သိုၵ်းမၢၼ်ႈလႄႈပျီႇတူႉၸိတ်ႉပဢူဝ်း ထႅမ်ႁႅင်းသိုၵ်းၶဝ်ႈၼႂ်းဝၢၼ်ႈဢိူင်ႇႁိူၼ်းယေးၼႂ်းၸႄႈဝဵင်းၾၢႆၶုၼ် ၽဝ်ႁိူၼ်းယေးၵူၼ်းဝၢၼ်ႈ ၊ ႁိူဝ်းမိၼ်သိုၵ်းပွႆႇမၢၵ်ႇသႂ်ႇႁိူၼ်းယေးၵူၼ်းဝၢၼ်ႈ ၼႂ်းၶၢဝ်းတၢင်းဝူင်ႈၼႆႉၵူၺ်းၾႆးမႆႈႁိူၼ်းၵူၼ်းဝၢၼ်ႈ 30 ပၢႆ၊ ၵူၼ်းဝၢၼ်ႈတႄႉ ပၢႆႈၽေးသိုၵ်းယဝ်ႉလႄႈ ဢမ်ႇမီးလွင်ႈတုမ်ႉတိူဝ်ႉမၢတ်ႇၸဵပ်း။

ဝၼ်းတီႈ 14/10/2025 ယၢမ်းၵၢင်ၶမ်ႈ သိုၵ်းမၢၼ်ႈ ဢဝ်ႁိူဝ်းမိၼ်သိုၵ်းမႃးပွႆႇမၢၵ်ႇသႂ်ႇၼႂ်းဝၢၼ်ႈ ဝေႃႉယၢၼ်ႇ(ဘောရန်) ဢိူင်ႇသီးပူး ၾၢႆႇတူၵ်းဝဵင်းၾၢႆၶုၼ်။ ဝၼ်းတီႈ 13/10/2025 ယၢမ်းဝၢႆးဝၼ်း 4 မူင်းၼၼ်ႉၵေႃႈ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ၶဝ်ႈၽဝ်ဝႆႉလႄႈ ၾႆးမႆႈႁိူၼ်းယင်းပႆႇမွတ်ႇမူတ်း- ဝႃႈၼႆ။  

ၽူႈၶဝ်ႈၸုမ်း ၵေႃႁူမ်ႈသၢင်ႈၵူၼ်းၼုမ်ႇတႆး ဝဵင်းၾၢႆၶုၼ်လၢတ်ႈၽူႈတွႆႇႁွၵ်ႈဝႃႈ -“ထိုင်မိူဝ်ႈဝႃး ၵၢင်ၼႂ် ၾႆးတိုၵ်ႉမႆႈ ယူႇ ၊ ၵၢင်ၶမ်ႈၵေႃႈသိုၵ်းမၢၼ်ႈမႃးပွႆႇမၢၵ်ႇထႅင်ႈလႄႈ ႁိူၼ်းယေးၸိူဝ်းၼႆႉတႄႉ ပဵၼ်ၽဝ်ႇမူတ်းယဝ်ႉ ၊ 30 ပၢႆၼႆႉ ထုၵ်ႇၽဝ်မူတ်း ။ ၵူၼ်းဝၢၼ်ႈတႄႉ ပၢႆႈၽေးသိုၵ်းဝႆႉၸဵမ်လႂ်ယဝ်ႉလႄႈ ဢမ်ႇမီးလွင်ႈတုမ်ႉတိူဝ်ႉမၢတ်ႇၸဵပ်း။ ”- ဝႃႈၼႆ ။

မိူဝ်ႈဝၼ်းတီႈ 10/10/2025 ၼၼ်ႉၵေႃႈ သိုၵ်းမၢၼ်ႈတင်း ၸုမ်းပျီႇတူႉၸိတ်ႉ ပဢူဝ်း PNO ႁူမ်ႈၵၼ်ၶဝ်ႈမႃးတၢင်းဝၢၼ်ႈ ၸလူင်ႈၼိူဝ် (မြောက်စလုံး) ဢိူင်ႇသီးပူး  လႄႈ တုမ်ႉတိူဝ်ႉ ပဵၼ်ပၢင်တိုၵ်း ၵၼ်ၶိုၼ်းတင်းၸုမ်းသိုၵ်းၵႅတ်ႇၶႄၵူၼ်းမိူင်း – ၸုမ်းလုၵ်ႉၽိုၼ်ႉသိုၵ်းမၢၼ်ႈ ၶိုၼ်းႁၢဝ်ႈႁႅင်း   ။ တီႈဝၢၼ်ႈၸလူင်ႈၼိူဝ်ၼႆႉ မိူဝ်ႈဝႃးဝၼ်းတီႈ 14/10/2025 သိုၵ်းမၢၼ်ႈၽဝ်ၼႂ်းဝၢၼ်ႈ ၽဝ်ပႃးႁူင်းႁဵၼ်း။  

ယွၼ်ႉပဵၼ်ပၢင်တိုၵ်းဝၼ်းၼၼ်ႉလႄႈ  ၵူၼ်းၼႂ်းဢိူင်ႇသီးပူး ၸႄႈဝဵင်းၾၢႆၶုၼ် ဢွၼ်ၵၼ် ငိူင်ႉပၢႆႈၽေးသိုၵ်းၵႂႃႇထႅင်ႈ ၼႂ်းထိူၼ်ၼႂ်းၶိူဝ်း ၊ မၢင်ၸိူဝ်းပၢႆႈၽေးသိုၵ်းၵႂႃႇတၢင်း ဝၢၼ်ႈ တီႈမူၵ်းသိူဝ်ႇ (ဒီမောဆိုး) လႅၼ်လိၼ်တႆး- ယၢင်းလႅင် လႄႈ ၼႂ်းၸႄႈဝဵင်းပၢင်လွင်း ႁူဝ်ၵူၼ်း   ႁဵင်ပၢႆ လူဝ်ႇတင်းၸွႆႈထႅမ် တီႈယူႇတၼ်းသဝ်း ၶဝ်ႈၼမ်ႉတင်းၵိၼ်ဝႆႉ ၼႆယဝ်ႉ ။

