်းလၢႆးမိုဝ်းNCAထႅင်ႈၼႆတႄႉၵေႃႈ ဢမ်ႇပႆႇၸၢင်ႈမၵ်းမၼ်ႈလႆႈ။

ထၢမ်။        ။ ယိူင်းဢၢၼ်းလူင်သုင်သုတ်း ဢၼ် 7 EAO မုင်ႈမွင်းၼိူဝ် NCA ၼႆႉ ပဵၼ်သင်ၶႃႈ။

တွပ်ႇ။       ။ ႁဝ်းၶႃႈတႄႉဢမ်ႇယိူင်းဢၢၼ်းႁႂ်ႈ ၼႂ်းပိုၼ်ႉတီႈၸဝ်ႈၵဝ်ႇ မီးလွင်ႈၵတ်းယဵၼ်ၼိမ်တဵင်ႈၵွႆး ၼင်ႇႁိုဝ် မိူင်းႁူမ်ႈတုမ်ပတ်း ပိုၼ်ႉ တေသူၸူးလႆႈ လွင်ႈငမ်းယဵၼ်ၼၼ်ႉ NCA  ၼႆႉ ပဵၼ်ပိုၼ်ႉတီႈဢၼ်ၸၢင်ႈတေပိုင်ႈဢိင်လႆႈ ပိူင်ၼိုင်ႈ။ လုၵ်ႉတီႈၼႆႉသေ တေမီးမႃး ပၢင်ဢုပ်ႇဢူဝ်းၵၢၼ်မိူင်း၊ ပၢင်ဢုပ်ႇဢူဝ်းတႃႇႁဵတ်းသၢင်ႈလွင်ႈၵၢၼ်ၵိုတ်းတိုၵ်းသေ ၸၢင်ႈလႆႈမႃးၶေႃႈတူၵ်းလူင်းၵၢၼ်ၵိုတ်း တိုၵ်း ပတ်းပိုၼ်ႉမိူင်းႁူမ်ႈတုမ်။

ယွၼ်ႉၼၼ် ပေႃးယၢင်ႈပႆၵႂႃႇၼိူဝ်သဵၼ်ႈတၢင်းၼႆႉလႆႈၵွၼ်ႇ တေၸၢင်ႈၸႂ်ႉတိုဝ်းမၼ်းလႆႈ။ NCA ၼႆႉ ႁဝ်းဢမ်ႇၸၢင်ႈပၢၵ်ႈပၢႆႇမၼ်း ပႅတ်ႈ။ ပေႃးဢဝ် NCA ပႅတ်ႈၵေႃႈ တၢင်းမုင်ႈမွင်း တႃႇႁဵတ်းလႆႈလွင်ႈငမ်းယဵၼ်ၼႆႉ ဢမ်ႇမီးသေဢိတ်းယဝ်ႉ။ ႁႃသဵၼ်ႈတၢင်းယင်း ဢမ်ႇၸၢင်ႈႁၼ်ၵွၼ်ႇယဝ်ႉ။ ယၢမ်းလဵဝ် ၵွပ်ႈမီး NCA ၼႆႉယူႇလႄႈ ႁဝ်းၶႃႈၸၢင်ႈမုင်ႈမွင်းလႆႈဝႃႈ ဝၼ်းၼိုင်ႈတေဢဝ်လွင်ႈငမ်းယဵၼ် ၵၼ်ၶိုၼ်းလႆႈယူႇၼႆယဝ်ႉၶႃႈ။

ထၢမ်။        ။ ၼႂ်းၶၢဝ်းတၢင်း 10 ပီၼႆႉ ႁဵတ်းလွင်ႈငမ်းယဵၼ်လႆႈ ထိုင်ၶၵ်ႉတွၼ်ႈလႂ်ၽွင်ႈၶႃႈ။

