မိူဝ်ႈၼႆႉ ဝၼ်းတီႈ 13/10/2025 ယၢမ်းၵၢင်ၼႂ် လိူၼ်ဢွၵ်ႇထူဝ်ႊပိူဝ်ႊ ၸုမ်းသိုၵ်းၸၢဝ်းၶိူဝ်း KNU ၊ CNF ၊ ABSDF ၊ PNLO၊ NMSP (AD) လႄႈ LDU ၶဝ်ႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇ တိုၵ်းသူၼ်းထိုင် ၽွင်းတၢင်မိူင်းၼွၵ်ႈ လႄႈ ၸုမ်းဢႃႊသီႊယႅၼ်ႊ၊ ၸုမ်းၸၢတ်ႈၸိုင်ႈလုမ်ႈၾႃႉ UN ၶဝ် ယႃႇႁႂ်ႈမႃးၶဝ်ႈႁူမ်ႈၸွမ်း ပၢင်ၶွပ်ႈၶူပ်ႇ NCA 10 ပီတဵမ် ဢၼ်သိုၵ်းမၢၼ်ႈယိုတ်းမိူင်း တေဢွၼ်ၼမ်းၸတ်းႁဵတ်း တီႈဝဵင်းလူင်ၼေႇပျီႇတေႃႇၼၼ်ႉ ။

သိုၵ်းမၢၼ်ႈယိုတ်းမိူင်း ဢၼ်မိၼ်းဢွင်ႇလၢႆႇဢွၼ်ႁူဝ်ၼမ်းၼႃႈယူႇၼႆႉ ၸႂ်ႉႁိူဝ်းမိၼ် ပွႆႇမၢၵ်ႇလူင်သႂ်ႇ ဢွင်ႈတီႈ ၵူၼ်းမိူင်းယူႇသဝ်းဝႆႉယူႇ ၵူႈမိုဝ်ႉၵူႈဝၼ်း၊ တဵၵ်းတဵင်မိပ်ႇငႅၼ်းႁႂ်ႈၵူၼ်းၼုမ်ႇ ၶဝ်ႈႁၢပ်ႇၵၢၼ်သိုၵ်းဢမ်ႇထၢတ်ႇလႄႈ ၸင်ႇႁူမ်ႈၵၼ်ႁဵတ်းလိၵ်ႈဢွၵ်ႇသၢၼ်ၶတ်း ပၢင်ပွႆးၶွပ်ႈၶူပ်ႇ NCA တဵမ် 10 ပီ – ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉယင်းတိုၵ်းသူၼ်းထိုင် ၸုမ်းဢႃႊသီႊယႅၼ်ႊ၊ မိူင်းဢမေႊရိၵၼ်ႊ လႄႈ ၽွင်းတၢင် ၵူႈၸိုင်ႈမိူင်း ၸိူဝ်းတေမႃးၶဝ်ႈႁူမ်ႈၸွမ်း ပၢင်ပွႆးၶွပ်ႈၶူပ်ႇ NCA တဵမ် 10 ပီ ၼၼ်ႉထႅင်ႈဝႃႈ “ဢမ်ႇထုၵ်ႇလီမႃးၶဝ်ႈႁူမ်ႈၸွမ်းပၢင်ပွႆးသေ ထုၵ်ႇလီၸုၵ်းမၼ်ႈပၼ်ၾၢႆႇၵူၼ်းမိူင်း” ဝႃႈၼႆ။

