ၼႂ်းပီ 2025 ၼႆႉ ၸိုဝ်ႈသဵင်တႆးၼႂ်းမိူင်းထႆး လူႉယွၼ်ႉ ၸုမ်းၵူၼ်းၼုမ်ႇၸိူဝ်းၵေႃႇၵၢၼ်ႁၢႆႉႁၢဝ်ႈႁၢဝ်ႈႁႅင်းႁႅင်း။ တူၺ်းၼႂ်းသိုဝ်ႇၶၢဝ်ႇထႆးဢၼ်လႂ်ၵေႃႈ ႁၼ်ၸီႉၸမ်ဝႃႈႁင်းတႆးသမ်ႉပေႃးဢမ်ႇမီးတီႈလီၵိၼ်လီဢဝ် ။ ႁႅင်းၵၢၼ်ယၢၼ်မိူင်း ၸိူဝ်းမႃးထင်သဝ်းယူႇၼႂ်းမိူင်းထႆးၵေႃႈ လႆႈၼႃႈလဵၵ်ႉတႃၼွႆႉ ၵႂႃႇလႂ်ပႆလႂ်ၵေႃႈ ဢမ်ႇထၢင်ႇႁၢင်ႈ ။ လႆႈၵူဝ် ၸဝ်ႈၼႃႈတီႈထႆးၶဝ်လိုပ်ႈလမ်းၵူတ်ႇထတ်း။

ၵူၺ်းၵႃႈ ႁႅင်းၵၢၼ်ယၢၼ်မိူင်းဢၼ်ယူႇၼႂ်းမိူင်းထႆးၼႆႉ ဢမ်ႇၵွမ်ႉမီးၵူၼ်းၸိူဝ်းၵေႃႇၵၢၼ်ႁၢႆႉၵူၺ်း ၵူၼ်းၸိူဝ်းမီး ၼမ်ႉၸႂ်လီ ၸိူဝ်းမီးသိလ်မီးထမ်းၵေႃႈ တိုၵ်ႉမီးတင်းၼမ်ယူႇ။ ၼႂ်းတႆးယၢၼ်မိူင်းႁဝ်းၼႆႉ  ယင်းမီးၵူၼ်းလီ ယင်းမီး ၵူၼ်းမီးတၢင်းဝူၼ်ႉသုင်ယူႇၼႆ ႁႅင်းၵၢၼ်ၼၢင်းယိင်းတႆးၵေႃႉၼိုင်ႈဢၼ်လူႉသဵင်ႈၵႂႃႇၼၼ်ႉ  ၼႄငဝ်ႈႁၢၵ်ႈလၵ်းထၢၼ် ပၼ်ဝႆႉ ၵူၼ်းလုၼ်ႈလင်။ ၵူၼ်းၼႂ်းၸိုင်ႈထႆး ယင်းဢဝ်ၵုင်ႇမုၼ်ၸွမ်းတႄႉတႄႉဝႃႈဝႃႈ ။  

ၸၢဝ်းၶိူဝ်းတႆးၼႆႉ ၸဵမ်မိုၼ်ႉသိုၼ်းၵွၼ်ႇၵေႃႈ တိုၼ်းၵိုၵ်းၸိုဝ်ႈဝႃႈ ပဵၼ်ၶိူဝ်းၵူၼ်းဢၼ်မီးလွင်ႈယဵၼ်ႇငႄႈ ။ ပဵၼ်ၸၢဝ်းၶိူဝ်းဢၼ် ႁၵ်ႉလွင်ႈၽဵင်ႇပဵင်းလႄႈလွင်ႈလွတ်ႈလႅဝ်း  ။

လွင်ႈလီလွင်ႈၶိုၵ်ႉၶိူဝ်းတႆးၼႆႉ ၵွမ်ႉမီးၼႂ်းပိုၼ်းၵူၺ်းတႄႉ ႁိုဝ်တေမီးၽႂ်ယုမ်ႇယမ်လႄႈၼပ်ႉထိုဝ် သင်ဢမ်ႇၼႄၼမ်ႉၼႄတူဝ်လႆႈ ။ တႃႇပိုၼ်းတႆးတေလီ ၵိုၵ်းလုမ်ႈၾႃႉၵႂႃႇထႅင်ႈၶၢဝ်းႁိုင်ၼၼ်ႉ ယူႇၼိူဝ်ႁူဝ်မႃႇ ပီႈၼွင်ႉတႆးၵူႈၵေႃႉလႄႈၵူႈတီႈ ။

