ပလိၵ်ႈသိုၵ်းမၢၼ်ႈတင်ႈၵဵတ်ႉလၢၼ်ႇ ၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်းၼိူဝ်သဵၼ်ႈတၢင်းတူၼ်ႈတီး – ၵေးသီး ႁဵတ်းႁႂ်ႈၵူၼ်းၵႂႃႇမႃးယၢပ်ႇၽိုတ်ႇဝႃႈၼႆ ။

ဝၢႆးလင်သိုၵ်းမၢၼ်ႈပိုၼ်ၽၢဝ်ႇတီႉၺွပ်းရူတ်ႉၵႃး ဢမ်ႇမီးဝတ်းဝႂ်လၢႆႊသိၼ်ႊၼၼ်ႉမႃး ပလိၵ်ႈသိုၵ်းမၢၼ်ႈတင်ႈၵဵတ်ႉလၢၼ်ႇပႂ်ႉၵူတ်ႇထတ်း ၵူၼ်းၵႂႃႇမႃးႁၢဝ်ႈႁႅင်းယဝ်ႉ လွၵ်ႇငိုတ်ႈယွၼ်းငိုၼ်းပႃး လႄႈႁဵတ်းႁႂ်ႈၵူၼ်းၵႂႃႇမႃးဢမ်ႇမီးလွင်ႈႁူမ်ႇလူမ်ႈၼႆယဝ်ႉ ။  

ၸွမ်းတၢင်း ၵဵတ်ႉလၢၼ်ႇသိုၵ်းမၢၼ်ႈၵူတ်ႇထတ်း ဝႂ်ႁၢပ်ႉႁွင်းဢွၵ်ႇတၢင်း ၊ မၢႆၾၢင်ႇသေဢမ်ႇၵႃး ၵူတ်ႇထတ်းၶိူဝ်းၶွင်ၵုၼ်ႇၵိၼ်ယဵမ်ႉ ဢၼ်လုၵ်ႉတင်းမိူင်းၶႄႇ- မိူင်းထႆး ၸိူဝ်းၼႆႉၼႆယဝ်ႉ ။

ၼၢင်းယိင်းဢႃယု30 ၵူၼ်းပိုၼ်ႉတီႈၵေးသီးလၢတ်ႈၽူႈတွႆႇႁွၵ်ႈဝႃႈ -“လုၵ်ႉတီႈတူၼ်ႈတီးၵႂႃႇၵေးသီးၼႆႉ ပေႃးမိူဝ်းတၢင်းလၢႆးၶႃႈၼႆႉၵဵတ်ႉလၢၼ်ႇၼႆႉမီးၼမ်ၼႃႇ မီး10 ပၢႆ ၊ ၵုမ်ႇလႆႈၵိုတ်းယူႇတိၵ်းတိၵ်း ၊ တၢင်းၼၼ်ႉ လႅင်းၾူင်းၵေႃႈဢမ်ႇလႆႈ ၊ ပေႃးပဵၼ်ၵူၼ်းၼုမ်ႇၶႅၼ်းထၢမ်ႇၸေး ၊ ၸႅတ်ႈၶူဝ်းၵုၼ်ႇၼႂ်းၵႃး ဢၼ်လုၵ်ႉတၢင်းမိူင်းၶႄ ၊ မိူင်းထႆးၸိူဝ်းပႃး ၶဝ်ဢမ်ႇပၼ်တၢင်ႇ ပေႃးႁၼ်ၶဝ်ၸႂ်ႉလူင်းၵႃးၵမ်းလဵဝ်ယဝ်ႉ ”- ဝႃႈၼႆ ။ 

မိူၼ်ၼႆ တီႈတၢင်းမိူင်းၼွင်ၵႂႃႇၵေးသီးလႄႈ တီႈႁိမ်းတူၼ်ႈမႆႉၺွင်ႇလူင် တၢင်းၶဝ်ႈဝဵင်းၵေးသီး ၵဵတ်ႉလၢၼ်ႇသိုၵ်းမၢၼ်ႈ ၵူတ်ႇထတ်းၵူၼ်းႁေႃႈရူတ်ႉၵႃး ၸဵမ်ဝႂ်ၵႃး (လၢႆႊသိၼ်ႊ)၊ ဝႂ်ႁေႃႈရူတ်ႉ၊ မၢႆၾၢင် ၸိူဝ်းၼႆႉၵူၺ်းဢမ်ႇၵႃး ပၢႆတဵၵ်းယွၼ်းငိုၼ်းၵူၼ်းမိူင်းပႃးထႅင်ႈ။

