မိူဝ်ႈၼႆႉ ဝၼ်းတီႈ 15/10/2025 ယၢမ်းၵၢင်ၼႂ် 8 မူင်းၶိုင်ႈ သိုၵ်းမၢၼ်ႈယိုတ်းမိူင်း ၸတ်းႁဵတ်း ပၢင်ပွႆးၶွပ်ႈၶူပ်ႇ 10 ပီတဵမ် NCA တီႈႁူင်းႁေႃ MICC-1 ၼႂ်းဝဵင်းလူင်ၼေႇပျီႇတေႃႇ တၢမ်တူဝ် ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ၶိုၼ်ႈႁွတ်ႈ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်သေ မီးပႃး ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းလူင်းလၢႆးမိုဝ်း NCA လႄႈ ၽွင်းတၢင်မိူင်းၼွၵ်ႈ လၢႆလၢႆၸိုင်ႈမိူင်း ၶဝ်ႈႁူမ်ႈၸွမ်း။

ၼႂ်းပၢင်ၵႅဝ်ႈပိုတ်ႇပၢင်ပွႆးၼၼ်ႉ လႆႈႁၼ် ၸေႃးမူႇတူးသေးၽူဝ်း ႁူဝ်ပဝ်ႈၵဝ်ႇ ၸုမ်းသိုၵ်းယၢင်း (KNU) ၊ ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း မၢႆ (1) ၶွင်ႇသီႇဢဝ်ၶိုၼ်းၸိုင်ႈတႆး (RCSS)၊ ၸွမ်သိုၵ်း ၸေႃးသူၺ်ႇဝ ၵႅမ်ၽူႈၵွၼ်းသိုၵ်း DKBA ၊ ၼေႃႇၵပေႃႇထူး ၵႅမ်ႁူဝ် ပဝ်ႈ KNU/KNLA – PC ၊ တေႃႇၸေႃးမျႃႉရႃႇၸႃႇလိၼ်း ႁူဝ်ပဝ်ႈ ALP ၊ ၸဝ်ႈသိုၵ်းလူင် ၶုၼ်ႇဢူၵ်ႉၵႃႇ ၼႃႇယၵ PNLO ၊ ၼၢႆႇဢွင်ႇ မိၼ်း ၸုမ်း NMSP-AD လႄႈ တူဝ်တႅၼ်းထႅင်ႈလၢႆလၢႆၵေႃႉ တၢင်ႇမူႇၸုမ်းၶဝ်ႈႁူမ်ႈပႃး။

ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ ဢၼ်ယုၵ်ႉယွင်ႈတူဝ်ၸဝ်ႈၵဝ်ႇ ၶိုၼ်ႈပဵၼ်ၸၼ်ႉ ၵႅမ်ၸွမ်ၸိုင်ႈ မိူင်းႁူမ်ႈတုမ် ၵေႃႉယိပ်းၵမ် ဢႃႇၼႃႇသုင်သုတ်းဝႆႉ ၼႂ်းမိူင်းၼၼ်ႉ မွၵ်ႇလၢတ်ႈၶေႃႈၵႂၢမ်းၵႂႃႇ ၼႂ်းပၢင်ၵႅဝ်ႈၼၼ်ႉဝႃႈ – “ ၶႂ်ႈတိုၵ်းသူၼ်းထိုင် ၸိူဝ်းၵဵဝ်ႇၶွင်ႈၸွမ်း တင်းသဵင်ႈ ႁႂ်ႈဝႆႉၼမ်ႉၼၵ်း တူၺ်းပၼ်ပုၼ်ႈၵူၼ်းမိူင်းသေ ယႃႇႁဵတ်းႁႂ်ႈဝၢၼ်ႈမိူင်းလႆႈႁူပ်ႉ တၢင်းတုၵ်ႉၶ ယၢပ်ႇၽိုတ်ႇထႅင်ႈတိၵ်းတိၵ်း။ တွၼ်ႈတႃႇတေၵႅတ်ႇၶႄဝၢၼ်ႈမိူင်းၼႆႉ ၾၢႆႇႁဝ်းတိုၼ်းတူဝ်ႈတၼ်းဝႆႉတႃႇသေႇ” ၼႆယဝ်ႉ။

