မိူဝ်ႈၼႆႉ 4/10/2025 ယၢမ်းၵၢင်ၼႂ်ႁိမ်း 8 မူင်း ႁိူဝ်းမိၼ် သိုၵ်းမၢၼ်ႈ မိၼ်ဝၢႆႈ ပွႆႇမၢၵ်ႇသႂ်ႇ ၼႂ်းၸႄႈဝဵင်းသီႇပေႃႉ မၢၵ်ႇလူင်တူၵ်းသႂ်ႇ တၢင်းပွတ်းဝၢၼ်ႈဢုမ်ႇမူႉ တင်း တၢင်းၵႂႃႇၼမ်ႉတူၵ်းႁူးၼွႆႉ ၸိူဝ်းၼႆႉထႅင်ႈ။

ၵူၼ်းသီႇပေႃႉ ၵေႃႉၼိုင်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ – “သိုၵ်းမၢၼ်ႈမႃးပွႆႇမၢၵ်ႇသႂ်ႇ ႁိမ်းဢုမ်ႇမူႉလုၵ်ႈၼိုင်ႈ တၢင်းပွတ်းဝၢၼ်ႈၵေႃႇတၢၼ်ႇ တၢင်းၶိုၼ်ႈၵႂႃႇမိူဝ်း ၼမ်ႉႁူးၼွႆႉ ၼၼ်ႉလုၵ်ႈၼိုင်ႈဢေႃႈ။ လွင်ႈတိူဝ်ႉၺႃး ႁိူၼ်းယေး ၵူၼ်းမိူင်းတေႉ ပႆႇလႆႈငိၼ်းၶႃႈ” – ဝႃႈၼႆ။

ယွၼ်ႉသိုၵ်းမၢၼ်ႈသူင်ႇႁိူဝ်းမိၼ် ပွႆႇမၢၵ်ႇသႂ်ႇၼႂ်းဝၢၼ်ႈၼႂ်းဝဵင်း ထပ်းၵၼ်ၶိူဝ်းယႂ်းမႃး လႄႈ ၵူၼ်းမိူင်း သီႇပေႃႉ ပၢႆႈဢွၵ်ႇဝဵင်း ၵႂႃႇသွၼ်ႉယူႇ ႁိမ်းႁွမ်းဝၢၼ်ႈ ပၢင်ႇၸဝ်ႈမိူင်း ဝဵင်းၵဝ်ႇ၊ သူပ်းလင်း၊ ပၢင်ႇသဝ်ႈ၊ ၵုင်းသႃႇ၊ ပၢင်ၼိဝ်ႉ ၸိူဝ်းၼႆႉ။

ၵူၼ်းမိူင်းသီႇပေႃႉၼႆႉ မိူဝ်ႈပီၵၢႆႈၵေႃႈလႆႈပၢႆႈၽေးသိုၵ်း တၢင်းပီ၊ တင်ႈတႄႇသိုၵ်းလွႆၶဝ်ႈၵုမ်းဝဵင်းမႃး ၵႂႃႇမႃးႁႃ ၵိၼ်ယၢပ်ႇ ဢမ်ႇမီးငိုၼ်းလႄႈ ဢမ်ႇၸၢင်ႈပၢႆႈၵႂႃႇၵႆ ၸိူဝ်းၶဝ်ႈမူၵ်းယူႇၸွမ်း ပိၵ်ႇထိူၼ်ႇႁၢင်ၶိူဝ်းၸိူဝ်းၼႆႉၵေႃႈမီးၼမ်။

ၼႂ်းလုၵ်ႈလိူၼ်ဢွၵ်ႊထူဝ်ႊပိူဝ်ႊ (လိူၼ် 10 ၵြႃး) ၶၢဝ်းတၢင်း 3-4 ဝၼ်း ၼႆႉၵူၺ်း သိုၵ်းမၢၼ်ႈပွႆႇမၢၵ်ႇသႂ်ႇ ၼႂ်းဝဵင်းသီႇပေႃႉ ဢမ်ႇယွမ်း 4 ပွၵ်ႈ။ မိူဝ်ႈဝႃး ဝၼ်းတီႈ 3/10/2025 ၼႆႉၵူၺ်း သိုၵ်းမၢၼ်ႈ ပွႆႇမၢၵ်ႇလူင်သႂ်ႇၵၢင်ဝဵင်း ပွၵ်ႉၸၢမ်ၽိူၵ်ႇ တိူဝ်ႉသႂ်ႇ ႁူင်းလိုဝ်ႈသဝ်းလင်ၼိုင်ႈ လႆႈလူႉၵွႆ။