တွပ်ႇ။       ။ လိၵ်ႈၵိၼ်ႇၵႅၼ်ႇ လူင်းလၢႆးမိုဝ်းၵိုတ်းတိုၵ်းၼႆႉ ၽွမ်ႉၸႂ်လူင်းလၢႆးမိုဝ်းၵႂႃႇယဝ်ႉၵေႃႈ တေၵိုတ်းယင်ႉဝႆႉၸိူင်ႉၼႆလၢႆလၢႆၼႆ ပေႃးလူဢၢၼ်ႇ လဵပ်ႈႁဵၼ်းတူၺ်းၽိုၼ်လိၵ်ႈၵိၼ်ၵႅၼ်ႇၼၼ်ႉတႄႉ တေႁူႉလီယူႇ။ ၼႂ်းၼၼ်ႉပႃးဝႆႉၽႅၼ်ၵၢၼ် တႃႇပၢင်ဢုပ်ႇဢူဝ်း ၵၢၼ်မိူင်းပဵၼ်ၶၵ်ႉပဵၼ်တွၼ်ႈ။ တီႈၼၼ်ႈၼၼ်ႉ မီးယူႇသၢမ်ၶၵ်ႉတွၼ်ႈ။ တေဢဝ် လၵ်းၼမ်းၶိူဝ်းၵူၼ်းဝႃႈႁိုဝ်၊ ပိုၼ်ႉတီႈ၊ ဢမ်ႇၼၼ် လွင်ႈတၢင်းဢၼ်လႂ်ဢၼ်ၼၼ်ႉ ဝႃႈႁိုဝ်ၼႆ မီးၸိူင်ႉၼႆယူႇ။

လိုၼ်းသုတ်းတႄႉၵေႃႈ တေလႆႈႁဵတ်းသၢင်ႈၽေႃႇၼမ်ႉၼႄတူဝ် ပၢင်ၵုမ်လူင်ၺီႇလႃႇၶၢမ်ႇ ၵၢၼ်ငမ်းယဵၼ်မိူင်းႁူမ်ႈတုမ်။ ပေႃးၼၼ်ႉ ယဝ်ႉၸင်ႇ တေလႆႈမႃး လိၵ်ႈၵိၼ်ႇၵႅၼ်ႇ ၶၵ်ႉတွၼ်ႈမိူင်းႁူမ်ႈတုမ် တွၼ်ႈ 1၊ 2၊ 3 ၼႆယူႇ။ ၼႆႉလႆႈဝႃႈ ပဵၼ်ၵၢၼ်ဢွင်ႇမၢၼ်တေႉတေႉ။

ၵူၺ်ၵႃႈ ဝၢႆးလင် ပီ 2021 မႃး ယွၼ်ႉငဝ်းလၢႆးၵၢၼ်ဝၢၼ်ႈၵၢၼ်မိူင်းလႅၵ်ႈလၢႆႈသေ ၶၵ်ႉၵၢၼ်ၸိူဝ်းၼႆႉၵေႃႈ လႆႈၵိုတ်းၵႂႃႇတင်းသဵင်ႈ။ ယွၼ်ႉၼၼ် ပၢင်လိူၵ်ႈတင်ႈ ပီ 2025 ၼႆႉၵေႃႈ ပဵၼ်သဵၼ်ႈတၢင်းဢၼ်တေၸၢင်ႈႁဵတ်းႁႂ်ႈ ဝၢၼ်ႈမိူင်းမီးလွင်ႈလႅၵ်ႈလၢႆႈထႅင်ႈလၢႆး တၢင်းၼိုင်ႈ။ ပေႃးၸတ်းပၢင်လိူၵ်ႈတင်ႈယဝ်ႉတူဝ်ႈလီငၢမ်းယဝ်ႉ တေမီးမႃး ပၢင်ဢုပ်ႇဢူဝ်း ဢၼ်ယၼ်ငဝ်ႈၶၢမ်ႇပိုၼ်ႉ NCA ၼၼ်ႉ ထႅင်ႈၵမ်းၼိုင်ႈယူႇၼႆ ႁဝ်းၶႃႈတႄႉယုမ်ႇယမ်ၸိူင်ႉၼႆ။