တႃႇမူၼ်ႉမႄးပၵ်းပိူင်လၵ်းမိူင်းၵမ်ႈၽွင်ႈၵေႃႈ တၢမ်တူဝ်မိၼ်းဢွင်ႇလၢႆႇ ၽွမ်ႉၸႂ်ၸွမ်းယူႇ။ ယွၼ်ႉသင်လႄႈ ၵၢၼ်ႁုၼ်ႈ မုၼ်းၶိုၼ်ႈ ယႂ်ႇ မိူင်းႁူမ်ႈတုမ်ၼႆႉ ယင်းတိုၵ်ႉတူၵ်းတႅမ်ႇ ၵိုတ်းဝႆႉပႃႈလင်မိူင်းပိူၼ်ႈၼႆၵေႃႈ ၶႂ်ႈႁႂ်ႈဝူၼ်ႉပႃး။ ၵွပ်ႈၼၼ် ၶႂ်ႈႁႂ်ႈၾၢႆႇၸုမ်း ၸၢဝ်းၶိူဝ်း ၸိူဝ်းမီးယူႇၼႂ်းမိူင်းႁူမ်ႈတုမ် လၢတ်ႈ/တုၵ်းယွၼ်းၸိူဝ်းပွင်ပဵၼ်လႆႈၼၼ်ႉၵူၺ်းၼႆ မိၼ်းဢွင်ႇလၢႆႇ သိုပ်ႇလၢတ်ႈၼႄၵႂႃႇ ၼင်ႇၼႆ။

ၼွၵ်ႈလိူဝ်ၸုမ်းယိပ်းၵွင်ႈၵၢင်ႇ ၸိူဝ်းလူင်းလၢႆးမိုဝ်း NCA ဝႆႉယဝ်ႉၼၼ်ႉ ပႃႇတီႇၵၢၼ်မိူင်း ၸိူဝ်းတေၶဝ်ႈၸွမ်း ပၢင်လိူၵ်ႈတင်ႈ ဢၼ်သိုၵ်းမၢၼ်ႈ တေၸတ်းႁဵတ်း ၼႂ်းႁၢင်ပီ 2025 ၼႆႉၵေႃႈၵႂႃႇၶဝ်ႈႁူမ်ႈၸွမ်းၵူၺ်းဢမ်ႇၵႃး ၽွင်းတၢင်မိူင်းၼွၵ်ႈ၊ တူဝ်တႅၼ်း ၸိုင်ႈမိူင်းၼွၵ်ႈၶဝ် ၸိူဝ်းယၢမ်ႈမႃးၶဝ်ႈပႃးပဵၼ် သၢၵ်ႈသေႇလၵ်းထၢၼ်ၼႂ်းၶၵ်ႉၵၢၼ်လူင်းလၢႆးမိုဝ်း NCA  ဝႆႉၼၼ်ႉၵေႃႈ မႃးၶဝ်ႈႁူမ်ႈၸွမ်း ၼႆယဝ်ႉ။

တူဝ်တႅၼ်းလူင်ပွင်ၸိုင်ႈမိူင်းၶႄႇ ၽွင်းတၢင်ၾၢႆႇႁွင်ႈၵၢၼ်မိူင်းၼွၵ်ႈ တဵင်ႉသျီႊၵျုၼ်ႊၵေႃႈ မွၵ်ႇလၢတ်ႈၶေႃႈၵႂၢမ်းၵႂႃႇ ၼႂ်းပၢင်ၵႅဝ်ႈၼၼ်ႉဝႃႈ “တေၵမ်ႉထႅမ်ပၼ်ၶိူင်ႈၸႂ်ႉတိုဝ်း ၸိူဝ်းလူဝ်ႇၼႂ်းပၢင်လိူၵ်ႈတင်ႈ လႄႈ လွၵ်းလၢႆးပၢႆးပၺ်ႇၺႃႇ ဢၼ်သိုၵ်းမၢၼ်ႈ လူဝ်ႇၸႂ်ႉၼၼ်ႉယူႇ” ဝႃႈၼႆ။