ပေႃးဢဝ်ၶိူဝ်းၵူၼ်းဝႃႈတႄႉ ဢမ်ႇဝႃႈၶိူဝ်းၽႂ်ၵေႃႈယဝ်ႉ ဢၼ်တႅမ်ႈပိုၼ်းလီသေလူႉႁၢႆတၢႆၵႂႃႇၵေႃႈမီး။ ၸိူဝ်းတႅမ်ႈပိုၼ်းႁၢႆႉသေ လူႉတၢႆၵႂႃႇၵေႃႈမီး ။ ၵူၺ်းၵႃႈ ဢၼ်လမ်ႇလွင်ႈတႄႉ ယူႇတီႈၵူၼ်းလုၼ်ႈလင် ၸွင်ႇတေမေႃဢဝ်ပဵၼ်တူဝ်ယၢင်ႇလီလႄႈ ၸွင်ႇတေမေႃဢဝ်တွၼ်ႈသွၼ်လႆႈ ၼႆၼၼ်ႉၵူၺ်း ။

ၽွင်းတူၵ်းမိူင်းပိူၼ်ႈ ၼင်ႇႁိုဝ်တေဢမ်ႇၵၢႆးႁူႉၵၢႆးတႃၸဝ်ႈႁိူၼ်းၼၼ်ႉ တၵ်းလူဝ်ႇမေႃယူႇသဝ်းၵိၼ်သၢင်ႈ ။ ၼင်ႇႁိုဝ် တေမေႃၸႅၵ်ႇလႆႈ လွင်ႈလီ လွင်ႈၸႃႉၼၼ်ႉ ႁႂ်ႈမေႃတူၺ်းႁၼ်ၵူၼ်းၸိူဝ်းသၢင်ႈဝႆႉပိုၼ်းလီ ။ ဢမ်ႇယိူင်ႈၸွမ်းလႆႈ ႁူဝ်ပၢၵ်ႇတဵမ်ၵေႃႈ ၵိုင်ႇလီၼပ်ႉယမ်ႁၼ်လီၸွမ်း ။

 ယႃႇႁႂ်ႈတူဝ်ၵဝ်ႇ ပဵၼ်ၵူၼ်းသုမ်းၸၢတ်ႈသုမ်းပၢၼ် တၢႆၵႂႃႇၵေႃႈ ႁႂ်ႈပိူၼ်ႈႁၼ်ဝႃႈ ပဵၼ်ၵူၼ်းမီးၵႃႈၶၼ်ၼႆႉလီသေပိူၼ်ႈ   ။ ၵွပ်ႈပိူဝ်ႈ မၢင်ၸိူဝ်း တူဝ်ပႆႇတၢႆၵေႃႈ ၸိုဝ်ႈသမ်ႉပေႃးၼဝ်ႈပႂ်ႉထႃႈ ။

ပေႃးမိူၼ်ၼင်ႇ ၼၢင်းယိင်းတႆး ႁႅင်းၵၢၼ်ယၢၼ်ႈမိူင်းၵေႃႉၼိုင်ႈ ၸိုဝ်ႈ ၼၢင်းၶမ်း ဢႃယု 40 ပီ ၼႆႉတႄႉ လႆႈသဵင်ႈၵၢမ်ႇ သုတ်းမုၼ် ၵႂႃႇယဝ်ႉသေတႃႉ ယွၼ်ႉၵၢၼ်လီမၼ်းၼၢင်းသေ တူဝ်တၢႆၵေႃႈ ၸိုဝ်ႈႁိုဝ်တေၼဝ်ႈ ။

လွင်ႈတၢင်းမၼ်းတႄႉၵေႃႈ မိူဝ်ႈမၼ်းၼၢင်းတိုၵ်ႉမီးသၢႆၸႂ် တိုၵ်ႉမီးဢဵၼ်ႁႅင်းတဵမ်တူဝ်ယူႇၼၼ်ႉ မၼ်းၼၢင်းယၢမ်ႈလၢတ်ႈလုၵ်ႈယိင်းမၼ်းဝႆႉဝႃႈ  သင်ဝႃႈ လူႉႁၢႆတၢႆၵႂႃႇၼႆ ဢမ်ႇၶႂ်ႈႁႂ်ႈတူဝ်ၶၼ်ႇထႃႇလူင်ၼႆႉ ပဵၼ်တူဝ်တူႇတူဝ်ၼဝ်ႈၵႂႃႇလၢႆလၢႆၵူၺ်း။

