ဝၢႆးလင် သိုၵ်းမၢၼ်ႈ ယိုတ်းၵုမ်း  လႆႈၶိုၼ်းၸႄႈဝဵင်းၵျွၵ်ႉမႄးတီႈ သိုၵ်းတဢၢင်းယဝ်ႉ ဢမ်ႇႁိုင် သိုၵ်းမၢၼ်ႈ ၵိုင်ႉၵၢင်ႉၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၵၢင်ဝဵင်းၼမ်ႉတူႈ ၸိုင်ႈတႆးပွတ်းႁွင်ႇ ႁဵတ်းႁႂ်ႈၵူၼ်းမိူင်း မႆႈၸႂ်လွင်ႈႁူမ်ႇလူမ်ႈ ငိူင်ႉပၢႆႈ ဝႃႈၼႆ ။

တႄႇဝၼ်းတီႈ 7/10/2025 ၼႆႉမႃးၵူၼ်းမိူင်းဝဵင်းၼမ်ႉတူႈ 200 ပၢႆ   မႆႈၸႂ်လွင်ႈႁူမ်ႇလူမ်ႈ ဢွၼ်ၵၼ်ငိူင်ႉပၢႆႈ ၵူဝ်သိုၵ်းမၢၼ်ႈမႃးပွႆႇမၢၵ်ႇထႅင်ႈ။  ယွၼ်ႉပိူဝ်ႈၼႂ်းၶၢဝ်းတၢင်း ဝူင်ႈလဵဝ် သိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇ 3 ပွၵ်ႈ ႁဵတ်းႁႂ်ႈ ၵူၼ်းမိူင်းလူႉတၢႆ ႁိူၼ်းယေး လူႉၵွႆလူႉသုမ်းတင်းၼမ် ။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈၼႆႉၵေႃႈၵူၼ်းဝၢၼ်ႈပၢႆႈမႃးလႃႈသဵဝ်ႈၼႆႉ 10 ပၢႆ ၊ ၵူၼ်းၼႂ်းဝဵင်းၼမ်ႉတူႈလႄႈ ဝၢၼ်ႈၸိူဝ်းဢၼ်ၸမ်ဝဵင်း ပၢႆႈတၢင်းလႃႈသဵဝ်ႈၵမ်ႈၼမ် ၊ မၢင်ၸိူဝ်းၵေႃႈ ပၢႆႈတီႈႁိူၼ်းပီႈႁိူၼ်းၼွင်ႉ တေမီးႁူဝ်ၵူၼ်း 200 ပၢႆၼႆႉ  ယွၼ်ႉၵူဝ်ႇသိုၵ်းမၢၼ်ႈမႃး ပွႆႇမၢၵ်ႇလႄႈဢွၼ်ၵၼ်ပၢႆႈဝႆႉထႃႈ ၊ ပေႃးပဵၼ်ပၢင်တိုၵ်း ၵူဝ်သဵၼ်ႈတၢင်းပိၵ်ႉဢေႃႈ”- ဝႃႈၼႆ ။

  ၵူၼ်းၼႂ်းဝဵင်းၼမ်ႉတူႈ ဢၼ်ငိူင်ႉပၢႆႈၽေးသိုၵ်းထႃႈၼႆႉပဵၼ်ၵူၼ်း ၼႂ်းဢိူင်ႇသၢႆးၶၢဝ် ၊ ဢိူင်ႇၶူဝ်မူဝ်ႇ ၸိူဝ်းၼႆႉ   ။  

ၵူဝ်ႇသိုၵ်းမၢၼ်ႈမႃးပွႆႇမၢၵ်ႇယူႇသေတႃႉ ၵူၼ်းမိူင်းၵမ်ႈၼမ် ယွၼ်ႉပႆႇလႆႈဢဝ်မၢၵ်ႇၶဝ်ႈတဝ်ႈၼမ်ႉ ၼႂ်းသူၼ်ၼႂ်းႁႆႈ လႄႈ ဢမ်ႇမီးငိုၼ်းတႃႇတေငိူင်ႉပၢႆႈၽေးသိုၵ်းၵေႃႈ မီးတင်းၼမ်ၼႆ – ၵူၼ်းပိုၼ်ႉတီႈလၢတ်ႈ ။

ၶၢဝ်းၼႆႉ ယွၼ်ႉပႆႇလႆႈဢဝ်မၢၵ်ႇၶဝ်ႈတဝ်ႈၼမ်ႉလႄႈ ဢမ်ႇၶႂ်ႈပၢႆႈသေတႃႉ ဢမ်ႇၸၢင်ႈႁဵတ်းႁိုဝ်။ ၾၢႆႇၼိုင်ႈၵေႃႈ မႆႈၸႂ်လွင်ႈႁူမ်ႇလူမ်ႈ ၾၢႆႇၼိုင်ႈၵေႃႈမႆႈၸႂ်တႃႇလဵင်ႉလူၼႃႈႁိူၼ်း မၢင်ၵေႃႉလႆႈၾၢင်ႉယူႇသဝ်း သူပ်းၵိၼ်မၢၵ်ႇ ႁူထွမ်ႇၵၢင်ႇသေယူႇသဝ်း။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵမ်ႈၼမ်သမ်ႉဢဝ်ငိုၼ်းၶီႈငိုၼ်းတူဝ်းသေၵႂႃႇသိုဝ်ႉၸိူဝ်ႉၽၼ်းသႂ်ႇဝႆႉၼႂ်းသူၼ်ၼႂ်းႁႆႈ။    ယၢမ်းလဵဝ်သမ်ႉၸမ်တေလႆႈဢဝ်မၢၵ်ႇမၼ်းယဝ်ႉ။ ပေႃးဢမ်ႇတၼ်းဢဝ်မၢၵ်ႇဢဝ်ႁူဝ် သမ်ႉတေသုမ်းမူတ်း။ ၵူဝ်ပဵၼ်ၼီႈပဵၼ်ၶွတ်ႇလႄႈ ဢမ်ႇၸၢင်ႈပၢႆႈ။ ၵမ်ႈၽွင်ႈ ၵေႃႈဢမ်ႇမီးငိုၼ်းတွင်းတႃႇပၢႆႈ ၊ တေဢမ်ႇပၢႆႈၵေႃႈသမ်ႉၵူဝ်တၢႆ ၊ တၢင်းၵူဝ်တၢင်းၾၢင်ႉသေ လႆႈၵႂႃႇႁဵတ်းၵၢၼ်ဝႆႉယူႇၸိူင်ႉၼၼ်”- ဝႃႈၼႆ ။

