ဝၼ်းတီႈ 11/10/2025 ယၢမ်းၵၢင်ၶမ်ႈ ၶွမ်ႊမသျိၼ်ႊပၢင်လိူၵ်ႈတင်ႈ မိူင်းႁူမ်ႈတုမ် တႂ်ႈသိုၵ်းမၢၼ်ႈယိုတ်းမိူင်းၵုမ်းၵမ် ပိုၼ်ၽၢဝ်ႇ  တေဢိုတ်းယႃႉ မၢႆၾူၼ်းၸိူဝ်း တင်ႈၸႂ်ႁဵတ်းသၢင်ႈယႃႉၵဝ်း ပၢင်လိူၵ်ႈတင်ႈ ဢၼ်တေၸတ်းႁဵတ်း ၼႂ်းႁၢင်လိူၼ် တီႊသႅမ်ႊပိူဝ်ႊ ပီ 2025 ၼႆႉ လူႉၵွႆၼၼ်ႉ ဝႃႈၼႆ။

သိုၵ်းမၢၼ်ႈပိုၼ်ၽၢဝ်ႇမၢႆၾူၼ်း Call Center  ႁွင်ႈၵၢၼ်လႄႈၽူႈမီးပုၼ်ႈၽွၼ်း တႃႇပႂ်ႉႁပ်ႉတွပ်ႇပၼ်ၵဵဝ်ႇၵပ်းၵၢၼ်လိူၵ်ႈတင်ႈ ပတ်းပိုၼ်ႉၸိုင်ႈမိူင်း။ ၵူၼ်းမိူင်းၵေႃႉလႂ်သေဢမ်ႇဝႃႈ- ၶႂ်ႈတွင်ႈထၢမ်ၶေႃႈမုလ်းၵၢၼ်လိူၵ်ႈတင်ႈၵေႃႈလႆႈ ဢမ်ႇၼၼ်ၶႂ်ႈတိူင်ႇလၢတ်ႈပၼ်ၶၢဝ်ႇ ပၼ်ၶေႃႈမုလ်းၵဵဝ်ႇၵပ်းၵၢၼ်လိူၵ်ႈတင်ႈၵေႃႈလႆႈဝႃႈၼႆဝႆႉ။

ၵူၺ်းၵႃႈတီႈပႂ်ႉႁပ်ႉတွပ်ႇပၼ်ၶိုၼ်းၼၼ်ႉတေမီးဝႆႉပႃး    ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ် ၶွမ်ႊမသျိၼ်ႊ မိူင်းႁူမ်ႈတုမ်၊ ႁွင်ႈၵၢၼ်ၽွင်းလူင် ၼႂ်းမိူင်း၊ ႁွင်ႈၵၢၼ်ၾၢႆႇၵုမ်းၸတ်းၵၢၼ်ဢုပ်ႉပိူင်ႇၵူႈလွင်ႈလွင်ႈ (ထွေအုပ်)၊ ႁွင်ႈၵၢၼ်ၾၢႆႇၵဵပ်း ၶေႃႈမုၼ်းၵူၼ်းၶဝ်ႈဢွၵ်ႇမိူင်း (လဝက) ၸိူဝ်းၼႆႉ  ။  

ၵွပ်ႈၼႆလႄႈ သင်ဝႃႈမီးမၢႆၾူၼ်းဢၼ်လႂ်သိုပ်ႇၶဝ်ႈမႃးၸူး Call Center ၼၼ်ႉသေ   တူၵ်ႇတၵ်ႉ လၢတ်ႈၶေႃႈၵႂၢမ်း ႁႂ်ႈပဵၼ်ၵၢၼ်ယႃႉ ၵဝ်း ပၢင်လိူၵ်ႈတင်ႈလူႉၸိူဝ်းၼၼ်ႉၸိုင် ၽူႈမီးပုၼ်ႈၽွၼ်းၶဝ် တေၵဵပ်းမၢတ်ႈမၢႆဢဝ် မၢႆၾူၼ်းၼၼ်ႉဝႆႉသေ သင်ႇပိၵ်ႉဢိုတ်းတၢႆပႅတ်ႈၵမ်းသိုဝ်ႈ- သိုၵ်းမၢၼ်ႈပိုၼ်ၽၢဝ်ႇဝႆႉၼင်ႇၼႆ။

ၼႂ်းမိူင်းႁူမ်ႈတုမ်ပတ်းပိုၼ်ႉၼႆႉ ၶွမ်ႊမသျိၼ်ႊပၢင်လိူၵ်ႈတင်ႈ ပိုတ်ႇဝႆႉႁွင်ႈၵၢၼ်တႃႇႁပ်ႉထွမ်ႇ လႄႈ တုမ်ႉတွပ်ႇပၼ်ၶေႃႈမုၼ်း ၵဵဝ်ႇၵပ်းပၢင်လိူၵ်ႈတင်ႈ တႃႇမိူင်းတႆး၊ မိူင်းၶၢင်၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ မိူင်းမွၼ်း၊ မိူင်းရၶႅင်ႇ၊ မိူင်းၶျၢင်း လႄႈ တိူင်းတႃႈၵုင်ႈ၊ တိူင်းဢီႇရႃႇဝတီႇ၊ တိူင်းၸႄႈၵႅင်း၊ တိူင်းတၼၢဝ်းသီ၊ တိူင်းပႃႇၵိူဝ်၊ တိူင်းမၵူၺ်း၊ တိူင်းမၢၼ်းတလေး (ဝဵင်းလိူဝ်ႇ) လႄႈ ဝဵင်းလူင်ၼေႇပျီႇတေႃႇ ၸဵမ်ၸိူဝ်းၼႆႉ တႃႇ 16 ႁွင်ႈၵၢၼ်။

