ပူၼ်ႉမႃး ၵၢင်လိူၼ်သႅပ်ႊထႅမ်ႊပိူဝ်ႊ ပျီႇတူႉၸိတ်ႉပဢူဝ်း PNO  တႂ်ႈသိုၵ်းမၢၼ်ႈယိုတ်းမိူင်း လၢတ်ႈဝႃႈ  ယိုတ်းၵုမ်းလႆႈၶိုၼ်း ၼႃႈတီႈ ၸုမ်းလုၵ်ႉၽိုၼ်ႉၶဝ်ၵုမ်းဝႆႉ ၼႂ်းၸႄႈဝဵင်းပၢင်လွင်း ၼႆသေတႃႉ  ဝၢႆးၼၼ်ႉ ၼႂ်းလိူၼ် ဢွၵ်ႊထူဝ်ႊပိူဝ်ႊ ၼႆႉမႃး ပၢင်တိုၵ်း ၼႂ်းၵႄႈ သိုၵ်းမၢၼ်ႈလႄႈ ၸုမ်းလုၵ်ႉၽိုၼ်ႉ ပဵၼ်ၶိုၼ်း တၢင်းဝၢၼ်ႈၵေႃမႆႉသၢင်း ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၼႆယဝ်ႉ ။

တႄႇဝၼ်းတီႈ 7/10 /2025 မႃးထိုင်ဝၼ်းမိူဝ်ႈၼႆႉ သိုၵ်းမၢၼ်ႈတင်းပျီႇတူႉၸိတ်ႉပဢူဝ်း လႄႈ ၸုမ်းလုၵ်ႉၽိုၼ်ႉ PDF ပဵၼ်ပၢင်တိုၵ်းၵၼ်ၶိုၼ်း တၢင်းဝၢၼ်ႈၵေႃမႆႉသၢင်းသေ  ႁဵတ်းႁႂ်ႈၵူၼ်းပိုၼ်ႉတီႈဢမ်ႇၸၢင်ႈ ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်း ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉဝႆႉ ဝႃႈၼႆ ။

ၵူၼ်းၸၢႆးပိုၼ်ႉတီႈပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ပၢင်တိုၵ်းၼႆႉတႄႇပဵၼ်ၶိုၼ်းၸဵမ်မိူဝ်ႈဝၼ်းတီႈ 7 ထိုင်မိူဝ်ႈၼႆႉ တိုၵ်ႉလႆႈယိၼ်းသဵင်ၵွင်ႈသဵင်မၢၵ်ႇယူႇ ၊ ၾၢႆႇတင်းသိုၵ်းမၢၼ်ႈ ဢဝ်ဢဵၼ်ႁႅင်းတင်းၼမ်  ထူဝ်းသိုၵ်းၶဝ်ႈၼႂ်းဝၢၼ်ႈ ၵေႃႇမႆႉသၢင်း ၊ ၾၢႆႇၶဝ်(သိုၵ်းမၢၼ်ႈ )ၵေႃႈ မီးၵူၼ်းလူႉတၢႆပႃး ၊ ၾၢႆႇတင်းပွတ်းၼႆႉတႄႉ ၵွၼ်ႇၼႃႈ ပၢင်လိူၵ်ႈတင်ႈၼႆႉ လႅပ်ႈတေၶဵင်ႈၶႅင်ၵၼ်သေ ပၢင်တိုၵ်းလႅပ်ႈတေသိုပ်ႇပဵၼ် ႁၢဝ်ႈႁႅင်းဝႆႉ ၊ ပေႃးၼႆၵူၼ်းပၢႆႈၽေးသိုၵ်းၵေႃႈ ဢမ်ႇၸၢင်ႈပွၵ်ႈႁိူၼ်း လႆႈပၢႆႈဝႆႉ မီး2ပီယဝ်ႉ”– ဝႃႈၼႆ ။

မိူဝ်ႈပီ 2023 လိူၼ်မၢတ်ႉၶျ် ၸုမ်းၽွမ်ႉႁူမ်ႈ သိုၵ်းယၢင်းလႅင် KNDF လႄႈ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်းႁူမ်ႈၵၼ်  ပဵၼ်ပၢင်တိုၵ်းၵၼ် တၢင်းဝၢၼ်ႈ ၵေႃမႆႉသၢင်း၊ ဝၢၼ်ႈၼမ်ႉၼဵင်ႈ ၊  ဝၢၼ်ႈပၢင်ႇပုမ် ၊ လူင်ပႅၼ်ႈ ၼႂ်းၸႄႈဝဵင်းပၢင်လွင်းသေ ႁဵတ်းႁႂ်ႈၵူၼ်း 3 ႁဵင်ပၢႆ ငိူင်ႉပၢႆႈၽေးသိုၵ်းမႃး ၼႆယဝ်ႉ ။