ဝၢၼ်ႈဝေႃႉယၢၼ်ႇ (ဘောရန်) ၼႆႉမီးလင်ႁိူၼ်း 200 ပၢႆ  ယၢၼ်ၵႆၵၼ်တင်း ဝၢၼ်ႈၸလူင်ႈၼိူဝ် 13 လၵ်း  ။  

“ၵူၼ်းဝၢၼ်ႈမၢင်ၸိူဝ်းပၢႆႈၵႂႃႇတင်းယၢင်းလႅင် ၊ တီႈမူၵ်းသိူဝ် ၸိူဝ်းၼႆႉဢေႃႈ ၊ လူဝ်ႇတင်းၸွႆႈထႅမ် တီႈယူႇတၼ်းသဝ်း ၽႃႈယၢင်မူဝ်းၵႃႇ ၊ တင်းၵိၼ်တင်းယႅမ်ႉၸိူဝ်းၼႆႉ၊ မၢင်ၸိူဝ်းၵေႃႈ ပၢႆႈၵႂႃႇယူႇ ၼႂ်းထိူၼ်ႇၼႂ်းၶိူဝ်း ဢမ်ႇလႆႈတၢင်းၸွႆႈထႅမ်သင် ”- ဝႃႈၼႆ ။

ၼႂ်းဝၼ်းတီႈ 7/10 /2025  သိုၵ်းမၢၼ်ႈတင်းပျီႇတူႉၸိတ်ႉပဢူဝ်း လႄႈ ၸုမ်းလုၵ်ႉၽိုၼ်ႉ PDF ပဵၼ်ပၢင်တိုၵ်းၵၼ်ၶိုၼ်းလႄႈ ၵူၼ်းဝၢၼ်ႈ လူင်ပႅၼ်ႈ ၊ ၼမ်ႉၼဵင်ႈ ၊ ၵေႃမႆႉသၢင်း ၊ ဝၢၼ်ႈၸလူင်ႈတႂ်ႈ ၸလူင်ႈၼိူဝ် ႁူဝ်ၵူၼ်း 4 ႁဵင်ပၢႆ လႆႈငိူင်ႉပၢႆႈၽေးသိုၵ်းထႅင်ႈ  ။

ၼႂ်းဝၼ်းတီႈ 10/10 /2025 သိုၵ်းမၢၼ်ႈႁူမ်ႇပျီႇတူႉၸိတ်ႉ ပဢူဝ်းၶဝ်  ၽဝ်ႁိူၼ်း ၵူၼ်းဝၢၼ်ႈ ၸလူင်ႈၼိူဝ် ႁဵတ်းႁႂ်ႈႁိူၼ်းၵူၼ်းပိုၼ်ႉတီႈလူႉၵွႆတင်းၼမ် – ၵူၼ်းပိုၼ်ႉတီႈလၢတ်ႈ ။

မိူၼ်ၼႆၼင်ႇၵဝ်ႇ ၼႂ်းထုင်ႉ ၾၢႆၶုၼ် မိူင်းပၢႆး လႅၼ်လိၼ် တႆး – ယၢင်းလႅင်ၼၼ်ႉၵေႃႈ သိုၵ်းမၢၼ်ႈ တင်း ၸုမ်းသိုၵ်းၽွမ်ႉႁူမ်ႈ ယၢင်းလႅင် တိုၵ်ႉမီးလွင်ႈပိုတ်းယိုဝ်းၵၼ် ပဵၼ်တီႈပဵၼ်တီႈယူႇသေ ပျီႇတူႉၸိတ်ႉပဢူဝ်း PNO  ၽဝ်ႁိူၼ်းၵူၼ်းပိုၼ်ႉတီႈပႃးၼႆ သိုၵ်းယၢင်းလႅင် KNDF ပိုၼ်ၽၢဝ်ႇဢွၵ်ႇမႃး ၼႂ်းဝၼ်းတီႈ 13/10/2025 ၼင်ႇၼႆ။

ၶေႃႈတူၵ်းလူင်း ၵျီႊတီႊဝႃႊ ၶွၼ်ႊဝႅၼ်ႊသျိၼ်ႊ မတ်ႉတႃ 14 ၶေႃႈတူၵ်းလူင်းၽိူမ်ႉထႅမ် 2 ၼၼ်ႉပႃးဝႆႉဝႃႈ – သိုၵ်းၼႆႉ ႁၢမ်ႈယႃႉၶူဝ်းၶွင်လမ်ႇလွင်ႈၵူၼ်းမိူင်း ဢၼ်ဢမ်ႇမီးဢမ်ႇပဵၼ် မိူၼ်ၼင်ႇ ႁိူၼ်းယေး လိၼ်သူၼ်ႁႆႈၼႃး ဢၼ်ၽုၵ်ႈသွမ်ႈဝႆႉမၢၵ်ႇၶဝ်ႈတဝ်ႈၼမ်ႉ၊ သူၼ်-ၶွၵ်ႈလဵင်ႉသတ်း ၊ ႁူဝ်ၼမ်ႉၵိၼ်ၼမ်ႉၸႂ်ႉ၊ ၵၢၼ်တေႃႉသူင်ႇၶူဝ်းၶွင်ၵူၼ်းမိူင်း ၸိူဝ်းၼႆႉလႃးလႃး။