မၼ်းၼၢင်းၶႂ်ႈႁႂ်ႈၶၢပ်ႈတူဝ်မၼ်းၼၢင်းမီးၽွၼ်းလီတေႃႇတူင်ႇၵူၼ်း ႁိုဝ်ဢမ်ႇၼၼ် တႃႇၸွႆႈထႅမ်သၢႆၸႂ်ၵူၼ်းလႆႈၼႆယူႇ။ ဢမ်ႇထၢင်ႇဢမ်ႇမုင်ႈမွင်းသေ မိူဝ်ႈဝၼ်းတီႈ 5/10/2025 ၼႆႉ  မၼ်းၼၢင်းလႆႈလူႉသဵင်ႈၵႂႃႇ ယွၼ်ႉတၢင်းပဵၼ် သဵၼ်ႈလိူတ်ႈဢွၵ်းဢေႃၶၢတ်ႇ ။ ၵေႃႉပဵၼ်လုၵ်ႈယိင်းမၼ်းၼၢင်း  ၸင်ႇတူၵ်းလူင်းႁဵတ်းၸွမ်းၼင်ႇ ၵႂၢမ်းမၼ်းၼၢင်း သင်ႇလၢတ်ႈဝႆႉ ။

လုၵ်ႈယိင်းမၼ်းၼၢင်းၵေႃႈ ၸင်ႇဢဝ်ၶၢပ်ႈတူဝ်မၼ်းၼၢင်းမွပ်ႈလူႇတၢၼ်းပၼ်တီႈႁူင်းယႃ ။ မေႃယႃလူင်တီႈႁူင်းယႃ ၼၶွၼ်ႊၽိင်ႊ ၸင်ႇၵူတ်ႇထတ်းတူၺ်းၼႂ်းၶၢပ်ႈတူဝ်တၢႆ ။ ၼႂ်းၼၼ်ႉ  ဢၼ်ၸၢင်ႈဢဝ်မႃးသိုပ်ႇသၢႆၸႂ်ၵူၼ်းတၢင်ႇၵေႃႉ  ၶိူင်ႈၶူဝ်းၼႂ်းတူဝ်မၼ်းၼၢင်းဢၼ်ၸႂ်ႉလႆႈမီး 4 ယၢင်ႇ။ တႂ်မၼ်းၼၢင်း 2 ၶၢင်ႈ၊ တပ်းလႄႈ ၵႅဝ်ႈတႃမၼ်းၼၢင်းၾၢႆႇၼိုင်ႈ –  လႆႈႁူႉၼင်ႇၼႆ။

 ၵဵဝ်ႇလူၺ်ႈလွင်ႈၼႆႉ ၼၢင်းလၢဝ်ၶမ်း ဢႃယု 17 ပီ လုၵ်ႈယိင်းၼၢင်းၶမ်း လၢတ်ႈၼႄဝႆႉၼင်ႇၼႆ –

“မိူဝ်ႈမႄႈပႆႇတၢႆတႄႉ ယၢမ်ႈထၢမ်ၵၼ်တူၺ်းၶၢဝ်ႉၶၢဝ်ႉၼၼ်ႉၼႃႇ ။ ၵေႃႈၶႂ်ႈႁႂ်ႈလူႇပၼ်တၢင်းလူႇ ဢၼ်ယႂ်ႇလူင် ၼႆ ၼၼ်ႉဢေႃႈ ။ ႁဝ်းၶႃႈတႄႇတူၵ်းလူင်း ယဝ်ႉၵေႃႈ လူင်းလၢႆးမိုဝ်း လိၵ်ႈၵိၼ်ၵႅၼ်ႇၵၼ် ။ ဝႆႉထႅင်ႈဝၼ်းၼိုင်ႈ မေႃၶဝ် ၸင်ႇၵွႆႈဢဝ် ။ ဢၼ်မေႃၶဝ်ဢဝ်ၼၼ်ႉ တေပဵၼ် တႂ် သွင်ၾၢႆႇ ။ ယဝ်ႉၵေႃႈ တပ်း လႄႈ ၵႅဝ်ႈတႃ (ၵၸူၵ်ႇတႃ)ၼိုင်ႈၾၢႆႇၶႃႈ။”

