သိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇ တီႈၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈ ၵူၼ်းမိူင်းလူႉတၢႆ 7ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ 2 ၵေႃႉ မၢတ်ႇၸဵပ်းထႅင်ႈ 10 ၵေႃႉဝႃႈၼႆ ။
ၼႂ်းဝၼ်းတီႈ 9/10/2025 ယၢမ်းၵၢင်ၶမ်ႈ 7မူင်း ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇ သႅၼ်း 250 ပွင်ႇပွႆႇသႂ်ႇ တီႈဝၢၼ်ႈဝႄးပွင်း ၸႄႈဝဵင်းမိူင်းမိတ်ႈ ။ မၢၵ်ႇလူင်တူၵ်းသႂ်ႇ 3 လုၵ်ႈ ၵူၼ်းဝၢၼ်ႈ ၵူၼ်းၸၢႆး 4 ၵေႃႉ ၵူၼ်းယိင်း 3ၵေႃႉ လူႉတၢႆ ၵူၼ်းပိုၼ်ႉတီႈမၢတ်ႇၸဵပ်းထႅင်ႈ 10 ၵေႃႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈပွႆႇမၢၵ်ႇၾၢႆႇၸၢၼ်းဝၢၼ်ႈဝၢႆးပွင်း ၵူၼ်းတၢႆ 7 ၵေႃႉ ၊ ယွၼ်ႉၺႃးမၢၵ်ႇလႄႈ လႅင်းၾူင်း လႅင်းwifi ၵေႃႈပိၵ်ႉပႅတ်ႈ ၵမ်းလဵဝ် ၊ တီႈႁိမ်းၸမ်သိုၵ်းမၢၼ်ႈမႃးပွႆႇမၢၵ်ႇၼၼ်ႉ မီးတီႈၶုတ်းၶမ်းဝႆႉ”- ဝႃႈၼႆ ။
ဢွင်ႈတီႈဢၼ်သိုၵ်းမၢၼ်ႈမႃးပွႆႇမၢၵ်ႇၼၼ်ႉ ယၼ်ၵႆၵၼ်တင်း ဝဵင်းမိူင်းမိတ်ႈ ၸမ် 40 လၵ်း ၊ မီးၼိူဝ်သဵၼ်ႈတၢင်းလူင်းၵႂႃႇ ဝဵင်းလိူဝ်ႇၼႆယဝ်ႉ။
ၽွင်းပႆႇပဵၼ်ပၢင်တိုၵ်းၼၼ်ႉ ၵူၼ်းဝၢၼ်ႈႁဵတ်းၵၢၼ်ၶုတ်းၶမ်းတီႈႁိမ်းၼၼ်ႉသေ ဝၢႆးပဵၼ်ပၢင်တိုၵ်းၼၼ်ႉ ၸုမ်းယိပ်းၵွင်ႈၵၢင်ႇ ႁွင်ႉလၢႆမူႇလၢႆၸုမ်း ပႃးၸဵမ်လၢဝ်းပၢၼ်းၶႄႇ မႃးႁဵတ်းၵၢၼ်ဝႆႉတီႈ ပႃႇၶုတ်းၶမ်းၼၼ်ႉၼႆ- ၵူၼ်းပိုၼ်ႉတီႈလၢတ်ႈ ။
မိူၼ်ၼင်ႇၼႆ ၼႂ်းဝၼ်းတီႈ 7/10/2025 ယၢမ်းၵၢင်ဝၼ်းမွၵ်ႈ 12 မူင်းၶိုင်ႈ ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇသႂ်ႇ ႁိမ်းဝဵင်းမိူင်းလူင် လုၵ်ႈဢွၼ်ႇ ဢႃယု 2 ၶူပ်ႇ ဢိၵ်ႇပႃး ၵူၼ်းဝၢၼ်ႈ လူႉတၢႆ 10 ၵေႃႉ မၢတ်ႇၸဵပ်းထႅင်ႈ ဢမ်ႇယွမ်း 3 ၵေႃႉၼႆယဝ်ႉ ။
တႃႇတေယိုတ်းၵုမ်းလႆႈၶိုၼ်းဝဵင်း ဢၼ်သိုၵ်းတဢၢင်းၵုမ်းၵမ်ဝႆႉၸိူဝ်းၼၼ်ႉ သိုၵ်းမၢၼ်ႈ ထႅမ်ႁႅင်းလၢႆလၢႆၾၢႆႇ ထူဝ်းသိုၵ်းလေႃႇတိုၵ်းသိုၵ်းတဢၢင်းဝႆႉ၊ မိူၼ်ၼႆ ၸႂ်ႉပႃးႁိူဝ်းမိၼ်တိုၵ်းသေ ပွႆႇမၢၵ်ႇသႂ်ႇၼႂ်းၼႃႈတီႈသိုၵ်းတဢၢင်းၵုမ်းၵမ် မိူၼ်ၼင်ႇ တၢင်းဝဵင်း သီႇပေႃႉ၊ ၼမ်ႉတူႈ၊ မိူင်းလူင်၊ မိူင်းငေႃႉ၊ မိူင်းမိတ်ႈ လႄႈ ၼမ်ႉသၼ်ႇ ႁဵတ်းႁႂ်ႈၵူၼ်းမိူင်းလႆႈမၢတ်ႇၸဵပ်းလူႉတၢႆၸွမ်းတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