ထၢမ်။        ။ ၸုမ်းယိပ်းၵွင်ႈၵၢင်ႇၸိူဝ်းလုၵ်ႉၽိုၼ်ႉသိုၵ်းမၢၼ်ႈယိုတ်းမိူင်းတႄႉ ဢွၼ်ၵၼ်လၢတ်ႈဝႃႈ သိုၵ်းမၢၼ်ႈၼႆႉ မၼ်းယႃႉၶိုၼ်း ၾိင်ႈမိူင်း 2008 ဢၼ်မၼ်းၶဵၼ်ႇတႅမ်ႈဝႆႉၼၼ်ႉႁႄ ႁဵတ်းလွင်ႈပူၼ်ႉပႅၼ် ၶႃႈႁႅမ်ၵူၼ်းမိူင်းတၢႆယူႇၵူႈမိုဝ်ႉဝၼ်းၼႆႉ မိူၼ်ၵၼ်တင်း သိုၵ်းမၢၼ်ႈယႃႉပူၼ်ႉပႅၼ် ၶေႃႈၵိၼ်ၵႅၼ်ႇ NCA ၵွႆး။ ယွၼ်ႉၼၼ် ၸင်ႇဢွၼ်ၵၼ်ဝႃႈ လိၵ်ႈၵိၼ်ႇၵႅၼ်ႇလူင်းလၢႆးမိုဝ်းၵိုတ်းတိုၵ်းၼႆႉ လူႉယဝ်ႉ။ လွင်ႈၼႆႉ ႁၼ်ထိုင်ၸိူင်ႉႁိုဝ်ၽွင်ႈၶႃႈ။

တွပ်ႇ။       ။ ႁဝ်းတႄႉႁၼ်ထိုင်ဝႃႈ ၶဝ်ဢမ်ႇပွင်ႇၸႂ်ၼိူဝ် ၾိင်းမိူင်းလႄႈ လၢတ်ႈၵွႆး။ တႃႇပဵၼ်မႃးလႆႈ လိၵ်ႈၵိၼ်ႇၵႅၼ်ႇ NCA ၼႆႉ လႆႈလူင်းလၢႆးမိုဝ်းၽွမ်ႉၵၼ် သၢမ်ၾၢႆႇ။ ၽူႈမီးပုၼ်ႈၽွၼ်းၾၢႆႇလူင်ပွင်ၸိုင်ႈ ဢၼ်ပဵၼ်ၸွမ်ၸိုင်ႈ လႄႈ ႁူဝ်ပဝ်ႈလုမ်းသၽႃး သွင်ၵေႃႉ လႆႈလူင်းလၢႆးမိုဝ်း။ ၾၢႆႇတပ်ႉသိုၵ်းမၢၼ်ႈသမ်ႉ ပဵၼ်ၸွမ်ၸိၵ်းသိုၵ်းမၢၼ်ႈ လႄႈ ၵႅမ်ၸွမ်ပွင်ၵၢၼ်သိုၵ်း။

တူဝ်တႅၼ်းၾၢႆႇၸုမ်းယိပ်းၵွင်ႈၵၢင်ႇၸၢဝ်းၶိူဝ်းသမ်ႉ ပဵၼ်ၸၼ်ႉႁူဝ်ပဝ်ႈ၊ ၽူႈၼမ်းၼႂ်း၊ ၽူႈပွင်ၵၢၼ်သိုၵ်း ၸိူဝ်းၼႆႉလူင်းလၢႆးမိုဝ်း။ ယွၼ်ႉၼၼ် ၽိုၼ်လိၵ်ႈၵိၼ်ၵႅၼ်ႇ ၵိုတ်းတိုၵ်းၼႆႉ ဢမ်ႇၸႂ်ႈဝႃႈပဵၼ်မႃးလႆႈ ႁိပ်ႈႁိပ်ႈၼႅတ်ႈၼႅတ်ႈ။ လုမ်းသၽႃးၵေႃႈ တေလႆႈမၵ်း မၼ်ႈပၼ်ပႃး။ ၵွပ်ႈၼၼ်ပဵၼ်ၵႂႃႇ ၽိုၼ်လိၵ်ႈၵိၼ်ၵႅၼ်ႇဢၼ်မႅၼ်ႈၸွမ်းၾိင်ႈမိူင်းၼၼ်ႉယဝ်ႉ။