ဢိင်ၼိူဝ်မၼ်းၼၢင်းလႆႈလူႇၶိူင်ႈၶူဝ်းဢၼ်လမ်ႇလွင်ႈၼႂ်းတူဝ်ၶိင်းၶၼ်ႇထႃႇဝႆႉၼႆႉသေ ၸုမ်းမေႃယႃတီႈႁူင်းယႃပႃႇငႄႉ    /ၼၶွၼ်ႊၽိင်ႊ ၸႄႈတွၼ်ႈၵဵင်းမႂ်ႇ ၸိုင်ႈထႆး ၸင်ႇပိုၼ်ၽၢဝ်ႇ ဢဝ်ၵုင်ႇမုၼ်လႄႈယိၼ်းၸူမ်းၸွမ်းတႄႉတႄႉဝႃႈဝႃႈ ။ ၵွပ်ႈဝႃႈ ယွၼ်ႉတၢင်းလီၵုသူလ်ႇ ၼၢင်းၶမ်းၼႆႉသေ ၸွႆႈသၢႆၸႂ်ၵူၼ်းလႆႈ ပဵၼ် 4 ၵေႃႉ။

ၼၢင်းၶမ်းၼႆႉ မိူဝ်ႈတိုၵ်ႉမီးသၢႆၸႂ် ပဵၼ်ၵူၼ်းသူင်ၵိၼ်သူင်လူႇတႄႉတႄႉဝႃႈဝႃႈ ။ ၵၢၼ်ႁႃၵိၼ်လဵင်ႉတွင်ႉတႄႉ မိူၼ်ႁႅင်းၵၢၼ်တၢင်ႇၵေႃႉၵူၺ်း ႁဵတ်းဝၼ်းလႂ်ၵိၼ်ဝၼ်းၼၼ်ႉ ။မၢင်ပွၵ်ႈၵေႃႈ ၵၢၼ်ၵေႃႇသၢင်ႈ ၊ မၢင်ပွၵ်ႈၵေႃႈ ႁဵတ်းၵၢၼ်လၢႆးဝၼ်းၵူႈသႅၼ်းသႅၼ်းယဝ်ႉၼႆ ၽူႈႁူႉၸၵ်းမၼ်းၼၢင်းၵေႃႉၼိုင်ႈလၢတ်ႈ။

မၼ်းၼၢင်းၼႆႉၸႃႇတိတီႈၵိူတ်ႇပဵၼ် ဝၢၼ်ႈၽုၺ်း ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း ၊ တႄႇၼႃႈႁိူၼ်းတင်းၸၢႆးၸၢမ်ႇၺုၼ်ႉသေ မီးလုၵ်ႈဝႆႉၵေႃႉၼိုင်ႈ။  ၶဝ်ပေႃႈမႄႈလုၵ်ႈႁဵတ်းၵၢၼ်ၼႂ်းမိူင်းထႆး ( ယူႇဝႆႉတီႈမႄႈရိမ်း ၸႄႈတွၼ်ႈၵဵင်းမႂ်ႇ ) ၶၢဝ်းတၢင်း 10 ပီပၢႆ ၊။ ၸူးၸႂ်မၼ်းၼၢင်းတႄႉ ၶႂ်ႈပွၵ်ႈၶိုၼ်းဝၢၼ်ႈၵဝ်ႇမိူင်းလင်ယူႇသေတႃႉ ဢိင်ၼိူဝ်ငဝ်းလၢႆးၵူႈလွင်ႈလွင်ႈသေ ဢမ်ႇလႆႈပွၵ်ႈႁိူၼ်းယေးတေႃႇပေႃးသုတ်းသဵင်ႈသၢႆၸႂ်။ 

ပၢင်မႃႇသႃႇၼၢင်းၶမ်းတႄႉ လႆႈၸတ်းၵႂႃႇ တီႈဝတ်ႉသၼ်မိူင် ဢိူင်ႇၻွၼ်ႊၵႅဝ်ႈ ၸႄႈဝဵင်းမႄႈရိမ်း မိူင်းၵဵင်းမႂ်ႇ ၸိုင်ႈထႆး မိူဝ်ႈဝၼ်းတီႈ ။12 လႄႈ 13/10/2025 ၼႆႉသေ လႆႈပူၼ်ႉၶၢပ်ႈတူဝ်ၼႂ်း ဝၼ်းတီႈ 14/10/2025 ၼႆ ၼႂ်းၽိုၼ်လိၵ်ႈ တမ်ႇၼွႆႉမွင်ၸႂ်ၼၼ်ႉပႃးဝႆႉၼင်ႇၼႆ။