ဝၢႆးလင် တူဝ်တႅၼ်းလူင်ပွင်ၸိုင်ႈမိူင်းၶႄႇ မွၵ်ႇလၢတ်ႈၶေႃႈၵႂၢမ်းၵႂႃႇယဝ်ႉ တူဝ်တႅၼ်းလူင်ပွင်ၸိုင်ႈမိူင်းဢိၼ်ႊတီႊယိူဝ်ႊ လႄႈ မိူင်းထႆး သိုပ်ႇမွၵ်ႇလၢတ်ႈၶေႃႈၵႂၢမ်း။

ပၢင်လိူၵ်ႈတင်ႈ ဢၼ်တေတႄႇၸတ်းႁဵတ်း ၼႂ်းႁၢင်ပီ 2025 ၼႆႉ မိၼ်းဢွင်ႇလၢႆႇ တေၸတ်းႁဵတ်းၵႂႃႇ သၢမ်တွၼ်ႈ။ တွၼ်ႈၼိုင်ႈၼႆႉ တေၸတ်းႁဵတ်းတႃႇ 102 ၸႄႈဝဵင်း၊ တွၼ်ႈသွင် တေၸတ်းႁဵတ်းတႃႇ 100 ၸႄႈဝဵင်း၊ ၸႄႈဝဵင်းၸိူဝ်းၵိုတ်းယူႇၼၼ်ႉ တေၸတ်း ႁဵတ်းၵႂႃႇ ၼႂ်းၶၵ်ႉတွၼ်ႈသၢမ် ၼႆယဝ်ႉ။

ၼႂ်းပၢင်ၵႅဝ်ႈပိုတ်ႇပၢင် ၶွပ်ႈၶူပ်ႇ 10 ပီတဵမ် NCA ၼႆႉပဵၵ်ႉသမ်ႉမိၼ်းဢွင်ႇလၢႆႇ တူၵ်ႇတၵ်ႉတိုၵ်းသူၼ်းလၢတ်ႈထိုင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ႁႂ်ႈၸႂ်ႉလၢႆးတၢင်း ၵႄႈလိတ်ႈပၼ်ႁႃၵၢၼ်မိူင်း လူၺ်ႈဢမ်ႇၸႂ်ႉတိုဝ်းၶိူင်ႈၵွင်ႈၵၢင်ႇသေတႃႉ မိူဝ်ႈဝႃး ဝၼ်းတီႈ 14/10/2025 ယၢမ်းတၢမ်းၶမ်ႈ မွၵ်ႈ 5 မူင်းတႄႉ ႁိူဝ်းမိၼ်တိုၵ်းၶွင် ၸုမ်းသိုၵ်းမၢၼ်ႈယိုတ်းမိူင်း ဢၼ်ယူႇတႂ်ႈဢၢမ်းၼၢတ်ႈ ႁပ်ႉထွမ်ႇၶေႃႈၸီႉသင်ႇၶွင် မိၼ်းဢွင်ႇလၢႆႇ ၼၼ်ႉ ယင်းတိုၵ်ႉမိူဝ်းပွႆႇမၢၵ်ႇသႂ်ႇ ၸွမ်းဝၢၼ်ႈၵူၼ်းမိူင်း ၼႂ်းၸႄႈဝဵင်းသီႇပေႃႉ ၊ ဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ၊ ၸွမ်းၸႄႈဝဵင်းမိူင်းပၢႆး ၾၢႆၶုၼ် မိူင်းတႆးပွတ်းၸၢၼ်းယူႇ  ။