ၸုမ်းသိုၵ်းမၢၼ်ႈယိုတ်းမိူင်းၼႆႉ ၸႂ်ႉတိုဝ်းၶိူင်ႈတရူၼ်ႊၵူႈသႅၼ်းသႅၼ်းလႄႈ ၸႂ်ႉတိုဝ်းပႃးႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိူၼ်းယေး ၵူၼ်းမိူင်း ပတ်းပိုၼ်ႉမိူင်းႁူမ်ႈတုမ်ယူႇၵူႈမိုဝ်ႉၵူႈဝၼ်း။ ၶႃႈႁႅမ်ၵူၼ်းမိူင်းယူႇဢမ်ႇထၢတ်ႇဢမ်ႇဝၢႆးလႆႈၸိူင်ႉၼႆၼႆႉ ၽိုၼ်လိၵ်ႈ ၵိၼ်ႇၵႅၼ်ႇ ၶေႃႈတူၵ်းလူင်း ၵၢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၵေႃႈ မိူၼ် ဝႂ်ၸေႈၵဝ်ႇၵဝ်ႇ ၽိုၼ်ၼိုင်ႈၵူၺ်းၼႆ ၽူႈၶၢၼ်ပၢၵ်ႇ ၸုမ်းသိုၵ်းယၢင်းၽိူၵ်ႇ KNU ပတူဝ်ႇၸေႃးတေႃးၼီး တွပ်ႇလၢတ်ႈၼႄဝႆႉၼင်ႇၼႆ။

“သိုၵ်းမၢၼ်ႈ လႄႈ ၵူၼ်းၸိူဝ်း လူင်းလၢႆးမိုဝ်း NCA ဝႆႉတင်းမူတ်းၼႆႉ ဢွၼ်ၵၼ်လႅၼ်တူဝ်ၸဝ်ႈၵဝ်ႇယူႇႁင်းၽႂ်မၼ်း။ ၵူႈလွင်ႈလွင်ႈၼႆႉ တေဢမ်ႇထိုင်တီႈထိုင်တၢင်းလႆႈၼႆၵေႃႈ ၵူႈၵေႃႉပေႃးႁူႉဝႆႉယူႇယဝ်ႉ။ ၵူၺ်းၵႃႈ ၵူၼ်းၸိူဝ်းၼႆႉ ယင်းတိုၵ်ႉသိုပ်ႇၸတ်းဝၢင်းၽႅၼ် တႃႇတေၵႃႈၸိူင်းဢၼ်ဢမ်ႇလႆႈလွင်ႈလႆႈတႃၼၼ်ႉထႅင်ႈယူႇ။”

ပၢင်လိူၵ်ႈတင်ႈ ဢၼ်သိုၵ်းမၢၼ်ႈဢွၼ်ၼမ်းၸတ်းႁဵတ်းယူႇယၢမ်းလဵဝ်ၼႆႉၵေႃႈ ပဵၼ်တႃႇလွၵ်ႇလႅၼ်ၽၢမ်းတႃၵူၼ်းမိူင်း ၼွၵ်ႈၵူၺ်းလႄႈ ၸဝ်ႈဢႃႇၼႃႇသိုၵ်းမၢၼ်ႈၶဝ် ၶတ်းၸႂ်သၢင်ႈႁႂ်ႈသိုပ်ႇၽွင်းငမ်းဝၢၼ်ႈမိူင်းၵႂႃႇလႆႈပဵၼ်တၢင်းၵၢၼ်ၵူၺ်း။

ပၢင်လိူၵ်ႈတင်ႈၼႆႉ တေဢမ်ႇၸၢင်ႈၵႄႈလိတ်ႈ ပၼ်ႁႃၵၢၼ်မိူင်း လႄႈ တၢင်းယၢပ်ႇလွင်ႈၵပ်ႉၵိၼ်းၶၢၼ်ၸႂ်ၵူၼ်းမိူင်းသင်သေ တေႁဵတ်းႁႂ်ႈဝၢၼ်ႈမိူင်း မီးပၼ်ႁႃၵႂႃႇၶၢဝ်းယၢဝ်းထႅင်ႈၵွႆးၼႆ – ၸုမ်းသိုၵ်းၸၢဝ်းၶိူဝ်း ၸိူဝ်းလူင်းလၢႆးမိုဝ်း NCA ဝႆႉ 6 ၸုမ်း ပိုၼ်ၽၢဝ်ႇဢွၵ်ႇဝႆႉၼင်ႇၼႆ။