ၵူၼ်းပၢႆႈၽေးသိုၵ်း ႁူဝ်ၵူၼ်း 3 ႁဵင် ဢွၼ်ၵၼ်လႆႈပၢႆႈသွၼ်ႈယူႇဝႆႉတီႈတၢင်းဝၢၼ်ႈ ပၢင်ႇၶုၼ် (ပင်ခွန် ) ၊ မၼ်းထႃး (မန်းထား) လႄႈ ၼႂ်းဝဵင်းပၢင်လွင်း ၊ ပၢႆႈသွၼ်ႈယူႇဝႆႉ ႁိူၼ်းပီႈၼွင်ႉၸမ်ၸႂ်လႄႈ ဢွၼ်ၵၼ်ၶၢတ်ႈႁိူၼ်းၶၢတ်ႈယေး ႁဵတ်းၵၢၼ်ႁႃၸဝ်ႉၵိၼ်ၶမ်ႈယူႇသဝ်းဝႆႉ ဝႃႈၼႆ ။

ၵူၼ်းၸၢႆးၸွႆႈထႅမ် ၵူၼ်းပၢႆႈၽေးသိုၵ်းလၢတ်ႈၽူႈတွႆႇႁွၵ်ႈဝႃႈ -“ၵူၼ်းဝၢၼ်ႈတင်းၵေႃမႆႉသၢင်းၸိူဝ်းၼႆႉပၢႆႈၽေးသိုၵ်း မီး2ပီယဝ်ႉ ၊ ဢမ်ႇလႆႈမိူဝ်းသေပွၵ်ႈ ပေႃးတေၶိုင်ႇမိူဝ်းၵေႃႈ ပၢင်တိုၵ်းပဵၼ်ၶိုၼ်းတိၵ်းတိၵ်း ၊ လႆႈပၢႆႈႁိုင်ယဝ်ႉလႄႈ ဢွၼ်ၵၼ် ယၢပ်ႇတႃႇၶဝ်ႈၼမ်ႉတင်းၵိၼ် လူဝ်ႇတင်းၸွႆႈထႅမ် တႃႇယူတ်းယႃႇတူဝ်ၸိူဝ်းၼႆႉ ၊ လုၵ်ႈဢွၼ်ႇၵေႃႈ ဢမ်ႇလႆႈသွၼ်လိၵ်ႈတႃႇပၢႆးပၺ်ႇၺႃႇမိူဝ်းၼႃႈ”- ဝႃႈၼႆ ။

ဝဵင်းပၢင်လွင်းလႄႈ ဝၢၼ်ႈၵေႃမႆႉသၢင်းၼႆႉ ယၼ်ၵႆၵၼ် မွၵ်ႈ 1 ၸူဝ်ႈမူင်း ယၢမ်းလဵဝ် သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်းပၵ်းတပ်ႉသေ တုင်ႉၼိုင်ႇၵႂႃႇမႃးဝႆႉ – ၵူၼ်းပိုၼ်ႉတီႈလၢတ်ႈ ။

“ ပေႃးPNO  ၶဝ်ၵုမ်းၶိုၼ်းလႆႈယဝ်ႉၵေႃႈ ၶႂ်ႈႁႂ်ႈၶဝ် ၽဵဝ်ႈပၼ် မၢၵ်ႇမႅင်းၼႂ်းပိုၼ်ႉတီႈသေ ဢဝ်ႁူမ်ႇလူမ်ႈပၼ်ၵူၼ်းမိူင်းၼႂ်းပိုၼ်ႉတီႈပႃး ၊ ၵူၼ်းပၢႆႈၽေးသိုၵ်းၵေႃႈ ပၢႆႈႁိုင်ယဝ်ႉၵေႃႈ ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉ ဢွၼ်ၵၼ်ၶႂ်ႈမိူဝ်းၵၼ်ၶိုၼ်း ၊ ၵူၺ်းတလဵဝ်ၼႆႉ ပၢင်တိုၵ်းပဵၼ်ယူႇၸိူင်ႉၼႆႉတႄႉပႆႇမိူဝ်းၼႆႉလီယဝ်ႉ”– ဝႃႈၼႆ ။

ၼႂ်းႁူဝ်ပီၼႆႉ သိုၵ်းမၢၼ်ႈ ထႅမ်ႁႅင်းသိုၵ်း ႁႅင်းၵွင်ႈၵၢင်ႇ ႁူမ်ႈတင်း ပျီႇတူႉၸိတ်ႉပဢူဝ်းသေ ထူဝ်းသိုၵ်းလေႃႇတိုၵ်းၸုမ်းလုၵ်ႉၽိုၼ်ႉႁၢဝ်ႈႁႅင်း ယဝ်ႉယိုတ်းၵုမ်းလႆႈၶိုၼ်း  တၢင်းဝၢၼ်ႈ ၵေႃမႆႉသၢင်း၊ ဝၢၼ်ႈၼမ်ႉၼဵင်ႈ ၊  ဝၢၼ်ႈပၢင်ႇပုမ် ၊ လူင်ပႅၼ်ႈ ၼႂ်းၸႄႈဝဵင်းပၢင်လွင်းၼႆယဝ်ႉ ။