ၽူႈတူင်ႉတိုၼ်ႇပၵ်းတႃပႂ်ႉတူၺ်းၸွမ်း ၶၵ်ႉၵၢၼ်ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်းႁၢင်ႈႁႅၼ်းၸတ်းႁဵတ်း ၼႂ်းဝဵင်းမူႇၸေႊ လၢတ်ႈၼႄတီႈၽူႈတွႆႇႁွၵ်ႈဝႃႈ “ယၢမ်းလဵဝ် သဵၼ်ႈမၢႆၵူၼ်းၸိူဝ်းတေလႆႈၵႂႃႇပၼ်သဵင် ၼႂ်းဝၼ်းပၢင်လိူၵ်ႈတင်ႈၼၼ်ႉ ၶဝ်ႁဵတ်းဢွၵ်ႇမႃး ၽိတ်းၼမ်ႁႅင်းၼႃႇ။ ၶဝ်ဢဝ်မႃးပိုၼ်ၽၢဝ်ႇၼႆႉ မၼ်းပဵၼ်သဵၼ်ႈမၢႆၵဝ်ႇၵဝ်ႇၸိူဝ်းၼၼ်ႉ။ ယွၼ်ႉၼၼ် ယၢမ်းလဵဝ် ၽူႈမီးပုၼ်ႈၽွၼ်းၶဝ် ၶိုၼ်းလူင်းၵဵပ်းသဵၼ်ႈမၢႆႁူဝ်ၼပ်ႉၵူၼ်းထႅင်ႈ။ ၵမ်းၼႆႉၶဝ်လူင်းထတ်း ႁိူၼ်းလႂ်ႁိူၼ်းၼၼ်ႉ။ ဝႃႈၽႂ်ယူႇႁိူၼ်း၊ ဢမ်ႇယူႇႁိူၼ်း။ ၽႂ်ၵႂႃႇမီးယူႇတီႈလႂ်ၸဵမ်ၸိူဝ်းၼႆႉ ၶဝ်ထတ်းႁူဝ်ယွႆႈမၼ်း” ဝႃႈၼႆ။

ယွၼ်ႉၵူၼ်းမိူင်းပိုၼ်ႉတီႈ ဢမ်ႇသူၼ်ၸႂ်ၼိူဝ် ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း တေၼမ်းၸတ်းႁဵတ်းၼႂ်းႁၢင်ပီ 2025 ၼႆႉလႄႈ ထိုင်တီႈ ႁွင်ႈၵၢၼ်ၶွမ်ႊမသျိၼ်ႊ ပၢင်လိူၵ်ႈတင်ႈၶဝ် လႆႈပိုၼ်ၽၢဝ်ႇဢွၵ်ႇ ႁႂ်ႈၵူၼ်းမိူင်းၵႂႃႇၵူတ်ႇထတ်းတူၺ်းၸိုဝ်ႈၸဝ်ႈ ၵဝ်ႇ ၼႂ်းသဵၼ်ႈမၢႆဢၼ်ပိုၼ်ၽၢဝ်ႇဢွၵ်ႇၵႂႃႇၼၼ်ႉသေ သင်မီးလွင်ႈတႃႇတေလႆႈၽိူမ်ႉထႅမ်ၸိုင် ႁႂ်ႈသိုပ်ႇၾူၼ်းပၼ်တီႈႁွင်ႈၵၢၼ် ၸိူဝ်းၵဵဝ်ႇၶွင်ႈ ၸွမ်းၼင်ႇၶွတ်ႇၽွတ်ႈပဵၼ်တၢင်းၵၢၼ်ဝႆႉၼၼ်ႉ  ပိုၼ်ၽၢဝ်ႇဝႆႉၼင်ႇၼႆ။

ၼႂ်းသဵၼ်ႈၸိုဝ်ႈ ၵူၼ်းမီးသုၼ်ႇပၼ်ၶႅပ်းၵၢင်ၸႂ် ဢၼ်ၾၢႆႇၶွမ်ႊမသျိၼ်ႊၶဝ် ပိုၼ်ၽၢဝ်ႇဢွၵ်ႇမႃးၼၼ်ႉ ပႃးသဵၼ်ႈၸိုဝ်ႈၵူၼ်းၸိူဝ်းလူႉ တၢႆၵႂႃႇ၊ ၵူၼ်းၸိူဝ်းၶၢႆႉၵႂႃႇႁဵတ်းၵၢၼ်တၢင်ႇတီႈတၢင်ႇလႅၼ်၊ သဵၼ်ႈၸိုဝ်ႈၵူၼ်းၸိူဝ်း မီးသုၼ်ႇပၼ်ၶႅပ်းၵၢင်ၸႂ်သမ်ႉဢမ်ႇပႃး –  ၸဵမ်ၸိူဝ်းၼႆႉၵေႃႈမီး  လႆႈႁူႉၼင်ႇၼႆ။