ၼႂ်းဝၼ်းတီႈ 8/10/2025 ယၢမ်းတဵင်ႈၶိုၼ်း သိုၵ်းမၢၼ်ႈပွႆႇမၢၵ်ႇသႂ်ႇ တီႈဝၢၼ်ႈၼမ်ႉမင်း ၼႂ်းၵႄႈ ဝဵင်းၵျွၵ်ႉမႄး တင်း ဝဵင်းမိူင်းငေႃႉ ၸိုင်ႈတႆးပွတ်းႁွင်ႇ၊ မၢၵ်ႇတႅၵ်ႇတိူဝ်ႉၶူဝ်ၼမ်ႉမင်း လူႉၵွႆ ဝႃႈၼႆ။

ဝၢၼ်ႈၼမ်ႉမင်းၼႆႉ မီးၾၢႆႇႁွင်ႇဝဵင်းၵျွၵ်ႉမႄး မွၵ်ႈ 12 လၵ်း မီးၼိူဝ်သဵၼ်ႈတၢင်းၵႂႃႇဝဵင်းမိူင်းငေႃႉ ၼႃႈတီႈသိုၵ်းတဢၢင်း TNLA တူင်ႉၼိုင်ၵုမ်းၵမ်ဝႆႉ။ ၵူၼ်းဝၢၼ်ႈၼမ်ႉမင်း ဢၼ်ပၢႆႈၽေးမႃးယူႇသဝ်းဝႆႉတီႈ 11လၵ်းၼၼ်ႉ သိုၵ်းတဢၢင်း ၸႂ်ႉၶၢႆႉၵႂႃႇယူႇတၢင်ႇတီႈလႄႈ ႁဵတ်းႁႂ်ႈၵူၼ်းဝၢၼ်ႈ ယၢပ်ႇၽိုတ်ႇၵိၼ်းၸႂ်၊ မၢၵ်ႇၶဝ်ႈတဝ်ႈၼမ်ႉ ၸိူဝ်းၽုၵ်ႇဝႆႉၼၼ်ႉၵေႃႈ ပႆႇတၼ်းလႆႈဢဝ် – ၵူၼ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။

ၶူဝ်ၼမ်ႉမင်း ဢၼ်ၺႃးမၢၵ်ႇသိုၵ်းမၢၼ်ႈလူႉၵွႆၵႂႃႇၼၼ်ႉ ၵေႃႇသၢင်ႈမႃး ၸဵမ်မိူဝ်ႈပီ 1915 မီးဢႃယု 100 ပီပၢႆယဝ်ႉသေ ပဵၼ်ၶူဝ်လမ်ႇလွင်ႈ ဢၼ်မီးၼႂ်းၵႄႈ ဝဵင်းၵျွၵ်ႉမႄး တင်း ဝဵင်းမိူင်းငေႃႉ။

ၼႂ်းဝၼ်းပုတ်ႉၼၼ်ႉၵူၺ်းၼင်ႇၵဝ်ႇ ယၢမ်းၵၢင်ဝၼ်း ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇသႂ်ႇၼႂ်းဝဵင်းမိူင်းငေႃႉ ၵူၼ်းမိူင်း တၢႆ 2ၵေႃႉ ႁိူၼ်းယေးလူႉၵွႆတင်းၼမ်၊ ယၢမ်းလဵဝ် ၵူၼ်းပိုၼ်ႉတီႈ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈဝႆႉ။