လူင်ပွင်ၸိုင်ႈ မိူင်းဢမေႊရိၵၼ်ႊ ဢမ်ႇလႆႈၶေႃႈတူၵ်းလူင်း လွင်ႈငိုၼ်းၸႂ်ႉၸၢႆႇလူင်ပွင်ၸိုင်ႈလႄႈ လႆႈယင်ႉၵိုတ်းၶၵ်ႉတွၼ်ႈၵၢၼ်ဝႆႉ တႄႇဢဝ်ဝၼ်းတီႈ 1/10/2025 မႃးတေႃႇထိုင်ဝၼ်းမိူဝ်ႈၼႆႉ ။

ယွၼ်ႉငဝ်းလၢႆး ၵၢၼ်ဢုပ်ႇၵုမ်ငူပ်ႉငီႉ ဢမ်ႇမီးလွင်ႈၶိုပ်ႈၼႃႈမႃးလႄႈ ယၢမ်းလဵဝ် ဢဵၼ်ႁႅင်းၽူႈႁၢပ်ႇၵၢၼ် ၽူႈၵုမ်းသဵၼ်ႈတၢင်းႁိူဝ်းမိၼ် ဢမ်ႇမီးလွင်ႈၵုမ်ႇထူၼ်ႈ၊ ႁဵတ်းႁႂ်ႈၶၢဝ်းတၢင်းသၢႆၵၢၼ်မိၼ် လႆႈၸိူင်ႉထိူင်းၵႂႃႇ တၢင်းၼမ်။

ယွၼ်ႉဢဵၼ်ႁႅင်းၽူႈႁၢပ်ႇၵၢၼ် ဢမ်ႇၵုမ်ႇထူၼ်ႈသေ ၼႂ်းဝၼ်းတီႈ 6/10/2025 ၼၼ်ႉ တုမ်ႉတိူဝ်ႉ ၶၵ်ႉတွၼ်ႈၵၢၼ်ငၢၼ်း တီႈဝၢင်းႁိူဝ်းမိၼ် ဢၼ်မီးတီႈ ဝဵင်းၼိဝ်ႊယွၵ်ႊ၊ Los Angeles လႄႈ Denver ၸိူဝ်းၼႆႉ။ ၶၢဝ်းတၢင်းသၢႆၵၢၼ်မိၼ် တူဝ်ႈမိူင်းဢမေႊရိၵၼ်ႊပတ်းပိုၼ်ႉ လႆႈၸိူင်ႉထိူင်းၵႂႃႇ 6000 ပၢႆ – ႁွင်ႈၵၢၼ်ၶၢဝ်ႇ The Guardian ႁၢႆးငၢၼ်းဝႆႉၼင်ႇၼႆ။

မိူဝ်ႈၽွင်း ၵၢၼ်ငၢၼ်းလူင်ပွင်ၸိုင်ႈ လႆႈၵိုတ်းယင်ႉဝႆႉၸူဝ်ႈၶၢဝ်းၸိူင်ႉၼႆ ၽူႈႁၢပ်ႇၵၢၼ်လူင်ပွင်ၸိုင်ႈ ၾၢႆႇႁွင်ႈၵၢၼ်ၵုမ်းထိင်း သဵၼ်ႈတၢင်းႁိူဝ်းမိၼ်ၶဝ်ၼႆႉ ပဵၼ်ဢၼ်လမ်ႇလွင်ႈဢမ်ႇမီးဢမ်ႇပဵၼ်လႄႈ လႆႈမၵ်းမၼ်ႈဝႆႉ ႁႂ်ႈၽူႈႁၢပ်ႇၵၢၼ် သိုပ်ႇႁဵတ်းၵၢၼ်ၵႂႃႇ လူၺ်ႈဢမ်ႇလႆႈႁပ်ႉငိုၼ်းလိူၼ်။

ၵူၺ်းၵႃႈ ယွၼ်ႉလွင်ႈမႆႈၸႂ် တေလႆႈႁဵတ်းၵၢၼ်လူၺ်ႈ ဢမ်ႇလႆႈငိုၼ်းလိူၼ်လႄႈ ၽူႈႁၢပ်ႇၵၢၼ် ၸိူဝ်းဢဝ်ၶႂၢင်ႉ ဢမ်ႇယူႇလီၼမ်ၶိုၼ်ႈမႃး၊ ႁဵတ်းႁႂ်ႈတုမ်ႉတိူဝ်ႉၵၢၼ်ငၢၼ်း တီႈဝၢင်းႁိူဝ်းမိၼ်။

သၢႆၵၢၼ်မိၼ် မိူင်းဢမေႊရိၵၼ်ႊတႄႉ တုၵ်းယွၼ်းဝႆႉဝႃႈ ႁႂ်ႈၸဵဝ်းယုၵ်ႉလိူၵ်ႈပႅတ်ႈ လွင်ႈၵိုတ်းလိုဝ်ႈၵၢၼ်ငၢၼ်း လူင်ပွင်ၸိုင်ႈၼၼ်ႉ ဝႃႈၼႆ။