ၼႂ်းဝၼ်းတီႈ 9/10/2025 (ဝၼ်းၽတ်းၼႆႉ) မူဝ်ႊႁႃႊမတ်ႉ ႁႃႊသၼ်ႊ ၽွင်းလူင်ၾၢႆႇၼွၵ်ႈမိူင်း မိူင်းမလေးသျႃႊ ဢွၵ်ႇၶၢဝ်းတၢင်းမႃးတီႈ ၼေႇပျီႇတေႃႇသေ တေႁူပ်ႉဢုပ်ႇၵၼ်တင်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၼႆ- ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းမလေႊသျႃႊ ပိုၼ်ၽၢဝ်ႇဝႆႉၼင်ႇၼႆ။

ၼႂ်းပီ 2025 ၼႆႉ မိူင်းမလေးသျႃႊႁပ်ႉပုၼ်ႈၽွၼ်းပဵၼ် ႁူဝ်ပဝ်ႈၸုမ်းဢႃႊသီႊယၼ်ႊဝႆႉ။

ၵၢၼ်ဢွၵ်ႇၶၢဝ်းတၢင်းပွၵ်ႈၼႆႉ ပဵၼ်ၵၢၼ်ဢွၵ်ႇၶၢဝ်းတၢင်း ၸွမ်းၼင်ႇလႆႈတႅပ်းတတ်းဝႆႉ မိူဝ်ႈပၢင်ၵုမ် ၽွင်းလူင်ၾၢႆႇၼွၵ်ႈမိူင်း ၸုမ်းဢႃႊသီႊယၼ်ႊ ပွၵ်ႈၵမ်း 58 ၼႂ်းလိူၼ်ၵျူႊလၢႆႊပူၼ်ႉမႃးၼႆႉ ၼႆယဝ်ႉ။

ၽွင်းလူင်ၾၢႆႇၼွၵ်ႈမိူင်း မိူင်းမလေးသျႃႊၼႆႉ လိူဝ်သေ ႁူပ်ႉၸွမ်း ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇယဝ်ႉ ႁူပ်ႉဢုပ်ႇပႃး ၸွမ်ၽွင်းလူင် ဢူးၺူဝ်ႇၸေႃး လႄႈ ၽွင်းလူင်ၾၢႆႇၼွၵ်ႈမိူင်းသိုၵ်းမၢၼ်ႈ ဢူးတၢၼ်းသူၺ်ႇ ၸိူဝ်းၼႆႉထႅင်ႈ ဝႃႈၼႆ။

ၼင်ႇႁိုဝ် တေၽေႃႇၼမ်ႉၼႄတူဝ် ၶေႃႈတူၵ်းလူင်းဢႃႊသီႊယၼ်ႊ 5 ၶေႃႈလႆႈၼၼ်ႉ ၼႂ်းပၢင်ႁူပ်ႉဢုပ်ႇၵၼ်ၼႆႉ ၾၢႆႇမိူင်းမလေးသျႃႊ တေတုၵ်းယွၼ်း ႁႂ်ႈၸတ်းႁဵတ်းပၢင်ၵုမ် ဢၼ်ပႃးၵူႈမူႇၵူႈၸုမ်းၶဝ်ႈႁူမ်ႈၸွမ်း။

လိူဝ်ၼၼ်ႉ ဢုပ်ႇၵုမ်ပႃး လွင်ႈပၢင်လိူၵ်ႈတင်ႈ ဢၼ်သိုၵ်းမၢၼ်ႈႁၢင်ႈႁႅၼ်းတေၸတ်းႁဵတ်း၊ လွင်ႈပိုတ်ႇပၼ်ၶႂၢင်ႉ လွင်ႈၵူၼ်းၼင်ႇၵၼ်ႁၼ်ထိုင်ၸွႆႈထႅမ်ၵၼ်လႄႈ လွင်ႈလူတ်းယွမ်း ပၼ်ႁႃပတိၵ်ႈၶၢတ်ႈၼႂ်းမိူင်း ၸိူဝ်းၼႆႉ ၼႆယဝ်ႉ။

ၵူၺ်းၵႃႈ မၼ်းၸၢႆးယၢမ်ႈလၢတ်ႈမိူဝ်ႈလိူၼ်ၵျူႊလၢႆႊပူၼ်ႉမႃးၼၼ်ႉဝႃႈ ယူႇတီႈဢႃႊသီႊယၼ်ႊတႄႉဢမ်ႇႁၼ်ထိုင်ဝႃႈ ပၢင်လိူၵ်ႈတင်ႈၼႆႉပဵၼ်လွင်ႈယႂ်ႇ။ သိုၵ်းမၢၼ်ႈလူဝ်ႇႁဵတ်းၸွမ်းၶေႃႈတူၵ်းလူင်းဢႃႊသီႊယၼ်ႊလႄႈ ၶေႃႈတူၵ်းလူင်းလိၵ်ႈၵိၼ်ၵႅၼ်ႇလွင်ႈၵမ်းယဵၼ်ၼႂ်းမိူင်းၵူၺ်း။ ပူၼ်ႉပႅၼ်ၵၢၼ်ၵိုတ်းတိုၵ်းၼႆႉႁဵတ်းႁႂ်ႈ လွင်ႈငမ်းယဵၼ်ႁၢၵ်းလူႉၵွႆၵူၺ်း – ဝႃႈၼႆ။

ၼႂ်းႁူဝ်လိူၼ်ဢွၵ်ႊထူဝ်ႊပိူဝ်ႊၼႆႉသိုၵ်းမၢၼ်ႈ ၸႂ်ႉႁိူဝ်းမိၼ်ပွႆႇမၢၵ်ႇၼႂ်းတိူင်းၸႄႈၵႅင်း၊ မိူင်းတႆးပွတ်းႁွင်ႇ ဢမ်ႇထၢတ်ႇဢမ်ႇဝၢႆး။ ၵူၼ်းမိူင်းတၢႆပဵၼ်မူႇပဵၼ်ၾုင် ပႃးၸဵမ်လုၵ်ႈဢွၼ်ႇလႄႈၵူၼ်းထဝ်ႈ။

Ref; BBC, Reuters