ၸႂ်ႈယူႇ ၵူႈမူႇၸုမ်း ဢွၼ်ၵၼ်ႁဵတ်းပူၼ်ႉပႅၼ် ယႃႉလူႉ ၽိုၼ်လိၵ်ႈၵိၼ်ၵႅၼ်ႇ ဢၼ်မႅၼ်ႈၸွမ်းၾိင်ႈမိူင်းၼၼ်ႉၼႆ။ ၸုမ်းၸိူဝ်းလူင်း လၢႆးမိုဝ်း NCA ဝႆႉ မိူၼ်ၼင်ႇ တပ်ႉသိုၵ်းမၢၼ်ႈ လႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵမ်ႈၽွင်ႈ ဢွၼ်ၵၼ်ယႃႉလူႉလိၵ်ႈၵိၼ်ၵႅၼ်ႇ။ ၵမ်ႈၽွင်ႈၵေႃႈ လၢတ်ႈဝႃႈ NCAၼႆႉ ၵွႆယဝ်ႉဢမ်ႇမီးယဝ်ႉၼႆႁႄ ၽၢတ်ႇဢွၵ်ႇၼႂ်းၸုမ်းဢၼ်လူင်းလၢႆးမိုဝ်းၵိုတ်းတိုၵ်းၼႆႉ ၵႂႃႇ။ ဢၼ်ၶဝ်ၽၢတ်ႇဢွၵ်ႇၵႂႃႇၼႆႉၵေႃႈ တၢမ်တူဝ်ၶဝ် ပေႃးယႃႉလူႉပူၼ်ႉပႅၼ်လိၵ်ႈၵိၼ်ႇၵႅၼ်ႇယူႇယဝ်ႉ။

ၵူၺ်းၵႃႈ NCAၼႆႉ မုၵ်ႉၼိုင်ႈၸုမ်းလဵဝ် ၵေႃႉလႂ်ၵေႃႉၼၼ်ႉ ယႃႉလႄႈ မၼ်းဢမ်ႇလူႉဢမ်ႇယၢႆႈသင်ၵႂႃႇ။ ၵွပ်ႈဝႃႈ ပဵၼ်ၽိုၼ် လိၵ်ႈၵိၼ်ၵႅၼ်ႇဢၼ်ထုၵ်ႇမႅၼ်ႈၸွမ်းၾိင်ႈမိူင်းၼၼ်ႉယဝ်ႉ။ ယွၼ်ႉၵၢၼ်ပူၼ်ႉပႅၼ် ၶေႃႈတူၵ်းလူင်းNCAသေ ၽိုၼ်လိၵ်ႈ ၶေႃႈတူၵ်းလူင်းၵၼ်ဝႆႉၼၼ်ႉတႄႉ ဢမ်ႇလူႉၵွႆသင်ၵႂႃႇ။ ယင်းတိုၵ်ႉမိူၼ်ၵဝ်ႇယူႇ။

ထၢမ်။        ။ ၼႂ်းပၢင်ပွႆးၶွပ်ႈၶူပ်ႇ 10 ပီတဵမ်NCAၼႆႉ ၸွင်ႇတေမီးလွင်ႈလၢၵ်ႇလၢႆးသင်မႃးၽွင်ႈၶႃႈ။

တွပ်ႇ။       ။ တေဢမ်ႇပေႃးမီးသင်ၶႃႈ။ ၼႂ်းပၢင်ႁူပ်ႉထူပ်းဢုပ်ႇဢူဝ်းၵၼ်ပွၵ်ႈၼႆႉ တေပႃး ၽူႈမီးပိုၼ်ႉႁူႉပၢႆးႁၼ် မိူင်းၼွၵ်ႈၶဝ် မႃးၶဝ်ႈႁူမ်ႈၸွမ်းတင်းၼမ်ယူႇ။ ၸိုင်ႈမိူင်းၸိူဝ်းႁဵတ်းပဵၼ် သၢၵ်ႈသေႇလၵ်းထၢၼ်ဝႆႉ မိူဝ်ႈလူင်းလၢႆးမိုဝ်းNCAၼၼ်ႉၵေႃႈ တေမႃးၶဝ်ႈႁူမ်ႈၸွမ်း။ တီႈၼႆႈ ႁဝ်းတေမီးၵၢၼ်တိူင်ႇပၢင်ႇၸွမ်း သၢၵ်ႈသေႇၸိူဝ်းၼၼ်ႉထႅင်ႈ။