ယၢမ်းလဵဝ် တီႈၼႂ်းဝဵင်းၼမ်ႉတူႈလႄႈ ႁိမ်းႁွမ်းဝဵင်း လႅင်းၾူင်း လႅင်းဢိၼ်ႊတႃႊၼႅတ်ႊ ၶၢတ်ႇဝႆႉ။    ႁၢၼ်ႉၸႂ်ႉ Starlink ၵေႃႈဢမ်ႇႁတ်းပွႆႇဢိၼ်ႊထိူဝ်ႊၼႅတ်ႊ ယွၼ်ႉၵူဝ်ၵူၼ်းမႃးၶွၼ်ႈတုမ်ႇၵၼ်- ၵူဝ်ဢမ်ႇမီးလွင်ႈႁူမ်ႇလူမ်ႈ ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇတႃႇၵပ်းသိုပ်ႇၵပ်းသၢၼ်ၵၼ်။  

မိူဝ်ႈပူၼ်ႉမႃး ဝၼ်းတီႈ 2/10/2025  ႁိူဝ်းမိၼ်တိုၵ်းၶွင်သိုၵ်းမၢၼ်ႈယိုတ်းမိူင်း ၵိုင်ႉၵၢင်ႉမႃးပွႆႇမၢၵ်ႇသႂ်ႇ တီႈပွၵ်ႉ 8 ဝဵင်းၼမ်ႉတူႈ ဢွင်ႈတီႈမီးၵူၼ်းမိူင်းယူႇသဝ်းဝႆႉၼၼ်ႉလႄႈ ၵူၼ်းမိူင်းလူႉတၢႆၵႂႃႇ 4 ၵေႃႉ မၢတ်ႇၸဵပ်း 6 ၵေႃႉ။

မိူဝ်ႈဝၼ်းတီႈ 6/102025 သိုၵ်းမၢၼ်ႈယိုတ်းမိူင်း ပွႆႇမၢၵ်ႇသႂ်ႇထႅင်ႈ ၼႂ်းၵၢင်ဝဵင်း ႁိူၼ်းယေးရူတ်ႉၵႃးၶွင် ၵူၼ်းမိူင်းလူႉၵွႆၵႂႃႇႁၢဝ်ႈႁႅင်း သေ ၼႂ်းဝၼ်းတီႈ 7/10/2025 ပွႆႇမၢၵ်ႇထႅင်ႈ မၢၵ်ႇတူၵ်းတႅၵ်ႇသႂ်ႇ ဝတ်ႉပူၵ်ႉပႃႇယူင်ႇ ႁူင်းၵေႃႇၵၢႆႇၸိူဝ်းမီးၼႂ်းဝၢင်းဝတ်ႉၼၼ်ႉ လူႉၵွႆၵႂႃႇတင်းသဵင်ႈ ။

ဝဵင်းၼမ်ႉတူႈၼႆႉ ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 ပွၵ်ႈၵမ်း 2 မႃး သိုၵ်းတဢၢင်း (TNLA) ၵုမ်းၵမ်ဝႆႉသေ ပၼ်ႇၵၢၼ်ၽွင်းငမ်းဝႆႉ  ။  

သိုၵ်းမၢၼ်ႈပိုၼ်ၽၢဝ်ႇဝႆႉငဝ်းလၢႆးၶိုၵ်ႉၶၵ်ႉ 63 ၸႄႈဝဵင်းသေ တေထႅမ်ႁႅင်းသိုၵ်း ၽႅၼ်ယၼ်ႇသိုၵ်းပိုတ်းယိုဝ်းၵႂႃႇ ၼႆၵေႃႈလႆႈမႃးၶၢဝ်းတၢင်း 2-3 လိူၼ်ယဝ်ႉ။ ယၢမ်းလဵဝ်ႈၸမ်ပၢင်လိူၵ်ႈတင်ႈမႃးၵိုတ်းယူႇၶၢဝ်းတၢင်းမွၵ်ႈ 2 လိူၼ်။ သိုၵ်းမၢၼ်ႈထႅမ်ႁႅင်းသိုၵ်းတၢင်းလိၼ် တၢင်းၵၢင်ႁၢဝ်သေပိုတ်းယိုဝ်းတိုၵ်းတေႃး ဝဵင်းၸိူဝ်းဢၼ်တူၵ်းဝႆႉၼႂ်းမိုဝ်းၸုမ်းလုၵ်ႉၽိုၼ်ႉၶဝ်ဝႆႉဢမ်ႇထၢတ်ႇဢမ်ႇဝၢႆး ၸဵမ်ၼႂ်းမိူင်းတႆးလႄႈ မိူင်းမၢၼ်ႈတူင်ႈပဵင်း။