ၵူၼ်းမိူင်းၶႄႇ ဢၼ်ၵႂႃႇၶိုၼ်ႈလွႆသုင်လူင် ဢႄႊဝရႅတ်ႊ ႁူဝ်ၵူၼ်း 350 ပၢႆ ၺႃးၽေးလူမ်းလႅင်ႉသေ ၶမ်ဝႆႉၼိူဝ်လွႆလႄႈ ၸဝ်ႈၼႃႈတီႈၼႂ်းပိုၼ်ႉတီႈ လႆႈသူင်ႇၵူၼ်းၵႂႃႇၸွႆႈထႅမ်ဝႆႉၼႆ သိုဝ်ႇၶၢဝ်ႇၼႂ်းမိူင်းၶႄႇ ပိုၼ်ၽၢဝ်ႇဝႆႉၼင်ႇၼႆ။

ဝၼ်းတီႈ 1 ထိုင် 8 ဢွၵ်ႊထူဝ်ႊပိူဝ်ႊၼႆႉ ပဵၼ်ၽွင်းယၢမ်း ဝၼ်းလိုဝ်ႈတွၼ်ႈတႃႇၵူၼ်းမိူင်းၶႄႇ။ ပဵၼ်ဝၼ်းၸိူဝ်ႉၸၢတ်ႈမိူင်းၶႄႇလႄႈ ၵူၼ်းႁဵတ်းၵၢၼ်လူင်ပွင်ၸိုင်ႈလႆႈဝၼ်းလိုဝ်ႈ 8 ဝၼ်းသွၼ်ႉၵၼ်။

ၽွင်းၼႆႉ ၵူၼ်းမိူင်းၵမ်ႈၼမ် ဢွၵ်ႇလႄႇတွင်ႈတဵဝ်းၵၼ်၊ မၢင်ၸိူဝ်း ပႆၶိုၼ်ႈလွႆလူင် ဢႄႊဝရႅတ်ႊ၊ ၸိူဝ်းလုၵ်ႉတၢင်းပွတ်းဢွၵ်ႇ ၶိုၼ်ႈလွႆၵႂႃႇၼၼ်ႉ ၺႃးလူမ်းလႅင်ႉ ၼမ်ႉၼၢႆးတူၵ်းၼႃႁႅင်းလႄႈ ဢမ်ႇၸၢင်ႈသိုပ်ႇၵႂႃႇတၢင်းလႂ် လႆႈၶမ်ၵိုတ်းဝႆႉၼိူဝ်လွႆၼၼ်ႉ ဝႃႈၼႆ။

လိူၼ်ထူၼ်ႈသိပ်း October ၵူႈပီၼႆႉ လွႆလူင် ဢႄႊဝရႅတ်ႊ လႄႈ ႁိမ်းႁွမ်းလွႆ ၾိင်ႈၾႃႉသႃႇယႃႇၵတ်းယဵၼ်လႄႈ ၵူၼ်းၶိုၼ်ႈလွႆၵေႃႈ မီးၼမ်ၵူႈပီ။ ၵူၺ်းၵႃႈ မိူဝ်ႈဝၼ်းသုၵ်းဝူင်ႈပူၼ်ႉမႃးၼႆႉ လူမ်းထွင်းႁႅင်း၊ မူၺ်ၶၢပ်ႇၵေႃႈ ၵိုင်ႉၵၢင်ႉတူၵ်းၼမ်မႃးႁႅင်း။ ႁဵတ်းႁႂ်ႈၵူၼ်းၵႂႃႇၶိုၼ်ႈလွႆ ႁိမ်းၸမ်ႁဵင်ၵေႃႉၼၼ်ႉ ထူပ်းလွင်ႈယၢပ်ႇၽိုတ်ႇ။

တေႃႇထိုင်ဝၼ်းတီႈ 8 ၼႆႉၸွႆႈၵူၼ်းၶိုၼ်ႈလွႆဢၼ်ထူပ်းၽေးလူမ်းလႅင်ႉမူၺ်ၶၢပ်ႇၼၼ်ႉလႆႈ မွၵ်ႈ 600 ၵေႃႉယဝ်ႉ။ ဢၼ်တိုၵ်ႉၸွႆႈယူႇၵေႃႈတိုၵ်ႉမီးယူႇတင်းၼမ်ၼႆ ၽူႈဢွၼ်ၶိုၼ်ႈလွႆလႄႈ ၵူၼ်းၼႄတၢင်းၼႂ်းပိုၼ်ႉတီႈၶဝ် တွပ်ႇဝႆႉတီႈသိုဝ်ႇၶၢဝ်ႇ ၼင်ႇၼႆ။

လွႆလူင် ဢႄႊဝရႅတ်ႊၼႆႉ ပဵၼ်လွႆသုင်သုတ်းဢၼ်ၼိုင်ႈၼႂ်းလုမ်ႈၾႃႉ မီး 8850 မီႊတႃႊ။ မီးတီႈလႅၼ်လိၼ်မိူင်းၶႄႇလႄႈ ၼီႊပေႃႊလ်။ ပဵၼ်လွႆဢၼ်မီးၼမ်ႉၶႅင်လႄႈမူၺ်ၶၢပ်ႇၼႃ။ ပေႃးဝၼ်းလိုဝ်ႈၵၢၼ်ၼႆ ၵူၼ်းသူင်ၶိုၼ်ႈလွႆၶဝ် ၵႂႃႇပႆၶိုၼ်ႈလွႆ Hiking ။ ၽူႈမၢၵ်ႈၵူၼ်းမီးၼႂ်းမိူင်းမၢၼ်ႈၵေႃႈၵႆႉၵႂႃႇၶိုၼ်ႈ။