တီႈပၢင်ၼႆႉ သင်ဝႃႈ မီးၸုမ်းယိပ်းၵွင်ႈၵၢင်ႇ 7 ၸုမ်းဢုပ်ႇၵၼ်ၵွႆးတႄႉ တေဢမ်ႇလႆႈလွင်ႈတၢင်းသင်တေႉတေႉ။ ယွၼ်ႉၼၼ်  ၸုမ်းသၢၵ်ႈသေႇလၵ်းထၢၼ်၊ ပႃႇတီႇၵၢၼ်မိူင်းၸိူဝ်းၼႆႉၵေႃႈ တေၸၢင်ႈမႃးၶဝ်ႈႁူမ်ႈလဵပ်ႈႁဵၼ်းၸွမ်း။ ၵွပ်ႈဝႃႈ ၼႂ်းပၢင်လိူၵ်ႈတင်ႈ ပွၵ်ႈၵမ်းၼႆႉ တေမီးၸုမ်းတင်းၼမ်ၶဝ်ႈႁူမ်ႈၸွမ်းယူႇ။ ပႃႇတီႇၵၢၼ်မိူင်းၸိူဝ်းတေလူင်းလိူၵ်ႈတင်ႈၼႆႉ တေလႆႈတမ်းဝၢင်းၼႄ မူႇဝႃႇတ ပိူင်ၵၢၼ်ၶဝ် ၼႄတီႈၵူၼ်းမိူင်း။ မိူဝ်ႈၼၼ်ႉ တေလႆႈတမ်းၼႄသႂ်ႇပႃးဝႃႈ ၼႂ်းမူႇဝႃႇတၶဝ် ပႃးဝႆႉၶၵ်ႉၵၢၼ်ငမ်းယဵၼ်ယူႇ။

ၶၵ်ႉၵၢၼ်ငမ်းယဵၼ်ၼႆႉ ၵွၼ်ႇပႆႇထိုင်ပၢင်လိူၵ်ႈတင်ႈ ပႃႇတီႇၵၢၼ်မိူင်းၶဝ် တေလႆႈမေႃထတ်းသၢင်ဢွၵ်ႇၼႄသေ ပေႃးဝၢႆးပၢင်လိူၵ်ႈ တင်ႈယဝ်ႉ ၵၢၼ်မိူင်းၸၢင်ႈတေလႅၵ်ႈလၢႆႈမႃးလႄႈ ထုၵ်ႇလီႁဵတ်းသၢင်ႈၶၵ်ႉၵၢၼ်ငမ်းယဵၼ်ၵႂႃႇယူႇ။ ပႃႇတီႇၵၢၼ်မိူင်းၼႆႉ တေမီးယူႇ 50 ၸုမ်းပၢႆ။ ၸိူဝ်းပဵၼ်ႁူဝ်ပဝ်ႈ ပႃႇတီႇၼႆႉ တေလႆႈတမ်းဝၢင်းၼႄမူႇဝႃႇတၶဝ်။

ၵွၼ်ႇပႆႇထိုင်ပၢင်လိူၵ်ႈတင်ႈ လႄႈ ပၢင်လိူၵ်ႈတင်ႈယဝ်ႉ ၶၵ်ႉၵၢၼ်ငမ်းယဵၼ်ၼႆႉ လႆႈႁၼ်သဵၼ်ႈတၢင်း တင်ႈတူဝ်မႃးၶိုၼ်းလႆႈဢိတ်းဢီႈ ယဝ်ႉၼင်ႇၵဝ်ႇ။

ထၢမ်။        ။ ၵဵဝ်ႇၵပ်းလူၺ်ႈ NCAၼႆႉသေ ၸွင်ႇမီးလွင်ႈသင်ၶႂ်ႈၽိူမ်ႉထႅမ်လၢတ်ႈၽွင်ႈၶႃႈ။

တွပ်ႇ။       ။ မၢႆ 1 ဢမ်ႇဢွၼ်ၵၼ်ဢၢၼ်ႇလိၵ်ႈၵိၼ်ႇၵႅၼ်ႇNCA လီလီ။ မၢႆ 2 ၵူၼ်းၸိူဝ်းဢၼ်လူင်းလၢႆးမိုဝ်း လိၵ်ႈၵိၼ်ႇၵႅၼ်ႇ ဝႆႉဝႃႈ တေႁဵတ်းသၢင်ႈၽေႃႇၼမ်ႉၼႄတူဝ် ၶေႃႈတူၵ်းလူင်း NCAၼၼ်ႉ လၢတ်ႈဝႃႈ NCA လူႉၵွႆယဝ်ႉၼႆသေ ၽၢတ်ႇဢွၵ်ႇၵႂႃႇ။ ၸိူဝ်းၶဝ် ဢွၵ်ႇၵႂႃႇၼႆႉ မိူၼ်ၵၼ်တင်း ယႃႉလူႉၵွႆ NCAၵွႆး။

ၼႂ်းNCAၼႆႉ ပၼ်ႁႃၵၢၼ်မိူင်း တေလႆႈဢဝ်လၢႆးတၢင်းၵၢၼ်မိူင်းၵႄႈလိတ်ႈၵွႆး။ တေဢမ်ႇၸႂ်ႉတိုဝ်း ဢဵၼ်ႁႅင်းၵႄႈလိတ်ႈ။ ၶေႃႈလိုၼ်းသုတ်းတႄႉ ပဵၼ်ၶေႃႈဢၼ်ဝႃႈ တေလႆႈၵႅတ်ႇၵင်ႈပၼ်ၵူၼ်းမိူင်းၼၼ်ႉယဝ်ႉ။ Citizen production ၼႆႉ မၼ်းလမ်ႇလွင်ႈတေႉတေႉ။ ဝၢႆးလင်လူင်းလၢႆးမိုဝ်းNCAယဝ်ႉ ၽႂ်ၵေႃႈ ဢမ်ႇႁဵတ်းၵၢၼ်ၵႅတ်ႇၵင်ႈပၼ်ၵူၼ်းမိူင်း။ ၼင်ႇႁိုဝ် တေႁဵတ်းၵၢၼ်ၵႅတ်ႇၵင်ႈပၼ်ၵူၼ်းမိူင်းလႆႈၼၼ်ႉ လိၵ်ႈၵိၼ်ၵႅၼ်ႇNCA ထုၵ်ႇလီသိုပ်ႇမီးၶီးၸႂ်ၵႂႃႇယူႇ။

ယွၼ်ႉၼၼ် NCAၼႆႉ တဵမ်ၵႂႃႇလၢႆ 10 ပီၵေႃႈ ဢမ်ႇထုၵ်ႇလီပွႆႇၽႃႈမၼ်းပႅတ်ႈ။ ဢမ်ႇထုၵ်ႇလီသၢင်းၽႅပ်ႉမၼ်း။ ၵွပ်ႈဝႃႈ ဢမ်ႇမီးၽႂ် ၵႅတ်ႇၵင်ႈပၼ် ၵူၼ်းမိူင်းၸိူဝ်းႁူပ်ႉလွင်ႈတုၵ်ႉယၢၵ်ႈ ယွၼ်ႉ ပၢင်တိုၵ်းသိုၵ်းသိူဝ်။ တႃႇၵႅတ်ႇၵင်ႈပၼ်ၵူၼ်းမိူင်း ၸိူဝ်းဢမ်ႇ မီးၶိူင်ႈၵွင်ႈၵၢင်ႇၼႆႉ မီးဝႆႉၼႂ်း လိၵ်ႈၵိၼ်ႇၵႅၼ်ႇ NCA။ ယွၼ်ႉၼၼ် တႃႇၵႅတ်ႇၵင်ႈပၼ်ၵူၼ်းမိူင်းၼႆႉ NCAၼႆႉ တိုၼ်းလူဝ်ႇမီးတေႉတေႉၼၼ်ႉယဝ်ႉ။

ထၢမ်။        ။ ၶွပ်ႈၸႂ်ယႂ်ႇၼမ်ၶႃႈ တီႈဝႆႉၶၢဝ်းယၢမ်းသေ တွပ်ႇပၼ်ၶႃႈဢေႃႈ။

တွပ်ႇ။       ။ ၶွပ်ႈၸႂ်မိူၼ်ၵၼ်ၶႃႈ။