လိူဝ်ၼၼ်ႉ တႃႇတေႃႉၶူဝ်းလုၵ်ႉၵေးသီး ၵႂႃႇတၢင်းသဵၼ်ႈဝဵင်းမိူင်းယႆၼႆႉ သိုၵ်းမၢၼ်ႈႁႄႉႁၢမ်ႈ ဢမ်ႇပၼ်တေႃႉၶူဝ်းၵုၼ်ႇၶွင်ၵိၼ်ယႅမ်ႉလႄႈ ၶိူင်ႈၸၢၵ်ႈ ၸိူဝ်းၼႆႉ။ သင်ထူပ်းႁၼ်မႅၼ်ႈၸိုင် မီးလွင်ႈလွၵ်ႇငိုတ်ႈသေ မၢင်ပွၵ်ႈၵေႃႈ ယွၼ်းငိုၼ်းၼႆယဝ်ႉ ။

ယွၼ်ႉၵဵတ်ႉလၢၼ်ႇလိူင်ႇၼမ် သိုၵ်းမၢၼ်ႈၵူတ်ႇထတ်းယွၼ်းငိုၼ်းလႄႈ ႁဵတ်းႁႂ်ႈၵႃႈၵႃး ၶိုၼ်ႈသူင်ႇႁႅင်း ။ ယၢမ်းလဵဝ် ၵႃႈၵႃး တူၼ်ႈတီး-ၵေးသီး လႆႈပၼ် 8 မိုၼ်ႇထိုင် 1သႅၼ်ပျႃးၼႆယဝ်ႉ ။

ၸဝ်ႈၵႃးၵႂႃႇမႃးလၢတ်ႈၽူႈတွႆႇႁွၵ်ႈဝႃႈ -“ပီၵၢႆၽွင်းၵႃႈၼမ်ႉမၼ်းၶိုၼ်ႈတႄႉယွၼ်း2သႅၼ် ၊ ပီၼႆႉတႄႉ 1သႅၼ်ၵူၺ်းယဝ်ႉ ၊ပေႃးဢမ်ႇယွၼ်းမွၵ်ႈၼႆႉၵေႃႈ တႃႇၸဝ်ႈၵႃးဢမ်ႇၵိုတ်းသင် ၊ ၵဵတ်ႉလၢၼ်ႇၵေႃႈၼမ် သမ်ႉလႆႈပၼ်ငိုၼ်းၵူႈတီႈ ၼိုင်ႈတီႈၼႆႉ လႆႈပၼ် 2-3 ႁဵင်ၵႂႃႇၸိူင်ႉၼႆ ၊ ၶူဝ်းၵုၼ်ႇသမ်ႉဢမ်ႇလႆႈတၢင်ႇ ၵူတ်ႇထတ်းပေႃးႁၼ်မႅၼ်ႈၶူဝ်းတၢင်းမိူင်းထႆး-မိူင်းၶႄႇ လႆႈသဵင်ႈငိုၼ်းၼမ် ၊ မၢင်ၸိူဝ်းၶဝ်သိမ်းပႅတ်ႈၸိူဝ်းၼႆႉ”- ဝႃႈၼႆ ။ 

လိူဝ်ၼၼ်ႉ ၵဵတ်ႉလၢၼ်ႇ တၢင်းမိူင်းၵၢဝ် ၊ မိူင်းၼၢင်းၼႆႉပေႃးႁူဝ်ၶမ်ႈ 6 မူင်း သိုၵ်းမၢၼ်ႈဢမ်ႇပၼ်ၸဝ်ႈၵႃးလတ်းၶၢမ်ႇၵႂႃႇမႃးယဝ်ႉၼႆ ၵူၼ်းပိုၼ်ႉတီႈလၢတ်ႈၼင်ႇၼႆ ။

ဝၢႆးလင် ၽႅၼ်ယၼ်ႇသိုၵ်း 1027 ယဝ်ႉသေ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵုမ်းၵမ်လႆႈၸႄႈဝဵင်း ၼႂ်းမိူင်းတႆးပွတ်းႁွင်ႇ လၢႆလၢႆတီႈယဝ်ႉၼၼ်ႉ ၾၢႆႇသိုၵ်းမၢၼ်ႈတင်း ပလိၵ်ႈ ၵႆႉႁူမ်ႈ ၵၼ်သေ တင်ႈလၢၼ်ႇၵူတ်ႇထတ်းၵူၼ်း၊ ၶူဝ်းၶွင်လႄႈ ယွၼ်းၵိၼ်ငိုၼ်း တီႈၸဝ်ႈရူတ်ႉၸဝ်ႈၵႃး ၸိူဝ်းၵႂႃႇမႃး မိူင်းတႆးပွတ်းႁွင်ႇ ပွတ်းၸၢၼ်း ၸိူဝ်းၼႆႉၵေႃႈ လိူင်ႇၼမ်မႃး ၼႆယဝ်ႉ။